الثلاثاء، نوفمبر 24، 2009

مصر و الجزائر - أبدعوى الجاهلية ؟ دعوها فإنها منتنة 2


حزنت كثيراً لما قيل عما حدث لمشجعي المنتخب المصري في السودان بعد المبارة الفاصلة ليلة 18 / 11 الماضية
و حزنت أكثر للتداعيات بعدها بين البلدين الشقيقين مصر و الجزائر
المحير في الأمر أن رواية ما حدث في السودان إتفق عليها آلاف المشجعين المصريين مما ينفي إمكانية تواطؤهم على الكذب
لكن كيف يتسبب آلاف البلطجية و المجرمين من مشجعي الجزائر في إصابة 21 شخص فقط و جميع إصاباتهم طفيفة ؟!
الموضوع محير و يحتاج إلى تحقيق دقيق و أتمنى من الشرطة السودانية أن تعلن نتائج تحقيقاتها مع المشاغبين الجزائريين الذين ألقي القبض عليهم ليلتها و إذا ثبتت إدانتهم فيجب أن توقع عليهم أقصى عقوبة موجودة لجريمتهم في القانون السوداني و لا يجب أن ننسى أبداً أن السودان هي من تم الإعتداء على أمنها و أمن ضيوفها و مواطنيها و لكن الأمن السوداني قد قام بأقصى ما يستطيع و لم يقصر بل قام بتأمين المباراة بـ 15 ألف عنصر أمن و لم تحدث أي أحداث شغب في الملعب و هو مكان الشغب المعتاد لكنه لم يكن ليتوقع الكمائن المنتشرة في الطرق المؤدية للمطار
فللسودان مننا كل الشكر و التقدير
لكن و لنكن صرحاء فإدعاء أن الحكومة الجزائرية و الجيش الجزائري قد أخرج مجرمين من السجون و نقلهم بالطائرات العسكرية بعد إستخراج جوازات السفر لهم في نفس اليوم ثم قام بتزويدهم بخرائط الشوارع في العاصمة السودانية و رسم لهم خطة الإعتداء فهذا إدعاء ينقصه الدليل و لا تسانده سوى أقوال مجهولة المصدر و القاعدة تقول : البينة على من إدعى و اليمين على من أنكر
فإذا كان لدينا أدلة مؤكدة على التواطؤ الحكومي الجزائري فلنظهرها أو لنصمت
أما اللغو الإعلامي الحاصل حالياً فمحزن و مشين في نفس الوقت
و أنا أعتذر لشعب الجزائر كله و لكل جزائري شريف عن هذه الشتائم القذرة التي يطلقها بعض الإعلاميون عندنا على الشعب الجزائري كله في تعميم مريض و مقرف
لا تتوقعوا أن تقوموا بسب و شتم شعب بأكمله فيه الجيد و السيئ مثل أي شعب آخر ثم تتسألون في بلاهة لماذا يكرهوننا ؟!!!!
لو أن الشتائم موجهة للمشاغبين فقط من مشجعي الجزائر لما إعترضت رغم أن الشتائم ليست هي الحل
لكن عندما يتم شتم شعب بأكمله فهي جريمة
إنهم يشعلون الفتنة و يقومون بإستعداء الشعب الجزائري كله من أجل شعبية الرئيس و ولديه و حكومتهم و نفس اللعبة يلعبها الرئيس الجزائري و حكومته على الجانب الآخر 


المفروض عمله هو :-
1- إنتظار نتائج التحقيقات السودانية و لو لم تعجب حكومتنا فيمكنها ساعتها المطالبة بتحقيق دولي مستقل
2- حماية جميع المصالح الجزائرية و المواطنين الجزائريين في مصر و مطالبة الحكومة الجزائرية بالمثل
3- تقديم شكوى رسمية موثقة بكل المخالفات التي نعترض عليها للفيفا و ننتظر قراره
4- وقف الحملة الإعلامية المتصاعدة بين البلدين فوراً و رئيسي البلدين يمكنهما وقفها بمجرد بضعة مكالمات هاتفية
5- إتخاذ جميع الإجراءات القانونية من جانب سفارتنا في الجزائر أمام المحاكم الجزائرية ضد كل الصحف و وسائل الإعلام الجزائرية التي نشرت إهانات أو أخبار كاذبة ساهمت في تأجيج الفتنة و المطالبة بالتعويض عن كل الأضرار الأدبية و المادية التي تسببت فيها هذه الأخبار الكاذبة و يمكن لسفارتهم لدينا فعل المثل أمام محاكمنا و لو لم ترضنا أو ترضهم الأحكام ساعتها فقط يمكن الإتجاه للمحاكم الدولية و ليس قبل إستنفاذ وسائل التقاضي داخل الجزائر و مصر


