الاثنين، أبريل 21، 2008

أستودعكم الله

أنا خلاص مسافر بكره يوم الإثنين 21/4/2008 على طائرة اسكندرية الرياض التي تغادر في الساعة 4.45 م
أستودعكم الله جميعاً و أدعو لكم بكل خير
عندي شعور بالرهبة شئ غريب ان الواحد يلاقي نفسه في بلد تانية وسط ناس غريبة
أكيد حتكون تجربة مميزة و ان شاء الله مصمم انجح فيها خصوصاً بعد ما فشلت في أخد أجازة بدون مرتب
الأجازة كانت ماشية زي الفل و اتمضت من رئيس القطاع و 3 مديرين بدرجة رئيس قطاعات و كانت فاضل لها امضاء رئيس مجلس الإدارة بس
لكن اللائحة تغيرت فجأة بقرار من وزير الكهرباء و تم تعميمه على كل شركات الكهرباء في مصر
و مضمون التعديل الجديد بيقول ان لابد من مرور 4 سنين على التعيين قبل السماح بأجازة بدون مرتب
طيب أنا كان فات عليا سنتين بس و معنديش استعداد أنتظر كمان سنتين لو سافرت و أنا فوق الـ 30 حأبقى سافرت متأخر قوي
فقررت استقيل لكن رئيس مجلس الإدارة واعي قوي عندنا و مش بيقبل استقالات عموماً أنا قدمتها لو قبلوها خير و بركة
ما قبلوهاش أديني انقطعت عن العمل و يفصلوني
دعواتكم ليا ربنا يوفقني في شغلي في الغربة و اول ما أضبط أموري هناك حأرجع أدون تاني من هناك
سلامي للجميع :)
و السلام عليكم و رحمة الله و بركاته

الاثنين، أبريل 14، 2008

ندوة بجريدة الدستور عن الفيس بوك و السياسة

يوم السبت اللي فات رحت القاهرة علشان استلم جواز سفري بعد ما حصلت على التأشيرة و خلاص مسافر يوم الإثنين الجاي
بعد ما خلصت موضوعي قلت أقابل المدونين بقى
قابلت بت خيخة و ابن حجر العسقلاني و أحمد الصباغ و عرفت منهم ان في دعوة لمجموعة من المدونين لجريدة الدستور لمناقشة موضوع عن المدونات
رحنا و اتقابلنا هناك مع نوره الخشن و مدونة كمان مش فاكر اسمها بس هي اللي كانت جايبانا كلنا اصلاً
وصلنا الدستور الساعة 5.15م


صراحة كنت فرحان قوي و مش متخيل اني حأدخل الدستور لأني بأحب الجرنان ده قوي و بأعتبره هو أجرأ جرنان في مصر و هو اللي شجع بقية جرايد المعارضة انها تمشي في سكة المعارضة الصريحة مش اللي من تحت لتحت
و باشتريه كل يوم و بأقرأه كله تقريباً
المهم الندوة كان بيديرها الصحفي / محمد الدسوقي رشدي


بس طلع شاب صغير و أعتقد أصغر مني كمان أنا كنت متخيله أكبر من كده و كان فيه 2 صحفيين كمان و مصور ده غير بقى المفاجأة

الندوة كانت عن الـ فيس بوك facebook و تأثيره السياسي و علاقته بإضراب 6 ابريل

يعني مش عن التدوين

طب دا أنا على قد حالي في الفيس بوك ده خالص و مجرد مستخدم عادي و ما سبرتش أغواره و ما اعتقدش إني حأسبرها لأن المدونات واكلة أغلبية وقتي على النت فمنين اجيب وقت للفيس بوك

و كان عدد الحاضرين حوالي 20 واحد منهم نشطاء على الفيس بوك و منهم مدونين و منهم ناس في إدارة المواقع الإلكترونية و بدا النقاش بإن كل واحد يتكلم لمدة 10 دقائق عن نشاطه على الفيس بوك و رأيه في تأثيره السياسي و هل يغني عن العمل في الشارع و لماذا يعلو صوت المصريين على النت بينما لا تسمع لأغلبهم صوتاً في المظاهرات مثلاً

