الجمعة، أبريل 24، 2009

مواصفات عروستي

ربنا كرمني الحمد لله و قدرت إن انا أقول في الأجازة دي إني عايز أخطب
الفكرة اللي الناس اللي مش فاهمين فاهمينها إني جاي على السريع آخد اي واحدة و السلام علشان الأجازة محدودة و الوقت ضيق

لا يا جماعة
الزوجة دي حتكون رفيقة عمر بحاله و حنعيش مع بعض كتير قوي إن شاء الله و لازم نفهم بعض و نستحمل بعض و نواجه مع بعض الحياة بحلوها و مرها و نكون عارفين إن هدفنا الاساسي هو إقامة بيت و أسرة ترضي الله سبحانه و تعالى و إننا نربي أولاد على المنهج الإسلامي الصحيح بحيث يراعوا ربنا في كل خطوة في حياتهم زي ما إحنا حنحاول نعمل كده و نكون قدوة حسنة ليهم

يبقى حأتأنى في إختيار الزوجة و حأشوفها في صالونهم مرتين و لا حاجة و لو حصل التوافق و القبول المبدأي يبقى نقدر نخطبها و أعرفها اكتر بقى عن طريق الإنترنت طول السنة الجاية و أنا في السعودية و العائلتين هنا في مصر يتعرفوا على بعض أكتر و يمتزجوا و يتوافقوا مع بعض اكتر
لإن الجواز مش واحد بيتجوز واحدة لا دي عائلة بتناسب عائلة و هل دي تصلح ام لأولادك و هل عائلتها يصلحوا أخوال لهم و هل إنت تصلح اب لأولادها و هل عائلتك تصلح أعمام لهم

مواصفات الزوجة اللي أنا عايزها
1 - متدينة
يعني تعرف دينها كويس و تراعي ربنا في معاملتها ليا و أنا برضه إن شاء الله حأراعي ربنا في معاملتي ليها
و تدينها برضه اكيد حيظهر تطبيق له في حياتها العملية و أبسط حاجة فيها إن يكون لبسها إسلامي ملتزم و محتشم
يعني تكون لابسة طرحة طويلة او خمار و لبسها واسع و تنطبق عليه شروط الحجاب الشرعي الصحيح ( لا يشف و و لا يصف و يغطى الجسد كله ما عدا الوجه و الكفين ) و ده مبدئياً بس
و يا سلام بقى لو حافظة جزء من القرآن و على معرفة بالحديث و الفقه يبقى 100 مية و انا بأقول تكون على معرفة مش عالمة فقه و شريعة لكن تكون على دراية بيهم و بأهميتهم و بعدها نستزيد سوياً أثناء حياتنا مع بعض في معرفة ديننا
أظن إني مش طالب المستحيل

2 - مثقفة
علشان يكون في بيننا أرضية مشتركة للحوار و يكون بيننا إهتمامات مشتركة و تكون عقليتنا في مستوى واحد او متقارب و ده يستلزم طبعاً إنها تكون مؤهل عالي على الأقل رغم إن المؤهلات مش هي اللي بتصنع الثقافة بس حتكون بداية جيدة
لكن مش حآخد واحدة بدبلوم - مع إحترامي لكل الناس - و اقعد اكلمها في حاجات هي مش فاهمها اصلاً و لا عايزة تفهمها

3 - مناسبة ليا إجتماعياً و مادياً
يعني تكون من نفس مستوايا لا أعلى منه و لا اقل منه سواء إجتماعياً او مادياً
يعني أنا باعتبر نفسي من الطبقة المتوسطة
أبويا موجه اول ثانوي ازهري تخصص مواد فقهية و شرعية سابقاً و بالمعاش حالياً
و امي ست بيت بس مثقفة جداً و ابوها كان موجه و خريج الأزهر برضه
و أنا الإبن الكبير و ليا اخت اصغر مني بسنة خريجة تجارة قسم محاسبة و متجوزة و عندها بنتين
و أخ اصغر مني بـ 3 سنين خريج هندسة ميكانيكا قوى و مجند في الجيش حالياً

عايز بقى أسرتها من نفس مستوانا ده و تكون مربياها برضه زي ما اهلي ربوني على قال الله و قال الرسول - صلى الله عليه و سلم - و على الحلال و الحرام و على تقوى الله
مش بأقول إني ملاك و بلا ذنوب بس بأقول إني بأحاول و عايز زوجة تساعدني على طاعة ربنا و عمل كل ما يرضي الله و تكون كما يقول الحديث الشريف : ( إذا نظر إليها سرته و إذا امرها أطاعته و إذا غاب عنها حفظته في نفسها و ماله و ولده )

و الحديث المشهور بيقول
روى أبو داود والنسائي عن أبي هريرة رضي الله عنه: قال النبي صلى الله عليه وسلم: "تنكح المرأة لأربع لمالها ولحسبها ولجمالها ولدينها فاظفر بذات الدين تربت يداك"

أنا بقى عايز ذات الدين اللي تكون من عائلة مناسبة
و إن شاء الله عايزها تقعد في البيت لإن صاحب بالين كذاب و انا عايز زوجتي تتفرغ ليا و للأولاد لإن شايف عمل المرأة بيتعبها جداً و بيشتتها عن زوجها و اولادها و انا كفيل بمصاريف البيت كلها و مصاريفها الخاصة و لو إتفقنا إننا إحنا الإتنين حنراعي ربنا في بعض يبقى مفيش داعي نخاف من بعض و نخون بعض و تبقى هيا باصة لشغلها على إنه ظهرها و سندها لأ أنا ما أقبلش التفكير ده

و مع كده برضه رغم إنها حتقعد في البيت لازم تكون متعلمة و مثقفة علشان نتوافق فكرياً و تعرف تربي العيال كويس و لو مت و لا حصل لي حاجة تقدر ساعتها تنزل تشتغل و تصرف على العيال و ما تتحوجش لأي حد

يبقى انا عايزها متدينة - مثقفة - متعلمة تعليم عال - من اسرة مناسبة و عائلة محترمة -تقبل الجلوس في المنزل و عدم العمل بعد الزواج - مقبولة شكلاً

البعض حيقول لي ما إتكلمتش في الجمال و ده ردي عليها إن انا عايزها مقبولة و مش شرط تكون جميلة قوي و لا فائقة الجمال لإن انا نفسي مش شايف إني جميل او وسيم أنا شخص عادي و عايزها عادية زيي

طيب حد تاني حيقول لي يعني إنت ما قابلتش و لا واحدة طول عمرك بالمواصفات دي
حأقوله : مش عارف يمكن حصلت مرة او إتنين بس انا معنديش حلول وسط يا إما تقدر تتجوز يبقى تدخل البيت من بابه يا إما ما تقدرش يبقى اللي معاهوش ما يلزموش فعلشان كده طول ما كنت غير قادر مادياً على الزواج كنت بأتعامل مع كل الآنسات اللي بأقابلهم في الحياة سواء في الشغل او في غيره على إنهم إخواتي و باتعامل معاهم معاملة اخوية بحتة و ده كان اريح ليهم و ليا
لإني غير مؤمن بعلاقات الحب قبل الإرتباط الرسمي و اللي مش بيكون باين لها نهاية محددة خصوصاً في حالة عدم القدرة على الزواج لإني بأشوفها صياعة و قلة ادب و ضحك على عقول البنات و هي مدخل للشر و المعاصي

ما هو سهل إني أضحك على بنت و اقولها بأحبك و عايز اتجوزك بس إنتي شايفة الظروف خصوصاً إن فيه بنات ماشية تحب على نفسها و ما بتصدق و نعيش مع بعض قصة غرام و لا بتوع السيما
طيب و بعدين و آخرة الصياعة دي إيه ؟
أنا كنت حاطط قدام عيني دايماً الحديث القائل
روى عبد الرازق في جامعه عن أبي قلابة رحمه الله بسند حسن أن رسول الله صلى الله عليه وسلم قال: "البر لا يبلى, والذنب لا ينسى, والديان لا يموت, اعمل ما شئت, كما تدين تدان".

يعني اي شئ غلط حأعمله حيترد لي و اللي ما أرضاهوش لأختي ما ارضاهوش لبنات الناس فكنت ماشي حياتي مستقيم لا بأبص كده و لا كده لكن اول ما ربنا قدرني على الزواج قررت إني اكمل نص ديني
إزاي ؟
انا عايش في السعودية و من البيت للشغل و من الشغل للبيت ففرصة إني اشوف عروسة معدومة فطلبت من أمي و أختي يدوروا في معارفنا على عروسة مناسبة ليا و بالمواصفات دي و فعلاً جابوا لي قائمة بعرايس من معارفنا و قرايبنا البعاد و ابتديت آخد خطوات جدية و ربنا يسهل اللي فيه الخير

بالنسبة لجواز الإنترنت بقى فانا مش مقتنع بيه نهائياً لإنك في النت بتتحاور مع شخصية وهمية و محدش بيكشف على النت عن نفسه غير الحاجات الكويسة و عمر ما واحد او واحدة حتبان عيوبهم على النت ثم المعرفة من النت مش حتخلي الواحد يعرف عائلة عروسته و لا أحوالها الحقيقة و لا شخصيتها الحقيقية فعلاً
الإنترنت مليان خدع و إشتغالات و نسبة فشل الجواز منه أكبر بكتير من نسب النجاح فاللي بيفكر يتجوز عن طريق النت يبقى موهوم

ده رأيي و دي طريقة تفكيري اللي مقتنع بيها
دعواتكم بقى إن ربنا يسهل و أتوفق لبنت الحلال في الاجازة دي

هناك 61 تعليقًا:

لقد خلقنا الله احرارا يقول...

