الاثنين، فبراير 02، 2009

شهر و نص في موقع بزاخة - حائل

بسبب تصليح اللاب توب بتاعي فمش حأقدر أنزل البوست بتاع الجزء التاني من الحج دلوقت علشان كل صورالحج عليه
لكن بعد الحج كان زميلي و بلدياتي المهندس أحمد اللي معايا في الشغل و في السكن نزل مصر في أجازته السنوية لمدة شهر و أنا إستلمت مكانه في الشغل لحد ما يرجع
إستلمت مكانه في موقع خزان مياه بزاخة و إستلمت عربيته
و بزاخة ده موقع بنبني فيه خزان مياه سعته 50 ألف متر مكعب و يبعد عن مدينة حائل بحوالي 75 كم
فكان الواحد بيسوق المسافة دي كل يوم رايح جاي و ده طبعاً ساعدني في تحسين مهاراتي في السواقة خصوصاً إن دي اول مرة أستلم عربية من ساعة ما أخدت رخصة السواقة بتاعتي هنا
كان الواحد بينزل من السكن الساعة 7 و نص الصبح و يوصل الموقع على 8 و ربع فنشوف أمور الشغل إيه لحد الساعة 3 الا ربع نقوم نروح فأوصل البيت حوالي 3 و نص الا لو عديت على المكتب و أنا راجع من الموقع فكنت بأقعد هناك لحد الساعة 4 و بعدها أروح

الموقع بتاع بزاخة ده فيه خزانين زي بعض بالضبط
واحد أحمد خلصه و أنا حضرت تشطيباته الأخيرة و التاني الجديد لسه بادئين فيه من شهر تقريباً
المشكلة إن منسوب موقع بزاخة أكتر من 1200 م فوق سطح البحر فدرجة الحرارة منخفضة شويتين تلاتة :)
و في مرة من المرات لقينا المياه متجمدة و تحولت لتلج في الحنفيات و خراطيم المياه لإن درجة الحرارة بالنهار بتبقى في حدود من 10 لـ 14 درجة لكن بالليل بتوصل لـ من -6 لـ -10 تحت الصفر
:)
درجات حرارة غريبة و مش متعود عليها في مصر
و رغم كده المطر قليل هنا و مش بينزل غير بصلاة الإستسقاء اللي بتقام في المساجد بأمر من الملك لما تشتد الحاجة للمطر في هذه الصحاري
إنما الواحد متعود على المطر الغزير في دمنهور و الرطوبة و الدفا اللي بعد المطر مش البرد الجاف اللي هنا ده

بعد رجوع أحمد من الأجازة رجعت موقع الشقيق القديم بتاعي طبعاً لكن في آخر يوم ليا في بزاخة خليت أحمد يصورني شوية الصور دول كنوع من الوداع للموقع


ورايا مكان الخزان الجديد و في الخلفية ورايا بعيد الخزان القديم




إختبار نسبة دك التربة في إحدى طبقات الردم أسفل الخزان


أعمال العزل المائي للخرسانة العادية بالأرضية بالبيتومين و رولات البولي إيثلين بسمك 4 مم


أعمال حديد التسليح في أحد الارضيات الخرسانية المسلحة بالخزان


مكتب المقاول في الموقع


تخليص الورقيات بتاعة الشغل


فوق سطح الخزان القديم و شغل أرضيات الخزان الجديد في الخلفية


فوق سطح الخزان القديم و تشوينات مواسير الخط القادم من محطات الضخ بالشقيق الى خزانات بزاخة في الخلفية

في العربية :)


فوق القمة


عند شجرة من القلائل الموجودات بالصحراء

و الخلاصة إن الشهر و نص بتوع بزاخة كانوا مدة كويسة بس كانوا في عز الشتاء و التلج و البرد
لكن الواحد دلوقتي رجع لموقعه الأولاني بعد عودة أحمد من الأجازة و طبعاً بقى من غير عربية و بقيت أروح الشغل مع البشمهندس عبد الخالق في عربيته بس كده أحسن
خلي كل واحد في موقعه اللي عارفه و متعود عليه

و اول ما يرجع لي اللاب توب بتاعي حأكتب و أنشر الجزء التاني من تفاصيل الحج بالصور إن شاء الله

هناك 28 تعليقًا:

أحسن شاب في البلد يقول...