و بدأ النقاش من عند الأستاذ شمعي أسعد على يمين محمد الدسوقي

و ذكر وجهة نظره ثم الشاب الناظر لأسفل في الصورة و قد كان مثاراً لجدال في الجلسة لأنه اعلن أنه مؤسس جروب بأحب الحزب الوطني على الفيس بوك و كاد الحوار يتحول لهجوم على الحزب الوطني لولا دخول رئيس التحرير

ابراهيم عيسى و الذي أعجب بمعظم كتاباته و ان كنت أختلف معه احياناً و لكنه يقول الحق من وجهة نظره و لا يخشى فيه لومة لائم

قعد يسمع و بان عليه تأثير الكلام بتاع حب الحزب الوطني

ههههههههههههههههههه

هيمان في الملكوت

بس شوية و قام استأذن ربنا رحمه لأن بعد كده كان فيه مصيبة

يعني انا ممكن افهم الشخص اللي بيحب الحزب الوطني ده لأنه لسه شاب متخرج من كلية اقتصاد و علوم سياسية و عرف يشتغل أول ما إتخرج في وزارة العدل و مقدم على شغل في وزارة الخارجية

حيكره الحزب الوطني ليه ؟

انما اللي فقع مرارتنا كلنا هو الشخص ده

اللي عامل جروب على الفيس بوك و بيقول فيها انه بيحب جمال مبارك

مين

جمال مبارك

لاحول و لا قوة الا بالله

لا و الأنقح انه مش عضو في الحزب الوطني بل و محامي عادي طب بتحبه ليه؟

يقولك بأحبه و خلاص و شايف انه اصلح واحد يمسك البلد

صراحة في خلال الربع ساعة بتاعته كانت الندوة كلها دمها بيغلي و بعد كده بيستغرب انه بيتشتم على الفيس بوك

طبعاً أنا ضد الشتيمة بس رأيه مستفز جداً

و اتكلم واحد من نشطاء الإخوان المسلمين على الفيس بوك

هو اللي في الصورة ده و هو و زميله اللي قبله عاملين جروب لطيف اسمه الحملة القومية للتطعيم ضد السلبية و طبعاً اتهاجم علشان موقف الإخوان المسلمين من الإضراب الأخير

و بعدها كانت مفاجأة حلوة انه حضر معانا واحد من مشرفي جروب يوم 6 ابريل اضراب عام في مصر خليك في البيت

و زميل اسراء عبد الفتاح مؤسسة الجروب و حكى لنا على تطور الجروب و ازاي بدأ بيهم هما و اصحابهم و اللي عددهم بعدد اللي دعوهم ما يزدش عن 300 فرد و ازاي انه في نهاية اليوم الأول كان العدد بقى 3000 فرد و انه يوم الإضراب كان وصل 65000 و دلوقتى عدى 70000

و ازاي الناس كانت متمسكة بالإضراب و فرحانة بيه و بتدعو له في كل مكان بمجهودات شخصية و ايه التهديدات اللي جات لهم و ايه اللي حصل لهم انتهاء بإعتقال اسراء و بعض أصدقائها

عموماً ده أهم اللي اتقال طبعاً لو عايزين تقروا الموضوع بالكامل لازم تشتروا العدد الإسبوعي للجريدة بتاع الأربعاء

:)

طبعاً الصباغ اتكلم على صالون المدونين و جروباته التانية و خيخة و عسقول قالوا ملناش في الفيس بوك و أنا قلت لهم أنا مستخدم بس انما أعجبكم في التدوين بس قلت بقين حلوين لكن الشريط بتاع المسجل خلص عندي لأجل البخت الحلو فمفيش كلمة من كلامي اتسجلت :)

و كان فيه واحد حاضر من موقع أبناء مصر اتكلم عن السياسة على النت و اثرها في الشارع