هذا هو الإسلوب الحضاري في الخلاف و ليست السفالة و البذاءة المتبادلة من أغلب وسائل الإعلام في الجانبين حالياً
و لا تنسوا أبداً أن الجزائريين مسلمين و إتقوا الله يا عباد الله
و هذه لعبة سياسية من حكومتي البلدين و لكنها إتسعت كثيراً
و إقرأوا الآيات التالية و تفكروا في معانيها لعلكم تعقلون
( و إن طائفتان من المؤمنين إقتتلوا فأصلحوا بينهما فإن بغت إحداهما على الأخرى فقاتلوا التي تبغي حتى تفئ  إلى أمر الله فإن فاءت فأصلحوا بينهما بالعدل و أقسطوا إن الله يحب المقسطين -9- إنما المؤمنون إخوة فأصلحوا بين أخويكم و اتقوا الله لعلكم ترحمون -10- يا أيها الذين آمنوا لا يسخر قومٌ من قومٍ عسى أن يكونوا خيراً منهم و لا نسآءٌ من نسآءٍ عسى أن يكن خيراً منهن و لا تلمزوا أنفسكم و لا تنابذوا بالألقاب بئس الاسم الفُسوق بعد الإيمان و من لم يتب فأولئك هم الظالمون -11- يا أيها الذين آمنوا إجتنبوا كثيراً من الظن إن بعض الظن إثم و لا تجسسوا و لا يغتب بعضكم بعضاً أيحب أحدكم أن يأكل لحم أخيه ميتاً فكرهتموه و اتقوا الله إن الله تواب رحيم -12- يا أيها الناس إنا خلقناكم من ذكرٍ و أنثى و جعلناكم شعوباً و قبآئل لتعارفوا إن أكرمكم عند الله أتقاكم إن الله عليم خبير -13-) سورة الحجرات


ربنا أمرنا أن نصلح الخلاف بين الأخوة بالعدل ونهانا عن السخرية من الآخرين و الشتائم و الغيبة و الظن السيئ و قال لنا أن مقياس الأفضلية الوحيد هو التقوى فهل سنستمع لكلام الله - سبحانه و تعالى - و نطيعه أم سنكون من العاصين و المخالفين لأوامره
إتقوا الله يا عباد الله عسى ان نكون من المكرمين عند الله
أنا ذاهب للحج و سأدعو الله أن يرفع  عنا البلاء و يذهب هذه الفتنة المنتنة كما قال رسول الله - صلى الله عليه و سلم - قولوا آميين

هناك 29 تعليقًا:

أحسن شاب في البلد يقول...

يا عم الحاج
انا ليا اصدقاء سافروا حضروا الماتش
البنات و السيدات المصريات انتهكت اعراضهم في السودان
و تم تعريتهم بالكامل في شوارع السودان
لحد امتى ننضرب على قفانا و نقول حصل خير و احنا الكبار ؟
يا عم دول مش حاسين بانهم غلطوا اي غلطة من اي نوع و مافيش حد عندهم بيعتذر او بيستنكر حتى اللي حصل

جبهة التهييس الشعبية يقول...

اوعى تنسى تدعي لي
:)
الدعو اياها
والنبي ادعي لنا الغمة دي تنزاح يا محمد انا مموتة نفسي من العياط
وربنا يكفينا شر ولاد الحرام اللي بياكلوا عيش على تفريقنا
لو فضل كده العيد ح يدخل علينا بنكد

مهندس مصري يقول...

أحسن شاب في البلد
=================
فيه مثقفين و كتاب كبار جزائريين عقلاء بدأوا يطالبوا بمحاسبة المخطئيين من الطرفين و بيقولوا إن اللي بيحصل ده غلط

ثم ما حدش قال حصل خير
أنا بأقول نآخد حقنا بالقانون مش بالردح و الشتيمة لشعب بحاله فيه الكويس و فيه الوحش زي أي شعب

لما نبقى نجرب القانون و ما ينفعش نبقى ساعتها نشوف سكة تانية

جبهة التهييس الشعبية
=====================
حاضر
يارب الغمة دي تنزاح

غريب يقول...