ربنا يكرمك ويوفقك للخير يارب انا بجد بفرح اوى لما اشوف شباب واعى ومتدين ربنا يكرمك ويفرحك قريبا ان شاء الله

د / ماهر محمود يقول...

ربنا يكرمك ياباشمهندس وتلاقيبنت الحلال المتدينة الجميلة المثقفة ذات الصل الطيب

عبدالله يقول...

لنفس الموقف الي انت فيه ده رفضت اسافر بره قبل ما اتجوز كل صحابي حصل فيهم نفس البهدله دي :)

ربنا يعينك ويوفقك للاختيار الصح عليك بالدعاء و الاستغفار و الاستخاره وربنا هيفتحها في وشك ان شاء الله

وكمان يا عم ما انت هتحضر لقاء المدونين في القاهره قريب اهه وصيهم بقي يشوفولك حد حسب المواصافات :)))

تحياتي

مسلم من مصر يقول...

السلام عليكم
كلامك يا أخى يذكرنى بحالى منذ سنة تقريبا,حيث كتبت على مدونتى مقالا بنفس الفكرة و نفس النقاط تقريبا سميته:صفات الزوجة,و تساءلت فى نهايته ان كنت سأجد فتاة أحلامى التى اريدها زوجا و سكنا لى و أما لأولادى.
و لأنى كنت فى غربة مثلك,و أعمل فى نفس المجال,و من البيت للشغل و من الشغل للبيت,فالموضوع كان صعب جدا, و لكن من تجربة سابقة كنت غير محبذ مبدأ زواج الصالونات, لكن الحمد لله ربنا كريم,و أنا الآن فى مصر و ان شاء الله على أعتاب ارتباط أسأل الله أن يتم على خير.
و ما أريد أن أذكرك به يا أخى,أنك لن تجد فتاة بها كل ما تتمناه,الا اذا عملت لها فرمة و صبتها على ايدك يا هندسة, اذا وجدت الفتاة التى تجمع 80% مما تريد,فالحمد لله حمدا كثيرا
أهم شىء أن تعى جيدا الأشياء التى يمكن أن تكون مرنا فيها, و الأشياء التى لا تنازل عنها.
و اذا تأخر الموضوع و لم يحدث نصيب خلال هذه الأجازة فلا تحزن فكل أمر المؤمن خير,و لنا كلام آخر و نصائح أخرى وقتها يا أخى.
ان شاء الله نسمع أخبار حلوة قريبا,و نبارك لك, ربنا يوفقك و ييسر لك كل امورك
و السلام عليكم

مهندس مصري يقول...

لقد خلقنا الله أحراراً
===================
آميين
و ربنا يفرحك كمان و كمان :)

د / ماهر محمود
==============
يارب
آميين

عبد الله
=======
يا بني ما هو الواحد ما إتحصلش على فلوس الجواز غير من بره
كان حيتجوز من غير ما يسافر إزاي و هو كان على الحديدة

بأقولك عايز واحدة عارف اصلها و فصلها و من عيلة نعرفوها و جواز النت فاشل غالباً تقولي المدونين يدوروا لك
ما تفهمني يا جدع

مسلم من مصر
============
و عليكم السلام و رحمة الله و بركاته

ربنا يوفقك و يكتب لك كل الخير

أنا عارف ان مستحيل الاقي 100% من المواصفات دي و حاطط في دماغي الكلام اللي انت قلته وعارف مواطن المرونة فين
:)
و لو ما حصلش نصيب في الأجازة دي يبقى الاجازة الجاية إن شاء الله
:)
لازم الواحد يختار صح شريكة حياته و أم اولاده لإنها حتكون شريكة العمر كله

جعلوني مريض نفسيا يقول...

ربنا يوفقك ويكرمك بالزوجة الصالحة

مجداوية يقول...

السلام عليكم
ربنا يوفقك إلى شريكة حياتك وتلاقي فيها كل الشروط والمواصفات

لفت نظري وأعجبني جدا واقعيتك وحكتك في وضع الشروط أو نقول المواصفات وأن شاء الله ربنا حيرزقك بانسانة كريمة تقر بها عينك

فمن توكل على الله فهو حسبه

بسمـــة مســـــلّم يقول...

السلام عليكم ورحمة الله وبركاته ربنا يوفقك يا بشمهندس بجد كويس ان لسه فى ناس ملتزمة كن واثقا الطيور على اشكالها تقع انا سعيدة بزيارتى لمدونتك .... متفقة معاك فى مبدأ الجواز على النت اللى طالع موضة ومبدا عدم الاستهتار بمشاعر الاخرين فى حالة عدم القدرة المادية او النفسية ان شاء اللله اباركلك قريب سلاااامى

خمسة فضفضة يقول...

السلام عليكم ورحمة الله وبركاته

الف مبروك مقدما يا باشمهندس ويارب تلاقي الزوجه الصالحه اللي تسعد ايامك

سبتلك رايي علي الجايكو

سلام

Ahmed Al khashab يقول...

اولا ربنا يبارك لك
و إن شاء الله أحصلك
ثانيا
أنا مش عايز الزواج عن طريق النت و أنا متفق معاك
بس انت قلت انك هتتعرف على خطيبتك من خلال النت
يبقى إزاى هتتعرف عليها؟؟!!!

mahasen saber يقول...

ياه اخيرا يا محمد هتخطب ربنا يكرمك باليى تتمناها وتستاهلك
وتكونوا لبعض ازواج الدنيا والاخره

انتا ابن ناس طيبييين وربنا هيرزقك بكل الخير ان شاء الله

امام الجيل يقول...

ربنا يعينك يا بشمهندس

وان شاء الله تبقى سفرية موفقة
وتفى بالغرض

للاسف فعلا السفر دى من بعض عيوبه
الاختيار وضيق الوقت

بس ان شاء الله فى وقت قليل تقدر تختار صح اعانك الله

ورزقك خيرا مما تحب وزيادة

Gannah يقول...

تصور أنا أول ما قريت العنوان على الريدر افتكرت انك لقيتها وجهزت نفسى للتهانى
يارب يكرمك بالزوجة الصالحة اللى فيها كل اللى أنت عايزه وزياده كمان ..ربنا سبحانه وتعالى جوائزه للصابرين دائما ما تفوق تصورهم
وكفاية أنك بتتقى الله فى بنات الناس
يالا بقى علشان أبارك بجد
ربنا معاك
تحياتى

محمد الجرايحى يقول...

أخى الفاضل : مهندس مصرى
السلام عليكم ورحمة الله وبركاته
طالما أنت مخلص النية لله
تأكد أن الله تعالى موفقك إلى الزوجة الصالحة التى ترجوها....

بارك الله فيك وأعزك
أخوك
محمد

كيكى يقول...

كع..انا مكروتش والله!!
ممممممممممممممممممم
انا كنت فاكرك لقيتها وبتمدح فيها
لقيتك لسة هتلاقيها ولسة هتمدح فيها!!
ربنا ينولك الى فى بالك
بس ممكن سؤال هى فترة اجازتك قد اية؟؟
يعنى لو كبيرة طب قشطة اوى دور برااااااحتك اوى
مش عايزين نقرر الفيلم عارفة انك قلت مش زى الفيلم بس برضة كل ماتطول تبقى احلى
المهم البركة على ربنا ثم على اختك
اخر حاجة
والله هقول اخر حاجة
انا من رايك فى موضوع الحب من على النت دة!!!
عوووووووووو

dodda يقول...

يا رب تتوفق وربنا يجبر بخاطرك وتخطب اللى نفسك فيها وزياده


كل كلمه فى البوست ده تستاهل عليها جايزه
يا ريت كل الشباب كده

ربنا يكرمك ويبارك فيك ويباركلك

جمعاوى روش طحن يقول...

D:


بس

مهندس مصري يقول...

جعلوني مريضاً نفسياً
==================
آميين

مجداوية
=======
و عليكم السلام و رحمة الله و بركاته
آميين يارب
يسمع من بقك ربنا

بسمة مسلم
==========
و عليكم السلام و رحمة الله و بركاته
آميين
و أنا برضه سعيد بزيارتك دي
:)
الله يسلمك و يكرمك بكل الخير

خمسة فضفضة
==========
و عليكم السلام و رحمة الله و بركاته
الله يبارك فيكي مقدماً برضه ؛)
و أنا رديت على الجايكو بإستفاضة

أحمد الخشاب
==========
ان شاء الله تحصلني عن قريب
ركز يا حاج
أنا حأعرفهاو أخطبها هنا و حيث إن الأجازة قصيرة حأكلمها بعد ما اسافر طول السنة الجاية عن طريق النت لحد ما أنزل الأجازة التانية كمان سنة

محاسن صابر
==========
آمييين
يارب يا أختي يارب

إمام الجيل
==========
آميين
شكراً :)

جنة
====
ربنا يكرمك و يطمنك زي ما انتي رافعة معنوياتي دايماً

إن شاء الله خير عن قريب

محمد الجرايحي
===========
و عليكم السلام و رحمة الله و بركاته
الحمد لله مخلص النية
و إن شاء الله خير
و بارك الله فيك ايضاً
:)

كيكي
=====
الأجازة كانت شهر و نص فات منها نص و فاضل الشهر
و ربنا يسهل ما فيه الخير

dodda
======
آميين
بس ربنا يوفقني و ألاقيها و يقدرني و يقدرها على تطبيق الكلام ده و تحويله لواقع فعلي

الله يكرمك :)

جمعاوي روش طحن
==============
ماشي
p:
؛)

L.G. يقول...