صور جامده جدا
جبال و صحرا و بتاع
ربنا يستر و ما يبعتونيش في حتة كده
يالا .. تيجي بالسلامة ان شاء الله

mahasen saber يقول...

حمد الله على السلامه يا باشمهندس
وعودا حميدا لموقعك القديم ولاا ااقول موقعك الاصلى

بس نقلتلنا صور حلوه لحياة ومعاناة المهندسين فى الصحرا

عارف يا محمد انا استغربت قوى قوى موضوع الجو البرد بالذات فى النهار طب فى اليل ممكن عشان المناخ الصحراوى انما بالنهار
بس بجد دايما بستمتع بقرايتى ليومياتك فى الموقع باخد فكره حلوه وصوره ممتعه عن حياة المهندسين وعن ظروف عملهم

ربنا يصلح حالك ويرزقك بعربيه فرارى بس تمشى فى الصحرا ازاى براحتها طبعا

fashkool يقول...

كل البوست طبيعى .. بس هى الشجره اللى فى الصحراء ودى حاجه مش متعود عليها فى قلب الصحراء فى السعوديه
تحياتى

عالم حبيب يقول...

جميل أوي يابشمهندس البوستات اللي بتكون طبيعية دي .. ربنا يقويك .. أظن الأيام دي أحلى أيام في الخليج .. هنا الجو جميل ما شاء الله .. متهيألي في السعودية كمان .. ربي يوفقك ياهندسة ونرجع بالسلامة :)

عالم حبيب يقول...

صحيح .. بمناسبة الرخصة والسيارة .. تعرف أنا أخدت الرخصة هنا من شهرين تقريبا ولسة هأكتب إن شاء الله عن الحدث التاريخي ده .. رخصة دبي مشكلة والله .. كأنك بتاخد رخصة طيارة .. يعني صرفت عليها يمكن 9000 درهم .. وبعد ما أخدت سيارة من الشركة كل يوم مخالفات شكل .. بيخترعوا مخالفات علشان يلموا فلوس .. فإنت اركب مع حد أحسنلك :)

كيــــــــــــارا يقول...

ربنا يعيييييييييييييييييينك بجد

محمد مارو يقول...

السلام عليكم

انا اسف اول مره اضع اعلان لموضوع معين بس بجد ده كارثه

لا اتمنى منك فقط مجرد الرد بل اتمنى ان تنشر الموضوع على قدر استطاعتك فهو يهدد كثير من الناس
الموضوع على مدونتى
و للمره التانيه انا بعتذر على الاعلان و دى اول مره و الله اعملها بس الموضوع بجد خطير و اتكرر كتير
تقبل اسفى و تحياتى

fahd يقول...

كان الله في العون يا هندسة

اجمل حاجه في المواقع دي ان حجمها كبير فتكون الخبرة علي حجم العمل الضخم

ربنا يوفقك وترجع دمنهور الدافئة مرة اخري سالما غانما

عالم حبيب يقول...

بأقولك يابشمهندس

جزاك الله خير على الدعوة

أنا سجلت في الموقع وطلب رقم الموبايل حطيته وأرسلي التأكيد وبعدين حطلي رقم كدهاللي هو
+467374940501

ايه الرقم ده

بعد كده جابلي لستة فيها ناس اخترتهم وبعدين جابلي الصفحة فيها ممكن اكتب رسالة

هل لو بعت رسالة هاتروح للناس على موبايلاتهم ؟ ولو بعت حد رسالة هاتوصلني على الموبايل او لازم أعمل حاجة علشان اقدر استقبل الرسائل



باقولك ايه ما تعمل شرح للجايكو أحسن : )

محمد الجرايحى يقول...

أخى الفاضل: مهندس مصرى
السلام عليكم ورحمة الله وبركاته
أحيى فيك جلدك وصبرك وإخلاصك فى العمل
ونشكرلك أنك أشركتنا معك فى التواجد فى هذا الموقع من خلال الصور والشرح الوافى
وفقك الله وسدد خطاك
اللهم آمين
أخوك
محمد

عالم حبيب يقول...

بعد شوية تقليب .. توصلت إلى إن استقبال الرسائل على الموبايل من

Settings / Notifications

بس هل هي مجانا ولا برسوم

:)

عصفور المدينة يقول...

اسمريت وسمنت شوية
صححح؟؟
يبقى أكيد بتشرب مشروبات غازية
ربنا يرعاك في حلك وترحالك يا هندسة

مهندس مصري يقول...

