الثلاثاء، سبتمبر 30، 2008

أسئلة نوارة الرجالي

ده يعتبر تاج من عند نوارة شوفوا الأسئلة عندها في البوست ده
شوية أسئلة رجالي

و آدي أجوبتي اللي جاوبتها في تعليق عندها على الموضوع ده

شهامة وجدعنة الانسان المصري

شوفوا الأسئلة عندها و الأجوبة عندي و بعدها ياريت كل الرجالة يجاوبوا نفس التاج ده بصدق و امانة علشان نثبت لنوارة إن لسه فيه رجالة جدعان
أما الستات فلازم يجاوبوا التاج الحريمي ده بتاع نوارة برضه

شوية اسئلة حريمي

الأجوبة


اولاً : مش بأفرح و لا حاجة و لو إنها مش بتتقال لي بس ممكن تكون مدعاة للفرحة من جهة إن الواحد يكون برئ زي الأطفال
:)
مش يتعامل معاملتهم
تفرق

ثانياً: عمري ما عملتها و بأهزأ أي حد ماشي معايا يعملها و لو كررها باسيبه و امشي و ممكن اقاطعه

ثالثاً: بالعكس دا أنا بأفتخر إني عمري ما عملت الغلط و لا شربت خمرة و لا مخدرات و لا زنيت و لا حتى مشيت مع بنت
و ده مش لعجز فيا و لكن لإني اؤمن بالحديث : إفعل ما شئت فكما تدين تدان

رابعاً : بالعكس دا انا أملي اللي اتجوزها أسعدها طول عمرها و هي تسعدني علطول
لإن خير متاع الدنيا الزوجة الصالحة و انا نفسي ربنا يرزقني بذات الدين و إن شاء الله أراعي ربنا فيها و أسعدها

خامساً : عمري ما حاعمل كده ابداً
أستغفر الله العظيم

سادساً: لا انا النداهة ندهتني من زمان لإني لما اركز في حاجة زي النت او قراية كتاب او لعبة على الكمبيوتر - مش بأحب الكورة قوي على فكرة - و أي حد ينده عليا صعب أسمعه من اول مرة
بأركز قوي في اللي بأعمله
:)

سابعاً: مش حاعمل كده ان شاء الله
بس هي برضه تنقي وقت مناسب للكلام مش ابقى داخل لسه من الشغل و ما قلعتش الجزمة و لا خدت نفسي و لا شربت بق ميه و هي تتفتح في الكلام عن الجيران و اللي عملوه و العيال و التلفزيون و الراديو و السوق و اللي حصل فيه و أخبار العمارة و الشارع كله
دماغ الواحد بتبقى مصدعة من الشغل و لسه راجع
لازم تختار وقت مناسب و تحكي الأهم فالمهم
:)
و لا ايه ؟

ثامناً: الحمد لله مش تبعي و بعيد عنها نهائي

تاسعاً : مش تبعي برضه و مش حتحصل ان شاء الله و حنفضل نحب بعض العمر كله

عاشراً: مش حأهملها و حأساعدها على قد ما أقدر بس انا اصلاً اللي حأتجوزها مش حتشتغل لإن صاحب بالين حيتعب قوي و تعبها حيجيي على دماغي و دماغ العيال
انا عايزها معززة مكرمة في بيتها
و انا علي مصاريف البيت من الالف للياء
و عمري ما حآخد منشطات
:)

حادي عشر : كل لما بأغلط بأعتذر و عمري ما إستكبرت على الإعتذار لو إتأكدت من غلطي

ثاني عشر : مش بيحصل
لا باتريق على دي و لا دي
بالعكس لما باقابل حد اذكى مني سواء راجل او ست بأحاول اتعلم منه او منها

ثالث عشر : برضه ما بيحصلش
عمري ما فكرت كده

رابع عشر : بالعكس دا الواحد دلوقتي عمال يحسبها بالمللي
معايا كام و حأحوش كام
حأجيب شقة منين و فين و بكام
و الفرش و العفش بكام
و الشبكة و الفرح
و هم ياما
و مين قال عايز ملكة جمال
انا عايزها متدينة و مثقفة و جامعية وجمالها معقول
عادي يعني

خامس عشر : محدش قال كده
أكيد في أذكى مني و في أقل ذكاء

سادس عشر : لا يعيبوه حاجات كتير مين قال ما يعيبوش

سابع عشر : و لو إن الحكاية ما وصلتش ابداً للدرجة دي بس فين نصيحة الأم لبنتها
كوني له أمة يكن لكي عبداً
:)

ثامن عشر : زي ما حاقولها أكيد هي كمان حتقولي
و لا هي ما بتعرفش تتكلم
انا اقول و هي تقول و لا لازم انا اللي اسأل
:)

