الجمعة، مارس 06، 2009

تفاصيل الحج 2

إحنا كنا وصلنا في حكاية الحج لحد فين ؟
بصوا على الجزء الأول كده و إفتكروا كنا قلنا إيه ؟ تفاصيل الحج 1 خصوصاً إني اضفت له بعض الصور و الفيديوهات

آه كنا وصلنا لحد ما رمينا الجمرة الكبرى في يوم النحر الصبح

بعد رمي جمرة العقبة الكبرى المفروض نتجه للحرم لأداء طواف الإفاضة سبعة أشواط حول الكعبة و بالنسبة لي لإني كنت بأحج متمتع فكان عندي برضه سعي تاني 7 أشواط بين الصفا و المروة
و لإننا ما نعرفش حاجة و أول مرة نحج فما نعرفش ان فيه اتوبيسات نقل جماعي من الجمرات بمنى لحد الحرم
إحنا بقى مشينا مع تيار الحجاج الرئيسي عبر طريق المشاة للحرم عبر 3 أنفاق طويلة تخترق الجبال



لكن في بداية الطريق وقفنا جنب كولدير مياه من المنتشرين بالطريق و حلقت لزميلي اللي كان معايا دماغه بمكنة الحلاقة العادية و جبتها له زيرو و ده طبعاً كان أحسن من اللي حلقوا لنفسهم بنفسهم لإنهم عوروا نفسهم كتير قوي
لكن أنا مكنتش جايب مكنة حلاقة معايا و كنت ناوي أحلق في محلات الحلاقة اللي قدام الحرم قصاد مخرج المروة
في الطريق لاحظت وجود عربيات نقل كبيرة على الجانبيين بتوزع أكلات جاهزة و مشروبات كنوع من الصدقة على الحجاج

أنا عن نفسي ما أخدتش منها رغم إن كان فيه حجاج واقفين في طابور علشان يأخدوا لإن أنا قلت إن الصدقة دي للفقراء و المحتاجين و انا ما دام الحمد لله ربنا قدرني و جيت الحج و معايا فلوس تكفيني أكل و شرب يبقى نسيب الصدقة دي لمستحقيها من الناس الغلابة
وصلنا للحرم بعد ساعة و ربع مشي و دخلنا علشان نطوف
بس الصحن كان زحمة رهيبة و كل الحجاج بيطوفوا في وقت واحد تقريباً فطلعت للدور الأول علوي صحيح اللفة واسعة و شوط الطواف طويل بس الزحمة أرحم شوية
لكن الشباب اللي شغالين بكراسي متحركة بالإيجار للطواف بغير القادرين كانوا عاملين مشكلة في الطواف و بيجروا بالكراسي بسرعة قوي و لازم تبعد عن طريقهم و انت بتطوف رغم إنهم المفروض يطوفوا من داخل البلكونة مش من خارج الطائفين زي ما اغلبهم كان بيعمل
خلصت الطواف بعد فترة طويلة نسبياً بس رغم كده لقيت نفسي خلصت في نفس المدة بتاعة زميلي اللي طاف في صحن الحرم
طلعت بعدها للسعي في الدور التاني علوي و ده أخف الأدوار من ناحية الزحمة

و خلصت السعي و خرجت من المسعى و و كان منظر الزحمة بره الحرم شديد زي ما أنتم شايفيين كده




و نزلت على محلات الحلاقة اللي قدامكم في الصورة دي الصغيرة على الشمال
و دي الصور قبل الحلاقة

