الأحد، أغسطس 30، 2009

عمرة رمضان 1430 هـ

الحمد لله عملت عمرة رمضان السنة دي يوم الخميس اللي فات و تعمدت إنها تكون في بداية الشهر تجنباً للزحمة لكن الظاهر مفيش فايدة :)
شوفوا منظر صحن الحرم قبل صلاة فجر الجمعة 7 رمضان



و دي صورتي فوق السطح في الحرم المكي

و دي في الحرم المدني بس كانت الشمس ضاربة في وشي
طبعاً اللي قرأوا بوستات العمرات اللي فاتت عارفين مسار رحلة العمرة من عندنا في حائل
يتحرك بنا الأتوبيس من حائل من أمام شركات الحج و العمرة ( الحملات ) الساعة 3 العصر و نصل ميقات ذي الحليفة -أبيار علي - وقت صلاة العشاء تقريباً و هذا هو الميقات المجاور للمدينة المنورة فنحرم منه و نتجه لمكة المكرمة فنصلها قبل الفجر و نقضي يوم  الخميس كله في فندق في مكة من الفنادق المجاورة للحرم و يتحرك بنا الأتوبيس بعد صلاة فجر الجمعة من مكة متجهين للمدينة  فنصلي في المسجد النبوي صلاة الجمعة ثم نغادر بعدها مباشرة لحائل فنصلها وقت صلاة العشاء تقريباً  
و ده اللي حصل المرة دي برضه :)
بس فيه شوية إختلافات ملحوظة عن عمرة رمضان الماضي
أولاً : عدد المصريين السنة دي أقل بكتير من السنة اللي فاتت لإن السنة اللي فاتت زيها زي كل سنة قبلها كان المصريين بيكونوا أغلبية ساحقة في عمرة رمضان زي ما يكونوا ما يعرفوش إنه ممكن عمل العمرة طول السنة و كنت مطرح ما تمشي تتكعبل في مصريين لدرجة كان بعض الناس بتسميه الإحتلال  المصري لمكة في رمضان 
لكن السنة دي نسبة المصريين غير ملحوظة وسط الجنسيات التانية الكتير بس الملاحظ زيادة نسبة الأتراك بشكل كبير :) واضح إنهم سدوا الفراغ اللي نتج عن غياب المصريين و لو إنهم ما وصلوش لعددهم 
ثانياً : بالنسبة لأنفلونزا الخنازير أغلب الناس مش خايفة منها لإنه ( قل لن يصيبنا إلا ما كتب الله لنا ) و بالتالي مفيش داعي للذعر و أغلب الناس ما كانتش لابسة كمامات و كان منظرنا غريب أنا و زمايلي و إحنا لابسينها ثم عدد اللي أصيبوا عالمياً بأنفلونزا الخنازير بسبب قيامهم بالعمرة كنسبة مئوية من عدد المعتمرين هو نسبة ضئيلة للغاية و تقارب الصفر
و قابلت أثناء العمرة طبيب شاب عراقي سني من الأنبار و حكى لي كيف أن الأمريكان لم ينسحبوا فعلياً من المدن العراقية و إن كانوا قد خففوا تواجدهم فيها للحد الأدنى و أنهم يكذبون في عدد القتلى من جنودهم بوقاحة حيث يكون الناس قد شاهدوا جميعاً 5 قتلى مثلاً فيخرج البيان الأمريكي بقتيل واحد و جريحين
حسيت إن مقابلة شاب عراقي محترم من محافظة المقاومة الباسلة دي رجعت لي بعض من ثقتي بكرامة الأمة إذا إتجهت الإتجاه الصحيح
و قال لي : ربنا يآخد الإحتلال و اللي جم مع دبابات الإحتلال من عملاء للأجانب و اذناب لإيران
وقابلت رجل فلسطيني عجوز من رام الله أول ما عرف إن أنا مصري قال لي الله يرحم جمال عبد الناصر لو عايش لسه ما كانت التنازلات العربية وصلت لهذه الدرجة
 الحمد لله أنا حاسس بعد العمرة دي إني غسلت الكثير من همومي و قادر أواجه الحياة لفترة ثانية
تحياتي لكم من أمام اللاب توب :) 
كل سنة و انتم طيبين
ربنا يفرج عنا جميعاً الهم و الغم و الكرب

هناك 20 تعليقًا:

لقد خلقنا الله احرارا يقول...

