الثلاثاء، أكتوبر 13، 2009

حأغيب عنكم شوية غصب عني

السكن اللي ساكن فيه هو مبنى للشقق المفروشة للعزاب - حاجة زي الفندق كده - و كان من أهم مميزاته لما سكنت فيه من 3 شهور و نص إن فيه شبكة إنترنت لاسلكية مفتوحة في جميع أرجاء المبنى
الشبكة دي كفائتها إتدهورت جداً من حوالي شهر و نص و بقى النت بيقطع كتير و بقيت لو عايز أخش نت بأخرج اقعد بالجهاز في صالة الإستقبال بتاعة الفندق علشان ألقط نت من شبكة لاسلكية تانية مفتوحة غير بتاعة الفندق و بيكون الوضع غير مريح و صاحب السكن مطنش خالص رغم شكوى كتير من السكان و هو ودن من طين و التانية من عجين
فأنا مش حأقدر انتظم في دخول النت و متابعة المدونات زي الأول فسامحوني و إعذروني على أي تقصير معاكم لحد ما الاقي حل لموضوع النت ده

هناك 17 تعليقًا:

بدراوى يقول...

تصدق يا باشمهندس انت فيك الخير
لسة جاى على بالى من ساعتين زمن
و عمال اقول هو راح فين
فكرت اتصل بس اتحرجت
قوم تقريباً توارد مدونات حصل
و حضرتك ظهرت و طمنتنا عليك

و عاذرك فى الغياب الإضطرارى بسبب النت
و نشوفك على خير عن قريب

فتاه من الصعيد يقول...

وانا كمان زي بدراوي لسه بقوول حضرتك غايب بقالك فتره

بس انا قلت اكيد المسئوليه شاغله حضرتك

ربنا معاك .... والنت يبقا كويس

تحياتي

لقد خلقنا الله احرارا يقول...

المهم انك تكون بخير ياباشمهندس
وربنا يحل مشكلة النت قريب

فاتيما يقول...

كتر خيرك يا محمد إنك بتطمنا
إن شاء الله الحكاية دى تتحل فى اقرب فرصة
إحنا منستغناش عن طلتك علينا
أزى العروسة ؟
يا رب خير

مواطن مصري يقول...
أزال المؤلف هذا التعليق.
mahasen saber يقول...

تغيب وترجع بألف سلامه يا باشمهندس يا ابن الناس الطيبين

ويا رب تكون كل امورك بخير وسلام

أحمد عاطف يقول...

محمد يارب دايما تبقى بخير

في اعلان جديد شوفته بيقولوا النت بريال في اليوم :D

اشترك يا هندسة ومتحرمناش منك

مفتقدك يا صديقي

ممكن استئذنك متردش على مواطن مصري

على ما أظن انه بيتعمد يدخل يخنق ويمشي

تحياتي ليكي

مهندس مصري يقول...

بدراوي
======
الله يكرمك يا أحمد
انت تتصل في اي وقت
دا انت غالي يا بني
:)

فتاة من الصعيد
===============
شكراً ليكي
هو الشغل حالياً خفيف نسبياً بس حيفتح على أشده في خلال إسبوعين

لقد خلقنا الله أحراراً
===================
آميين
أهو الشبكة كويسة النهاردة اهوه

فاتيما
======
الحمد لله كل شئ تمام
ربنا يكرمك يا أم يوسف يارب

مواطن مصري
==========
منتظر 2 زمايلنا في السكن في نفس الشقة حالياً هما في أجازاتهم في مصر و لما يرجعوا حنتفق إحنا الـ 5 حنعمل إيه

محاسن صابر
==========
الله يسلمك يارب
الحمد لله

أحمد عاطف
=========
الله يكرمك يا بو حميد
آه ده عرض لمدة 3 شهور بس لازم يكون عندك خط تليفون أرضي و بتدفع 30 ريال إشتراك النت + إشتراك التليفون الشهري بس سعر النت بيزيد بعد 3 شهور لـ 260 ريال تقريباً
و عموماً زي ما قلت لمواطن مصري احنا منتظرين بقية زمايلنا في السكن علشان نقرر مع بعض حنعمل إيه

على فكرة مواطن مصري ده حالة فريدة من نوعه لا تملك امامها سوى ان تقول سبحان الله
:)

سبهللة يقول...

ربنا يرزقك وتجيب انت نت لنفسك
ولا الحوجة لحد
واحسن لك حاجة تجيب ال usb

مواطن مصري يقول...

الله يسامحك يا احمد انا معرفكش عشان تغلط فيا و ع العموم يا مهندس اسف و هشيل التعليق0لو مدايقك

مهندس مصري يقول...

سبهللة
======
ربنا يسهل

مواطن مصري
===========
تعليقك الأولاني مش مزعلني
:)
و أنا إسمي محمد
بس إحنا بنتكلم على أراءك السياسية الفريدة من نوعها و المخالفة لكل ما هو مألوف و معروف و اللي منطقها متهاوي و إصرارك على عدم الإقتناع بغيرها رغم ضحد حججك بالمنطق العديد من المرات
فلا يملك الإنسان سوى أن يقول سبحان الله
ربنا يهديك يا عمرو

فتاه من الصعيد يقول...

اعتذر لك يا باشمهندس عما حدث في المدونه ..... كنت عايز تفيدني .... بس خير تعمل شر تلقا .... بس الشر ه من غيري الحمد لله

اعتذر مره اخرى

فتاه من الصعيد يقول...

انا كنت هلغي تعليقه ورده عليك .... بس خليته علشان الكل يشوف اسلوبه المتدني في الحووار

بس لو تحب الغيه .... حضرتك رد عليا في المدونه

تحياتي

مهندس مصري يقول...

فتاة من الصعيد
===============
و لا يهمك حصل خير
أديكي عرفتي إسلوبه
سيبي تعليقه أنا كنت متخانق معاه من زمان في مدونة جبهة التهييس الشعبية في التعليقات و عارف إنه بيشتم

حصل خير

رابطة هويتي اسلامية يقول...

فى إطار حملة مدونتى عنوانى تستضيف رابطة هويتى إسلامية المدون محمد غالية صاحب مدونة هل تبحث عن السعادة

فى نقاش عام وحوار مفتوح حول موضوع الحملة .

والدعوة مفتوحة للجميع للمشاركة معنا فى النقاش من أجل الإفادة والإستفادة

نتمني منكم مشاركتنا من أجل تدوين أفضل

تحياتنا

أسرة رابطة هويتي إسلامية

يا مراكبي يقول...

جرب فعلا الموبايل كوننكتور

احنا شغالين بيه في البيت من اول يوم جينا فيه السعودية وبناخده معانا في كل مكان

يا مراكبي يقول...

وفيه كمان الجهاز الجديد اللي اسمه جو من شركة عذيب وده مش كونيكتور .. ده بيشتغل واي ماكس من غير شريحة موبايل