الجمعة، يوليو 31، 2009

مخنوق في عيد ميلادي

البوست ده مجرد فضفضة فمفيهوش أي حاجة مهمة و أديني قلت من الأول أهوه
من ساعة ما نقلت مع زمايلي في السكن الجديد و بقينا 5 في شقة بدل ما كنا 2 في أوضة و أنا مستغرب ا لمكان و العيشة
و القواعد بتاعة العيشة المشتركة بقى و مين حيطبخ و مين حيشيل و يحط و مين حيغسل الإطباق و الأكل حيتقسم إزاي و غيرها من أمور الحياة المشتركة
أنا إنسان بسيط لحد غير عادي و دايماً بأتعامل مع الناس على سجيتي و مش بأحسب حسابات كتير لكن بأتفاجئ لما يكون تصرف بسيط عملته واحد او أكتر أخدوه على محمل غير بسيط بالمرة و فسروه تفسير تاني خالص و ياريتهم واجهوني علطول بحيث افهمهم قصدي و نصفي الموضوع في مهده لكن لأ ده بيشيلوه و يبتدوا يراكموا حاجة فوق حاجة فوق حاجة و أنا مش واخد بالي لحد ما ألاقي واحد إنفجر في وشي بدون سبب من وجهة نظري و بعد صبر طويل من وجهة نظره
أنا مش بأحب أزعل حد بل و بأحب الناس كلها تكون حبايبي لكن الناس مش بسيطة
الناس عايزة اللي يتعامل معاها بحذر طول الوقت و يلبس 100 قناع بحيث يقدم لكل واحد فيهم القناع اللي على مزاجه و الا يبقى مش تمام
أنا مش بأحب الأقنعة و بأحب أكون على طبيعتي مع العلم إني قلت لهم قبل كده يا جماعة اللي أزعله في حاجة يقول لي و نتناقش و لو أناغلطان حأعتذر له و قدام الناس كلها و لو مش غلطان يبقى فهم قصدي و صافي يا لبن
والله ما في ملحوظة حد لفت إنتباهي ليها إلا و حاولت بكل جهدي إني ما أكررهاش و كلها حاجات بسيطة
لكن مش عارف حاسس إن الناس واقفة لي على الواحدة
يمكن أنا بأبالغ علشان اللاب توب بتاعي بايظ و مش قاعد على النت علطول زي ما كنت متعود
بس أنا حاسس إني مش قادر أتصرف على طبيعتي و لازم أعامل كل واحد بالراحة خالص و لازم أحسب 100 مرة الكلام قبل ما أقوله علشان ما يتفهمش غلط حاسس إني ماشي في حقل ألغام
ده في السكن أما في الموقع فمشكلة تانية
المهندس عبد الخالق الفلبيني رئيسي المباشر في الموقع فهو حساس زيادة عن اللزوم و فيه عيب زي الزفت دايماً في أي تصرف بيفرض التفسير الوحش و النية الغلط مع إن ربنا قال : ( إجتنبوا كثيراً من الظن إن بعض الظن إثم ) لكن هو علطول بيظن الظن السيئ و لو كنت عملت معاه 1000 حسنة ممكن يمسح لك سجلك بسيئة واحدة وياريت تكون عملتها بل بيكون هو ظنه السيئ فقط
لدرجة إني بقيت متأكد إن عنده شعرة ساعة تروح و ساعة تيجي
المهم إنه قفل معايا قفلة من قفلاته العجيبة و أنا صالحته كتير قبل كده رغم إني ما كنتش بأكون غلطان بس كنت بأقول معلش أعمل بأصلي و أعمل حساب لفرق السن و أصالحه لكن المرة دي بقى كنت جبت آخري فلما حاولوا يصالحونا على بعض و هو اتعنطز أنا ما إديتلهوش أهمية و بقى له إسبوعين لا بيكلمني و لا بيرد السلام حتى و أخد شغل الموقع كله لنفسه خصوصاً إن الشغل بقى خفيف في الموقع و يقدر يشرف عليه مهندس واحد بس و عموماً هو ماشي في نهاية شهر 9 لإن عقده إنتهى و هو مش حيجدده و راجع بلده في جنوب الفلبين
و بعدها أنا حأستلم الموقع مكانه لكن حالياً معنديش شغل و معنديش نت و الناس بتحسب عليا تصرفاتي و كلامي و حأموت من الملل و الخنقة و عموماً انا من بكرة حأنزل المكتب علشان أتدرب على شغل واحد زميلنا من المكتب حينزل أجازته في مصر خلال شهر رمضان و لما يرجع بعد العيد ساعتها حأرجع أنا الموقع
الغريب بقى في وسط الخنقة اللي حتموتني دي إن ناس كتير قوي هنئتني بعيد ميلادي على الفيس بوك
مع إني كنت عندي مدونة و حساب على الفيس بوك السنة اللي فاتت إلا إن السنة دي لقيت التهاني بعيد ميلادي بتنهال عليا في الفيس بوك بشكل إستغربت له و أكتر بكتير من السنة اللي فاتت
أنا مش بأهتم قوي بموضوع عيد الميلاد ده هو مجرد يوم بيزيد فيه عمري سنة و مش عارف حسناتي زادت فيه و لا سيئاتي و ياترى السنة اللي فاتت حتشهد لي عند ربنا و لا حتشهد عليا
و وسط كل الخنقة دي صعب ألاقي حاجة أكتبها في المدونة و علشان كده لو تلاحظوا أنا بأنشر منقولات بقى لي فترة طويلة لإني مفياش مزاج و لا دماغ لكتابة أي حاجة
فاكرين اللي كنت كاتبه في موضوع أكتب ايه ؟ من سنة فاتت
دلوقتي الحالة النفسية و التدوينية عندي أسوأ بكتير
مشاكل في الشغل و السكن و النت و قرف الغربة العادي كل دول عاملين عندي كوكتيل خنقة يجنن و كان لازم أفضفض شوية قبل ما دماغي ينفجر من الضغط لإني لما بأزعل ضغط الدم بيعلى عليا صحيح أنا مش عيان بالضغط بس بأحس بيه يعلى عليا لما أزعل أو اتنرفز
ربنا يعدي الايام دي على خير