عمرة مقبولة بأذن الله
ربنا يكرمنا جميعا بالزيارة
بس التدوين وهموم الامة وراك وانت هناك
مقابلاتك مع العراقى والفلسطينى فكرتنى بحاجة بحبها اوى
لما سيدنا عمر بن الخطاب كان بيحج وبعدين يسند ظهره للكعبة ويسمع شكاوى المتظلمين
يارب نشوف ايام زى دى فى الدنيا
مبروك عودة اللاب توب
ومبروك العمرة والمشاعر الجميلة المصاحبة لها
ربنا يتقبل بأذن الله

فتاه من الصعيد يقول...

عمره مقبوله .... وعقبالي :)

مهندس مصري يقول...

لقد خلقنا الله أحراراً
===================
آميين
الله يبارك فيكي
بس أصل المواضيع بتفرض نفسها و مش معقول أقابل عراقي من مدينة الرمادي أشد المدن في مقاومة الإحتلال و ما أسألوش على الوضع في بلده
و مش معقول أقابل فلسطيني غير و يكون الحديث عن جرحنا النازف في فلسطين

أمال حنتكلم في إيه يعني ؟

فتاة من الصعيد
===============
آميين و عقبال كل المسلمين

يا مراكبي يقول...

ألف مبروك وربنا يتقبل إن شاء الله

نش كنت تعدي عليا ف جده؟

بدراوى يقول...

عمرة مقبولة
يا باشمهندس

دعتلى هناك معاك
و لا نسيتنى
:-)
----
المصريين قليلين عشان خايفين
من السوين فلو
ووزارة الصحة فى مصر ضبطتهم
و مش عارفين يأخذوا المقدم اللى دفعوه لشركات السياحة

mado80 يقول...

الف الف مبروك يا باشمهندس
عمره مقبوله باذن الله

mado80 يقول...

صحيح هتعمله اجتماع للمدونين في الرياض
هيبقي فين بالظبط ان شاء الله
ياريت تقلي قبلها بفتره بالله عليك علشان اعمل حسابي

تقبل تحياتي وتقديري

مهندس مصري يقول...

يا مراكبي
=========
الله يبارك في حضرتك
بس ما هو أنا ما أعرفش العنوان و لا نمرة الموبايل ثم وقت الحملة بيبقى ضيق جداً و لو إنه يكون لي الشرف طبعاً بمقابلتك
و أنا ما أعرفش من جدة غير شكلها من الطيارة و شكل المطار بتاعها لإني دايماً بأسافر طيران حائل إسكندرية عن طريق جدة

بدراوي
=======
:)
دعيت للكل يا أحمد
المصريين مش خايفين لكن الحكومة هي اللي أجبرتهم ما يروحوش
كله بسبب يوسف بطرس غالي اللي عايز يخفض إنفاق المصريين للعملة الصعبة في السعودية في الحج و العمرة و ما صدقوا لقوا حجة أنفلونزا الخنازير
و هي من أمتي الحكومة بتخاف على الناس قوي كده ؟

مادو 80
========
الله يبارك فيك
آميين يارب

موضوع اجتماع المدونين في الرياض في العيد الصغير مجرد فكرة
عايزين بقى مدونين الرياض يدرسوها و يحددوا مكان اللقاء و برنامج اليوم اللي حنقضيه مع بعض و الفنادق المناسبة لمبيت أمثالي من القادمين من خارج الرياض و نظام المواصلات و الإنتقالات ايه بالضبط ؟
لإن الغريب أعمى و لو كان بصير يا ولدي و أنا ما أعرفش أي حاجة في الرياض

بس مدونين الرياض منفضين مش عارف ليه ؟

كيــــــــــــارا يقول...

