الأربعاء، مايو 06، 2009

زيارة متوقعة لدمنهور من سوزان مبارك

البلد مقلوبة و ملبشة أمن من يومين بشكل غير طبيعي و عمالين يدهنوا بردورات أرصفة و يخططوا بعض الشوارع الرئيسية بل و لقيت النهاردة محلات معلقة علم مصر
بأسأل فيه إيه ؟ قالوا لي : إن ماما سوزان جاية
فإفتكرت علطول مطلع أغنية الترحيب بيها
يا دي النور يا دي النور - ماما سوزان في دمنهور :)
مش عارفين بقى هي جاية بجد و لا إشتغالة زي المرة اللي فاتت بتاعة البوست ده
زيارة حسني مبارك و سوزان لمدينتي دمنهور و رشيد

و خليكم فاكرين إن آخر زيارة لمسؤول مهم لدمنهور كانت من سنة و نص لما نظيف و كل المحافظين شرفونا و كنا إتكلمنا عنهم في البوستات دي
يا مرحب يا نظيف باشا
يا مرحب يا نظيف باشا 2
يا مرحب يا نظيف باشا 3
يا مرحب يا نظيف باشا 4

ربنا يستر
و أسيبكم بقى مع صور الإستعدادات الأولية للزيارة الميمونة

الخطوط اللي تم إعادة دهانها على الأسفلت تاني


المحلات اللي علقت علم مصر بالأمر

و حتى كشك عم عزوز أشهر و اقدم كشك في ميدان الساعة في دمنهور معلق العلم على تلاجة الحاجة الساقعة
ربنا يستر لإن زياراتهم ما بيكونش وراها خير غالباً

هناك 17 تعليقًا:

بدراوى يقول...

على فكرة انا اسكندرانى
يعنى قريب ليك كثير

بس هو ماما سوزان حتيجى تفتتح ايه
بالضبط
؟!

مهندس مصري يقول...

بدراوي
=======
الله أعلم يا بني
ممكن تكون الأوبرا اللي بقى لها سنتين مش عارفين يفتتحوها
:)
و يمكن مجلس المدينة اللي قلبوه متحف علشان مبناه أثري
الله أعلم
محدش عارف حاجة و كلها إشاعات

سومه...مجنونه فى بلد عاقل يقول...

يا عم سيب الراجل فى حاله الراجل مراته لسه ميته الله يرحمها
:(

سومه...مجنونه فى بلد عاقل يقول...

على فكره شوفت البوست ويا ريتنى ما شوفته
بدون ذكر اسباب بقى
والعيب مش فى احمد العيب فى الرمادى اللى بقينا نمشى بيه

سومه...مجنونه فى بلد عاقل يقول...

ادعولى عشان صابح عنى امتحان بيروقراطى استاطيقى برجوازى ليبرالى متعفن خخخخخ
يبحث فى الانا ويفرق بين النقد الذاتى الموضوعى المتفشكل
حيث ان الحيوان يدرك الفن زى الانسان تماما بالمنطق سوريو وان الفن نوع من الخلق الانسانى يظهر متجسد فى اثر مادى محدد يتسم بقدره تعبيريه يتشكل منه واقع قائم
منك لله يا حسن يا حماد يابنتاع البليله
خلاص الربع اللى باقى ضرب:(

مجداوية يقول...

السلام عليكم

طالما السبب اعادة تجديد دار الاوبرا تبقى حتيجي

لكن اللي يضحك بجد حكاية دار الأبرا اللي في دمنهور دي !!!!!

مش قصدي الاساءة أنا عشت فيها نص عمري لكن الحق مش لايقة خاااااااالص

بس حتى لو مجاتش يبقى البلد كسبت شوية التلميع دول


:)

مهندس مصري يقول...

سومة مجنونة في بلد أجن منها
=========================
الكلام عن نظيف كان من سنة و نص
و لو مراته ميتة و هو غلطان في حاجة نسيبه ؟
الله يرحمها و يرحمنا يا ستي

ربنا يديكي في الإمتحان ده على قد نيتك
:)
قصدي
:)
ربنا يوفقك
:))

مجداوية
=======
و عليكم السلام و رحمة الله و بركاته
ما هو الناس مستغربة هنا برضه
و إحنا كنا ناقشنا في البوست بتاع زيارتها اللي فاتت و ما تمتش هيا و جوزها إن فيه حاجات تانية دمنهور محتاجاها أهم 100 مرة من الأوبرا
و يفضل تشوفي البوست القديم و تعليقاته بنفسك

ياريت البلد تكسب تلميع
بس هما بيلمعوا وسط البلد النضيف أصلاً أما بقية البلد فلها الله
دا غير شوارع مهمة مانعين فيها المرور بقالهم يومين و الشوارع الجانبية مش مستحملة كمية المرور اللي إتحولت عليها و البلد مرتبكة بدون داعي و هي لسه ما جاتش
أمال أثناء الزيارة نفسها حيعملوا فينا إيه ؟

Appy يقول...

