الثلاثاء، مارس 24، 2009

قواعد المرور في القاهرة الكبرى - تحديث

تحديث

تذكرت أنني قد قرأت معظم هذه القواعد من قبل من 10 سنوات تقريباً في موقع نكت نص كم و بالبحث وجدت الموضوع الأصلي مع عدة مواضيع طريفة أخرى عن المرور في الروابط التالية

قواعد المرور

قواعد المرور 2

الشمبرلاح

المقبات الصناعية

أرض الحرية

أفيال و ذئاب

نكت مرورية

========================

وصلتني هذه الرسالة بالبريد الإلكتروني

قواعد المرور بالقاهرة الكبرى

القاعدة الأولى:
لو عربيتك كبيرة أو قديمة، أستخدم المبدأ القانوني: اللي خايف على عربيته يوسع!!

ملحوظة: ابعد عن سكة العربيات المخرشمة ، بيسوقوا بنظرية ضربوا الأعور على عينه!!


القاعده الثانيه:
قاعدة البوز بيز:اللي يدخل ببوز عربيته الاول للتقاطع هو صاحب أولوية المرور! احرص على أن تكون صاحب أول بوز.
ملحوظة: لا تطبق الـبوز بيز مع أي لوري أو أتوبيس، حرصاً على بوزك لا مؤاخذة.




القاعدة الثالثة:
الإشارات تكشف نواياك للأعداء، أياك أن تستخدمها!



القاعدة الرابعة:
لا تترك مسافة للأمان بينك و بين السياة التي أمامك فهذا له عدة مخاطر:


1
عربية ثانية حتملا الفراغ في ثواني و برضوه ما يبقاش فيه مسافة بينك و
بين الي قدامك، كل الي كسبته انك اتأخرت لورا شوية.

2
حتدي فرصة للعيال يعملوا غرز قدامك.

3
كل المشاة حيغمضوا عينيهم و يعدوا من الحته دي.

4الي وراك حيقعد يزمر - لو كان مؤدب -
أو تسمع شوية أسامي حيوانات لو كان سواق تاكس - مؤدب - ،
أو حيخبطك من ورا لو كان سواق ميكروباص - و دول مفيش حد منهم مؤدب -.

الإشارات مش معمولة علشان تنظم المرور ، معمولة علشان شكل القاهرة يبقى متحضر بس!

اعتمد على العساكر ( مع تحملك كامل المسؤلية لو واحد منهم شاورلك تعدي و بلدياته الناحية الثانية فتح السكة للوري ) أو يفضل أن تستعمل البوز بيز ( راجع القاعدة الثانية (.



القاعدة الخامسة:
اذا كنت مش واقف في الصف الأول في الاشارة اعمل حسابك تزمر بشكل متواصل و هستيري أول ما الأشارة تفتح، لأن الناس الي قدام بيبقوا واقفين في
الاشارة من زمان و جايز جداً يكونوا ناموا!!



القاعدة السادسة:
معظم الحوادث تحدث في التقاطعات أول الأشارة ما تحمر، كل ما عديت الإشارة الحمراء أسرع كل ما قلت فرصة انك تتخبط!



القاعدة السابعة:
الشارع مكان مقرف، سوق بأسرع ما يمكن حتى تتخلص من هذا الهم بسرعة، الناس الي ماشيين بالراحة مرضى نفسيين بيستمتعوا بالعذاب ، يستاهلوا الي يجرى لهم.



القاعدة الثامنة:
من حقوقك الدستورية أن تركن أمام باب المحل الذي تريد أن تشتري منه، اذا
سبقك واحد ابن ستين في سبعين و ركن قدام الباب، فمن حقك أن تقفل عليه و تركن صف ثاني أو ثالث، و مش مهم لو الشارع اتقفل، ايه يعني أما الناس تتعطل عشر دقائق علشان تستمتع بحقوقك الدستورية؟ هيا يعني الدنيا طارت ولا كان وراهم الديوان؟


القاعدة التاسعة:
من حقك أيضاً أن تخرج من مكان انتظارك في أي لحظة تشاء، اكسر الدركسيون شمال و اطلع، أي حد ماشي في الشارع لازم يقف لك فوراً، راجع البند السابق.