من غير كوتة قريت الكلام كله

طب معلش يا باشمهندس
طب طول ما انا ااقرى الكلام بفكر في بنت صديقة ليا فيها كل المواصفات اللي بتقول عليها ونحسبها كذلك وفاضلة جدا ولبسها شرعي وكل حاجة

من الآخر عندي لك عروسة من الاسكندرية اذا حضرتك اهتميت بالموضوع ابعتلي على الميل موجود في مدونتي
بجد مش هزار وتقدر تتقدم وتشوف العروسة جواز صالونات عادي والعائلات تتعرف حصل وفاق خير وبركة لم يحدث مفيش مشكلة
في جميع الأحوال ربنا يوفقك لما يحب ويرضى ويرضيك يارب بزوجة صالحة

تحياتي

ابو اعصار يقول...

ان شاء الله تلاقيها بس
لازم تعرف ان ده قرار مصيري
محتاج تاني وحتاج ان الواحد يظهر بحقيقته
وان شاء الله لازم احضر فرحك لو الشهر ده
وفقك الله دنيا واخرى

ندا يقول...

بص بقى انا لقيتلك العروسة خلاص
ويمكن ربنا يجعلنى واسطة خير
بس هى من محافظة الغربية والحمد لله فيها معظم المواصفات اللى انت ذكرتها
وعلى راى المثل اخطب لاختك ولا تخطبش لاخوك
واكيد انت عارف كل واحد بياخد رزقة
ولو لكم نصيب مع بعض هتشوفوة
ربنا يوفقك للخير
وده اميلى لو عاوز تعرف تفاصيل واكيد مش هيكون فيه كلام غير لما توصل بالسلامه

كيــــــــــــارا يقول...

عاااااااااااا انا قلت هبارك واهني بقي

انا كن نزلت بوست برده عن فتي احلامي وكنت مهتميه برده عن الاخلاق بس كنت قاصره التعليقات علي البنات بس

وهقولك تعليق عجبني اوي

************
السلام عليكم ورحمة
الله تعالى وبركاته
انا معلش بنوتة كبيررررة شوية
بس حأسلم عليكى دى اول حاجة
وتانى حاجة حاقولك الكلام حلووو اوى
وتالت حاجة حأقولك إن ساعة النصيب
لا حينفع لا عقل ولا قلب كله بعيد عنك بيعطل ويوقف ويتنسى والمقدور لابد من أنفاذه .وربنا يرضينا بنصيبنا يارب

***********

النصيب لما بيجي كل شي بيقع لا قوانين ولا مواصفات

مش هقولك غير ربنا يرزقكك الزوجة الصالحه وتكون زي مابتتمناها

اوعي تاخد حد علي انك هتغيره الطبع بيغلب التطبع

وان شاء الله اباركلك قريباااااااااااااااااااا

mero-moory يقول...

السلام عليكم ورحمة الله وبركاته
اول مرة اجي هنا وبالصدفه

بس المواصفات اللي قولتها شباب مصر كلهم عايزينها
بس تطبيقا لكلام كيارا اللي موافقاه جداااااااا

احب اقولك بباختصار جمله تنهي ده كله
النصيب ده قدر ووقت القدر بيعمى البصر

وربنا يوفقك
في رعاية الله

مهندس مصري يقول...

نص المناقشات في الجايكو حول هذا البوست

*

صرف النظر عن طريقة تعرف حضرتك على زوجتك ومقابلتك ليها مرتين .. اسمحلي أنصحك نصيحة بخصوص جملتك "أعرفها اكتر بقى عن طريق الإنترنت طول السنة الجاية" .. مفيش حاجه اسمها تعرف حد عن طريق الانترنت .. حضرتك كده هتبني صوره تخيلية بعيدة كتير جداً عن الحقيقة معتمدة على تخيلات حضرتك

وبعدين اشمعنى الصالون ؟؟ هو انتوا ضيوف؟؟ دانتوا أصحاب بيت .. واحنا أكتر من أهل :D

بالتوفيق يا باشمهندس

1 day, 22 hours ago by tafatefo Delete Mark as spam Add as favorite!
*
amanikhalil2000

@egyptioneng: هههههههههه بس كده يا باش مهندس يعني ليه التواضع في الطلبات ده بس جامعية ومثقفه وتقعد في البيت وتلبس خمار ما تعرفهاش عن طريق النت لكن تتعرف عليها في النت...مش عجيبه شويتين:)))

1 day, 22 hours ago by amanikhalil2000 Delete Mark as spam Add as favorite!
*
amanikhalil2000

طب سؤال رخم ممكن تتجوز واحده مدونه حتي لو متعرفهاش يعني خطبتها وقالت لك انا عندي مدونه واكاونت علي فيس بوك ممكن تكمل :))

1 day, 22 hours ago by amanikhalil2000 Delete Mark as spam Add as favorite!
*
tafatefo

الخناقه بقى

حضرتك عايز واحده متعلمة ومثقفة وتعليم عالي (ومش هتاخد واحده بدبلون) علشان تقعد في البيت؟؟؟؟

يعني هي كانت بتاكر وتدخل الجامعه وتتخرج وأهلها يصرفوا عليها .. واحتمال تكون كانت بتدب مشوار منيل للجامعه رايح جاي يومياً علشان تقعد في البيت بعد ما تتجوز حضرتك؟؟

أنا نفسي أفهم وجهة نظركم .. وأفهم وجهة نظر الزوجة (اللي للأسف) بتقتنع بالتفكير الغرييييييييييييييييب ده

1 day, 22 hours ago by tafatefo Delete Mark as spam Add as favorite!
*
tafatefo

قريب من الدرجة التانيه مهندس برضه .. بس مش مهندس بترول .. ومنصب حساس .. واخوان

اتجوز واحده كانت مؤهلة انها تبقى من ألمع الإعلاميات .. وكانت أخدت خطوات كبيرة جداً في وقت قصير جداً .. هي كمان اخوان

فجأة .. اتجوزوا على اتفاق ان مع كتب الكتاب (اللي كان بعد أسبوع من الخطوبة) تبطل شغل .. وهي مقتنعة تمام الاقتناع بده .. وبتناقشني فيه وبزعلها كل ما أتكلم معاها

مع العلم انها كانت بجانب عملها ده كانت بتدرس تجويد لأنها حافظة القرءان وواخدة إجازات من مكة .. وطبعاً سابت ده كمان

أفهم بقى .. بتبنوا تفكيركم ده على ايه

أنا مره قولتلها قدام جوزها تكونيش فاكره نفسك اتجوزتي الناصر صلاح الدين علشان تتخلي عن كل أحلامك فور ارتباطك بسيادته؟؟

1 day, 22 hours ago by tafatefo Delete Mark as spam Add as favorite!
*
egyptioneng

@tafatefo: كانت بتتعلم علشان يبقى في إيدها شهادة تشتغل بيها وقت اللزوم ساعة ما يكونش ليها زوج يصرف عليها و يريحها من تعب الشغل

في الحالة اللي انت ذكرتها صح إنها سابت شغلها و غلطت إنها سابت دراسة التجويد و قراءات القرآن

1 day, 22 hours ago by egyptioneng Delete Add as favorite!
*
egyptioneng

@amanikhalil2000: @tafatefo الفكرة إني مش حألحق اتعرف عليها في خلال الأجازة القصيرة دي فمش حيكون فيه وسيلة غير النت

بس حأكون عارفها من طريق الأهل و دخلت بيتهم كذا مرة هنا قبل السفر لكن حأستكمل الكلام و حأتعرف على دماغها و فكرها عن طريق النت لإنه حيكون احسن من التليفون طبعاً :)

و بالتالي لو كان للعروسة اللي مرشحها لي الاهل مدونة ده حيكون ممتاز لإني حأتعرف على عقليتها و شخصيتها بشكل افضل من خلال مدونتها

1 day, 22 hours ago by egyptioneng Delete Add as favorite!
*
amanikhalil2000

اعرف واحده ابنها طلب بنت من الجامع تكون حافظة قران وبتلبس خمار بعد الجواز كانت بتشتكي انها لما بتعزمها هي وابنها علي الغدا مش بتشيل معاها كوبايه من علي السفرة وبتسيب لها كوم مواعين رغم ان الام بتقعد ساعات طويلة تطبخ وتدخل الصالون تصلي بالساعه وبعدها تفتح المصحف وتقد ولما الام بتمرض تروح تزورها من علي طرف الكرسي ومش بتسقيها بق ميه @egyptioneng ربنا يوفقك يا رب بس مش كل حاجه المظاهر في الطبع والمعامله مهمين جدا

1 day, 22 hours ago by amanikhalil2000 Delete Mark as spam Add as favorite!
*
egyptioneng

و كل العرايس اللي في قائمة الترشيحات من الاهل فيهم المواصفات التالية

متدينات - مؤهل عالي - من عائلة طيبة - مناسبين في المستوى المادي و الغجتماعي

يبقى فيه اساس كويس للتوافق ممكن الواحد يبني عليه بعد كده و الواحد داخل ناوي خير

أنا اللي حأتجوزها حأشيلها جوه عينيا و حأراعي ربنا فيها و كل أملي إنها تراعي ربنا فيا و إحنا ساعتها نعمل أسرة مثالية تكون قدوة للناس و ترضي ربنا