و اتكلم ناس من حزب الغد من كذا محافظة و منهم صاحبة مدونة لاظوغلي

و بعد كل اللي اتقال كان فيه سؤالين هل اللي بيحصل دلوقتي من اعتقال لنشطاء على الانترنت يخليك تخاف تحط اسمك و صورتك و بياناتك الحقيقية و لا لأ ؟

و ايه هي نصيحتك لمستخدم الفيس بوك ؟

و أنا بالنسبة للسؤال الأول بأقول العمر واحد و الرب واحد و ( قل لن يصيبنا الا ما كتب الله لنا ) و السؤال التاني كل واحد قال فيه اللي ربنا قدره عليه

و بعد انتهاء الندوة كان فيه حوار مفتوح بس للأسف إضطرينا نستأذن علشان الوقت كان إتأخر و كان ورايا سفر

الأحد، أبريل 13، 2008

أخدوا اخلاء سبيل وشوفوا فيديو حصري

أولاً:- آسف على التأخير بس بقالي يومين ما فتحتش نت و لا قعدت على الكمبيوتر مشاغل الترتيبات النهائية للسفر
ثانياً:- بالنسبة لمعتقلي الإضراب من حزب الغد و حركة كفاية في دمنهور فقد أمرت محكمة جنايات دمنهور أمس السبت بإخلاء سبيلهم وذلك رداً على إستئناف نيابة أمن الدولة لقرار المحكمة السابق القاضي بإطلاق سراحهم و لكن للأسف رغم ذلك مازالت الداخلية تتلكأ في اطلاق سراحهم و قد انتهت اجراءات الإفراج عنهم و تم عرضهم على مباحث أمن الدولة و هم الآن في ترحيلات قسم شرطة دمنهور و لا يعرف سبب عدم الإفراج عنهم حتى الآن و لكن غالباً سيتم اطلاق سراحهم
الجدير بالذكر أن من ضمن هؤلاء المعتقلين المدون أحمد ميلاد صاحب مدونة مصري حتى النخاع
ثالثاً:- حصلت على فيديوهات لمشهد قمع الشرطة المصرية لنشطاء معتصمين أمام نيابة عابدين بالقاهرة يوم 7/4/2008 الماضي اثناء مطالبتهم بالإفراج عن رفاقهم المعتقلين في الإضراب شاهدوا الفيديوهين




الخميس، أبريل 10، 2008

أخدوا براءة

المعتقلين من كفاية و الغد في دمنهور يوم 6/4 اتعرضوا النهاردة على المحكمة و ادتهم براءة و لغت قرار النيابة بحبسهم 15 يوم و حيفرجوا عنهم من سجن برج العرب لو النيابة ما إستأنفتش
تحديث
====
قررت اليوم محكمة جنح مستأنف دمنهور بغرفة مشورة إلغاء قرار نيابة امن الدولة طوارئ الذي صدر سابقا بحبس 13 متهم على ذمة قضية تظاهرات 6أبريل بدمنهور في القضية رقم 4892لسنة2008 ادارى قسم دمنهور، حيث قررت المحكمة إخلاء سبيل المتهمين، هذا وقد امتنعت النيابة عن تنفيذ قرار إخلاء السبيل وقامت باستئناف قرار المحكمة، وتحدد لنظره يوم السبت 12/4/2008 بمحكمة جنايات دمنهور

الأربعاء، أبريل 09، 2008

المزيد من الفيديوهات لما حدث بدمنهور يوم 6/4

قمت بالبحث في اليوتيوب ووجدت هذه الفيديوهات لمظاهرة تجمع المعارضة بدمنهور يوم 6/4/2008 أنشرها بلا تعليق





فيديو سقوط صورة الرئيس مبارك في المحلة

الفيديو ده من عند وائل عباس
شعب المحلة يسقط صورة الرئيس مبارك في مشهد يذكرك بمشهد سقوط تمثال صدام حسين