القاعدة العاشرة:
إحترس من ثلاث أنواع من السائقيين بيسوقوا و كأنهم مش ممكن يموتوا:

1.
العيال الروشين الي بيلعبوا Computer Games فاكريين إن ممكن يكسبوا
Life
زيادة لو ساقوا أسرع

2.
موتوسيكلات توصيل الطلبات ( Home Delivery ).>
3.
سواقين الميكروباص.

ملحوظة: إوعى تحاول تثبت لحد منهم إن فكرته غلط. فاهمني!!!.




القاعدة الحادية عشر:
لما تشوف حادثة لازم تهدي و تتفرج - مش مهم تساعد - الحاجات دي دمها أخف من الأخبار المملة بتاعة التلفيزيون، و بعدين لما الطريق وراك يقف تحمي المجتمع من حادثة تانية.



القاعدة الثانية عشر:
الكناسين لازم يحللوا اللقمة الي بياكلوها، حاول تنفعهم و ترمي أي حاجة من الشباك.



القاعدة الثالثة عشر:
لما تخلص سيجارة أوعى تحطها في الطفاية، ارميها من الشباك أول ما تشوف واحد بموتوسيكل معدي جنبك ( علشان يحرم يعمل غرز (


القاعدة الرابعة عشر:
من حقك أن تعبر الشارع في أي وقت و من أي مكان.



القاعدة الخامسة عشر:
اذا كان هناك سيارة قادمة اعمل نفسك مش واخد بالك و عدي براحتك خالص، ما تخافش، هوا حيقف، هو اهبل يدوسك و يودي نفسه في داهية؟



القاعدة السادسة عشر:
اياك أن تنظر نحو السيارات القادمة، أعبر الطريق و ظهرك لها حتى لا يشك أحد قائدي السيارات أنك تراه و يحاول يخوفك علشان تقف انت.

-

القاعدة السابعة عشر:
حتى لو شفته أوعى تخاف - خصوصاً لو معاك بنت - تبقى راجل ملو هدومك و تخاف من حته عربية؟

عرض قفاك و سيبه يتفلق.


القاعدة الثامنة عشر:
الرصيف ليس للمشاه، بل لركن السيارات و فرشات الباعة الجائلين و المحلات... الخ، لذلك يحق للمشاة السير في وسط الشارع، لمزيد من الأمان،
راجع القاعدة السابقة.



القاعدة التاسعة عشر:
إذا كان الماشي من فئة النقل الثقيل، فمن أبسط حقوقه إنه يمشي على أقل من مهله و يهتز براحته. واللي مش عاجبة الهز يدور على لوري يخبطه

هناك 10 تعليقات:

لقد خلقنا الله احرارا يقول...

اول ما قريت العنوان افتكرت حضرتك رجعت مصر خلاص بس ملحوقة ان شاء الله --- بصراحة الكلام صادق جدا وغير مبالغ فيه اطلاقا على عادة اسلوب السخرية بس هو ناقصه كلام شويه كمان على الميكروباصات حاجة مش ممكن--انا من يومين ركبت واحد مشوار اقل من عشر دقائق تزلت قولتله اللىيركب معاكم تانى يستاهل اللى يجراله--عمل كل حاجة مشى بسرعة غبية وعكس الاتجاه ونظرية البوز وكان هيتقلب فى الملفات ونزلنى بعيد عن الموقف بمسافة طويلة ونصب علينا فى الاجرة اللى مش محددة وعلى حسب مزاج سعادة البيه--بس مفيد فى حاجة بيشجعك على التقرب من الله لانى فى الوقت القليل ده مابطلتش دعاء اللهم انا نجعلك فى نحورهم ونعود بك من شرورهم

احمد سعيد يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

فكرتنى بأيام العز

Ahmed Mansour يقول...