:
:
أخي الفاضل جميل ما تفضلت به وانه لمن المحزن المؤسف ان نتقاتل على كرة مطاطية زرعها العدو ليفتننا بها و حال كرتنا الارضية يئن الى الله من جور الكفرة وظلم المفسدين ، و نحن المفترض بنا بأننا أمة دعوة وصلاح منشغلين بعبث و لهو مشين نهايته فتن و جراح و قسوة قلوب بين شعوب تعاني من هشاشة في وازعها الديني لأنها ابتعدت عن طريق الحق و الصواب فعاث بنا الحكام فساداً وافساداً ، يتسلون بنا يمنة ويسرة
والله المستعان

لك مني تحية وسلام
وكل عام وانت بخير

لقد خلقنا الله احرارا يقول...

طيب
يكرمك ربنا
تفتكرنا كلنا بالدعاء
ربنا يهدينا ويصلح حالنا

حج مبرور وذنب مغفور

موضوع الجزائر الدنيا بدأت تعقل
فى المصرى اليوم النهارده خبر عن ان الجزائر عندها اتجاه لتأميم اوراسكوم تليكوم
يعنى نوارة ماقطعتش نفسها على الفاضى



حاجة كمان معلش
النهارده بالذات كنت ناوية ابعت لك تعليق واطلب منك عدم نشره
وكنت هقولك فيه هو فيه حاجة مزعلاك من نوارة
علشان احاول ابعت لها تعليق
والاقيك هناك دايما
سبحان الله
فرحت جدا
لما شفت تعليقها عندك

مجداوية يقول...

السلام عليكم

حج مبرور وذنب مغفور إن شاء الله وكل عام وأنت بخير

ونسأل الله أن يوئد الفتنة ولكن لا بد من محاسبة المخطئين من الجانبين ومعرفة الأسباب وعلاجها حتى لا تتكرر وسوف تتكرر لو أصر الكثيرين منا على عدم رؤية الحقيقة

فتاه من الصعيد يقول...

نتصرف باسلوب متحضر لما نبقا متحضرين

احنا مع الاسف تعاملنا بعشوائيه .... سواء احنا او الجزائر

وكاي شيء عشوائي لا نعرف متى ينتهي ولا ما هي عواقبه

ربنا يستر

تحياتي

مهندس مصري يقول...

غريب
=====
و لك مني ألف سلام و كل عام و نحن جميعاً بخير

لقد خلقنا الله أحراراً
===================
حاضر
إن شاء الله
مفيش زعل و لا حاجة بس النت بيقطع عندي كتير فبأتأخر في قراءة البوستات فما بأعلقش
:)
و ده عند نوارة و غيرها

مجداوية
=======
و عليكم السلام و رحمة الله و بركاته
آميين
فعلاً لابد من المحاسبة القضائية لكل من أخطأ من كل الأطراف

مهندس مصري يقول...

فتاة من الصعيد
===============
فعلاً ربنا يستر

فاتيما يقول...

و الله يا محمد الردح من الجانبين دا
له أسبابه من وجهة نظرى
اولا مش موافقة عليه طبعااااا
و خصوصا من جانبنا
لكن
و بقول لكن
لولا السلبية
و البطء
و الترهل فى اداء الدبلوماسية المصرية و النظام كله ...
لولا وجدت فجوة و تداعيات
أصل فيه مثل بيقول اللى ملوش كبير يشتريلو كبير و لما متلاقيش حد كبير يتكلم بحكمة بتدى فرصة وقتها للصغار يبقالهم وجود و تحدث وقتهاالمهاترات
و اللى مجننى إننا دولتين شموليتين
و حالنا عدم
يعنى بسهولة رهيبة ممكن السيطرة على غضب الناس
لكن عدم الضبط و التهدئة كان مقصود ...
حجة مقبولة بإذن الله يا باشمهندس
و ربنا يكرمك و يستجيب لدعاك و يرزقك الخير كله ..
الحجة الجاية تبقى معاك المدام إن شاء الله و تكتب بوست تقولنا فيه
انا طالع احج انا و الجماعة ...
أو الحكومة
او سبب سعدى
أو حسب ما تقول بقى
و احنا فى كل الاحوال هنقولك
حج مبرورو و ذنب مغفور بإذن الله
مش هقولك تدعيلى
عشان انا محرجة اصلا منك ..
بس هطمع فى كرم اخلاقك و اطلب إنك المرة دى تدعى ليوسف و بس
ادعيله ربنا يحفظه
و يكتبله الخير يا محمد
حتى لو مش معايا
بس يكون بخير
و منحرمشى منك أبداااااا
خالص ودى يا اجدع مهندس مصرى

زكرياء يقول...

لا فض فوك يا محمد...هذه المهزلة عار علينا جميعا، الناس كل يوم يتقدمون و نحن على جاهليتنا...و لكل الذين اوجعونا بادعاءاتهم اقول ان كلامهم بلا برهان مجرد كلام في الهواء و قلة الادب و الشتم عار على صاحبها فقط لا ترجع حقا و لا تصلح حالا...و لا حول و لا قوة الا بالله

زكرياء يقول...

