الجمعة، يوليو 24، 2009

برضه اللاب توب تاني

فاكرين البوست ده أنا حأغيب عنكم شهر
نفس العيب تاني في الشاشة
و برضه لما وديته الضمان قالوا حيبعتوه الرياض و يرجع في خلال 3 أسابيع
المهم أنا مش حأعرف أخش نت زي الأول
حيبقى نظام محايلة و إستغلال لأجهزة زمايلي اللي معايا في السكن كل أما جهاز فيهم يفضى
فوجودي حيقل كتير في المدونات الفترة الجاية

و السلام عليكم و رحمة الله و بركاته

هناك 14 تعليقًا:

مواطن مصري يقول...

اي سيبر بس ابقى خلي بالك من الهيئة

بدراوى يقول...

معندهمش سيابر يا مواطن يا مصرى
يارب يتصلح الحال و ترجعلنا بألف سلامة يا مهندس

Me7'o يقول...

هاتوحشنا والله يا هندسة

لو عاوز منى أى خدمة فى الرياض أأمرنى
أو حتى لو عاوزنى أزنلك على دماغ الراجل اللى هايصلحه أنا تحت أمرك برضه

أنا أجدع واحد يزن
هههههههههههه

تحياتى

تليفونى أهوه لو فيه أى خدمة أقدر أقوم بيها

0595819404

عصفور المدينة يقول...

السلام عليكم ورحمة الله وبركاته
لو اللاب توب بتاعك ماركته إيسر

شوف الفيديو ده
عشان فيه مشكلة شائعة في شاشات اللاب توب الإيسر وشركة إيسر نفسها مش عارفة حلها

عصفور المدينة يقول...

السلام عليكم ورحمة الله وبركاته
لو اللاب توب بتاعك ماركته إيسر

شوف الفيديو ده
عشان فيه مشكلة شائعة في شاشات اللاب توب الإيسر وشركة إيسر نفسها مش عارفة حلها
http://www.youtube.com/watch?v=cT0h58JACIU

أحمد عاطف يقول...

هتوحشنا يا هندسه

ربنا يرجعلك الجهاز بالف سلامة عشان انت ترجعلنا بالف سلامة

علي محـمــــــد يقول...

السلام عليكم

في انتظار عودتك وكتاباتك يا مهندسنا :)

بس استعجلهم ولا تغيب كثير يا اخي

في امان الله

فتاه من الصعيد يقول...

الف سلامه على الشاشه ....... وربنا معاك وتتحل المشكله بسرعه
هنفتقدك كثيرا ...... ابقى حاول تكتب البوستات وأنشرها لأن مواضيعك جديره بالمتابعه ومهمه جدا

مهندس مصري يقول...

مواطن مصري
===========
السايبرات كتير بس الساعة بـ 5 ريال يعني بـ 7,5 جنيه
إنما لما أتاقل على زمايلي كل واحد شوية يبقى حنتصرف لحد ما الفترة دي تعدي
ثم الهيئة ملهاش دعوة بالسايبرات لإن النت كله متفلتر و أي موقع مشبوه بيكون محجوب
و الهيئة ملهمش غير إن السايبر يقفل وقت الصلاة علشان صلاة الجماعة في المسجد زيه زي كل المحلات التانية اللي بتقفل مع الأذان و بتفتح بعد إنتهاء صلاة الجماعة في المسجد

بدراوي
======
السايبرات كتير بس قعدتها توجع الجيب
:)
الله يسلمك يا غالي

ميخو
=====
الله يكرمك
بس أنا ما أعرفش توكيل الـ acer ده فين و لا إسمه إيه
و مش عايز أتعبك خصوصاً إن التوكيل بتروح له أجهزة من كل المملكة
شايلينك لعوزة يا باشا
و تليفونك خلاص شلته عندي للمهمات الصعبة
:)

عصفور المدينة
=============
و عليكم السلام و رحمة الله و بركاته
شفت الفيديو
بس أنا مشكلتي عكسية
إضاءة الشاشة بتنطفئ و بأكون شايف الكلام بشكل مظلم جداً
كأنك حطيت فلتر شديد السواد على الشاشة و بتكون شايف الكلمات و الأشياء بصعوبة
لكن لما بأقفل الشاشة و افتحها بتتعدل
لكن شوية و ترجع تطفطف و تطفي تاني
و هكذا
و قبل كده وديته التوكيل و إتصلح و رجع باظ تاني بنفس العيب
مش عارف بقى الحل إيه ؟
خصوصاً إن الضمان حيخلص كمان 3 أسابيع و بعدها أي عطل تاني تصليحه حيكون على حسابي
و أنا معنديش مشكلة أصلحه بس أكون بوظته مش يكون العيب من عندهم و أنا أشيل الليلة

أحمد عاطف
=========
الله يسلمك يا باشا
ربنا يكرمك يارب

علي محمد
=======
و عليكم السلام و رحمة الله و بركاته
ربنا يسهل :)
أسعد دوماً بتعليقك يا أخي

فتاة من الصعيد
===============
الله يسلمك
يارب تتحل المشكلة بسرعة لإن في الغربة هنا النت يمثل جزء كبير من حياتي
شكراً إنك شايفة موضوعاتي مهمة
:)
بس الحقيقة أنا بقى لي فترة مش لاقي حاجة أكتبها و عمال بأنشر في مواضيع منقولة
مش عارف حأقدر أكتب مواضيع خاصة بيا و تتناول أي حاجة من وجهة نظري و لا أنا أصبت بحالة جفاف تدويني و لا إيه ؟
راجعي اللي كنت كاتبه في البوست ده
http://egyptioneng.blogspot.com/2008/08/blog-post_25.html
أنا حاسس بنفس الحالة دي تاني

عصفور المدينة يقول...

لو هو إيسر يا محمد يبقى الحل اللي في الفيديو ده حيحل الاثنين
وانا عندي موديل مش شكل اللي في الفيديو وفتحته وضغطت على الكابل واتحلت المشكلة برضه

وهما لما بياخدوه بيغيروا الشاشة بينما العيب مش فيها

مهندس مصري يقول...

عصفور المدينة
=============
هو إيسر يا هندسة
خلاص لو باظ تاني بعد ما يرجع من التوكيل أبقى أجرب وصفتك دي قبل ما أدفع الشئ الفلاني في تصليحه بعد ما الضمان يخلص

شكراً جزيلاً على النصيحة :)

فتاه من الصعيد يقول...

ولا يهمك ..... المهم تكون بتفيد اللي بيدخل .....والأجازه هتديك افكار حلوه
في انتظار الجديد والمفيد كالعاده

عمرو المصري يقول...

عجبا لأمر المؤمن أمرله كله له خير
حتي الشوكة يشاكها يغفر الله له بها


الحمد لله علي كل حال


في انتظارك ولكن لا تتأخر

او اشتريلك لاب جديد واخلص ياعم

انت ماشاء الله من غير حسد مهندس وبتقبض قد كده
عقبالي يارب
انا كمان


انا بهزر طبعا
ان شاء الله خير

جزاكم الله خيرا

مهندس مصري يقول...

فتاة من الصعيد
==============
إن شاء الله خير
:)


عمروالمصري
=========
الحمد لله الذي لا يحمد على مكروه سواه

آه يا جيبي
جديد ايه هو القديم جه بالساهل
:))