هناك 31 تعليقًا:

بدراوى يقول...

مهندس مصرى
انت انسان جميل و محترم
و بتتعامل بخير مع كل الناس
و ده شىء جميل اوووى

مشاكلك فى الشغل طبيعية
يمكن انت بتأخذها بشكل تانى
من الحزن او الغضب
لكن حتتحل و حتبقى افضل

مش عارف اقولك ايه
بس انا نفسياً معقول
بس مش كويس اوووى
بسعى فى شغل دلوقتى و حقدم فى كورس
جديد
بس لسة قدامى كثير عشان الاقى نفسى كويس
اتمنى ليك تبقى افضل من الأول
انت قدها اكيد

و بعدين ياريت تبص نظرة تانية
و تشوف ان موضوع خطوبتك ده
فيه خير
و يمكن يكون الإنسانة اللى ترتبط بيها
فيها خير ليك
و تبدأ بداية جميلة ليك

اتمنى ليك كل توفيق

مواطن مصري يقول...

كل سنة و انت طيب مدام انت انسان طيب يبقى هتقابل الناس الطيبين

و متنسناش في التورتة شيكولاتة

لقد خلقنا الله احرارا يقول...

مش عارفة اقول لك ايه
ربنا يصلح الحال والسنة الجاية فى نفس الميعاد ان شاء الله تكون الاحوال احسن بكتير
هو عموما كل اللى حكيته حاجات بسيطة
بس الواحد بتعدى عليه اوقات قدرته على الاحتمال بتقل
وكمان احيانا المشاكل بتكتر كلها فى وقت واحد وبتتحل كمان بأذن الله فى وقت واحد
انا لما بيعدى عليا يوم صعب اوى بحفظ تاريخه
واقول لنفسى اصبرى والسنة الجايةفى نفس الميعاد هتلاحظى الفرق
الحمد لله اننا مؤمنين وان ربنا امرنا بالصبر
ربنا يصبرك ويهون عليك ويصبرنا

مهندس مصري يقول...