أو ده حلمي على الأقل

1 day, 22 hours ago by egyptioneng Delete Add as favorite!
*
egyptioneng

@amanikhalil2000: ما هو انا كل اللي رشحوا لي العرايس دول هما أمي و أختي

و الطبع مهم طبعاً عروستي لازم تعامل أمي بإعتبارها امها زي ما انا حأعتبر أمها أمي

الكلام ده أساسي و ده الف باء العلاقة السليمة

1 day, 22 hours ago by egyptioneng Delete Add as favorite!
*
egyptioneng

@all يا جماعة انا مش عايز واحدة مظهرها كويس و طبعها وحش و لا واحدة مظهرها وحش او غير ملتزم و طبعها كويس

انا عايز واحدة طبعها كويس و مظهرها ملتزم و إن شاء الله حألاقيها

أنا طول حياتي ماشي ملتزم و محتفظ بكل الحب للزوجة الصالحة اللي ربنا حيكرمني بيها و واثق إن ربنا إن شاء الله حيكرمني بيها و دعوات أمي عمرها ما خيبت

و حأحاول بأقصى جهدي إني أكون الزوج الصالح و إن شاء الله حأكونه

1 day, 21 hours ago by egyptioneng Delete Add as favorite!
*
amanikhalil2000

@egyptioneng: بالتوفيق ان شاء الله

1 day, 21 hours ago by amanikhalil2000 Delete Mark as spam Add as favorite!
*
tafatefo

أيوه ليه يعني ناس كتير عايزه واحده متعلمه تعليم عالي تقعد في البيت بعد الجواز؟؟ نفسي أفهم المنطق

تريحها من تعب الشغل .. طب هي ليه دخلت الجامعه؟؟ ما كانت نمت ثقافتها بعد الثانوي وأكيد أكيد أكيد كانت هتبقى أكثر ثقافة من الجامعية

كمان اعذرني ده مش سبب .. دا حضرتك عايز واحده تقعد في البيت .. مش علشان راحتها ولا حاجه .. حضرتك مش مخلي الموضوع اختياري أو حسب رغبتها .. لا دا حضرتك عايز واحده جامعية وموافقة تقعد في البيت

طب ما افرض شغلانتها مريحة ومرتبها أكبر .. تقعد حضرتك في البيت؟؟

أو لو اتعرض عليك شغلانة مريحة بره مجالك اللي بتحبه .. تسيبه حضرتك وتروح الشغلانة المريحة

عارف ان كلامي عن الشغل مش منطقي (لأني مبشتغلش) وعارف هتقوللي (انت اللي بتتكلم عن الشغل؟) .. بس اللي أنا مش مقتنع بيه ان واحده تتعلم وتشتغل وتحب شغلها وبعدين تسيبه علشان اتجوزت البيه .. أيا كان مين البيه ده

واللي متغاظ منه (مع الاعتراف بان حضرتك حر طبعاً ومن حقك تحط الشروط اللي انت عايزها وبينك وبين اللي "هتاخدها" يفتح الله) ان رجل زي حضرتك يبقى عايز واحده جامعية ولما تتجوز تقعد في البيت

1 day, 21 hours ago by tafatefo Delete Mark as spam Add as favorite!
*
egyptioneng

@tafatefo: لإني حأكون أنا و هي مقتنعين إن مهمة الست الأساسية هي جوزها و عيالها و إن حسن تبعلها لزوجها يعدل الجهاد في سبيل الله و الجمعة و الجماعات

و إنها لو باتت و زوجها عنها راضي فثوابها عظيم و إن إهتمامها بتربية اولادها من غير ما تكون مشتتة بين شغلها و بيتها حيكون أحسن من تفوقها في شغلها مع نقص إهتمامها ببيتها و زوجها و اولادها

في بيتها حتكون ملكة متوجة لكن في الشغل حتكون بتصارع و تكافح زي بقية زملائها

بصراحة عمري ما شفت واحدة ست بتشتغل عرفت توفق بين شغلها و بيتها و الأمثلة قدامي لا تعد و لا تحصى من كثرتها

و لما بيبان إنها وفقت بينهم بتكون تعبانة و مجهدة و منهكة جسدياً و نفسياً او نفسياً على الاقل و ده بيأثر على تعاملها مع زوجها و الاولاد و أنا شفت ده بنفسي

الراجل اتخلق علشان يشتغل و يتعب و يصرف على زوجته و اولاده و بيته و ده واجبه

انما الست وظيفتها الاساسية إنها تكون زوجة صالحة و أم قدوة و شغلها ده شئ إضافي و مش من مهامها الاساسية في الحياة

1 day, 20 hours ago by egyptioneng Delete Add as favorite!
*
egyptioneng

@amanikhalil2000: آميين

1 day, 20 hours ago by egyptioneng Delete Add as favorite!
*
egyptioneng

@tafatefo: ثم انت ما قريتش البوست كويس أنا قايل فيه

(و مع كده برضه رغم إنها حتقعد في البيت لازم تكون متعلمة و مثقفة علشان نتوافق فكرياً و تعرف تربي العيال كويس و لو مت و لا حصل لي حاجة تقدر ساعتها تنزل تشتغل و تصرف على العيال و ما تتحوجش لأي حد )

يعني لو انا مت فجأة ما تشحتش هي بل ساعتها تقدر تشتغل بشهادتها

1 day, 20 hours ago by egyptioneng Delete Add as favorite!
*
midooo

فعلا التوفيق بين الشغل و البيت صعب جدا و علي حساب الصحة

1 day, 20 hours ago by midooo Delete Mark as spam Add as favorite!
*
egyptioneng

@midooo: بالضبط يا بني

و بتلاقي الأم راجعة من الشغل روحها في مناخيرها و تشخط في العيال على اتفه سبب و مش طايقة نص كلمة من اي حد بسبب طحنها في الشغل و بهدلة المواصلات

1 day, 20 hours ago by egyptioneng Delete Add as favorite!
*
midooo

بس الست بتتخن أوي من القعاد في البيت :D

1 day, 20 hours ago by midooo Delete Mark as spam Add as favorite!
*
egyptioneng

@midooo: لا بشوية تضبيط في الأكل و المجهود المبذول منها ممكن تحافظ على نفسها

1 day, 19 hours ago by egyptioneng Delete Add as favorite!
*
tafatefo

@egyptioneng: يا بشمهندس عايز حضرتك تتأكد اني مش بنتقدك ومقتنع تماماً ان كل واحد حر .. أنا بس عايز أفهم

وبعدين .. عايز حضرتك تفهمني ان واجب الست هو بيتها وأولادها؟؟ طب ما دول واجب الرجل .. والست في الإسلام مش ملزمة أصلاً بما نطلق عليه شغل البيت .. ده حضرتك ملزم توفرلها خادم .. كمان الست تبقى قدوة لأولادها ازاي وهي قاعدة في البيت ومش عارفه الدنيا بتتغير ازاي؟؟ دي اللي نفسي أفهمها هي ومثقفة علشان أتكلم معاها .. يعني ازاي واحدة مش بتشتغل ومش بتحتك بالحياة إلا من خلال التليفيزيون اللي بيمحق الشخصيه بعد أول سنتين مسلسلات (وفي حالة حضرتك هيبقوا قناة الرحمة والناس والحجاب والنقاب والجلباب واللحية مع احترامي للقناتين لكن الدين مقالش كله دين ومقالش نفضل نتكلم ونسمع في الدين طول اليوم ونسيب أي حاجه تانيه) .. ازاي الأم اللي قاعده في البيت ومبتحتكش بالحياة اليومية هتتفهم تغيرات الدنيا من حواليها؟؟ وتبقى قدوة لأولادها .. وتبقى مثقفة علشان تقدر تتكلم معاها

لما نوارة كانت بتقول ان الأم المصرية بتغير على ولادها ومعتبراهم بتوعها لوحدها وبتحب تتحكم في البيت وتقعد تقول محدش بيساعدني ومحدش بيعمل حاجه لنفسه إلخ .. كنت عايز أقولها ما اللي عمل فيها كده قعدة البيت .. مفيش أي حاجه ممكن تحقق فيها ذاتها غير ان الأكل عجب الأولاد والبيه .. وان البيت نظيف

1 day, 19 hours ago by tafatefo Delete Mark as spam Add as favorite!
*
tafatefo

@midooo: :D:D:D

1 day, 19 hours ago by tafatefo Delete Mark as spam Add as favorite!
*
tafatefo

@egyptioneng: آه .. ما هو ده من حسن التبعل للزوج

1 day, 19 hours ago by tafatefo Delete Mark as spam Add as favorite!
*
midooo

طفاطيفو : انت مبتشتغلش يبقي مش بتحتك بالحياه

1 day, 19 hours ago by midooo Delete Mark as spam Add as favorite!
*
midooo

و معاليك مش بيشتغل ليه ؟ مش لاقي شغل ؟

1 day, 18 hours ago by midooo Delete Mark as spam Add as favorite!
*
amanikhalil2000

@all خرجت اربع ساعات ولسه بتتناقشوا!!! عموما بس معاومه مؤكده نجاح الاولاد وتفوقهم مش حكر علي الزوجه ربه البيت او العامله في نماذج ناجحه جدا امهاتهم بيشتغلوا والعكس صحيح الرك علي شخصية الام في ام طول النهار تلك في التليفون وتزور جاراتها ومخها مصدي. وفي ست بتشتغل وتقدر تدور البيت صح وتنمي شخصيه ولادها وتكون مطلعه ومثقفة.. انا رأي الشخصي في فترة الافضل تكون في البيت فيها بعد كده لما ولادها تروح مدارس ويكون في فرصه عمل محترمه ومجزيه يبقي لازم تشتغل لو هي عاوزة وبرضه ده مش مصادرة ارأيك يا باش مهندس-طالما انت عاوزها تحسن التبعل يبقي تحسن التبعل :D