أنا كنت بأسأل ايه اللي حصل ؟ في الإضراب في دمنهور

يا ناس افهموا أنا مش بأقول إن الإخوان سلموهم زي ما أمين صندوق حزب الغد بيعتقد كده في تعليقه
أنا بأقول عايز رد من الإخوان على الكلام ده و أهو رد النجم القادم وصلني
و حرية التعبير مفتوحة للجميع
و عموماً أنا مش مع طرف ضد التاني أنا عايز اعرف الحقيقة و كل اللي يعرفوني عارفين اني بأدور على الحقيقة بس
عموماً أدي فيديو يوم 6/4 اللي نشرته مدونة مظلومين نعيد نشره هنا


و على فكرة لم يتم عرض المقبوض عليهم اليوم كما كان مفترض على المحكمة لإلغاء قرار حبسهم 15 يوم بل و لا يعرف مكانهم على وجه التحديد هل هم بسجن الأبعادية أم بسجن برج العرب أم بمكان آخر

الثلاثاء، أبريل 08، 2008

ايه اللي حصل في الإضراب في دمنهور

أنا جاء لي التعليق المجهول ده على تدوينة الأمن يهاجم مظاهرة الإخوان المسلمين
أنا مش عارف مدى صحته بس عايز اللي يعرف حاجة و عنده رد يرد على الكلام ده
غير معرف يقول...
اخبار اضراب 6ابريل تم النزول الى ميدان الساعه الواحده والنصف يبدأ احمد ميلاد والدكتور عادل العطار المظاهره ومعهم الدكتور محمد برانيه ويحيى ابوشعره وطاهر ابو شعره وطارق ابو شعره ليبدأ الهتاف يسقط يسقط حسنى مبارك ويتم القبض على الجميع اتمكن من الفرار وجمع الاوراق المطبوعه واذهب انا وباقى المتظاهرين الى مبنى نقابة المحامين ونبدأ اعتصام لاخراج من تم القبض عليهم يصل اثناء الاعتصام الاستاذ طارق حشاد القيادى بالاخوان ولن اقول المسلمين ثم بعد فتره ينزل مع رفاقه ليتحدثوا مع طارق هيكل مفتش امن الدوله ثم يذهبوا لنفاجأ بعد ذلك بانسحاب الامن لخلف المبنى ويامرنا رجال النقابه انهم سيغلقوا ابواب المبنى لنخرج ونحن حوالى 20 فرد لمواجهة الامن يقترح زملائنا بالحزب الناصرى فك الاعتصام والتشاور مره اخرى بعد عدة ساعات يخرج 6 افراد من ال18المقبوض عليهم منهم قيادى الحزب الناصرى ويبقى الاستاذ احمد ميلاد والدكتور عادل العطار ورفاقنا من الغد وكفايه ليحولوا للنائب العام ليامر بحبسهم خمس عشرة يوم على ذمة التحقيق هل هؤلاء هم الاخوان اولا ينضموا للائتلاف المعارضه ولم يشاركوا حتى المظاهره السابقه لم يحضرها احد منهم عدا الدكتور جمال حشمت ليلقى كلمه بها كاى ضيف واليوم لم يكتفوا بعدم المشاركه بل شاركوا امن الدوله فى القبض على اخواننا وطردنا من نقابه المحامين لنواجه بقلتنا قوات امن الدوله اى اخوان هؤلاء اقترح عليهم اسم الاخوان الغادرين فهذا ما يليق على افعالهم والبقية تاتى من غدر وخيانه لمصر من ابنائها
08 أبريل, 2008 05:16 م
أنا لا اتفق مع المعلق في رأيه في الإخوان و لكن اذا كان هذا حدث بالفعل فسيكون شئ غريب جداً و اريد عليه رد