بدراوي
=======
يا عزيزي أنا بأتكلم عن الحاجات اللي خنقاني و اتكركبت كلها مرة واحدة
لكن الخطوبة طبعاً نقطة مضيئة في حياتي
بس أنا بأتكلم على البيئة اللي عايش فيها حالياً و بأواجهها يومياً

مواطن مصري
===========
هههههه لا ما كانش فيه تورتة النهاردة يادوبك جبنا كيلو هريسة و أكلناه إحنا الخمسة خلاص معلش جيت متأخر يا مواطن

لقد خلقنا الله أحراراً
====================
إن شاء الله السنة الجاية حتكون أحلى
كل اللي خانقني فعلاً حاجات بسيطة بس كركبتها كلها في وقت واحد حسسني بإني مخنوق و مش طايق
ربنا يصبرنا جميعاً آميين

فاتيما يقول...

يا محمد ربنا يفكها عليك
للأسف دى مشكلة العيشة مع أغراب فى بيت واحد ..عملية التكيف دى صعبة قوى
كويبس إن الراجل الفليبينى دا ماشى عشان ميبقاش مشكلة مزمنة ...
عارف حلها إيه؟!!
تتجوز يا إبن الحلال و تيجى مصر تاخد عروست فى إيدك و ترجع هناك ...
متهيألى منتاش مستعد مادياً .. صح؟
و هينفع تاخدها معاك فى سكن الموقع ..مش هينفع طبعاً ...
الله مالها متقفلة كدا ليه ؟
لأ ..إنتا تصلح النت بسرعة بقى
و تنسحب من محيطهم قدر الامكان
و تحاول تتجنب الحوار الطويل معاهم ...
ربنا يهديهم و يروقلك الحال
يا رب

فتاه من الصعيد يقول...

أولا كل سنه وحضرتك طيب

ثانيا : ما تعملش حساب لمشاعر الناس ..... أتصرف على طبيعتك .... طالما كده كده في زعل

ولو حد زعل ...... قوله ما أتنيلتش قلت ليه من الأول أنك بتضايق من التصرف ده

وبكده لو بيتلككلك يبقا خد على دماغه
لو موش بيتلكك يبقا فهم أنه لازم ينبهك بذوق لما يضايق من تصرف انت عملته

وفي الحالتين انت كسبت انك بقيت على طبيعتك

بالنسبه للمدير المهبوش .... فسيبه لغايه ما ربنا يرحمك منه وما تركزش معاه

بالنسبه للغربه .... ربنا يعينك عليها

كل سنه وانت طيب كمان مره

مجداوية يقول...

السلام عليكم

أولا كل سنة وانت طيب
ثانيا المعيشة مع أغراب عنك وكمان أغراب عنك في الطباع أمر مش سهل أبدا والاختلاف والخلاف أمر حتمي لإاذا كانوا الاخوات مش بينسجموا مع بعض فما بال الأغراب هو بس نصيحة متكنش على طبيعتك أوي لأن الطبيعية مش دايما كويسه ممكن تؤذي اللي قدامك بعفوية فياريت تحد من البساطة لأنها لا تصلح في التعامل مع البشر في الدنيا يعني قليل وقليل فقط من عدم البساطة لتتوافق مع من حولك مش كل حاجة تحسها تقولها ومش كل كل حاجة متعجبكش تقولها بكل صراحة وربنا يعينك على غربتك المتعددة الأضلاع دي
أما رئيسك الفلبيني فيا ريت تصالحه وتنهي مدة وجوده بذكرى طيبة عنك وعن الاسلام حتى لو كان هو الغلطان لأنه باقي له أيام وماشي .. هو مسلم ؟على العموم سواء كان مسلم أم لا ففي الحالتين خليك أكرم

عندك هموم وغربة وخنقة
وهنا هموم وغربة وخنقة
وغربة الوطن أشد وطأً
ورب هنا رب هناك وكلها أرض الله فلا تبتأس وانظر لنص الكوب الملىء وأكيد بعد الخنقة فرج

أنا لا أقلل من احساسك بخنقتك ولكنها نصيحة أخوية من مغتربة سابقة خارج الوطن ومغتربة حالية داخل الوطن

Me7'o يقول...

حبيبى

بقولك إيه يا أبو حميد

بينك وبين الكعبة سكة خمس ساعات
على هناك على طول من غير ما تفكر
الخميس الجاى تكون هناك وأرمى حمولك بقى على الله

وأفتكر إننا فى شهر شعبان
ولما إنسان زيك كده يا أبو حميد يحس بالضيق والخنقة وأنا عارف إنه نظيف قوى بعرف برضه على طول إنه بعيد عن ربناالفترة دى

ربنا يهون عليك غربتك ويسهلك أمورك فى شغلك وفى سكنك

وفى الآخر

كل سنة وإنت طيب

عاشقة الفردوس يقول...