1 day, 16 hours ago by amanikhalil2000 Delete Mark as spam Add as favorite!
*
5fadfada

مع اني نفسي اقعد في البيت من بكره الصبح ، وايوه بيبقي فيه لوود كبير جدا علي الست اللي بتشتغل وبتبقي مقسومه بين الشغل والبيت بس رايي ان الست لازما وحتما ولابد تشتغل بعد الجواز لان ده بيحقق لها نوع من الاستقلاليه والثقه بالنفسه ومش بيخليها تحت رحمه الظروف ولا رحمة زوجها اللي انهارده راضي عنها وبكره يمكن يكون لا

دا غير انها بتبقي فاضيه بقي لجوزها وهاتخنقه في الرايحه والجايه وهو نفسه هايتمني انها تكون بتشتغل عشان تحل عن سماه ..ههههههه

و ماانصحش اي واحده انها تقعد في البيت بارادتها ابدا مهما كانت الاسباب ، علي فكره كنا ناقشنا موضوع القعاد في البيت ده مره زمان عند ازميرالدا اول ما اتجوزت ربيع وكانت بتشتكي من الشغل ، مش عارفه حد فيكم كان تابع المناقشه ولا لأ؟؟

1 day, 16 hours ago by 5fadfada Delete Mark as spam Add as favorite!
*
tafatefo

ما هو أنا فعلاً مش بحتك بالحياة .. أنا بتحرش بيها .. ومش بشتغل علشان مش فاضي

الرك عليك بقى يا دكتور ياللي هتطلع الأوتوبيس تدلل .. ضغط يا هانم .. سكر يا بيه .. مجموعة انفلونزا يا مدام :D:D

1 day, 16 hours ago by tafatefo Delete Mark as spam Add as favorite!
*
tafatefo

وأعتقد ان أي أولاد لو لقوا أب وأم ناجحين وبيحبوا شغلهم ومهتمين بيهم وفاهمين متغيرات المجتمع ومعايشينها .. هيبقوا أفضل من أب بيشتغل وأم قاعده في البيت

1 day, 16 hours ago by tafatefo Delete Mark as spam Add as favorite!
*
tafatefo

نسيت أقولك اني ان شاء الله بعد بكره هبتدي التكليف .. وهقضيه في أسوان :P

1 day, 16 hours ago by tafatefo Delete Mark as spam Add as favorite!
*
midooo

انت لسه منستش اللي درسته ؟

1 day, 16 hours ago by midooo Delete Mark as spam Add as favorite!
*
tafatefo

مش بقولك متعودين على الحفظ .. يا ابني الأسنان دي فن

1 day, 15 hours ago by tafatefo Delete Mark as spam Add as favorite!
*
egyptioneng

@amanikhalil2000: ممكن اتفق مع رأيك ده لو العيال فعلاً عدت مرحلة الطفولة الصغيرة و دخلت المدرسة

ساعتها ممكن لو حتلاقي شغل ما يضرش إهتمامها بالبيت يبقى ايه المانع

ساعتها اعتقد مفيش مشكلة و دي حاجة ترجع للظروف وقتها

@tafatefo طيب ايه رأيك إن كل القنوات اللي انت قلت عليها دي أنا مش بأتفرج عليها

و مين قال إننا طول اليوم حنقعد نتكلم في الدين و لا انت بتخترع من دماغك :)

الدين حيبقى موضوع من ضمن مواضيع بس هو حيكون أهمهم طبعاً

الشغل مش ضرورة للإحتكاك بالحياة و انت دليل على كده و هي ممكن تقرأ و تخش نت جنب التلفزيون دا غير احتكاكها بالقرايب و المعارف و الجيران و تنميتها لشخصيتها تعتمد عليها و على رغبتها في ده و مش شرط تشتغل علشان تنمي شخصيتها

ثم لو راحت السعودية معايا مش حيكون لينا حد غير بعض بس لإننا حنكون اغراب في بلد غريبة يفضل فيها تقلل إحتكاكك بالناس لأدنى حد ممكن تفادياً للمشاكل

الأم بتزود ثقافتها بالقراءة و النت و القنوات الهادفة في التلفزيون مش بالشغل و القراءة هي أهم شئ فيهم

@5fadfada ما هو ده اللي اتكلمت عنه في البوست لما قلت

و لو إتفقنا إننا إحنا الإتنين حنراعي ربنا في بعض يبقى مفيش داعي نخاف من بعض و نخون بعض و تبقى هيا باصة لشغلها على إنه ظهرها و سندها لأ أنا ما أقبلش التفكير ده

هو ده اللي بأتكلم عليه

ليه تكون زوجتي خايفة إني أغدر بيها أنا والله مش حأغدر و لا في طبعي و لا في نيتي الغدر ليه هي تتمسك بالشغل على إنه أمان ليها مني

و لا يا ستي لما مراتي تبقى فاضية لي بالحب و التفاهم حنعدي اي صعاب و حأكون ساعتها أسعد راجل في الدنيا

1 day, 15 hours ago by egyptioneng Delete Add as favorite!
*
tafatefo

هو القنوات الينية دي كل اهتمام قريبتي بصراحة .. ممكن تحكيلك على اللي اتقال في كل القنوات الدينية ما شاء الله

نعم؟؟ انت هتخلي زوجتك تحتك بالحياة زيي؟؟ طب أنا مولود في الشارع ولسه ملقيتش بيت يلمني

بالتوفيق يا باشمهندس .. وربنا يتمملك بخير ويهديك للزوجة اللي تتمناها ان شاء الله

1 day, 14 hours ago by tafatefo Delete Mark as spam Add as favorite!
*
egyptioneng

@tafatefo: لا يا سيد

ما هو مش كل إحتكاك لازم يكون زي إحتكاكك

كل شخص و ليه إحتكاكه الخاص بيه و لا مؤاخذة :))

آميين و يارب ألاقيها

و انا ناوي خير و واثق في ربنا إني حيجازيني خير إن شاء الله

1 day, 13 hours ago by egyptioneng Delete Add as favorite!
*
egyptioneng

@ALL ممكن أنقل الكلام اللي في الجايكوهاية دي عندي في المدونة و لا لأ ؟

لو قلتوا لأ مش حأنشره لكن أنا شايف اللي اتقال هنا مكمل للموضوع و غطى جوانب ما إتقالتش في المدونة

14 hours, 53 minutes ago by egyptioneng Delete Add as favorite!
*
midooo

متنساش الملحوظة اللي أنا قلتها :D

13 hours, 45 minutes ago by midooo Delete Mark as spam Add as favorite!
*
5fadfada

زززززيع يا عم الإنجنير ولا يهمك

:D :D:D

12 hours, 25 minutes ago by 5fadfada Delete Mark as spam Add as favorite!
*
amanikhalil2000

اوك

4 hours, 38 minutes ago by amanikhalil2000 Delete Mark as spam Add as favorite!

همس الاحباب يقول...

ربنا يوفقك ويرزقك بزوجة صالحة تقر بها عينك
بالتوفيق دائما اخى العزيز

هانى سعيد يقول...

ربنا يوفقك ويكرمك وتلاقى بنت الحلال اللى بتحلم بيها لكن انا ليا تعليق صغير هو انك مغالى شوية فى مواصفات فتاة الاحلام صفات تقريبا نادرة الوجود قوى لكن روح شوف جمال وحلاوة فتاة احلامى انا عملتلها بوست مخصوص عندى اسمه بحبك مووت روح وشوف الجمال اللى على حق ربنا شوف ازاى وهو الواحد بيختار لازم يركز فى اختياراته شوف ازاى ان مشروع العمر كله لازم نتريث وناخده واحدة واحدة مش سلق بيض شوف ازاى ان البعلاقة اللى لازم تتم لازم تكون قايمة على التفانى فى الحب والاخلاص ولازم يكون فى قاسم مشترك بين الطرفين انا قولت رايى ولك حرية الاختيار ونصحتك وماليش دعوة بعد كدة لازم تاخد واحدة زى حبيبتى والا هتندم كتيييييييييييييييير وربنا يسعدك ويوفقك
تحياتى

Jana يقول...

