الأربعاء، يونيو 25، 2008

الحمد لله عملت عمرة

الحمد لله عملت عمرة
من هنا سهلة خالص الشركات اللي بتنظمها اسمها حملات
الحملة طلعت الأربعاء الساعة 2.30 م و رجعت الجمعة 8.30 م بإقامة يوم بليلة في مكة و نص يوم في المدينة و الباقي سفر و بالفندق في مكة
كل ده بكام ؟
ب 90 ريال سعودي فقط لا غير
يا بلاش
مش عارف أرفع الصور في السايبر بس متصور شوية صور في الحرمين المكي و المدني تمام
أحرمنا يوم الاربع اللي فات من ذي الحليفة ( أبيار علي )
اشترينا ملابس الإحرام من هناك و بدأنا التلبية بعد صلاة العشاء
و الأتوبيس عطل في الميقات هناك و أول ما دعينا يشتغل إشتغل علطول
:)
وصلنا مكة الساعة 3.30 ص قبل الفجر
رمينا الشنط في الفندق و جري على الحرم صلينا الفجر و بدأنا الطواف 7 أشواط و بعدها ركعتين خلف مقام ابراهيم
بعدها سعينا بين الصفا و المروة 7 أشواط و بعدها حلقنا زيرو وتحللنا
قضيت اليوم أغلبه في الحرم و منظر الكعبة مهيب و يخطف القلب بس ما قدرتش أوصل للحجر الأسود زحمة طحن عنده و لما عملوا طابور ساعة العصر ملحقتش أوصل و الصلاة أقيمت :( بس صليت ركعتين في حجر اسماعيل
و بعد فجر الجمعة روحنا المدينة و صلينا في مسجد قباء ركعتين الضحى و بعدها صلينا الجمعة في المسجد النبوي و صليت ركعتين في الروضة الشريفة و مرينا من أمام قبر النبي - صلى الله عليه و سلم - و ألقينا السلام عليه في وسط الطحن و الزحمة
و بعدها رجعنا شوفنا جبل أحد على السريع من الأتوبيس و ووصلنا حائل يوم الجمعة بالليل قبل صلاة العشاء
دعيت في العمرة لكل اللي أعرفهم و اللي ما أفتكرتش أساميهم دعيت لهم دعوات شاملة بإن ربنا يكرمهم بكل الخير و يبعد عنهم كل الشر
و ده غير الدعوات المخصوص
:)
و السلام عليكم و رحمة الله و بركاته حتى نلتقي

الاثنين، يونيو 16، 2008

حائل تاني :)