و بعد الحلاقة
بس الواحد كان هلكان خالص لإن لو تفتكروا الواحد كان مشى كتير اليوم اللي قبلها لما نزلت من الأتوبيس و إحنا راجعين من عرفات و قعدت أسأل و أدور على المخيم و لما وصلته و صليت فيه المغرب و العشاء جمع قصر ما لحقتش أنام غير ساعة الا ربع و بعدها صحيت لصلاة الفجر و مشيت من آخر مزدلفة لحد رمي الجمرة الكبرى في أول منى و بعدها مشيت من الجمرات للحرم و بعدها طواف الإفاضة و السعي فكنت مش إستويت لا دا أنا كنت اتهريت خالص
اتغديت من مطعم جنب الحرم و وقفت مستني أي عربية ميكروباص نازلة المزدلفة مفيش كله نازل منى او العزيزية فين و فين لما لقيت عربية رايحة المزدلفة
رحت المخيم إغتسلت و تحللت من ملابس الإحرام و لبست هدومي العادية
و كان شعور مريح إن الواحد يرجع لهدومه العادية تاني بعد 3 ايام في لبس الإحرام اللي هو عبارة عن بشكيرين بس
قابلت في الليل 2 إصحابي واحد منهم ما شفتوش من 5 سنين و التاني من سنة كان كل واحد فيهم شغال في مكان مختلف في السعودية و اتقابلنا كلنا في الحج
كانت فرحتي كبيرة قوي برؤيتي لمصطفى اللي كان زميلي في الكلية و بلدياتي و صاحبي و معايا في نفس مجموعة مشروع التخرج
لكن بعد التخرج بكام شهر سافر للسعودية و ما نزلش مصر من ساعتها فكانت فرحة ما تتوصفش إن أنا شوفته
و شوفت معاه في خيمته مسلم من أثيوبيا إسمه عثمان و إستغربت قوي إن أثيوبيا فيها مسلمين لإن فكرتي إن معظمها مسيحين بس هو فهمني إن المسلمين حوالي نص السكان هناك و بيزيدوا بإستمرار
كمان كان معايا في خيمتي واحد مسلم من جنوب افريقيا و أصوله أندونيسية و هو مهاجر لإستراليا و عايش فيها من 10 سنين و رغم إنه ما يعرفش عربي بس بيعرف يقرأ القرآن بصوت كويس و بالتجويد كمان و مش بيغلط في التشكيل على الرغم من إن عرب ياما في الخيمة ما كانوش عارفين يقرأوا مضبوط زيه
في تاني ايام العيد اللي هو اول ايام التشريق الثلاثة يبدأ رمي الجمرات الثلاث
رمي 7 حصيات لجمرة العقبة الصغرى ثم 7 لجمرة العقبة الوسطى ثم 7 لجمرة العقبة الكبرى مع التكبير في كل رمية


و يومها سمعت إن الرمي ساعة الزوال ( الظهر يعني ) بيكون زحمة جداً و إن اغلب الناس اللي ماتت السنين اللي فاتت ماتت في الوقت ده بسبب الزحام الشديد و التدافع و كنت سامع الفتوى المصرية اللي بتبيح رمي الجمرات على مدار الـ 24 ساعة فقررت أعمل بيها

و رحت رميت جمرات يوم التشريق الاول الساعة 10 ص
و أخدت السكة بقى مشي على رجليا ساعة و نصف رايح


و زيهم جاي

بس ناس كتير خوفوني من إن اللي عملته ده مش صح و إنه لابد من الرمي بعد الزوال فسألت أحد الشيوخ الموجودين في أكشاك الفتوى المنتشرة بمنى و المزدلفة و التابعة لوزارة الحج فأكد لي أن فتوى الرمي على مدار الـ 24 ساعة كانت قبل إنشاء جسر الجمرات الحالي الذي خفف الزحام كثيراً و أن الرمي الصحيح هو من وقت الظهر حتى غروب الشمس

فإضطريت إني أعيد الرمي تاني في وقت العصر حوالي الساعة 5 لكن إكتشفت ساعتها إن فيه أتوبيسات نقل جماعي تنقل الحجاج من نهاية المزدلفة إلى جسر الجمرات ببداية منى مما وفر علي أني أكرر مشوار المشي المرهق بتاع الصبح
في اليوم اللي بعده - تاني ايام التشريق و ثالث أيام العيد - كنا أمام إختيارين إما نتعجل و ننهي حجنا اليوم او نتأخر و ننتظر للغد
طبقاً للآية الكريمة ( فمن تعجل في يومين فلا إثم عليه و من تأخر فلا إثم عليه ) و قررت إني أتعجل و أنهي حجي النهارده علشان يفضل وقت ألحق أزور المدينة المنورة فيه او لو ما زورتهاش ألحق استريح يوم الجمعة قبل ما أرجع للشغل يوم السبت و ده اللي حصل فعلاً
رحت بأتوبيس النقل الجماعي للجمرات و رميت الجمرات في وقت الزوال بالضبط بعد آذان الظهر بـ 10 دقائق بس