ربنا يوفقك يا باشمهندس لبنت الحلال ويبارك لكم
شىء جميل انك وضحت ظروفك ومواصفاتك كما وضحت طلباتك فى ظروف ومواصفات من تحب الارتباط بها
وباتفق معاك فى كتير من اللى انت قلته
لكن ليا عتاب صغير فيما يخص حديثك عن صاحبة الدبلوم لما قلت "مش حاخد واحدة بدبلوم واعد اكلمها فى حاجات مش فاهماها ومش عايزة تفهمها اصلا ..ووضحت احترامك لكل الناس
لكن بعد ما أحرجت كل اصحاب الدبلومات
بوصفك ليهم انهم مش حيفهموا كلامك ومش عايزين يفهموه
انا مش شايفة ابدا ان اللى معاها دبلوم ممكن تكون لسوء حظها وتعثرها فى الحياة لاسباب قد تكون مادية او حتى ظروف كانت ايام دراستها منعتها من التعليم الجامعى انها تكون بكده اقل مننا خريجى الجامعة يعنى ...طب ماهو انت ممكن تتجوز دكتورة ولو كلمتها فى الهندسة مش حتفهم فيها ويمكن كمان متحبش تفهم ..وانا خريجة تجارة اهو ومبحبش افهم فى الهندسة ولا الكهربا ايا كان تخصصصك يعنى ..
الا اذا كنت تقصد الثقافة بشكل عام
يبقى ساعتها الدبلومات او التعليم العالى مالوش اى علاقة ...لأن فى كتير خريجى جامعات معلوماتهم العامة ضئيلة جدا ..وبرده فيه اصحاب دبلومات ثقافتهم عالية ودماغهم نضيفة واكثر نضجا ووعيا من اصحاب مؤهلات عالية
يعنى مش باحس اننا من كوكب تانى او اننا تميزنا بشىء فظيع عن اصحاب الدبلومات سواء كانت عالية او متوسطة كمان

فالمقياس هنا اذن هو الثقافة بشكل عام

ونرجع نقول انك حر طبعا فى اختياراتك وشروطك ..ولو عايزها معاها 3 دكتوراة و4 ماجستير فى علوم مختلفة برده يبقى من حقك
لكن من غير ما تكسر نفس البعض بكلمة زى "اعد اكلمها فى حاجات مش فاهماها ولا عايزة تفهمها" واللى كان من غير قصد طبعا..
:)
مع كل احترامى ودعائى ليك بان ربنا يوفقك ويباركلك
واسفة لو كلامى زعلك بس انا عارفة انك انسان واعى وحتفهم مقصدى والصراحة مافيش احسن منها
:))))))

بت خيخة وأي كلام يقول...

انا كمان بابا الله يرحمه كان موجه اول ثانوى ازهرى لغة عربية
وكان دارس حاجة زيادة كدة ليها علاقة بامور الفقه والشريعة الاسلامية

تخيل لو باباك وبابياك كانوا اصحاب مثلا ولاحاجة ايام الدراسة
يااااااااااه
دى تبقى الدنيا صغنونة اوى



المهم
المواصفات اللى انت كاتبها دى
كأنك بتوصفنى يا محمد
بس يا خسارة انت جيت متأخر
وكمان انا اكبر منك

نيهاهاهاهاهاهاهاهاهاع



لا بجد والله ربنا يكرمك وتلاقيها

ارجوك فكرنى لما اشوفك فى يوم البؤجة
اقولك على اقترحاتى فى العرايس
انا عندى عروستين
ينطبق عليهم الوصف ده


سلام
اختك خيخة

مهندس مصري يقول...

L.G
====
آمييين
بس أنا حالياً ماشي في موضوع خطوبة فعلاً مع واحدة قريبتنا من بعيد و ربنا يسهل و لما ابقى أخلص كل المرشحات من قرايبنا و معارفنا ساعتها بس ابقى أدور في الأغراب

و انا ما كتبتش البوست ده علشان أدور بيه على عروسة
أنا كتبته لتوضيح وجهة نظري في كيفية إختيار العروسة

ألف شكر لحضرتك و شاكر جداً إهتمامك
:)

أبو إعصار
==========
ما هو علشان الموضوع محتاج تأني فالسنة دي خطوبة بس و الفرح السنة الجاية إن شاء الله
:)

ندا
===
ألف شكر بس راجعي ردي على L.G

كيارا
======
ما هو أنا مؤمن بإن الطيور على أشكالها تقع و أكيد إن شاء الله حأقع في بنت الحلال اللي زيي و تكون هي نصيبي
:)

ميرو - موري
===========
و عليكم السلام و رحمة الله و بركاته
منورانا في أول مرة و ياريت ما تبقاش آخر مرة
:)
بصي هو الواحد يعمل اللي عليه و يسيب الباقي على ربنا
و إن شاء الله خير
و من يتوكل على الله فهو حسبه

همس الأحباب
==========
آميين

هاني سعيد
=========
آميين
بس مش مغالي في المواصفات و لا حاجة
المهم تعرف تدور فين و إزاي
و علقت عندك على البوست بتاعك ده
:)

جنى jana
========
آميين
يا ستي أنا قصدي على الثقافة مش التعليم
بس مفيش مقياس للثقافة أعرف أقيس بيه
فقلت إن التعليم حيكون معيار مبدأي يدل على الثقافة لكنه مش مقياس نهائي
و بأتكلم على الصفة الغالبة على المعظم

فالمفترض بأغلبية المتعلمين تعليم عالي الثقافة او القابلية للتثقيف
و يفترض العكس تنازلياً حسب درجة التعليم

و لا يمنع هذا من وجود مثقفين بل و شديدي الثقافة من حملة الدبلومات بل و من غير الحاصلين على شهادات
فقد يكون شخص لا يعرف سوى القراءة و الكتابة و يقوم بتثقيف نفسه أفضل من الجامعيين
و لا أنكر أن هناك جامعيين ثقافتهم ضحلة او بلا ثقافة على الإطلاق

و لكنني ذكرت ما إعتقدت أنه القاعدة العامة للأغلبية
و كل قاعدة لها شواذ

و كلامك ما زعلنيش
و انا اعتذر لو كلامي زعل حد
و آسف بشدة فلا أقصد اي إهانة و يبدو أنني لم استطيع توضيح ما أقصد و أرجو أن يكون قد وضح الآن

و أنا لا أقصد الكلام في الهندسة حيث أنني لا أحب الكلام عن العمل داخل المنزل و أحب الفصل بين حياتي الشخصية و حياتي العملية
بل كنت أقصد الكلام في الثقافة العامة
:)

بت خيخة و اي كلام
=================
يا بنتي إنتي حالة خاصة
ربنا يعينك يا هاني و يصبرك على ما بلاك
له نصيب كبير في جنة الخلد و نعيمها
:)
ههههههههههههههه

آميين يا ستي يارب آلاقيها و لو إني حاسس إني لقيتها خلاص و لما الموضوع يكتمل حأعرفكم كل حاجة
:)

بالنسبة لإقتراحك راجعي ردي على L.G

سلام يا خيخة

Ahmed Mansour يقول...

مبرووووووووووووك مقدماً يا ابو القناديل ، وإن شاء الله نقيد القناديل ، وتحصل أخوك محمد السوداني اللي سبقك من مكتب العطيشان ، بس شد حيلك شد علشان الجواز بيهد .

مهندس مصري يقول...

أحمد منصور
==========
الله يبارك فيك
خير ان شاء الله
و سلم لي على الزول في أول مكالمة
:)
و سلامي للزملاء كلهم فرداً فرداً
:)

فاتيما يقول...

أزيك يا محمد
فين يا بنى ال21 دول ..
معرفش و لا حد فيهم غير أسمين تلاتة بالكتير
المهم كنت عاوزة أقول ...
ربنا يوفقك يا رب
و تلاقى بنت الحلال
بس عاوزة أقولك كمان و جايز اكون مبالغة أو نتاج تجربتى بتصور كدا
بس الواقع الفعلى و من معرفتى ببنات كتير فى حياتى أقدر أقولك إن مواصفاتك دى كلها إستحالة تتجمع فى شخص واحد ...
مش بفترى و لا حاجة
و لا متهيألى
و لا كمان كل اللى عرفتهم كانوا وحشين
بس جرت العادة إن تقريبا مفيش حد بالكمال دا اللى إنت طالبه ...
ايوه ال كمال .. شايفه كدا
لأن ألف ف المية
المميزات الكتير تحمل معها عيباً خطير يقترن بيها و متقدرش تتجاوزه مهما حاولت
يعنى ممكن تكون متدينة و بنت ناس كويسين و موافقة تقعد ف البيت و كل الحاجات دى
و بعدين يطلع عقلها صغير رغم تعليمها
او مش بتاعة مسئولية
او متدينة متزمتة
او متحبش اهلك
او متطلعة ماديا
او مش متوافقة معاك عاطفيا
او ... او ... أو ....
يعنى من الآخر الحلو ما يكملشى
طبعا مش هعلق على موضوع الشغل و القعدة ف البيت عشان متزعلشى منى
لأنى رأيى مخالف ليك تماماً ...
و بخصوص الدبلوم طبعا جانا كتر خيرها كفت و وفت
بس فى الآخر برضو ربنا يوفقك
و نباركلك يوم البؤجة إن شالله

الطائر الحزين يقول...

حمدا لله على السلامة
يا بنى ما انت كنت بعقلك
نصحتك وانت حر وعقلك فى رأسك تعرف خلاصك

Appy يقول...

ربنا يوفقك يا هندسه يا رب
بس ده اعلان على بلوجر ولا ايه :)

مهندس مصري يقول...

فاتيما
======
ما هو الـ 21 مش كلهم معلقين
بس دخلوا لعندي من عندك و عندي كل بياناتهم من رقم الـ IP لحد الدولة اللي دخلوا منها
:)

بالنسبة لكلامك انا عارف إن الكمال لله وحده بس الواحد يعمل اللي عليه و يجتهد على قد ما يقدر و يسيب الباقي على ربنا
و من يتوكل على الله فهو حسبه
المهم يحسن الإختيار من الاول و بعدها ما دام عمل اللي عليه بدون تقصير يبقى يتقبل اللي ربنا قسمه له و الحمد لله على كل حال
و انا ما دام ناوي خير و بأعمل خير واثق في ربنا إنه مش حيجازيني الا الخير

هههههههههه
موضوع الشغل و القعدة في البيت ده إتفاق بين العروسين
و كل واحد حر و محدش حيغصب حد على حاجة مش عاوزها
و لو أنا راضي و هي راضية يبقى محدش له دعوة

و زي ما قريتي تعليق جانا شوفي ردي عليها

و إن شاء الله ربنا حيوفقني يا ام يوسف
:)

الطائر الحزين
=============
الله يسلمك
بس هي دي سنة الرسول صلى الله عليه و سلم لو تفتكر لما قال من رغب عن سنتي فليس مني
:)

آبي
====
آميين
بس لو كنتي قريتي الموضوع و التعليقات كلها و ردودي عليها كويس كنتي عرفتي إنه مش إعلان بل عرض لوجهة نظري
:)

Jana يقول...