عمره مقبوله ان شاء الله وربنا يجعلنا من عتقاء الشهر

كل عام وانت بخير :)

علي محـمــــــد يقول...

السلام عليكم

الحمدلله على السلامه وعمره مقبوله يارب ..
بس ليه كذا ؟ تجي المدينه وماتعدي علينا :) عموما الجايات اكثر ان شاء الله وربنا يتقبل عمرتك

في امان الله

عاشقة الفردوس يقول...

عمرة مقبولة ان شاء الله
وتقبل الله صيامك وقيامك



مبسوطة جدا بلقاءك بالاخ الفلسطيني والعراقي


ربي يوحدنا جميعاً اللهم آمين

Me7'o يقول...

تقبل الله يا هندسة
أنتم السابقون ونحن اللاحقون فى آخر رمضان إن شاء الله
------------
مادو

بصفتى واحد من مدونين الرياض انا أتكلمت مع أبو العريف وقالى إن احتمال كبير المكان يتغير ويكون فى المدينة إن شاء الله....

تحياتى

مهندس مصري يقول...

كيارا
=====
آميين و كل سنة و انتي طيبة

علي محمد
=======
و عليكم السلام و رحمة الله و بركاته
الله يسلمك
آميين يارب
إحنا بنصلي صلاة الجمعة في المسجد النبوي فقط ثم نغادر مسرعين
لكن وعد مني لو ارسلت لي رقم جوالك على الإيميل حأتصل بيك بمجرد نزولي للمدينة سواء في عمرة أو غيرها لإني يشرفني معرفتك

عاشقة الفردوس
==============
آميين
منا و منكم

آميين

مهندس مصري يقول...

ميخو
====
آميين
ربنا يعينك على الزحمة الطحن بتاعة العشر الأواخر

و بالنسبة للقاء معنديش مشكلة يكون في أي حتة بس عرفونا قبلها بفترة كافية و نعرف حنعمل إيه و الأهم حنبات فين ؟
لإن معنديش إستعداد آخد المشوار صد رد
ثم مين لينا من المدونين في المدينة ؟

حمدى جعوان يقول...

تقبل الله يابشمهندس
كان نفسى اعمل عمره قبل ما انزل بس والله ظروف صعبه الله الاعلم بيها هى اللى منعتنى
ان شاء الله ربنا يكتبلى الحج السنه دى
لانى محتاج فعلا اقرب من ربنا اكتر

محمد الجرايحى يقول...

عمرة مقبولة بمشيئة الرحمن
وماشاء الله صورة المصليين فى الحرم شئ أكثر من رائع وتنشرح له الصدور
ونسأل الله تعالى أن يكتبها لنا
اللهم آمين

شوكولاتة يقول...

عمرة مقبولة إن شاء الله يابشمهندس وربنا يجازيك عليها حير الجزاء

مهيج الجماهير يقول...

ان شاء الله عمرة مقبولة
و كل سنة و حضرتك طيب
رغم انها متأخرة شوية
تحياتى

حنــــان يقول...

عمرة مقبولة باذن الله يا باش مهندس


و انشاء الله يكرمك بعمرة اخرى

و يكرمنا جميعا بزيارة الحرم .. يااااا رب

ربنا يتقبل

مهندس مصري يقول...

حمدي جعوان
==========
آميين
خيرها في غيرها إن شاء الله
و ربنا ييسر لك الحج
:)

محمد الجرايحي
===========
آميين
إن شاء الله ربنا يكتبها لكل المسلمين

شوكولاتة
========
آميين
:)

مهيج الجماهير
============
آميين
و انت طيب و ما تغيبش علينا كتير

حنان
=====
آمييييييييييييييين