و جيت ارجع للمخيم في مزدلفة ففوجئت بإن الأتوبيسات النهارده جاي بس و مفيش أتوبيسات راجعة المزدلفة فإضطريت أرجع كل المسافة دي مشي مع زميلي في الشغل و زوجته و بمجرد ما رجعنا رتبنا شنطنا و حاجتنا و ركبنا الأتوبيس بعد صلاة العصر فنزلنا في بطحاء قريش عند نفس المكان اللي كنا فيه اول ما جينا الحج - راجع الجزء الاول - و كل واحد برضه المفروض يتصرف في مواصلة للحرم علشان نروح نعمل طواف الوداع
بصعوبة الواحد لقى سيارة و لكن إضطريت أنزل منها في نص السكة تقريباً و اكمل مشي لإن كان فيه إختناق مروري رهيب لإن كل السيارات متجهة للحرم بأعداد تفوق قدرة الطرق على الإستيعاب
وصلت الحرم بعد صلاة المغرب مباشرة لإني إتغديت في مطعم في السكة لكن المرة دي كانت الزحمة فوق الرهيبة بكتير لإنه ينفع شرعاً إنك تؤجل طواف الإفاضة و تضمه لطواف الوداع في طواف واحد فعدد اللي كانوا في طواف الوداع كان أكتر من طواف الإفاضة بشكل كبير
و ما قدرتش أطوف لا في الصحن و لا الدور الارضي و لا الدور الاول علوي حتى زي الإفاضة من الزحمة الرهيبة فطلعت على السطح في الدور التاني علوي و طفت هناك رغم الزحمة الشديدة برضه و في وسط الطواف أذنت العشاء فصلينها ثم أكملنا الطواف و إنتهيت منه في 3 ساعات و نصف بسبب الزحام الرهيب
و كان ميعاد التجمع في البطحاء لركوب الاتوبيس فات خلاص فإتصلت بمشرف الحملة فعرفت منه إن لسه محدش رجع الاتوبيس بسبب الزحام الرهيب وقلت لهم ينتظروني و ده طمنني شوية
و اتنططت في 3 مواصلات لحد ما وصلت للأتوبيس و كنت من الـ 5 الأوائل في الوصول
المهم انتظرنا لحد ما إكتمل الاتوبيس و إتحركنا الساعة 11 م و قالوا لنا إننا مش حنقف في المدينة و حنستمر لحائل مباشرة
و وصلت حائل الساعة 2 الظهر يوم الخميس و انا بأعرج و مش قادر امشي على رجليا الإتنين اللي كانوا وارمين من كتر المشي و كعوبهم مشققة و إكتشفت إن احد الشقوق كان عميق لدرجة إنه إتحول لفتحة في كعب رجلي
و إني ماشي برجلي مفتوحة من 3 أيام
قضيت يومين الخميس و الجمعة راحة تامة في السرير و نزلت الشغل يوم السبت
بس على قد التعب الرهيب ده لكن الواحد حب الحج جداً
و إن شاء الله ناوي اروح الحج الجاي
عقبالكم جميعاً



هناك 19 تعليقًا:

سومه...مجنونه فى بلد عاقل يقول...

التعليق الاول

سومه...مجنونه فى بلد عاقل يقول...

دا شىء مش ممكن ابدا انى اعلق اول تعليق
تقبل الله يا مهندس
حج مبرور وذنب مغفور
وربنا يكتبها لكل اللى محجش يا رب

كيــــــــــــارا يقول...

ياااااااااااااااااااااااااااااه

انا حسيت ان انا اللي حجيت بجد

مرهق بس احساس بسمو بالروح رائع

ربنا يتقبل ان شاء الله

roppama يقول...

حج مبرور وذنب مغفور يا هندسة عقبال كل سنة وشكرا على تعليقك عندي

علي محـمــــــد يقول...