باشكرك يا محمد على ذوقك وتفهمك وتوضيح مقصدك
وانا معرفش حد زعل من كلامك
كل ما هنالك انى عارفة انك ابو الذوق كله فاستصعبت الكلمة دى تطلع منك انت بالذات
وكنت عارفة انك متقصدش المعنى البايخ ..ومحدش شاف منك الا كل خير
بس اشفقت على اى صاحب دبلوم يقرا ويفهمك غلط
وفى نفس الوقت محبتش حد يزعل منك ..فجرجرتك الى توضيح قصدك الحقيقى
:))))

متعرفش بقا ايه المشكلة اللى عندى اللى بتخلى مدونتك انت بالذات ومدونتين كمان مش بيفتحو معايا بسهولة ابدا الا بعد كذا محاولة وانتظار طويل!!!!؟؟؟
باستغلك يعنى.. واهو كله قاعدلك فى الدعاء ان شاء الله
:)

مهندس مصري يقول...

جنى
===
و لا يهمك
حصل خير
و كلامك على العين و الراس
مش عارف بقى حكاية تغييب المدونة في الفتح ايه ؟
دا أنا شلت الأغنية علشان كانت متقلة فتحة المدونة
و مش بأحط فيديوهات بقى لي فترة علشان كده

مش عارف والله

عمرو المصري يقول...

النداء الأخير
من
ارض الحرب

اناعارف ان ردود الدعاية والاعلانات مملة وبتضايق صاحب المدونة جدا جدا جدا
لكن ارجو مسامحتي
فهذا هو التعليق الاخير الذي
اكتب فيه اعلانا لموضوع

اليوم يمر عامان علي مدونة ارض الحرب
ارجو المشاركة منكم
بالتعليق والنقد
او حتي بالممباركة والدعاء ان تستمر المدونة فيما تقدمه



في انتظاركم
الدعوة مفتوحة
جزاكم الله خيرا

mostafa rayan يقول...

ربنا يكرمك باللي تستاهلك
بس يا نجم اوعى تصدق كلام حد يقولك عروستك عندي وانا واسطة خير والكلام الفاكس دة
الجواز مش لعبة ولازم تفكر مليون مرة ولازم عروستك انت اللي تختارها بنفسك مش حد يختارهالك
لازم قلبك وعقلك يختاروها قلبك يدق وعقلك يوافق
بلاش تمشى وراء كلام وسايط الخير دة
بلاش ياصاحبي

بدراوى يقول...

هو انا موافق حضرتك فى كل المواصفات
ماعدا موضوع عدم الشغل و الجلوس فى البيت
عارف ده حله ايه تعمل دراسات عليا
او تذاكر
لان قعدة البيت وحشة و صعبة
بجد
ممكن تنسى المجتمع و الناس
و مش كفاية انك تخرجها تزور اهلها او تخرج تتفسح معاها او تخرج تودى الولاد للمدرسة لما ربنا يرزقوا الذرية الصالحة ان شاء الله

حاجة كمان انت بتقول حتتعرف عليها على النت ، طب العيلتين حيتعرفوا على بعض و يتوافقوا ، بس برده نظرتك انت كعريس لعروستك او زوجتك و انت بتتعرف عليها عن طريق النت مع وجود ترابط بين العيلتين حيخليك متعرفش كل عيوبها
الا بقى لو تحاول تنزل اجازة كل صيف و تتعرف عليها اكثر

ده رأيى و مش ملزم ليك طبعاً
و ربنا يوفقك و يسدد خطاك و يكتبلك الخير و يكتبلك الزوجة الصالحة التى هى خير متاع الدنيا

مش عارفة الدنيا وخداني علي فين يقول...

السلام عليكم
انت بتعمل إعلان في مدونتك و كمان حاطط مواصفات لعروستك
في مدون تاني عمل نفس الموضوع ده و كتب عن مواصفات العروسة اللي عايزها
و اللي مواصفاتها تنطبق تبعتله و ترد عليه او علي الايميل
الظاهر الموضوع ده هيبدأيتنشر بين المدونيين و تصبح ظاهرة عامة

دعاء تيسير الزواج

اللهم اني اسالك باني اشهد انك انت الذي لااله الاانت .. الاحد الصمد الذي لم يلد ولم يولد ولم يكن له كفوا احد اقضي حاجتي .. انسي وحدتي .. فرج كربتي..اجعل لي رفيقا صالحا كي نسبحك كثيراونذكرك كثيرافانت بي بصير .يامجيب المضطر اذا دعاك..احلل عقدتي ..امن روعتي ..ياالهي من لي الجا اليه اذا لم الجا الي الركن الشديد الذي اذا دعا اجاب .هب لي من لدنك زوجا صالحا ..اجعل بيننا المودة والرحمة والسكن..فانت علي كل شي قدير .يامن قلت لشي كن فيكون..ربنا اتنا في الدنيا حسنة وفي الاخرة حسنة ..وقنا عذاب النا وصلي اللهم علي سيدنا محمد وعلي اله وصحبه وسلم.

مهندس مصري يقول...

عمرو المصري
==========
ألف مبروك يا عمرو
مدونتك متميزة فعلاً
بس إنت مقل من الكتابة فيها

مصطفى ريان
===========
ما هو أنا اللي بأختار بنفسي
ماما و أختي بيحطوا لي ترشيحات لكن أنا اللي بأختار منها
:)

بدراوي
=======
هو حل ممتاز بس مش حينفع في السعودية
:)

ثم أنا بأنزل أجازة شهر كل سنة
بس أنا مش ناوي اطول الخطوبة كده
سنة واحدة كفاية جداً
و حنقضي السنة دي تعارف في الشات
بسبب ظروف سفري
لكن حأكون شفتها بنفسي في بداية الخطوبة كذا مرة خلال الأجازة دي
خصوصاً إن أنا بأختار من القرايب و المعارف
يعني من ناس نعرفوهم
مش من ناس اغراب
:)

آميين لدعواتك الحلوة دي

مش عارفة الدنيا واخداني على فين
===============================
و عليكم السلام و رحمة الله و بركاته

ههههههههههههه
أنا كده إتأكدت إنك ما قرأتيش التعليقات اللي فاتت و ردودي عليها
مع إني حاطط تحذير من الكروتة قبل التعليق
:)

أجاوب تاني
ده مش إعلان و انا رافض فكرة الجواز من واحدة غريبة من الإنترنت
و بالتالي أنا مش عايز اللي تنطبق عليها المواصفات تبعت لي
لإني رافض المبدأ أساساً

أمال ده إيه ؟
ده شرح لوجهة نظري في المواصفات التي يجب توافرها في العروسة المثالية في ظروف زي ظروفي

يعني البوست ده توضيح لوجهة نظري و مش محاولة للبحث عن عروسة
:)

شكراً على الدعاء
آميين

سومه...مجنونه فى بلد عاقل يقول...

ربنا يعينك بس متجيش بعد سنه تقول كان مالى ما كنت فى حالى :)
وتغنى اغنيه اسمه ايه دا اللى بيقول كبستنى وسدت نفسى ما انا كنت مدلع نفسى:)
ربنا يرزقك بانسانه طيبه تتقى الله فيك

سومه...مجنونه فى بلد عاقل يقول...

انا مازلت مصره على العزمه:)

عاشــــــ النقاب ـقــــة"نونو" يقول...

ربنا يعطرك ببنت الحلال اللي ترضي بيها المولى يارب
وان كنت لسة ما وجدت ربنا ييسر واحاول اساعدك
عندي المواصفات دي ونحسبهن على خير
حمد الله على سلامتك

روح يقول...

ربنا يكرمك وتلاقيها

بس انا بأخذ عليك بعض
الاشياب في البوست

اولا تجريحك في الناس خريجة
الدبلوم
علي فكرة انا اعرف رجال
وكبار في السن

والله قمة الثقافة
وفي اي مجال تتكلم فيه

في الطب في القانون في الرياضة
فمكنش لة لزوم طريقة كلامك عنهم

واتمني ان ميكونش حد دخل وقرا الكلام واضايق

كمان طريقة الجواز علي النت
انا اعرف ناس اتجوزت من النت

وبصراحة كان جواز ناجح وجاد جدا
ولكل قاعدة استثناءات

وفي النهاية ربنا يكرمك يارب
بالزوجة الصالحة
واللي تكون لك قرة عين
وترزقوا بالذرية الصالحة من حفظ كتاب الله ...

سعدت بوجودي في مدوننكم
واتمني الزيارة قريبا
تقبل تحياتي

عاشــــــ النقاب ـقــــة"نونو" يقول...