السلام عليكم و رحمة الله و بركاته
نتكلم كما طلبت الجماهبر العريضة :) -خيخة و فاتيما يعني - عن حياتي بالتفصيل في حائل
قاعد في فيلا في حي اسمه النقرة و ده بره حائل بحوالي 10 كم و حيث ان مفيش معايا عربية فأنا بأكون شبه محبوس في الفيلا دي طول الليل بعد الشغل لأن ما ينفعش حد يتحرك في البلد دي مشي على رجليه كله راكب عربيات و مفيش أي مواصلات عامة
معايا في الأوضة الواسعة 3 مهندسين زي العسل ربنا كرمني بيهم بركة دعاء أمي و كل اللي يحبوني
المهندس خالد ( مدني ) و المهندس أحمد منصور ( مساحة) و المهندس محمد عبد العظيم ( ميكانيكا -لحام )
التلاتة مصريين و التلاتة من أحسن و أطيب و أجدع الناس الحمد لله اللي كرمني بيهم
بأصحى من النوم الساعة 6.30 ص و أصلي و أفطر و ألبس و أكون راكب مع البشمهندس عبد الخالق العربية الساعة 7.30 ص بالضبط و معانا المهندس محمد كامل مهندس كهرباء مصري و نتجه لموقع مجمع حقل آبار الشقيق
و بعد رحلة ساعة و ربع و أسفلت يشيلنا و مدقات صحراوية تحطنا بنوصل الموقع و ده في قلب صحراء جبلية و مفيهوش شبكة موبايل غير في نقطة واحدة عالية عند خزان المياه العملاق اللي بنبنيه هناك و المكان ده يعتبر سنترال الموقع كل اللي نفسه يتكلم في الموبايل بيطلع هناك يلقط الشبكة
الشغل الحمد لله كويس و مش صعب و في نفس الوقت الواحد بيشوف حاجات جديدة و يزداد علم و خبرة بس الشغل كتير و كل حاجة بأستلمها بطلب فحص يقدمه المقاول و أكتب فيه ملاحظاتي و اللي بتكون مع ملاحظات البشمهندس عبد الخالق فبنتفق حنكتب ايه و بعدها هو يكتب انجليزي و أنا تحتها أكتب الترجمة العربي
أنا بأتكلم معاه إنجليزي علطول و ده بيقوي لغتي اللي الحمد لله أقوي من لغة معظم الناس هنا
و بكده بأتعلم الهندسة بلغتين جداد الإنجليزي - مصطلحات العمل مع العمال في الموقع و ليس المصطلحات النظرية اللي درسناها في الكلية - و السوري- اللهجة السورية - لأن كل مهندسين المقاول سوريين و لهم ساعات مصطلحات عجيبة بس أهو الواحد بيتعلم
في استراحة من 12.00 لـ 1.00 بس غالباً الواحد بيقضيها شغل في المكتب في كتابة الملاحظات و التوجيهات أو طباعة الصور للأعمال -ما إحنا معانا كاميرا ديجيتال و بنصور كل حاجة في الموقع - أو في عمل التقارير
بيخلص الشغل الساعة 3.30 م و بنروح ساعتها نكون في الفيلا حوالي الساعة 5.00 م
مهندسين المقاول هم :- المهندس علي طه ( مدني ) و المهندس طلال ( معماري ) و المهندس معاوية ( ميكانيكا ) و المهندس ساجد ( كهرباء ) و كلهم ناس عسل بجد
و خصوصا ً علي و معاوية بيتحطوا على الجرح يطيب
و مدير الموقع للمقاول هو المهندس ايليا ( مدني ) و كلهم من سوريا و كلهم ناس قمة في الإحترام و جودة و دقة العمل لدرجة عمري ما شفتها في مصر
لما بنروح غالباً بنتغدى في مطعم قريب من الفيلا (رز و ربع فرخة ) أو بنتغدي أي معلبات في البيت
و بعدها يبدأ الملل في الفيلا حتى تاني يوم الصبح
صحيح ساعات بأشقر على التلفزيون و بأقعد عليه لما يكون العدد قليل و بأحاول أقنع الناس نتفرج على mbc action أو mbc 2 بدل ميلودي أفلام و روتانا سينما
بس احنا 15 مهندس في الفيلا غير الـ 2 الهنود يعني 17 واحد على تلفزيون واحد في فيلا مقطوعة بعيد عن البلد و بعيد عن السايبرات و بعيد عن كل حاجة
و بأنام قبل 12 بالليل و أصحى تاني يوم و هلما جرا
الإقامة بيقولوا جاية بكرة و ده حيكون بداية تحرك الواحد علشان يقدم في مدرسة تعليم القيادة و يحاول يطلع رخصة لأن البلد دي لابد فيها من العربية لأن المسافات بعيدة قوي عن بعضها
و بيقبضونا متأخر بتاع 20 يوم عن بداية الشهر يعني دايماً ماسكين علينا 20 يوم بس ده العادي هنا و أقل من العادي
المهم انهم بيقبضوا بإنتظام مش زي غيرهم
أنا الحمد لله كويس و صحتي كويسة و إضطريت أتعلم أغسل هدومي على إيدي بنفسي و ان كانت القمصان و البنطلونات و الترنجات بأوديها المغسلة
و شكلي حأضطر أتعلم الطبيخ
و يوم الجمعة بنصلي في أي مسجد فيه خطبة و مش شرط الجامع الكبير اللي بيلم أغلب البلد و نروح بعدها سوبر ماركت باندا و نجيب بقالة الإسبوع و ده أكبر سوبر ماركت في حائل
دي أهم التفاصيل دعواتكم ليا و أنا حأدعي لكم في أول عمرة إن شاء الله بعد ما الإقامة تيجي
سلام
:)