كل عام وانت الي الله اقرب وعلي الطاعة ادوم وعن النار ابعد

وربي يفرج ماانت به ان شاء الله

ساعات بتحصل الحركة دي
بتلاقي كل حاجة فوق دماغك

بس هقولك حركة حلوة

خد نفس عميق


كمااان

كماااااان


يلا قول لا اله الا الله


ايوة سيدنا محمد رسول الله


استغفر كده علي قد ماتقدر


ربي ييسرلك امورررك يارب ان شاء الله


قال رسول الله صلي الله عليه وسلم " من لزم الاستغفار جعل الله له من كل ضيق مخرجا ومن كل هم فرجا ورزقه من حيث لايحتسب"

صدق رسولنا الكريم


إلزم الإستغفااااار

شوكولاتة يقول...

كل سنة وحضرتك طيب يابشمهندس
وإن شاء الله السنة الجاية زي النهاردة تكون كل أمورك أحسن. وماتحطش في دماغك كلام الناس لأن أنا بتعامل مع الناس اللي من الصنف ده على أساس إنهم مرضى
وربنا يرزقك الخير حيث كان
السلام عليكم

Rannon يقول...

أولا كل سنة وانت طيب وعقبال سنين كتير وانت مبسوط

ثانيا بقى بالنسبة لموضوع السكن وازاي تعامل وتتعامل فدي حاجة طبيعية انا عانيت منها جامد رغم اني مش برة مصر بس عيشت في دور مغتربات ومدينة جامعية عشان الدراسة صحيح تعبت قوي خصوصا أول سنتين بس في النهاية اتعلمت حاجات كتير وهي اني فعلا أعرف أتعامل مع الناس بمختلف طباعها وتفكيرها ودي ملكة صعب تلاقيها عند حد ده غير انك هتقابل أنواع من البشر غريبة فعلا ومطلوب منك تعيش معاها...انت مستغرب الموضوع بس عشان جديد عليك بس شوية شوية هتلاقي الحكاية بقت سهلة وان انت اللي بتتعلم وبتكتسب صفات جديدة وخد بالك بعد سنين الغربة والسكن مع ناس مختلفة هتعرف قوي معنى مقولة(تعرف فلان؟..أعرفه..عاشرته؟ لأ...يبقى متعرفوش

ثالثا بالنسبة للشغل ومشاكله والغربة بصفة عامة وقرفها..فا انت بس قول يااااااااااااارب وهي تتظبط ان شاء الله

وكل سنة وانت طيب وبخير يارب
واوعى تزعل نفسك في عيد ميلادك تاني وانزل بسرعة اشتريلها حاجة حلوة :)

على عبدالله يقول...
أزال المؤلف هذا التعليق.
على عبدالله يقول...

على فكرة
انا لما بحس بخنقة كدا بروح مكة والمدينة
سبحان الله تغيير تام بعد العودة

فتوكل على الله
وانتظرنى ان شاء الله فى عمرة رمضان ((الايام الاواخر)) ونسمع بقى للسديس والشريم والجهنى والمعيقلى والكلبانى
واجمل حاجة الفطار فى الحرم .. يا سلام
متعة
ربنا ما يحرمنا وجميع المسليمن

دى هاتبقى هيصة

:)

مهندس مصري يقول...

فاتيما
=======
رديت عليكي في الإيميل

فتاة من الصعيد
===============
و انتي طيبة و بخير :)
المهندس الفلبيني خلاص قاطعنا بعض و الموضوع انتهى و لما يمشي حأستلم مكانه و خلاص

و بالضبط زي ما قلتي كل اللي عايزه اللي ينبهني لغلطي لو غلطت ينبهني بذوق و على جنب بيننا و بين بعض مش لازم يجرسني و يزعق لي في قلب الشقة
دا حتى زمان قالوا النصيحة في العلن فضيحة

مجداوية
======
و عليكم السلام و رحمة الله و بركاته
أنا دلوقتي بقيت أتصرف بحرص بس بقيت حاسس إني مخنوق و مش على طبيعتي