معلش قريت حوارات الجايكو
بصراحة اغلبها ضحكني جدا
تعرف حضرتك مدير مدرسة ابني بعمل له شغل خاص بالمدرسة من البيت لسبب بسيط جدا ان السادة المدرسين والاصطاف باكمله ما يعرفوش نت ولا كمبيوتر
الراجل هتجيله لوثة واشتغل معاه لدرجة عرض مدير المرحلة الابتدائية واول امبارح فضل يقولي اصل قعدة البيت وحشة وتخلي الواحدة عقلها ضيق ووووووووو
وبعد ما خلص كلامه كله قلت له قعدتي في البيت خلتني اتعلم شغل كتير ثَقفت نفسي اكتر لدرجة ان فيه مدير مدرسة عنده اصطاف مدرسات ومدرسين ما بيعرفوش يعملوا ورقة على النت وبيقولي اعمليهالي والنبي
ههههههههههههههههه
لما بتكم مع المدرسات مثلا تلاقي لقمة العيش طاغية على التثقيف واضافة معلومات وتطوير النفس
يبقى خلينا نصارح نفسنا شوية اغلب اللي بيشتغلوا وليكن 99 في المية وانا مش ببالغ بيشتغلوا علشان الفلوس والاحتياج وبعيدا عن عاوزة احقق ذاتي اللي بنسمعها دي فهتلاقيها في طبقة معينة
لكن روح لواحدة موظفة ولا بتاعت الجبنة ولا اللي قاعدة مكفية على ماكينة في مصنع واسالها انتي بتشتغلي علشان تحققي ذاتك ؟؟
هتقولك بشتغل علشان اسد اقساطي وتعليمي واساعد زوجي
او اجهز نفسي
وطبعا لو سالتها اوفرلك عيشة كريمة هتقعد فورا في البيت وكلنا حوالينا النماذج دي
مش مصدقين ؟؟؟
روحوا اسالوا بياعة المحل اللي تحت بيتكم واللي واقفة في بقالة ولا اللي بتنظف الشقة
وبطلوا بقى النغمة الفاضية اياها
الست هتبقى أنجح لو كانت قاعدة في البيت هتتثقف وربنا يعينها وتعرف دينها كويس وييسر لها حفظ القران وتتعلم كل حاجة الانترنت وفر كل حاجة
بل ممكن تشتغل كمان من البيت برضه بدون اهانة بس هتعرف تقضي واجباتها بكفاءة اعلى والا اسالي نفسك يا ست يا عاملة اخر مرة عملتي اكلة حلوة وقعدتي مع ولادك وزوجك من غير ما تتاوبي ولا عاوزة تفردي ظهرك من كافية المكتب ولا الماكنة امتى
طولت عليك
ولي في كدة مقال اخر بذن الله في مدونتي لاحقا
تحياتي

مهندس مصري يقول...

سومة مجنونة في بلد عاقل
=======================
لا ما تقلقيش :)
آميين
عزمة إيه ؟

عاشقة النقاب
===============
آميين
لا وجدت و الحمد لله
الله يسلمك

روح
====
راجعي ردي الاول على Jana و أنا ما جرحتش في حد و محدش إتضايق لحد دلوقت
:)
و ياريت حضرتك قبل ما تعلقي تقرأي كل التعليقات السابقة و ردودي عليها علشان ما يكونش السؤال مكرر و أنا جاوبته قبل كده
:)
و الجواز الناجح من النت هو الإستثناء الذي يؤكد القاعدة

آميين
إن شاء الله
و أهلاً بحضرتك دايماً

عاشقة النقاب
=============
لا حضرتك تطولي براحتك
و كده رأيي من رأي حضرتك تماماً
:)

مهندس مصري يقول...

روح
====
ثم مين جاب سيرة الرجالة الكبار في السن
أنا هنا بأتكلم عن البنات خريجات الدبلوم اللي في سني او اقل مني سناً شوية
يعني في سن مناسب للزواج مني
كام واحدة فيهم مثقفة ؟
أكاد أجزم طبقاً لمشاهداتي إن فوق الـ 90 % منهن غير مثقفات
في محافظتي على الاقل
و مش معنى كده إن خريجات الجامعة مثقفات قوي
بس نسبة المثقفات فيهم أعلى
راجعي ردي على jana

همس الاحباب يقول...

الف مبروك الخطوبة
وربنا يتتمم بخير
وكنا عايزين نشوفك امبارح
بس يلا قدر الله وماشاء فعل
ولنا لقاء باذن الله
تحياتى

لقد خلقنا الله احرارا يقول...

الف مبروك يا باشمهندس ربنا يتمم بخير

أحمد عاطف يقول...

هندسة

الله يرزقك حتى ترضى ويقر عينك حتى تشعر أنك في جنان الرحمن

ربنا يرزقك بما فيه الخير ليك

عقبال ما انزل اجازة انا كمان عشان نفس الموضوع

بس انا المرة دي مطول الاجازة عشان اعرف الاقي بنت الحلال

الوحدة مرة والله

تحياتي يا صديقي

ابو صهيب ( الجمعاوي الاصيل)سابقاً يقول...

السلام عليكم ورحمة الله

على بركة الله سير

بس ياريت تاخد بنصيحة

المتجوزين ياهندسة قبل ما تقع

يلا مش مشكلة
ربنا يرزقك ببنت الحلال اللي تصونك وتعينك على طاعة الله وتملى عليك حياتك اللهم امين

مهندس مصري يقول...

همس الأحباب
==========
الله يبارك فيك
لنا لقاء إن شاء الله قبل ما اسافر السعودية في 27 / 5
و أنا كمان كان نفسي اشوفكم

لقد خلقنا الله أحراراً
====================
الله يبارك فيكي
آميين

أحمد عاطف
=========
آمييين
شكراً يا صديقي
أنا كانت قراءة فاتحتي يوم الجمعة اللي فاتت
الحمد لله
عقبالك
أنا كنت واخد أجازة شهر و نص علشان كده
:)

أبو صهيب - الجمعاوي الأصيل - ميخا
===============================
و عليكم السلام و رحمة الله و بركاته
:)
آميين
بس إسمها تملأ
مش تملى
تفرق كتير قوي
:)

"النجم القادم"رابطة مدونون من أجل فلسطين يقول...

لالالالالالالالالالالالالالالالالالا الهندسة بيدور على عروسة وانا موجود عيبة في حقي هههههههههههههه يا عمنا انت تأشر واحنا نجبلك مليون عروسة

على فكرة انت مش بشوفك ليه مختفي فين ؟؟؟؟؟؟؟؟؟؟؟؟؟؟

ملكة بحجابى يقول...

ربنا يوفقك
بس على فكرة نسيت جمب متدينة ومثقفة ومتعلمة انك تحط حاجة مهمة دلوقتى انها تشارك فى الاثاث
مش تريقه بس عندى فى الجريدة بشوف اعلانات بنفس المواصفات بقعد اسأل نفسى طبعا من حق كل انسان يحلم بالملاك اللى هيشاركه حياته بس ياترى انت هتديها ايه ؟؟ قدام كل ده؟؟ هتتقى ربنا فيها .. ماشى يبقى كان كفاية تطلب انها تتقى ربنا فيك.. عمة انا مش ضدك انا بس بئولك البنات على اد مافيهم بنات ناس محترمين وفيهم كل المواصفات الكويسة اللى انت طالبها الا انها اما بتقرا مواصفات مطلوبة لعروسة بتقول ايه كل ده وهو اصلا عنده كل الحاجات اللى بيطلبها دى ؟ العلم والثقافة والدين واحترام عقلها وفهم احساسها كانثى هتسيب شغلها عشان بيتها وهتقدر تعوضها ده معنويااااا واللا لا .. نهايته بتمنالك من كل قلبى كل خير وانك تلاقيها بسرعه بسرعه عشان نفرح بيك.. اللهم أرزقه زوجة صالحة وأجعله لخا زوج صالح وبارك فيهما وعليهما وأجمع بينهما فى خير



تقبل مرورى وأطيب دعواتى
ملكة بحجابى

ايوشة يقول...

الف مبروك عرفت ان حضرتك خطبت من مدونة فاتيما ربنا يتمم على خير يارب

احلام جوليا يقول...

يارب يا باشمهندس تلاقي عروسة بالمواصفات دي بس دي حتبقى مثالية قوي فحاول تحصل ولو 80% من الصفات علشان تتجوز وربنا يوفقك

مهندس مصري يقول...

النجم القادم
=============
أنا موجود إنت اللي مش بتظهر في مسجد الحي خالص يا نجم
اللهم سهل لك يا عم
:)

ملكة بحجابي
===========
لا الأثاث عليا أنا :)

الحمد لله عندي أغلب الكلام ده
و الحمد لله أنا ناوي أديها كل حاجة إنتي قولتي عليها
ناوي أحطها جوه عينيا
و حأحاول بأقصى طاقتي إني أكون الزوج الصالح اللي يسعدها و ترضى عنه و نقدر إحنا الإتنين نرضي ربنا صح

آمييين

أيوشة
======
الله يبارك فيكي
:)
آميين

أحلام جوليا
===========
خلاص لقيتها
و فيها معظم الصفات المطلوبة
:) و بشكل يكاد يكون مثالي
الحمد لله إنه كرمني بيها

أبو أسامة يقول...

طيب يا بشمهندس

بما إنك لقيتها

ألف مبروك مقدما

وربنا يتمم لك بالخير

وإن شاء الله نقول قريب :

بارك الله لكما وبارك عليكما وجمع بينكما في خير

مهندس مصري يقول...

أبو أسامة
=========
الله يبارك فيك
آميين
:)