أما الشئ الوحيد الذي سمعته عن الإضراب في دمنهور هو قيام مظاهرة تندد بالغلاء و تهتف ضد الحكومة أول امس في مجمع المواقف الجديد و لكن تم تفريقها سريعاً
كما كان ميدان الساعة في وسط البلد في ميعاد المظاهرة التي دعت اليها حركة كفاية مكتظاً بقوات الأمن الخاصة و تم القاء القبض على 18 من حركة كفاية و حزب الغد تم اطلاق سراح 6 منهم و أمرت النيابة بحبس الـ 12 الآخرين لمدة 15 يوم على ذمة التحقيق و تم ترحيلهم لسجن برج العرب الذي رفض استقبالهم فتمت اعادتهم الى سجن الأبعادية بدمنهور
تحديث
غدا محاكمة معتقلي محافظة البحيرة

الاثنين، أبريل 07، 2008

معركة المحلة ما خلصتش

مصر: اعتقالات واصابات في "يوم الاضراب"
رداً على كل اللي علق على البوست اللي فات و لكل اللي قرأ و ما علقش
ادخلوا اللنك اللي في نهاية البوست و انتوا تفهموا ايه اللي حصل
بس ملخص الموضوع لكل اللي سألوا المظاهرات بدأت سلمية بعد خروج الوردية الأولى من العمال الساعة 3 العصر امبارح و لكن الأمن كان معتقل كل القيادات العمالية الممكنة من الصبح علشان يفشل الإضراب و الإعتصام جوه المصنع لكن أثناء الهتافات في المظاهرة السلمية البوليس ضرب بالقنابل و الرصاص المطاطي لتفريق المتظاهرين و كان عددهم فوق الـ 7 آلاف شخص بس الناس ما إتفرقتش بل ردت على الضرب بحدف الطوب و الحجارة و إشعال الإطارات المطاطية و إلقاؤها على الأمن و قام بعض المتظاهرين بإعادة قذف قنابل الغاز على الشرطة مرة اخرى
و قامت الشرطة بإستخدام الرصاص الحي و الكلام الآن على ان المحلة محاصرة و مقفلة تماماً و المرور متوقف و كثير من المصابين و الجثث يتم نقلهم لمستشفيات المنصورة و تقوم الشرطة بمصادرة طلقات الرصاص الحي الذي يتم استخراجه من أجساد المصابين و من جثث الشهداء
البوليس هو اللي دمر سلمية المظاهرات و هو اللي بدأ العنف و هو اللي كان بيكسر في عربياته المصفحة علشان يتهم المتظاهرين و هو اللي بيقبض على الناس من المستشفيات و هو اللي ضرب أطفال بالرصاص و هو اللي استخدم بلطجية في حرق بعض المنشآت العامة
هما كانوا معتقدين لما يضربوا قنابل و رصاص الناس حتخاف و تجري بس الناس وقفت و تصدت
برجاء المتابعة على اللينكات التالية
صور المظاهرات و أحداث المحلة
الأمن المركزى يهشم زجاج سيارة مصفحة فى المحلة الكبرى لإتهام المتظاهرين بإثارة الشغب
جبهة التهييس الشعبية
مدونة اضراب 6 إبريل و تغطية دقيقة و بالفيديو
مدونة لساني هو القلم
و اعملوا بحث في الجوجل و الياهو على كلمات إضراب و المحلة و مصر
سواء عربي او انجليزي و حتعرفوا كل حاجة و فضكم من كل القنوات لأن كلها طلعت بتخاف ما عدا الـ bbc arabic هي الوحيدة اللي نقلت الصورة الحقيقية

الأحد، أبريل 06، 2008

صور اشتباكات المحلة النهاردة مع قوات الأمن من رويترز

صديقي عبد الرحمن فارس بعت لي اللنك ده
و فيه صور اشتباكات المحلة مع الأمن النهاردة طبقأ لوكالات الأنباء و خاصة رويترز

و فيه تعتيم في كل القنوات على الموضوع ده حتى الجزيرة مش جايبة حاجة
في مجزرة في المحلة يا جماعة و في كلام على مئات المصابين و 4 شهداء منهم طفل صغير و حصار كامل للمدينة و اشتباكات عنيفة خصوصاً في ميدان الشون و حوالين محطة القطار