أحسن شاب في البلد
=================
ربنا يسهل و ييسر لك الجيش يا سيادة ضابط الإحتياط

( وش بيعمل تعظيم سلام و بيضحك )

آميين

محاسن صابر
==========
الله يسلمك
الموقع فوق الجبل يا ستي و ده سبب البرودة الشديدة
الحمد لله إن الموضوع عجبك
و يسمع منك ربنا بس مش ضروري فيراري أنا راضي بقليلي
:)

فشكول
======
ما هي الشجرة دي موجودة بس قليلة
أصل السعودية واسعة قوي و كلها صحراء و كل منطقة فيها ليها الصحراء بتاعتها
نورت يا أستاذنا

عالم حبيب
========
هنا الجو برد
بس بدأ يتحسن شوية في فبراير
لا انا ما أخدتش غير مخالفة واحدة بس لغاية دلوقت
و أنا عارف إن رخصة دبي أصعب من هنا رغم ان هنا صعب برضه
بس رخصة دبي تسوق بيها في أي دولة في العالم

كيارا
=====
آميين

محمد مارو
=========
و عليكم السلام و رحمة الله و بركاته
شفت الموضوع عندك

فهد
====
آميين
و كان في عونك برضه يا رافع رايتنا في السودان
:)

عالم حبيب
=========
أنا رديت عليك في الإيميل

محمد الجرايحي
===========
و عليكم السلام و رحمة الله و بركاته

آميين لكل دعواتك و لك مثلها إن شاء الله

بس أنا ما استاهلش كل الكلام الحلو ده
أنا بأروح شغلي الصبح عادي زي أي حد بيشتغل و أرجع العصر عادي جداً

الله يكرمك يا أستاذ محمد

عالم حبيب
=========
الإرسال بفلوس و الإستقبال ببلاش

عصفور المدينة
=============
يااااه
أخيراً شرفتنا يا بشمهندس
دي خطوة عزيزة والله
حضرتك اللي تقدر تحكم على تغيراتي الشكلية أكتر مني
بس ممكن سمنت من الأكل السمين هنا
و إسمريت من وقفة الشمس الكتير

و تأكيدك في غير محله أنا مش بأحب المشروبات الغازية و بأشربها في أضيق الحدود لكن بأشرب علبة لبن بالشيكولاتة صغيرة كل يوم الصبح

آميين يا بشمهندس
و يكرمك ربنا يارب
بس ما تغيبش علينا كده علشان بتوحشنا قوي

Soooo يقول...

شغالين ليه بالبولي ايثيلين ياهندزا .. ماتقضوها خيش مقطرن كما تعودنا نحن واباؤنا السابقين
!!!
وبعدين هم ادوك عربيه وانيت مش عربيه روفر ليه ؟؟؟
وعلى كده تلاقي الناس بتقعد تناديك وتقولك يا راعي الوانيت
هههههههه

بس الله ينور ياهندزا بجد
هو الخزان ده .. معمول عشان يشيل بيبس؟؟؟؟






سلامووووووووووووز

م/ الحسيني لزومي يقول...

اقرأ نص اتفاقية منع تهريب السلاح لغزة
وادعوا الله ان يثبت مصر في عدم التوقيع عليها

مهندس مصري يقول...

سوو
====
عيب عليك
إحنا شغالين على آخر صيحة في عالم الإنشاءات

ثم ما إسمهاش هنا وانيت
إسمها بيك أب غمارتين
:)

دا خزان مياه شرب يا عمونا

م / الحسيني لزومي
================
قريتها من زمان و مصر مش طرف فيها
بس هيا مش محتاجة تمضي على حاجة لإنها ماضية على بياض من زمان

FreeKiller يقول...

ارجوك يا بشمهندس تسلملي على حايل

لحسن وحشتني مووووووت

هيء هيء هيء

اسامه عبدالعال يقول...

هههه ايوه شكلك ابتدي يقلب اهو فكرتنى باشكالنا فى السعوديه
وايه رايك فى البرد مش قلتلك هتنشف اي خدمه
ربنا معاك ويعينك

Ahmed Shokeir يقول...

والله كويس إنك بتاخد الشغل في المواقع الصعبة دي ببساطة كده ، وقادر تأقلم نفسك عليها .. بالتوفيق دايما

dodda يقول...

