الأحد، سبتمبر 27، 2009

العين صابتني و رب العرش نجاني

أخيراً فهمت و بصورة عملية ليه السواقين بيكتبوا على عربياتهم حاجات زي ( العين صابتني و رب العرش نجاني ) و ( نظرة حسد و لا عضة أسد ) و ( ما تبصليش بعين رضية بص للي إندفع فيه ) و غيرها كتير
العربية كانت معايا بقى لها أكتر من إسبوع و ماشي بيها كويس و كله زي الفل و بمجرد ما نشرت صورتها على المدونة أول إمبارح إتخبطت مني إمبارح من تحت على المدق الترابي بتاع الموقع في صخرة ما تعرفوش جات في طريقي إزاي مع إن الطريق ده ماشي عليه كتير قبل كده و ربنا ستر و ما حصليش حاجة رغم إن العربية خرجت عن الطريق و قضيت 3 ساعات عند السمكري إمبارح أستعدل الحتة اللي إتعوجت و ربنا ستر مفيش حاجة جات في الدهان فما إحتاجتش دوكو بس السمكري لهف مبلغ محترم
أنا مسحت الصور من البوست اللي فات و أنا كنت غلطان في نشرها من الأول بس أنا متعود أعبر عن فرحي و حزني و كل أحوالي في المدونة بس واضح إني تجاوزت الحدود الطبيعية خصوصاً إنها عهدة و مش بتاعتي
عموماً محدش بيتعلم ببلاش و محدش بيتعلم بالساهل
قدّر و لطف

هناك 31 تعليقًا:

فتاه من الصعيد يقول...

قصدك ان المدونين عنيهم حشه ولا ايه :D

حط بقا المعوذتين على باب المدونه .... والمهم ربنا ستر الحمد لله

حمد الله ع السلامه

فاروق عادل يقول...

ك يابشمهندس وسلامة العربيه احمد ربنا ان العين صابتك ورب العرش نجاك

مجداوية يقول...

السلام عليكم

بص يا باشمهندس أنا ملحقتكش قضاء الله حصل قبل التحذير دخلت أعلق التعليقات مفتحتش فقولت حابعتلك على الايميل ومتعرفش ايه نساني وكنت عايزة أقولك مش كل حاجة تحصلك تقولها وتنشرها كده وخير ما فعلت إنك شلت الصور ,, أنا كنت في غربة قابلك والناس متعرفش إن الغربة لها تمن لا يعرفه إلا من تغرب ,, والعين حق فحصن نفسك بالأذكار المعروفة وبالقرآن وتوكل على الله والله خير الحافظين ,, وسبحان الله ,,سبحان الله ,, ولا حول ولا قوة إلا بالله والحمد لله إنك بخير

A.SAMIR يقول...

حد برضة ينشر صورة عربيته ع المدونة
معلش
محدش بيتعلم ببلاش
تحياتي

حمدى جعوان يقول...

حمدلله على سلامتك يابشمهندس ... قدر الله وماشاء فعل
بس اعمل زى مافتاة من الصعيد قالتلك.... وكمان علق خرزة زرقه

(:

مهندس مصري يقول...

فتاة من الصعيد
==============
مش كلهم بس نقول أحدهم أو بعضهم
و ممكن يكون حسد من سكات و بدون تعليق
الحمد لله الذي لا يحمد على مكروه سواه
الله يسلمك

فاروق عادل
==========
الله يسلمك
الحمد لله

مجداوية
======
و عليكم السلام و رحمة الله و بركاته
الحمد لله
قدّر الله و ما شاء فعل

أ.سمير
=====
بالضبط و ياريتها حتى كانت عربيتي
دي مش بتاعتي
دي عهدة و أمانة و مسؤولية
الحمد لله على كل حال

مهندس مصري يقول...