السلام عليكم

مبروووك عليك الحج .. وحج مبرور وذنب مغفور يا مهندس ..
بصراحه انت خليتنا نعيش الحج معاك وبدون خيال عشان حطيت صور توضيحيه كثيره .. انا قريت الجزء الأول وهذا الجزء وشفت انك استغربت ان هناك باصات مصريه للشركه اللي انت طلعت معاهم للحج .. لا تستغرب كذا افضل للحجاجتعرف ليش ؟ .. عشان زمان كان في شركات ضخمه وهي بس اللي توفر وسائل النقل للحجاج وكان شبه احتكار ومن ضمن هذي الشركات شركة البلوي للنقل وهي ملك للملياردير منصور البلوي رئيس نادي الإتحاد والثانيه شركة دله للملياردير صالح كامل اي ار تي :) والثالثه شركة حافل المعروفه لمين وشركة المغربي للنقل وكلها شركات ضخمه .. اما الان فالحمدلله ان المسأله فيها حريه تجاريه اكبر .. يعني انا لو عملت شركة حج مطلوب مني توفير باصات خاصه لنقل الحجاج المتعاقدين معايه وهنا تبان شطارة صاحب الشركه اما انه يتعاقد مع شركه محليه بأسعار عاليه حبتين اما انه يتعاقد مع شركات نقل خارجيه ويوفر على نفسه فرق مالي معقول .. ومن سنوات وشركات النقل الخارجيه تجي في الحج بناءً على عقود خاصه مع شركات الحج الصغيره والمتوسطه واكثر هذي الشركات تركيه اردنيه مصريه ...
انا سعيد بإنك حجيت وفرحان بفرحتك هذي .. بس انا لاحظت تطرقك للمفترشين في الحج والمفترشين هم ناس جاؤو بدون تصريح رسمي والافتراش يعيق حركة الحجاج مثل ما تعرف .. وانا من مؤيدين الإلتزام بالتصريح الرسمي للحج عشان ما احد يأخذ مكان غيره ويسبب ازدحام غير مبرر خصوصاً انه حج قبل كذا ..وخمس سنوات مش مشكله لو انتظرتها عشان تكرر حجك وهذا عشان تفسح المجال لإخوانك المسلمين في كل مكان من أداء الحج بيسر وسهوله .. صدقني ياأخي إن هناك ناس في كل دول العالم يتمنون انهم يأدون فريضة الحج ولكنهم لا يستطيعون هذا ..انت محظوظ ان ربنا اكرمك بالحج :) حج مبرور وذنب مغفور يا اخي الفاضل وتقريرك رائع جداً

في امان الله

جمعاوى روش طحن يقول...

إزيك يا عم الحج ...

(:


حج مبرور وذنب مغفور إن شاء الله

(أم البنين) يقول...

ما شاء الله
أسأل الله أن يرزقك مقام المتقين أخي الكريم
وأن يكرمك بلذة النظر إلى وجهه والشوق إلى لقائه

خمسة فضفضة يقول...

السلام عليكم ورحمة الله وبركاته

رجعتني لاحلي ايام واحلي احساس

يارب ما تحرماش زيارة بيتك الحرام ابدا ما حيينا
ويارب نكون جميعا صحبه في حج السنه دي

سلام

مهندس مصري يقول...

سومة مجنونة في بلد عاقل
======================
:))
آميين
و عقبالك

كيارا
=====
طيب يا ستي حججناكي و إنتي قاعدة مطرحك شوفي بقى وفرت عليكي قد إيه
:)
آميين

ربما تشرق الشمس
================
ما تعلق بأكاونت المدونة بتاعتك يا عم أحمد !!!
آميين يا سيدي و نكونوا جماعة مع بعض

علي محمد
========
و عليكم السلام و رحمة الله و بركاته
شكراً على توضيح مسألة الباصات
و صدقني يا أخي لو قمت بالحج بدون تصريح فلن أفترش الطرقات بل سأقوم بتأجير مسكن بالعزيزية
:)
شكراً مرة ثانية و ربنا يرزقنا الحج معاً إن شاء الله

جمعاوي روش طحن
==============
الحمد لله
:)
آميين

أم البنين
==========
آمييين
شكراً :)

خمسة فضفضة
==========
و عليكم السلام و رحمة الله و بركاته
آميين يارب آميين
يااااه
دا أنا كنت إفتكرتك نسيتي مدونتي من طول غياب تعليقاتك يا دكتورة
الحمد لله إنك لسه فاكراها
:)
الله يسلمك

mahasen saber يقول...

