الأحد، مايو 10، 2009

إضحك شوية

بيقولوا الريس كان بيموت فالحزب عمل مظاهرة نفاق قدام قصر الرياسة
و تصاعدت الهتافات : مع السلامة يا ريس , إلى جنة الخلد ياريس
فالريس سمع الدوشة فنده على رئيس الديوان و قال له : فيه إيه ؟
قاله : الشعب جاي يودعك يا ريس
قام رد و قال له : ليه ؟ هو الشعب رايح فين ؟!!!
:))
================================
الريس إتنكر و ركب تاكسي فلقى سواق معلق 4 صور صغيرة في القزاز القدماني فسأله مين دول ؟
قاله : دول رؤساء الجمهورية ؟
قاله : مين يعني كل واحد فيهم ؟
قاله : الاولاني محمد نجيب قائد الثورة
و التاني جمال عبد الناصر اللي أمم القناة و بنى السد العالي و حررنا من الإنجليز
و التالت أنور السادات بطل الحرب و السلام
قاله : و الرابع ؟
قاله بلامبالاة : لا ده ابو علاء شريكي في التاكس
:))

==================================
الريس هو و رئيس الوزراء إتنكروا و ركبوا تاكس و سألوا السواق عن رأيه في الريس و رئيس الوزراء
قام قال لهم : الأول زفت و التاني هباب
فلما كشفوا نفسهم مسك الفتيس و قال لهم : الأول زفت و التاني هباب و داس دبرياج و إدى الغيار على التالت و كمل : و التالت مش عارف معلق ليه ؟
:))
===================================
الريس و رئيس الوزراء إتنكروا و نزلوا على صعيدي بيفلح في ارضه و سألوه عن رأيه في الريس و رئيس الوزراء
قام قال لهم : الإتنين لع ( لأ يعني )
فكرروا السؤال فقال : الإتنين لع
فلما كشفوا نفسهم قال لهم : الإتنين لع و التلات لع و الاربع إنتوا معزومين حداي ( عندي يعني )
:))

===================================
رئيس الوزراء راح للريس و قال له : ياريس إبنك عايز شقة من شقق الشباب في إسكندرية
رد و قال له : إدي له ما هو من الشباب
بعد شهر
- ياريس إبنك عايز شقة في أسوان
- إدي له ما هو من الشباب

بعد شهرين
- إلحقني يا ريس إبنك عايز يفتح الشقتين على بعض
:))

==================================
الريس كان بيطلع في الروح و كان بيغمى عليه كتير و يفوق تاني

فاق مرة و نده : يا جمال
جمال : أيوه يا بابا
-عايزك تحكمهم بالحديد و النار
- حاضر يا بابا

أغمى عليه و فاق تاني و قال :
- يا جمال
- أيوه يا بابا
- عايزك تلبس رجالتهم كلهم طُرح
- حاضر يا بابا

أغمى عليه و فاق تالت و قال :
- يا جمال
- أيوه يا بابا
- ما تنساش تدي توكيل الطُرح لعلاء
:))

=============================

الريس زهق من عدم وجود أي صوت معترض من الشعب العادي على قراراته مهما كانت فقرر يعمل حاجة تحركهم
فأصدر قرار بوضع لجنة أو كمين على كل كوبري و اللي رايح و اللي جاي يتنفخ
و بدأ تنفيذ القرار و الشعب مستسلم و راضي كالعادة
فزعل جداً و قال لازم أشوف بنفسي و نزل على كوبري قصر النيل في التحرير
لقى الناس واقفة طابور قدام اللجنة و كل واحد منتظر دوره في النفخ
فقال : محدش عايز يقول حاجة ؟
فواحد قال : ايوه يا ريس
ففرح و قال أخيراً واحد حينطق فقاله : عايز إيه ؟
المواطن قاله : ورانا مصالح و اشغال يا ريس و الطابور طويل و بيآخد وقت كتير فياريت تخليهم يسرعوا معدل النفخ شوية

:))


هناك 13 تعليقًا:

Wish I were a Butterfly ... يقول...

:)
جميلة أوي النكت
و أول واحدة هي أكتر واحدة ضحكتني
أول مرة أدخل المدونة دي و حظي جه معاها على البوست دة

شكرا على البوست اللي بيساعد الناس تبتسم. ربنا يسعدك دايما

تحياتي

مهندس مصري يقول...

أتمنى لو كنت فراشة
================
الله يكرمك
عفواً
آميين
نورتي المدونة
:)

همس الاحباب يقول...