بالنسبة للبشمهندس عبد الخالق فهو من مسلمي جزيرة ميندناو في جنوب الفلبين و لكنه مريض بعقدة الإضطهاد و الظن السيئ و هذه ليست أول مرة يخطئ في حقي و في حق آخرين كثيرين و لكني كنت بأصالحه دايماً و آجي على نفسي و حاولت اصالحه المرة دي برضه علشان الذكرى الحلوة لإني و الحمد لله مفيش مكان إشتغلت فيه الا وسبت فيه ورائي الذكرى الطيبة مع جميع الزملاء
لكن هو رفض الصلح تماماً رغم إن هو اللي غلطان
يبقى حأعمل إيه بقى ؟ أتحايل عليه ؟
ده مش بيرد السلام حتى و لو دخل غرفة بيصافح الكل ما عدا أنا
هو يمكن يكون مريض نفسياً من ساعة ما ماركوس حاكم الفلبين الديكتاتوري في الثمانينات حرق قريته بالكامل و الجيش الفلبيني كان بيذبح المسلمين في منطقته
يشهد الله إني كنت بأعامله بما يرضي الله لكن هو اللي ظنه السيئ بيصور له أوهام إضطهاد الجميع ليه ؟

مهندس مصري يقول...

ميخو
=====
خمس ساعات مين ؟
دول 1100 كم يا مفتري عمرهم ما ييجوا 5 ساعات ابداً :))
ممكن أنزل حملة آه بس أنا كنت عايز أخليها في اول خميس في رمضان علشان أعمل عمرة رمضان قبل الزحمة

آميين ربنا يهون علينا كلنا
و كل سنة و انت طيب و بخير و سعادة :)

عاشقة الفردوس
==============
آميين
لا إله إلا الله , محمد رسول الله
أستغفر الله العظيم من كل ذنب و أتوب إليه

شوكولاتة
=======
و عليكم السلام و رحمة الله و بركاته
وحضرتك طيبة
آميين
هما مش مرضى بل و كانوا أصدقائي قبل ما نسكن مع بعض بس واضح إن سيستمنا مش متضبط مع بعضه في السكن سوا

رنون
=====
و كل سنة و انتي طيبة و ربنا يبسطك دايماً
و ياستي أنا برضه كنت مغترب في أول سنتين في الكلية و أول سنة عشت في المدينة الجامعية و كنت زي الفل مع الناس كلها و السنة التانية عشت في شقق طلبة بره المدينة و كل ترم في شقة مختلفة و عاملت أصناف ناس كتير قوي و جامعة اسيوط كان فيها من كل صنف و لون قبل ما أحول لهندسة إسكندرية
و السنة اللي فاتت ما كنت ساكن في بداية المشروع في فيلا مشتركةلمدة 3 شهور مع 3 زملاء معايا في نفس الغرفة
و عمر ما حد من الناس اللي سكنت معاهم ما وقف لي على الواحدة كده و لا كان متربص لأي غلطة مني رغم إن كلها حاجات هايفة
و بعدين ما قلنا قبل كده جبنا كيلو هريسة و خلص خلاص
بس برضه الهريسة بتاعة مصر أحلى
خصوصاً من محل أولاد رزق عندنا

علي عبد الله
===========
و عليكم السلام و رحمة الله و بركاته
ربنا يكون في عونك
لا أنا كلهم أصحابي بس فجأة كده لقيتهم وقفوا لي على الواحدة و بييجوا في الهايفة و يتصدروا

بس أنا ناوي على العمرة في أوائل رمضان علشان أتفادى الزحمة :)
أنا برضه بأحس بعد العمرة بصفاء نفسي تام و غسيل للروح من كل الشوائب و المشاكل العالقة

حمدى جعوان يقول...

والله يابشمهندس اللى اقدر اقوله هو انى ادعيلك ربنا بإنه يزيل الهم والضيق عنك ...... انا والله بمر بنفس الحاجات اللى بتقول عليعا مع اختلاف المهن يعنى.... ويمكن اللى فرفشنى شوية هو انى قررت انزل اجازه فى رمضان لانى فعلا جبت اخرى زى ماقولت... ان شاء الله الايام هتعدى والاحوال هتتصلح .. هون على نفسك (( الكلام ده بقوله لنفسى كمان )) وصلى لربنا واان شاء الله هتتظبط الامور ( ألا بذكر الله تطمأن القلوب )

وكل سنه وحضرتك طيب

مجداوية يقول...