حمدي جعوان
==========
الله يسلمك
:)
بس الخرزة الزرقاء خرافة
و الصحيح شرعاً هو المعوذتين و الأذكار الشرعية

لقد خلقنا الله احرارا يقول...

قدر الله وماشاء فعل
اهو درس بنتعلمه كلنا
المهم ان ربنا ستر

well يقول...

اذا وقع القدر عمى البصر ...ابقى خد بالك

Appy يقول...

يعنى اقولك ايه يعنى ما انا اهو مبتتعلمش يعنى منى يا راجل انا ملحقتش اشوف ولا اعرف ربنا يبارك لك فيها وحصل خير ربنا بيفديك اسال مجرب يا حج

مهندس مصري يقول...

لقد خلقنا الله أحراراً
===================
فعلاً
الحمد لله

ويل
====
إن شاء الله

آبي
====
آميين
قدّر و لطف

شوكولاتة يقول...

الحمد لله إنها جات على قد كده درس بقى واتعلم منه
حمد الله على سلامتك يابشمهندس
تحياتي

توتة المخنوقة يقول...

حمدالله على سلامتك يا باشمهندس والحمد الله انك بخير والى يجى فى الريش بقشيش

مواطن مصري يقول...

علق خرزة زرقاء و أعمل كف خمسة و خميسة على العربية

مواطن مصري يقول...

و بعدين مش ممكن يكون غلط من حد مش موضوع حسد؟

مواطن مصري يقول...

انت مأمن عليها اهم حاجة التأمين ولا هتقولي التأمين حرام

:D

مهندس مصري يقول...

شوكولاتة
=======
الحمد لله
الله يسلمك

توتة المخنوقة
=============
الحمد لله
الله يسلمك

مواطن مصري
===========
ما هو إنت لو بتقرأ التعليقات اللي قبلك و ردودي عليها ما كنتش إضطرتني أعيد لك اللي قلته لغيرك قبل كده
الخرزة الزرقاء خرافة
و الصحيح شرعاً هو المعوذتين و الأذكار الشرعية
و مثلها كف الخمسة و الخميسة
كلها خرافات

يعني ما إتخبطتش غير بعد النشر و انت شايف إنها مش حسد بينما أغلب الناس هنا و في الفيس بوك بل و معايا في الحياة الواقعية أجمعوا إنه حسد
يبقى أكيد مش حأسيب رأي الناس كلها لرأيك إنت

ثم إنت بتفترض إفتراضات مستفزة ليه ؟
حرام ايه ؟
التأمين على السيارات هنا إجباري مش إختياري
و اي كمين بيسألك على رخصتك و رخصة العربية و ورق التأمين
بس أنا ما كنتش عايز أعمل محضر في شرطة المرور علشان خبطة إتعرضت لها في قلب الصحراء و ما كنتش عايز أكبر الموضوع في الشركة اللي شغال فيها
فرحت للسمكري و خلصتها من بره بره

شاب مفقوع يقول...

اللهم لك الحمد قدر ولطف يا باش مهندس

وبعدين العالم المدونين دول انا عارفهم عالم حقودين

اكيد واحد فيهم نشك عين عشان الحتة الشوزوكي اللي انت ركبتها

او يمكن واحد من اللي معاك في الشغل بس عينه اتاخرت شوية

يالا فداك المبلغ

يا مراكبي يقول...

ياراجل .. فيه حد يفكر كده برضه؟ هههه


ألف سلامة .. قدر الله و ما شاء فعل

مهندس مصري يقول...