ههههههههههه
تسلم يا هندسة
جميلة قوى النكت
والاجمل الاخيرة لانها بتصور حالنا وواقعنا الفعلى
وفعلا شر البلية ما يضحك
تحياتى

maha zein يقول...

شر البلية ما يضحك
هنقول ايه
ربنا علي كل مفتري
نكت جميلة وفي الصميم
يوه يا شيخ ضحتني وانا مش فاضية وبغسل

خمسة فضفضة يقول...

السلام عليكم ورحمة الله وبركاته

هههههههههههههههههه

ايوه يا عم المهندس اتريق علي الريس براحتك خااااااالص
ما انت في الامان بره مصر ههههههههه


بس حلوين وفي منهم اللي اول مره اسمعه


سلام

مهندس مصري يقول...

همس الأحباب
=========
فعلاً

مها زين
========
آميين

خمسة فضفضة
=========
و عليكم السلام و رحمة الله و بركاته

لا يا ستي أنا لسه جوه

و لو كنت بره فأهلي كلهم جوه

كويس إنهم عجبوكي و كنت منتظر تضيفي نكت تانية من عندك
و لا انتي بتخافي ؟
:)

بدراوى يقول...

حلوة النكت يا باشمهندسة
بس بخصوص نكتة الكوبرى هو كان فيه قرار تانى
و هو تدفع 10 جنيه و انت طالع الكوبرى
و بعدين تنضرب بالقفا و تدفع 10 جنيه تانية و انت نازل من على الكوبرى
و الناس كانت بتقول ياريت يزودوا شوية الناس اللى بتضرب على القفا عشان نخلص :-)
----
ممكن لو سمحت لينك تدوينتك عن بيع القطاع العام
لأنى شوفت كلامك عند أحمد سعيد و معرفتش اقراه كله بسبب الخلفية السودة اووى ديه
ده انا بقرا موضوع احمد بالتحسيس
مش ممكن :-(

بدراوى يقول...

اوبا سورى جداً
قصدى يا باشمهندس
اسف جداً

لو تحب اشيل كلامى و احطه تانى مفيش مشكلة

كيــــــــــــارا يقول...

هههههههههههههههههه

جامده بجد

هم يبكي وهم بضحك

هو المدونه اتشقلبت ليه

إنـســـانـة يقول...

هههههههههههههههههه والله كتر خيرك انك عايزنا نضحك فى وقت لا يشجع على الابتسام حتى

بس انا عندى اعتراااااض بسيييييط .. جماااااال مش من الشباااااااب .. اومال احنا نبقى ايه .. اطفال؟؟؟

مهندس مصري يقول...

بدراوي
=======
ههههههههههه
حلوة
بالنسبة لخلفية أحمد السوداء
أنا بأقرأ موضوع أحمد من الجوجل ريدر لإن خلفيته بيضاء
ثم بأخش اقرأ التعليقات من صفحة كتابة التعليقات نفسها لإن خلفيتها بيضاء
مش من صفحة البوست نفسه لإني بأتعب جداً من الإسود برضه

ثم كل اللي كتبته هناك أول مرة أكتبه
و ما نشرتوش عندي في بوست قبل كده

تصدق بالله فكرة و الله أبقى آخده كوبي و بست و أنشره تاني في بوست عندي لوحده مع الإشارة بلينك لبوست أحمد سعيد

سوري على إيه ؟
إنت ما قلتش حاجة غلط

كيارا
=====
المدونة إتشقلبت علشان حطيت فيها كود Html علشان أشترك في https://www.google.com/webmasters/tools/dashboard
اللي بيديكي معلومات مفيدة عن موقعك
و دي إحدى خدمات جوجل
:)

إنسانة
=======
هو لما ألفوا النكتة من 15 سنة كان لسه جمال من الشباب
:))
و ألف خطوة عزيزة دا إحنا مش بنشوفوكي غير كل سنة مرة

ربنا يسعدك دايماً

جنّي يقول...

السلام عليكم

جميلة النكت ..

وشر البلية ما يضحك ..

وهل هناك أشر مما ابتلينا به من حسني وحزبه الفاسد وحكوماته الاكثر فسادا ..

مهندس مصري يقول...

جني
==
و عليكم السلام و رحمة الله و بركاته
هو فعلاً شر البلية ما يضحك
لكن أكيد فيه أكثر شراً
مفيش شر غير و فيه ألعن منه لحد ما القيامة تقوم

أستر علينا يارب