شوفوا بعض الصور







اضراب 6 ابريل خليك في البيت



إتفقت كافه القوي الوطنية في مصر علي أن يكون يوم 6 إبريل يوم إضراب عام في مصر يوم 6 إبريل خليك قاعد في البيت أو شاركنا فى الميادين العامة أوعي تنـــــــــزل لكن شاركنا ماتروحشي الشغل ماتروحشي الجامعه ماتروحشي المدرسة ماتفتحشي المحل ماتفتحشي الصيدليه ماتروحشي القسم ماتروحشي المعسكر عايزين مرتبات تعيشنا عايزين نشتغل عايزين تعليم لأولادنا عايزين مواصلات أدمية عايزين مستشفيات تعالجنا عايزين دواء لأطفالنا عايزين قضاء منصف عايزين أمن وأمان عايزين حرية وكرامه عايزين شقق للعرسان مش عايزين رفع أسعار مش عايزين محسوبيه مش عايزين ظباط بلطجية مش عايزين تعذيب في الإقسام مش عايزين أتاوات مش عايزين فساد مش عايزين رشاوي مش عايزين إعتقالات مش عايزين تلفيق قضايا قول لأصحابك مايروحوش الشغل همه كمان وخليهم يدخلوا الإضراب حزب العمل المصري حركة كفاية الإخوان المسلمين حزب الكرامه حزب الوسط حركة موظفي الضرائب العقاريه عمال غزل المحلة حركة إداريي وعمال القطاع التعليمي نقابةالمحامين حركة أستاذه الجامعات السادس من إبريل إضراب عام سلمي في مصر أبعت رسايل لخمسة من أصحابك ولو كل واحد بعت لخمسة في ظرف يومين البلد كلهاحتعرف بالموبايل بالأرضي بالأيميل أو حتي رسايل عالشات في قنوات التليفزيون أنسخوا رسالتنا وأبعتوها تعليق على كل المقالات ألي بتقروها بيكوا وبينا البلد دي حتتغير ان شاءالله

الأربعاء، أبريل 02، 2008

فيديو المظاهرة أمام محكمة دمنهور

بأدور في اليوتيوب على أي فيديو لأحداث امبارح لقيت الفيديو ده و اللي رفعه النجم القادم



ده غير بعض الصور و فيديو لمكان المعركة بعد الطحن مباشرة في مدونة مصري حتى النخاع

اللي حصل مؤكد يا جماعة كان فيه ضرب عنيف جداً و قنابل مسيلة للدموع و رصاص مطاطي و الكلام ده واضح جداً في نهاية الفيديو

الثلاثاء، أبريل 01، 2008

عاجل : الأمن يهاجم مظاهرة للإخوان المسلمين بدمنهور

إقروا الخبرين دول

الامن يفض مظاهرة مرشحي الاخوان بالبحيرة بالقوة

أسماء المعتقلين اليوم على خلفية مظاهرات الإحتجاج

أنا ما حضرتش المظاهرة دي كان عندي شغل مهم النهاردة و ما كانش ينفع اغيب ده غير اني ما كنتش أعرف اصلاً بالمظاهرة

ناس قرايبنا بيتهم هناك و من أقوالهم عرفت التالي

الدم من المتظاهرين المضروبين بعصيان و دروع الأمن كان مغرق الشارع و ناس بتجري و العساكر بتضرب عليهم نار - البوليس بيقول انه رصاص مطاطي - و قنابل غاز مسيل للدموع كتيرة انضربت و غطت منطقة المحكمة بالكامل و اغلبية شارع أحمد عرابي

و في حالات اختناق حصلت للناس جوه البيوت غير اللي كانوا في الشارع اصلاً

عموماً التفاصيل و الصور جوه اللينكين اللي فوق

اقروهم كويس

حسبنا الله و نعم الوكيل