بلاش كروته يا سلام عليك يا هندسه

اخبارك ايه يا محمد تعرف انك ليك وحشه جامده بجد
اخبارك ايه يا رب تكون بالف خير وصحه وستر

نزلت المناسك اخيرا

ربنا يتقبل منك ويوعدنى ويوعد كل من تتوق نفسه لهذه الزياره الطاهره

ربنا يتقبل

احمد سعيد يقول...

يا عينى
انت عارف
طول عمرى بدوخ فى مناسك الحج دى
مش بعرف راسى من رجليا
مش عارف انتو بتظبطوا الترتيب والمناسك فى الزحمه دى ازاى
انا بس ربنا يكرمنى كدة واروح
وربنا يسهل هناك
هههه

عندى هنا الحاج والحاجه لما ربنا كرمهم
فضلوا يتعلموا فى المناسك
واحكامها قبلها 3شهور


عموما ربنا يتقبل
وعقبالنا يااااااااااااااااااااارب

Gannah يقول...

انت ليه عملت فيا كده؟؟
فكرتنى بالايام الجميلة دى
انا دلوقتى عايزة اطلع احج
وبصراحة لو عندى فرصة السنة الجاية وربنا قدر وكنت موجودة هنا هطلع مش هكدب واقول سألتزم بالتصريح
انا شخصيا اللى بيصبرنى العمرة بس سبحان الله الحج له روح تانية
انا برضه مشيت كتير قوى ورجعت مكسرة
بس الحمد لله
والله دى نعمة كبيرة
شكرا للذكريات الجميلة
ربنا يتقبل ويجعل لنا عودة
تحياتى

Ahmed Mansour يقول...

دعوة للتدوين باللغة العربية الفصحى

مهندس مصري يقول...

محاسن صابر
==========
:)
الحمد لله أنا تمام و زي الفل
و لا ينقصني غير رؤياكم كلكم
أهلي و أصحابي و بلدي
معلش على التأخير
آميين

و إن شاء الله ترتبوا لي لقاء مدونين في الأجازة أشوفكم كلكم فيه
و ساعتها بقى حأعرفكوا بوستات تغطية اللقاءات تتعمل إزاي
دي كانت لعبتي قبل ما اسافر
:))

أحمد سعيد
========
عقبالك إن شاء الله
و ما تحملش هم لو جيت و أنا موجود حأديك كورس مناسك ما يخرش المياه
بس إبقى شوف حلاوتنا كام في الحوار ده
هههههههههههههههههههه

جنة
====
أصل أنا كنت وعدت بنشر الجزء التاني
و وعد الحر دين عليه
:)
و انا برضه ناوي زيك
آميين

أحمد منصور
==========
حاضر حأشوفها

الفاتح الجعفري يقول...

سلام الله عليكم ورحمته وبركاته
ماشاء الله
ربنا يتقبل منك يابشمهندس
ويرزقنا ويرزقك زيارة بيته الحرام المرات بعد المرات والاعوام تلو الاعوام
ويمن عليك من فضله ويجعلك كما تحب وترضي
وجزاكم الله كل خير علي هذه البوستات الرائعه

محمد سعد القويري يقول...

الأخ مهندس مصري
حج مبرور
يمكن متأخرة إشوي

استمتعت كثيرًا بقراءة هذا البوست

وشعور الرجوع للملابس العادية
شعور لا يوصف


تقبل الله منا ومنكم
تحياتي
ـــــــــــــــــــ
ملحوظة : لقد قمت بوضع رابط مدونتكم على صفحتي ، وأسعد بالتواصل معكم

مواطن مصرى نايم يقول...

ربنا يتقبل يا رب
و يكتبهالهنا جميعا
و كل سنة و انت طيب

mohamed ghalia يقول...

ربنا يتقبل ويرزقنا الحج إحنا كمان
دمت بكل الود دمت فى سعادة

مهندس مصري يقول...

الفاتح الجعفري
=============
و عليكم السلام و رحمة الله و بركاته
آميين
و جزاك كل خير
:)

محمد سعد القويري
================
آميين
و أنا أيضاً يسعدني التواصل معك
و قد أضفت مدونتك عندي من إسبوع تقريباً

مواطن مصري نايم
===============
آميين
و انت طيب و بخير

محمد غالية
=========
آميين
الله يكرمك يا محمد