شاب مفقوع
==========
الحمد لله
بس كل اللي في الشغل مستلمين سيارات و محدش فيهم حيبص لأقدم عربية في المشروع
هي عين من النت
و كملت النهاردة بعجلة فرقعت و هيا لسه جديدة و الإستبن كانت حالته متهالكة و رجعت البلد بالعافية
و إضطريت أغير عجلتين النهاردة بعجلتين جداد
ربنا يستر و تيجي على قد كده

يا مراكبي
=========
طيب قول لي أفكر فيها إزاي ؟
لما بقى لي فترة مستلمها و ما حصلش دا كله غير بعد النشر
الخبطة من يومين و النهاردة العجلة اللي فرقعت و يا عالم إيه اللي حيحصل بعد كده
ربنا يستر

و السيارة اللي إستلمتها قبلها و سقتها لمدة شهر و نص من سنة تقريباً ما حصلهاش حاجة لإني ما نشرتش صورتها غير بعد ما سلمتها لواحد تاني و كنت سبتها خلاص
يبقى المفروض أستنتج إيه ؟
و ده مش رأيي لوحدي على فكرة

ربنا يستر
و الله يسلمك يا هندسة

أحمد عاطف يقول...

محمد

انا بخلي مسئوليتي من الموضوع دا

انا عيني كانت في الكاميرا وياعم مش عايزها خلاص

احسن عين العربية تيجي فيا انا

...............

ياعم فداك الدنيا كلها المهم انك بخير وان صحتك تمام

وثق ان دي ضريبة صغيره للرفاهيه والعربية جات لك رزق وجات لك برزق ناس تانيين

كلنا ايادي تطعم افواه اخرين

ربنا يحفظك

مهندس مصري يقول...

أحمد عاطف
=========
يا بني إنت من الحبايبب و مفيش منك خوف
آميين ربنا يحفظنا جميعاً
:)

norahaty يقول...

سلامتك ياباشمهندس
قدر الله ماشاء فعل
وزى ما بيقولوا اللى
يجى فى الريش بقشيش
المهم الانسان هو
هو اللى ما يتعوض.
حمدلله على السلامة.

مهندس مصري يقول...

نورهاتي
=======
الله يسلمك
:)
الحمد لله

Wa7ed Mafroos يقول...

معلش يعنى ولو فيها رزالة وسؤال خارج عن موضوع العربية والسمكرى وخلافه ، إنت قطعت مع نوارة نجم؟

مهندس مصري يقول...

واحد مفروس
===========
ايه السؤال الغريب ده ؟
لا يا سيدي و لو اني ما أعرفكش
ما قطعتش مع حد
بس مشغول في الشغل و مش فاضي للنت اليومين دول
و ما نشرتش حاجة في المدونة من اسبوع أهوه
و مش فاضي أقرأالبوستات الجديدة عند الناس و لا اعلق عليها

Wa7ed Mafroos يقول...

أنا عارف إنك ماتعرفنيش ، وقولتلك من الأول إن سؤالى رزل :-) أنا بس لاحظت إنك كنت زبزن دائم هناك وبقالك شهرين ولا حاجة مبتظهرش ، فقولت أسأل بس
آسف إذا كنت أحرجتك ولا حاجة

مهندس مصري يقول...

واحد مفروس
===========
لا مفيش إحراج و لا حاجة بس السؤال كان غريب
إنما انا مشغول في الشغل زائد إن وصلة النت عندي بقت بتقطع كتير فمش بأعرف أخش نت زي الأول

محامي مصري ابن مصري يقول...

يا حمو المهم ربنا ستر و انا عارف عين مين دي و خلينا ساكتين و علي راي المثل يا مدونين يكفيكو شر العين و انت انسان مؤمن يا حمام يا خويا

سبهللة يقول...

الحمد لله ان انت كويس
ربنا قدر ولطف
وبحمد ربنا ان انا مش العين اللى حسدتك
لانى بقالى فترة ما جيتش هنا
ولسة قارية البوست دلوقتى
انا مش عارفة الناس بتحسد ليه
دى عربية نقل عهدة
اما لو كانت ملاكى وبفلوسك كان حصل ايه ؟؟

مهندس مصري يقول...

محامي مصري ابن مصري
===================
الحمد لله
ربنا ستر

سبهللة
=======
مش عارف والله يا بشمهندسة كان حيحصل ايه
الحمد لله