ايه يا قنديل
انت ناوي تسوق في مصر في الاجازة ولا ايه
بس اوعى تسوق فيها هههههههههه
اجازة سعيدة ان شاء الله

مهندس مصري يقول...

لقد خلقنا الله أحراراً
====================
ملحوقة كلها إسبوعين تقريباً و أكون في مصر

و ممكن تلاقي بقية اللي قلتيه ده في التحديث و اللينكات بتاعته
:)

أحمد سعيد
==========
إضحك كركر
اوعى تفكر
:))

أحمد منصور
==========
مفيش عربية في مصر
آخري حأسوق الجزمة اللي لابسها في رجلي
:)
إن شاء الله يا أحمد
عقبال أجازتك

سومه...مجنونه فى بلد عاقل يقول...

الرسايل دى جاتلى ميل قبل كدا وضيف ليها مقاله بطوط الحل الخابور لحل مشكله المرور
عشان بصراحه موضوعه اكتر حاجه عجبتنى عن المرور
:)

مجداوية يقول...

السلام عليكم

اللي يقرأ ده لازم يضحك عشان الكلام بيضحك جداو لأنه رصد حقيقي جدا أنا ممكن أكمل عليه بعض القواعد كنت كتبتها من قبل

* اذا كنت تسير ليلا ورأيت ورائك نورا متقطعا أو ثابتا فلا تحيد عن وسط الطريق وانظر خلفك كما تفعل دائما لتتأكد أن هذا النور ليس صادرا من نور الايمان الذي بداخلك أو من مركبة فضائية هبطت هبوطا اضطراريا بل إنها مجرد سيارة فلا تعبأ وأكمل طريقك وتوصل بالسلامة


*اذا رأيت سيدة تسوق سيارة وتفسح لك الطريق فلا بد أن تستخدم الكلاكس بصورة مفزعة لها عشان تغور وتوسع كمان على أساس ان الستات مبيعرفوش يسوقوا والأفضل لهم يقعدوا في البيت بدل ما يزاحموا الرجالة حتى في السواقة


* السيارة ملك خاص لك( بفلوسي يا كلاب)فلك أن تضيق لها شاكمان توأم يصدر أصواتا مرعبة لمن حولك ووووررررر ,,وامبلفاير يجعل كل السيارات المحيطة بك ترتج على أنغام موسيقاك المفضلة


وقواعد مرورية أخرى لا أريد أن أسردها كلها والا احتاجت تدوينة

وطبعا لما تشوف ده بعينك تبقى أنت أكيد أكيد في مصر

:)
وشر البلية ما يضحك

بنوتة مصرية يقول...

اية ياباشا الروقان دة كلة
وعلى رايك اجدع حاجة اننا نسوق ماركة باتا ماعلهاش غرامة

مهندس مصري يقول...

سومة مجنونة في بلد عاقل
======================
ما قريتهاش للاسف
ممكن تجيبي لي اللينك
:)

مجداوية
======
و عليكم السلام و رحمة الله و بركاته

معاكي حق
و كم ذا بمصر من المضحكات و لكنه ضحك كالبكاء

:)

بنوتة مصرية
============
عقبال ما ربنا يروق بالك علطول
شوفي بقى البوست الجديد
:)

ملكة بحجابى يقول...

استفدت كتير وتقريبا طلع كورس السواقة اللى انا وخداخ فى سنتر ترالالى اوبشن اى كلام من انهاردة نسوق بقواعدك ياباشمهندس

ههههههههههه
تقبل مرورى وتحياتى ياريس

مهندس مصري يقول...

ملكة بحجابي
===========
دي مش قواعدي
دي منقولة من موقع نكت
:)
شرفتي المدونة