السلام عليكم

ربنا يفرج همك

الأخ عبد القادر لاقى كما تقول من الاضطهاد ما لاقى فعذره معه فادفع بالتي هي أحسن واشتري له مصحفا هدية واكتب له رسالة أخوة جميلة وأرسلها له مع من تثق فيهم ولا أعتقد أنه سيرد كتاب الله ويرفضه وستكون عملت اللي عليك وزيادة وهذا من الأحسن الذي ذكر في الآية الكريمة, فان كان أهلا لرضا الله تصافيتما وان تمسك بموقفه فستكون أمام الله برئت من خصامه وخيركما الذي يبدأ بالسلام
اصلح الله شانكم كله

أم مالك يقول...

انا اول مرور وحاسة انك انسان
محترم ومميز واحسبك على خير
كل عام وانت بخير
بالنسبة للغربة ربنا يعينك
انا حافظة مواقف وحاجات كثير فنصف العيلة عندنامغتربة
ولاكثر من عشرين سنة
ربنا ييسر امرك واتمنا التواصل
تحياتى

مهندس مصري يقول...

حمدي جعوان
=========
أنا لسه راجع من الأجازة من شهر و نص بس
بس ما تعرفش الدنيا إتكركبت فجأة ليه ؟
عموماً كلها أيام و بتعدي
ربنا يهون علينا جميعاً

و كل سنة و حضرتك طيب برضه :)

مجداوية
======
و عليكم السلام و رحمة الله و بركاته
ممكن جداً يرفض كتاب الله لإنه حيقول لي إنت مش بتطبق اللي فيه
حيث إنه شايف إننا مسلمين بالإسم فقط
و هو لسه مزعق النهاردة مع مهندس كبير زميلنا في المكتب حاول يفتح معاه سكة للصلح
لكن عموماً هي فكرة حلوة ممكن في آخر يوم ليه قبل ما يسافر أدي له هدية مصحف باللغة الإنجليزية و اكتب له إهداء كويس علشان يفتكرني بالخير

إنما أنا بدأت بالسلام كذا مرة و هو رفض حتى يرد السلام

أم مالك
========
الله يحفظك يا فندم
سعيد بتشريف حضرتك ليا
:)

أحمد عاطف يقول...

العزيز الصديق محمد

اولا كل سنة وانت طيب

هاحكيلك قصة صغيرة حصلت لي

اول ما سافرت ليبيا كنت متخيل ان البشر كلهم زيي ينفع يتعاشروا

لكن فوجئت زيك كده من زملاء السكن

الاول كان معايا زميل في الغرفة

فاتبعت مبدأ اليهود ليا النص يبقى اعمل كل اللي نفسي فيه

وبدأت لحد ما طفش وبقى بينام في الصاله

ومن يومها باب اوضتي بمفتاح ومافيش مخلوق معايا الا اخويا لما ييجي من المنطقة اللي كان فيها

وفضل الحال دا لحد قبل ما اسيب الشغل ب 3 ايام وكنت قررت اسيب الشركة خلاص وسمحت بشريك اخر في الغرفة عشان يستفاد بيها لوحده بعد رحيلي

مش ها قولك ادفع باللتي هي احسن

هاقولك أعرض عن الجاهلين

اجتنب الناس دول وهتلاقيهم هما زهقوا

هتلاقي بالمعاشرة فيهم ناس محترمين جدا اكيد

لكن هتلاقي فيهم ناس لما تجتنبهم زيهم زي ال ....

ربنا يعينك ويهون عليك

فصبر جميل والله المستعان على ما تصفون

سمسم يقول...

السلام عليكم
معلش اتوكل على الله
يبني
انا عارفة المزاج ده كويس
عادي يعني
ربنا يعين
وكل سنة وربنا راضي عليك

على عبدالله يقول...

السلام عليكم

معلش يا هندسة انا حذفت التعليق
لقيته مايصحش !!
:)

تحياتى

مهندس مصري يقول...