اولا مبروك مرتين

الخطوبه وعلى راى خيخه احسن تستاهل هههههههههههه
التانيه يا عم ابسط هينضفوا البلد
احنا بىق الريس بيجى كل ويك اند عندنا يا هو يا جيمى فى القطاميه هايتس مش عاوزه اقولك زياده على النظافه اللى التجمع فيها غسلينه باريال كمان
مصائب قوم عند قوم فوائد يا حج

أحمد عاطف يقول...

انا سمعت انك خطبت صحيح الكلام دا ؟؟؟

ياعمألف مبروك الله يوفقك ويقر عينك ويفرح قلبك

بمناسبة الزيارات .. زمان كان الريس بييجي الزقازيق سنة ورئيس الوزرا السنة اللي بعدها ولاني في الاصل شرقاوي من الزقازيق فكنت بفرح جدا جدا جدا لما بييجوا

لأنهم ببساطة شديده بينضفوا البلد جدا من كل حاجه وأي حاجه

لدرجة أن الزقازيق بقدرة قادر بين يوم وليلة بتنقلب بيفرلي هيلز وطبعا الخراب مافيش اسهل منه مسافة ما الناس تمشي في خلال اسبوع تكون رجعت تاني لوضعها الطبيعي زي أي مدينة في مصر

ربنا يكتر زيارتهم

hamada يقول...

جروب جريدة الصباح العربي بيت المدونين العرب
http://www.facebook.com/group.php?gid=78080770039

مهندس مصري يقول...

آبي
====
الله يبارك فيكي
:)
و راجعي ردي على مجداوية
:)

أحمد عاطف
=========
صحيح يا باشا
الله يبارك فيك
آميين
بالضبط يا أحمد
و راجع ردي على مجداوية

حمادة
=====
حاضر

maha zein يقول...

ايه ده
ده الناس كلها علقة اعلام
لا وربنا ايه ده
ده علي اساس ايه طيب
بس شوارعكم نضيفة
اوعه تكون نضفت بس عشان ماما سوسو

عموما مش فارقة زارت مزرتش مفيش حاجة بتتغير غير شوية الزرع اللى بيتلموا بعد الزيارة

لقد خلقنا الله احرارا يقول...

عالم مايجيش من وراها الا وجع الدماغ وزيارتهم دى هتعطل مصالح ناس كتير بدون استفادة فعلية
غير المنظرة الكدابة
بس انت مستغرب من العلم المتعلق اجبارى
احنا فى المدرسة ايام لجنة الجودة كان اجبارى نعلق صورةالريس فى حجرات المدرسين
والادارة
طيب الفصول وسكتنا
انما اوضتنا ليه يعنى ؟







على الاقل العلم ارحم


مجداوية متهيالى عبد الحليم كان غنى حاجة شبه اوبرا فى فى كل قرية وتماثيل رخام على الترعة

سومه...مجنونه فى بلد عاقل يقول...

ايه دا مبروووووك الخطوبه
عقبال الجواز واحنا كدا مخدناش الجاتوه
...
شكلك صدقت موضوع مستر تايد وسيبه فى حاله :)
......
بالنسبه للامتحان الحمد لله بفضل الله حليت كويس وخدت على قد نيتى :)

مهندس مصري يقول...

مها زين
========
الأعلام متعلقة بالأمر
و الشوارع دي هي وسط البلد فنضيفة دايماً
بس دهنوا الأرصفة تاني و خططوا الأسفلت من جديد
:)
و أهي جات زارت و إفتتحت المتحف و الأوبرا و مكتبة مبارك و مشت فقفلوا بعدها كل اللي فتحته
:)

لقد خلقنا الله أحراراً
====================
آه عبد الحليم قال كده
في أغنية من كلمات صلاح جاهين
بس مش فاكر إسمها

سومة المجنونة :)
==============
الله يبارك فيكي
لسه حفلة الخطوبة و تلبيس الدبل ليلة الجمعة الجاية بس حتكون عائلية على الضيق
:)
فلسه ما فاتكيش الجاتوه

آه صدقت

الحمد لله
ربنا يوفقك دايماً

جبهة التهييس الشعبية يقول...

هو نظيف مش مراته توافاها الله؟ مش ناوي يحزن عليها شوية ويرحمنا احنا؟ وللا هو اللي جاب اجلها وللا ايه؟

مهندس مصري يقول...

جبهة التهييس الشعبية
====================
ما الراجل ساكت و كانن
الكلام على سوزان يا حاجة
:)
أنا بس حاطط لينكات بوستات قديمة عن نظيف