تاسع عشر : مش حيحصل و حنتفق على كل حاجة مين ليه ايه و عليه ايه ؟

عشرين : طيب دا أنا نفسي آكل أكل بيتي معتبر من إيد مراتي بدل ما انا متبهدل في الطبيخ و في أكل المطاعم
:)

واحد و عشرين : ابداً و الله

اتنين و عشرين : عمري ما حأسفه رأيها
و لإني ما حبيتش قبلها اكيد الطيبون للطيبات فحتكون ما حبتش حد قبلي
مش بأقولك ذات الدين
:)

تلاتة و عشرين : مش حواري و لا نظامي يا ابلة
و لا امشي ورا و لا قدام حد

اربعة و عشرين : عمري ما حأعملها هو انا عبيط
دي غيرة الستات دي تجنن لو في غير محلها

خمسة و عشرين : كويس إنك قولتي لي علشان آخد بالي
حاضر

ستة و عشرين : لعلمك لما بأشوف واحد كده بازبهل و بعدها بأحط وشي في الارض و ما أعرفش أبص لها
بأتكسف
بس ده في الواقع مش في التلفزيون :)

سبعة و عشرين : المفروض من الجملة دي إن الرجل عقلاني و المرأة عاطفية
و دي قاعدة عامة بس مش مطلقة يعني في إستثناءات و احياناً بيحصل العكس و نلاقي إمرأة صارمة و رجل عاطفي
و مش كل الناس ماشية ورا ريالتها
:)

تمانية و عشرين : طيب إيه رأيك إني أكيد حأبص في وشها بأقول لك عايز أسعدها
و الحمد لله شغلي مفيهوش ستات
:)
عادة

أخيراً : تعدد الزوجات ليه ظروفه الخاصة و انا معترض على اللي بيستخدموه في غير مكانه
أنا عن نفسي واحدة كفاية علشان نعرف نعيش كويس و نربي العيال كويس

و انا حأنشر الكلام ده تاني عندي لإنه شبه التاج بس طويل قوي و رخم حبتين

الفلبين والحرب الصامتة ضد المسلمين!

كل سنة و انتم طيبين بمناسبة عيد الفطر
عيد سعيد عليكم جميعاً
و لكن اثناء إحتفالاتكم بالعيد ياريت تفتكروا شعب مسلم يعاني ويلات الحرب لا لسبب سوى أنه يقول :
لا إله إلا الله محمد رسول الله
و أنا ياما سمعت من المهندس عبد الخالق رئيسي المباشر في العمل حكايات كتير عن اللي بيتعرضوا له في جنوب الفلبين من اكتر من اربعين سنة
لكن انا لقيت المقالة دي تلخص كتير من اللي بيتعرضوا له
الفلبين والحرب الصامتة ضد المسلمين!

الأحد، سبتمبر 28، 2008

إختراق إسرائيلي خطير للخليج

تمكنت إسرائيل من إختراق أجهزة الأمن في الدول الخليجية بشكل خطير
إقروا المقالتين دول للاستاذ فهمي هويدي
مقالة 1
مقالة 2




حالة إدمان التدوين

كما توقعت حالة إدمان التدوين عندي زادت عن السنة اللي فاتت
يمكن بسبب الغربة وإن مفيش قدامي حاجة أعملها بعد الرجوع من الشغل غير القعدة على النت علشان أخفف شعوري بالغربة
شوفوا السنة اللي فاتت كنت كام
و دلوقتي بقيت كام
88%How Addicted to Blogging Are You?

Created by OnePlusYou - Online Dating

و لا حول و لا قوة إلا بالله
إضغطوا على الرسم ده و و إختبروا نفسكم و شوفوا وصلتم في إدمان التدوين لحد فين

السبت، سبتمبر 20، 2008

عمرة رمضان




الحمد لله ربنا قدرني و عملت عمرة رمضان اللي ثوابها يعادل ثواب حجة
لو فاكرين انا كنت كتبت عن العمرة قبل كده مرتين
الحمد لله عملت عمرة و صور العمرة الي كنت عملتها
بس عمرة رمضان لها طعم تاني

طعم متعب و زحمة قوي بس طعم إيماني عميق برضه خصوصاً صلاة التراويح في الحرم 23 ركعة انما ايه جميلة

المشكلة في العمرة من داخل السعودية انها 3 ايام بس
يوم رايح - الاربعاء- و يوم في مكة - الخميس - و يوم جاي- الجمعة - و نعدي على ميقات أبيار علي ( ذو الحليفة ) جنب المدينة و نحرم منه و إحنا رايحين
و و إحنا راجعين بنعدي نصلي الجمعة في المسجد النبوي
و بنقضي يوم الخميس كله في مكة
فبيبقى إجهاد جامد لإن السفر بالإتوبيس بشكل متواصل متعب
نفسي في عمرة طويلة و يومين على بعضهم في المدينة بدل الإستعجال بتاع كل مرة ده بس ظروف الشغل ما تسمحش