أحمد عاطف
========
الحمد لله إن مفيهمش جاهلين
بس بيعلقوا على حاجات تافهة
عموماً الأمور بدأت تتحسن و أنا برضه متقوقع على نفسي و مش زي الأول تفادياً لأي مشاكل

سمسم
===
و عليكم السلام و رحمة الله و بركاته
أهلاً و سهلاً باهلنا في غزة العزيزة
حضرتك نورتي المدونة

ربنا ينصركم يارب

علي عبد الله
============
و عليكم السلام و رحمة الله و بركاته

و لا يهمك
براحتك خالص

محامي مصري ابن مصري يقول...

ايه يا حمام مالك بس صلي علي النبي كدا امال لو مكنتش انت الي بتعلمنا الصبر ولا نسيت علي العموم انت كنت حتنسينا نقول كل سنه و انت طيب و ان شاء الله السنة دي تشهدلك عن ربنا بكل خير . بالمناسبة كنا لسا في سيرتك كالعادة بكل خير يا باشمهندس و عايزين نقولك كل سنه و انت طيب يوم الجمعة الي فاتت بس بعد كدا عرفنا ان نتك مش تمام اليومين دول و ابعث اليك سلام وليد و وليد عابد و العبد و هيثم و ابنته ايه و حمو الجفاص و عبدو التمساح ( ضياء ) و اخية علي بيه ( بهاء ) و الغز الي بوظ محل اولا رزق و خلي التذوق 70% من المحل لينا و الواد حمدي كمان بيصبح علبك و كل اصدقاء الجينيرالز في ايه بلص كافي و اخيرا اخوك الشكور الي اصبح مدون حديثا عن الموتورولا بس و اسيبك بقا شويا مع الحبايب

مهندس مصري يقول...

محامي مصري بن مصري
==================
ههههههههههههه
حبيبي يا شكري
سلامي للاصحاب كلهم
و كل سنة و انتم جميعاً طيبين يا شلة دمنهور الغالية
و أول ما اللاب توب يتصلح حأسلم عليكم صوت و صورة
نورت التدوين يا عطار :)

علي محـمــــــد يقول...

السلام عليكم

ليه بس كذا يا اخي .. ليه النفسيه المتكدره هذي ؟
اول شي هذا الموضوع حلو ومو مثل ما وصفته لما قلت انه خالي من اي شيء مهم ..
ثاني شيء احساسك طبيعي في استغرابك لمكان السكن الجديد وهذا الاحساس اي احد ممكن يحسه لو كان مكانك فلا تكدر نفسك وعلاجه التعود وهذا سهل ..
ثالث شيء اختلف معاك في ان الانسان لازم يتعامل بحذر مع الناس .. طالما انا ما اسيء الادب معاهم فليش احسب حسابات واحرص على مشاعر ناس تفكيرهم غلط .. هذا في حال كانو حساسين زياده عن اللزوم .. وعلى فكره حكاية المشاكل وارده جداً بين المشتركين في سكن واحد وهذا كمان طبيعي وما يحتاج منك تعكر مزاجك .. تصدق يا مهندسنا :) انا ما اهتم بحالة التوافق ودرجته بيني وبين اصدقائي لانها قابله للتغيير بسهوله لكن بصراحه افكر في الناس اللي بتتزوج واسأل نفسي دايما واقول يا ترى لو الحظ يجيب لي وحده مو على كيفي ايش اسوي :( ؟ والله هذي الورطه والمشكله :) مو مشكلتك انت .. اها قبل لا انسى لايروح الفلبيني لا وانت ok معاه مدام رايح خروج نهائي خليها نهايه طيبه معاه حتى لو كلفك هذا ارتفاع ضغط الدم عندك *_^
اتمنى لك حياة طيبه وسعاده وكل عام وانت بخير

في امان الله

مهندس مصري يقول...

علي محمد
========
و عليكم السلام و رحمة الله و بركاته
أنا إستغرابي مش من مكان السكن أنا إستغرابي من تصرفات الناس اللي إختلفت في السكن الجديد عنهم في السكن القديم
كل واحد متربص للآخرين على أي غلطة تافهة علشان يعمل منها موضوع كبير
المفروض نسامح بعض أكتر من كده
المهندس الفلبيني حأحاول أصالحه قبل ما يسافر مباشرة رغم إني حاولت مصالحته كذا مرة و هو رفض رغم انه هو الغلطان
عموماص خليني مستريح منه دلوقت و أجرب أصالحه قبل سفره بإسبوع و لا حاجة
:)

على فكرة الواحد بيحس بأهل المدينة المنورة دول إنهم مش سعوديين عاديين
لأ تحس إنهم طيبين و أخلاقهم عالية كأنهم ملائكة و اللي بيسكن عندهم بيتطبع بطبعهم
بارك الله فيك ياأخي

مصري بالغربة يقول...