انا ملسوطه بالبوست اوى:)
حتقولى ليه؟؟ حقولك مش عارفه!!!
بس انا هندى احساس معين خاص بكل مصرى مغترب...
يعنى بحس انه من اهلى....

الصوره بتاعه الشجره فعلا تحفه سبحان الله!!
الحمد لله انها مش بتمطر ده من رحمه ربنا
لو مطرت فى الجو ده حتتزحلقوا ع الجليد...
ربنا يوفقك والحمد لله انك رجعت لموقعك

.

طالب ثانوى يقول...

حمد لله على السلامة يابشمهندس بس اية حكاية التلج و الميا المجمدة حسستنى انك فى موسكو

وبالنسبة لصلاة الاستسقاء علشان تعرف اننا فى نعمة

مهندس مصري يقول...

القاتلة الحرة
============
ما أعرفش حد في حائل ينفع أسلم عليه بالنيابة عن حائل كلها
:)

اسامة عبد العال
================
ربنا يسترها

احمد شقير
========
يا سيدي
:)
أصل ده العادي هنا يا هندسة
ربنا يوفقنا جميعاً

دودا
=====
شكراً
ربنا يكرمك يارب
:)

طالب ثانوي
===========
بتتريق
موسكو
صبرك بس لما اللاب توب بتاعي يتصلح و حأوريك صور المياه المتجمدة في الحنفيات

و مصر هبة النيل يا بني
لولا النيل كان زمان مصر بقت زي ليبيا كده

FreeKiller يقول...

طيب كنت سلملي على برج حائل

ما علينا

بس صور جامده بجد
ربنا يوفق حضرتك دايما
:)

مهندس مصري يقول...

القاتلة الحرة
=============
حاضر
:)
و أحلى سلام على طول السلام للبرج بتاع حائل اللي مش برج يا جدع

شكراً
آميين
و يكرمك ربنا يارب

abu_saeef يقول...

الله يوفقك يامهندس مصري والله من جد وحشتني لديرتي تدري ان الجبل الي كنت في اعلاه في الصوره هذا كان مكان طلعاتي انا واهلي كل يوم خميس اه يالدنيا صار لي سنتين ماجيت السعوديه الله يرجعني سالم ان شاء الله والله يوفقك بعملك وان شاء الله تكون رجل مخلص وان شاء الله ترجع بالسلامه لمصر
مع السلامه

اليتيمة يقول...

السلام عليكم ةرحمة الله
ازيك يا هندسة00اختك هندسة برضه بس بربي العيال دلوقتي والهندسة في الدولاب وقريبا هاتروح المتحف00نورت السعودية كلها ويارب تبقي مثل يشرفنا دايما00حبيت ابعتلك رابط منتدي حائل الي ذكرت فيه مدونتك او يومياتك
http://www.hyil.com/vb/showthread.php?t=146625

مهندس مصري يقول...

أبو سيف
========
شكراً جزيلاً لك
أعادك الله إلى أهلك و وطنك سالماً غانماً
و هون عليك غربتك في أمريكا

آميين

اليتيمة
========
و عليكم السلام و رحمة الله و بركاته
نورتينا يا بشمهندسة
ربنا يبارك لك في العيال و أبوهم
شفت الرابط و حأرد عليهم
:)
عموماً مش هو ده بس الموضوع الوحيد اللي كاتبه عن حائل
بصي في العمود الجانبي و إضغطي على رابط حائل في التسميات حيفتح لك كل المواضيع اللي كتبتها عن حائل

مهندس مصري يقول...

أحمد الشمري
===========
أستغفر الله العظيم
غفر الله لك يا أخي في الإسلام و العروبة
يبدو أنك لم تفهم ما قلته جيداً
أنا قلت صلاة الإستسقاء لا تقام إلا بأمر من الملك
و بعد الصلاة يستجيب الله سبحانه و تعالى لدعاء عباده المسلمين و يرسل الأمطار

أرجو ان توضح لي متى قمت بجحد نعمة حائل ؟
و في أي جملة بالضبط
لقد قمت بكتابة كثير من المواضيع عن حائل و ذكرياتي بها و كلها ذكريات جميلة
و حائل بلد جميلة و أحبها كثيراً

و أتمنى منك التروي يا أخي و قراءة الموضوع جيداً قبل التعليق