وصلنا الميقات الساعة 8,30 م و أحرمنا
وصلنا مكة الساعة 2,30 صباحاً و بعد استلامنا لغرفة الفندق نزلنا جري على الحرم و بدأنا الطواف
و بعد الطواف سبع أشواط في وسط زحمة رهيبة و صلاة ركعتين خلف مقام إبراهيم إتجهنا للسعي بين الصفا و المروة

بس الشهادة لله ربنا يبارك للسعوديين ويجازيهم خير على التوسعات اللي بيعملوها في الحرم المسعى تم توسيعه و بقى فيه دور أول علوي و دور تاني بجوار الدور الأرضي و لسه فيه توسعات جاية و كلها على أعلى مستوى
و ده منظر توسعات المسعى من بره شايفين عدد الأوناش اللي شغالة
المهم عملت السعي في مسعى الدور الاول كانت زحمته أخف شوية


خلصت 5 أشواط من السعي و الفجر أذن و لما خلصت الشوطين التانيين اقيمت الصلاة فصليت عند المروة في مسعى الدور الأول و نزلت خرجت من مخرج المروة و حلقت


بس لو تلاحظوا حتلاقوا البرج اللي ورايا بيتهد و ده بسبب التوسعات برضه
روحت نمت لحد الضهر و نزلت صليت الظهر في الحرم بس الفندق بتاعنا المرة دي كانت اقرب نقطة ليه في الحرم هي مخرج المسعى بتاع المروة و علشان كده كانت اقرب سكة للدخول للحرم هو مشي شوط كامل في المسعى من المروة للصفا و انا داخل و من الصفا للمروة و انا خارج
و الملاحظ في رمضان إن الحرم و الشوارع المحيطة به زحمة طوال الـ 24 ساعة و ما بيفضاش خالص
كمان البيوت في مكة مبنية على الجبال و الأنفاق مخترقة لجبال صخرية
الحاجات دي انجازات هندسية جبارة و كنت مهتم بيها جداً بحكم المهنة هي و التوسعات
يا بخته بجد اللي يشتغل في الحاجات دي في مكة
المهم خرجت من باب الملك عبد العزيز و ده الباب الوحيد اللي ساحته الأمامية ما إتدمرتش لإن مفيش توسعات ناحيتها
بس شوفوا الزحمة
المهم و انا بأتمشى إكتشفت سر من أسرار الصباغ اللي مخبيها علينا رغم الصحوبية و العيش و الساندوتشات
محل صرافة و تغيير عملات في مكة و بعد كده جاي يتكلم على الموبايل اللي ضاع :)
و لقيت ايه كمان
فندق مبارك و لا تعليق
و ناس بتأكل الحمام في الشارع


وهكذا طول اليوم ما بين الصلاة في الحرم و النوم في الفندق لإن الواحد كان هلكان الصراحة لدرجة آخر اليوم كان الواحد بيعرج
صلينا العشاء و التراويح على السطح في المسجد الحرام بسبب شدة الزحام

شوفوا الحرم عامل ازاي بعد الصلاة


بس صلاة التراويح هناك لها طعم تاني خالص و إحساس عميق يحرك قلب الواحد من جوه لكن انا لي اعتراض على دعاء القنوت كان طويل جداً و بعض المعاني فيه مكررة بدون داعي انا رجلي وجعتني من الوقفة و افتكرت حديث حولها ندندن انا و معاذ


و بعد صلاة فجر الجمعة اتجهنا للمدينة

المشكلة الكبيرة بقى سواء في الحرم المكي او المدني إن الحمامات زحمة جداً

و مش عارف ايه الحل الصراحة دا الحمامات و المواضئ في المسجد النبوي 5 ادوار تحت الارض
و الجراجات تحت الارض متعددة الطوابق يادوب مكفية العربيات
ربنا يقدرهم على توسعات تانية تكفي
صلينا الجمعة في المسجد تحت واحدة من المظلات اللي بتغطي الساحة الداخلية للمسجد
بس الروضة الشريفة اتقفلت بعد الصلاة مباشرة و معرفتش ادخلها من الزحمة بس مرينا قدام قبر النبي - صلى الله عليه و سلم - و صاحبيه ابو بكر الصديق و عمر بن الخطاب - رضي الله عنهما - بقوة الدفع وسط تيار بشري رهيب و خرجنا من باب البقيع
بس زحمة طحن
شوفوا المنظر بعد الصلاة