كل سنه وانت طيب يا هندسه ومنور حائل

سبهللة يقول...

الف سلامة عليك يا باشمهندس
شوف
انت طبعك زييى بالظبط
اللى فى قلبى على لسانى والناس ما تفهمنيش
دايما يفكروا فى الاسوأ
وكنت دايما بحاول اصالح اللى حواليا عشان اوضح حسن نيتى واوضح الموقف صح
لكن اقولك على حاجة
بما انك مخنوق
فحاول تغير حياتك
ازاى؟؟
تعمل زي ما هم بيعملوا معاك
تقف لهم على الواحدة وبعد ما تمسك لكل واحد فيهم غلطة
ساعتها ابقى اقعد معاهم وفهمهم انك كان ممن تعدى لهم غلطاتهم اللى علمولها بحسن نيه
لكن انت علمت زيهم
هتلاقى الناس اللى حواليك بيخافوا اوى على زعلك وبيحسسوا على كلامهم معاك
انا ولله جربت الفكرة دى ونفعت جدا
بقت الناس اللى انا كنت بتمنى لهم الرضى يرضوا وما كانوش بيرضوا ابدا
دلوقتى هم اللى بيدورا عليا عشان يرضونى لانى بصراحة بقيت بتلكك لكل واحد
وقلت لكل اللى حواليا انا بعد كدة مش هافوت اى كلمة لاى حد وهاقف لكم على الواحدة زى ما انتوا بتعملوا معايا
لدرجة ان امى اللى كانت عمال على بطال بتزعلنى وافضل طول الوقت اراضى فيها
دلوقتى بتحاسب اوى على كلامها معايا
لان عارفة ان زعلى بقى وحش اوى وانى اتغيرت ما بقتش بعدى زى الاول
دة اولا

ثانيا ودة الاهم
بالنسبة للهموم اللى انت شايلها على دماغك والقرف اللى انت حاسس بيه
مالوش غير حل واحد
انك تجيب السبحة وطول الوقت تقول
استغفر الله واتوب اليه
لان الرسول صلى الله عليه وسلم قالنا

من لزم الاستغفار جعل الله له من كل ضيق مخرجًا. ومن كل هم فرجًا. ورزقه من حيث لا يحتسب

صدق رسول الله صلى الله عليه وسلم

وانا شخصيا مجربة الاستغفار
ابدأ انت بس وهتحس بتغير كبير فى حياتك وفى نفسيتك
بس اهم حاجة ان السبحة ما تسيبش ايدك لان طول ما انت ماسكها هاتفكرك بالاستغفار فى الاوقات اللى يكون مافيهاش شغل وحتى وانت شغال ولو بتتفرج على التى فى هتلاقى نفسك بتسغفر من غير ما تحس
بدل ما تسرح وتفكر وتتغم
وما يهمكش كلام الناس ونظرتهم للى ماسك سبحة على انه بيتمنظر
انما الاعمال بالنيات
وانت نيتك تستغفر عشان ربنا يفك همك

ثالثا
كل سنة وانت طيب وان شاء الله السنة الجاية تكون معاك زوجتك وتخفف عليك الغربة وقرفها

سلام عليكم

مهندس مصري يقول...

مصري بالغربة
============
و انت طيب يا هندسة و ليك وحشة والله

سبهللة
======
و عليكم السلام و رحمة الله و بركاته
إسلوب التلكيك ده ما أحبش أتبعه مع الناس اللي ساكنين معايا في نفس الشقة
ممكن ينفع بره البيت لكن جوه البيت صعب
خصوصاً إن أنا متسامح بطبعي
أنا بقيت منطوي على نفسي شوية و بقيت بأقلل الكلام و التعامل تفادياً للمشاكل

حاضر إن شاء الله أحاول الإكثار من الإستغفار

و كل سنة و حضرتك طيبة انتي و زوجك و اولادك :)

nor يقول...

ربنا يعينك علي الغربه
و يعينك علي زملائك و ييسر لك كل احوالك
تحياتي