بس بدأوا يغطوا الساحة الخارجية دي بمظلات برضه كجزء من التوسعات لإستيعاب أعداد أكبر من المصلين
بس لسه ما خلصوهاش
و رجعنا بعدها لحائل وصلنها الساعة 8,30 بالليل بعد ما فطرنا على مائدة رحمن في جامع في السكة
بس سفر متعب بشكل جامد انا مش عارف الناس كانت بتحج على ظهور الجمال إزاي بس

عموماً ربنا يطول في عمرنا و يكتب لنا الحج جميعاً يارب و انا ناويه السنة دي ان شاء الله
و على فكرة انا دعيت لكم كلكم كل اللي قالي و اللي ما قاليش و افتكرته و ربنا يتقبل و يستجيب

الجمعة، سبتمبر 12، 2008

رئيس الوزراء هو إمام المصلين

رئيس الوزراء الفلسطيني إسماعيل هنية يؤم المصلين يومياً في صلاة التراويح بأحد مساجد غزة
ربنا ينصرهم
إقروا الخبر ده
تقرير: "عسى ربكم أن يهلك عدوكم".. آية أبكت رئيس الوزراء "إسماعيل هنية"
و شاهدوا الفيديوهات الآذان و دعاء القنوت




الأربعاء، سبتمبر 10، 2008

ريحة الجثث فاحت في الدويقة

الجثث ريحتها فاحت في الدويقة من تحت الصخور و مطلعوش ربعهم حتى و الحكومة عملت كردون علشان تمنع وسائل الإعلام من كشف فضيحة عدم وجود أي جهود رسمية للإنقاذ
دا الأهالي بتحفر بالفؤوس و معاهم بعض المتطوعين من رجال الإنقاذ اللي عندهم دم
و الرتب من الضباط و معاهم المعدات موجودين بره الدويقة للشو الإعلامي و إحكام حصار الكردون الأمني لعدم السماح بتسرب المعلومات
إقروا الخبر ده
و شوفوا التدوينة دي
و التانية دي من داخل الدويقة
و حسبنا الله و نعم الوكيل

الأحد، سبتمبر 07، 2008

كارثة الدويقة

الإنهيار اللي حصل إمبارح في الدويقة ده حلقة في مسلسل الإهمال اللي بقى عادي و طبيعي
ناس مش لاقية حتة تسكن فيها قامت راحت بنت عشوائيات في الجبل ولما الجبل شرخ فوقيهم و جابوا مهندسين الحي يعاينوا كل اللي عملوه لهم محاضر مخالفات في البناء و سابوهم زي ما هم و لما اتنبح صوتهم من الشكوى قاموا بنوا عمارات جديدة لإسكان حي منشأة ناصر لهم و لكن بسبب الفساد و البيروقراطية اتوزع بعضها على المحاسيب و فضلت آلاف الشقق فاضية في انتظار توزيعة أو تهليبة مضبوطة لها على مرمي البصر من عشوائيات الغلابة
و بعد المصيبة ما حصلت و اكتر من 500 شخص اندفنوا تحت الصخور و اكتر من 35 بيت اتساووا بالأرض
ساعتها بس قالوا حندي كل اسرة متضررة شقة و 5000 جنيه للمتوفي و 2000 جنيه للمصاب و خطة عاجلة لمعالجة العشوائيات غير الآمنة- إنما الآمنة يتحرقوا بجاز وسخ و يركنوا على جنب لحد ما تجيلهم مصيبة تاخدهم و ساعتها نبقى نبص لهم - و لو اني مش فاهم ايه الفرق بين العشوائيات الآمنة و الخطرة !!!!!
يعني واحد من الضحايا جايبينه امبارح متعور هو و مراته و 2 من عياله و له 3 عيال تانيين تحت الانقاض
واحد بيقول لي بسخرية مريرة يعني حيطلع له بشقة و بـ 23 ألف جنيه و يشبرق نفسه :(
حسبنا الله و نعم الوكيل في اللي خلوا الناس عايشة عيشة اقل من عيشة الحيوانات و ياريت عارفين يعيشوها لأ دا المصايب نازلة ترف واحدة ورا التانية بدون ما تديهم أي إستراحة علشان يأخدوا نفسهم
حرق و غرق و هدم و مرض حنلاقيها منين و لا منين



الاثنين، سبتمبر 01، 2008

رمضان كريم


كل سنة و انتم طيبين بمناسبة شهر رمضان الكريم
و إن شاء الله حأحكي لكم على شهر رمضان هنا شكله إيه
ربنا يكرمنا جميعاً و يتقبل صيامنا و قيامنا و يكتب لنا العمرة في رمضان لإن ثوابها يعادل ثواب حجة و يتقبلها منا جميعاً
قولوا آميين