نسيت اقول لك ان تدعو لي انا ايضا عل و عسى ينصلح حالي :) و سلملي على على الحجاز و قل له سلم عليك زكريا و قالك جايلك ان شاء الله

أليس في بلاد العجائب يقول...

الله يفتح عليك ويكفينا شرور انفسنا وسيئات أعمالنا

تقبل الله طاعاتك واعاننا واياكم علي الخير

لا تنسانا في دعائك وللمسلمين اجميعن

تروح وترجع بالسلامة ان شاء الله

Dr. Kafy يقول...

طبعا كلامك صح و فعلا يجب على البلدان العربية تتصرف كأخوة فإذا ظلم أحد الأخوة الآخر و جب على الباقيين أن يعيدوا الحق لأصحابه.

بس برضه إحنا انضربنا على قفانا جامد ، أو ممكن يكون الاعلام المصرى بتاعنا هو اللى بيشنع علينا!! تفتكر؟

تبقى خيبة!

يا مراكبي يقول...

بسم الله ما شاء الله .. الله ينور عليك

أنا بقيت أدور بملقاط عن الناس المتزنين اللي ردود أفعالهم بتكون متعقلة .. لأن الغالبية كان رد فعلها عنيف ومخزي وشتموا وسبوا الجزائريين جامد جدا

وبدل ما نشوف هناخد حقنا إزاي بقينا بنضيع حقنا بسبب رد فعلنا الفاجر ده .. ده اسمه فجر .. وخصوصا ان الحدث المقابل (رغم سفالته) مش بالحجم الرهيب ده

ربنا يهدي الأحوال

اقصوصه يقول...

تروح وترجع بالسلامه يا رب

وحج مبرور وسعي مشكور

sally hamdi يقول...

الكلام كتيير اوى عن مصر والجزاير واللى حصل بالخرطوم
بس اللى عايزة اتكلم فيه
ان هما بيرددوا كلام وعن اقتناع ان احنا اليهود والصهاينه

فى خطاب للرئيس الراحل السادات
بيقول فيه _ هاجر زوجه ابراهيم ام اسماعيل ابو العرب مصريــــه فنحن اصل العرب فهم من ينتسبون الينا وليس نحن من ننتسب اليهم _

دا كان رد لاى واحد من اى دوله كان رافع شعار المعارضه على اتفاقيه السلام وقالوا ان مصر ارهابيه
نفس الكلام بيدور ويتكرر
حسبنا الله ونعم الوكيل

....................
كل سنه وانتوا طيبين
وعيد سعيد

الزنارى يقول...

فعلا الحل المفترض فعلة الان هو التحقيق فى هذا الموضوع
حتى تتضح الحقيقة أما الجميع
مع خالص الاحترام و التقدير
أحمد الزنارى

عاشقة الفردوس يقول...

تسلــــــــم

وحج مبرور ان شاء الله

تقبله الله منك

لاتنسانا من صالح دعاءك
:)

mahasen saber يقول...

عيد سعيد عليك يا باشمهندس وعلى كل احبابك

ويا رب تكون ايام مباركه علينا وعلى كل امتنا العربيه

والمهزله الحاصله دى تختفى وتروح

سبهللة يقول...

من أحلى الكلام اللى اتكتب عن الموضوع دة
واللى احلى منه الايات اللى انت حاططها
يارب حد من اللى فى ايديهم الامر يقروها ويعوها وينفذوها
جزاك الله خيرا وجعله فى ميزان حسناتك

اللهم اصلح ما بيننا وبين الجزائر الشقيقة

مهندس مصري يقول...

سبهللة
=======
آميين
و اللي يعترض على كلام الله بقى مش عارف حيقتنع بإيه بعده

الزناري
========
فعلاً
شكراً لحضرتك

عاشقة الفردوس
==============
الله يسلمك
آميين

اقصوصة
=======
الله يسلمك
:)

سالي حمدي
========
أنا موافق إن حكومتنا صهيونية الهوى و متعاونة مع إسرائيل لكن شعبنا لأ
شعبنا مش كده
أو أغلبيته على الأقل مش كده
لكن لا يجب أن نغضب لكلام السفهاء من الجانبين
بل ندعو الله لهم بالهداية
و كل سنة و حضرتك طيبة

يا مراكبي
=========
الله يخليك يا هندسة
الحقيقة أنا الإعلام شحني برضه بس ما رضيتش أكتب و أنا مشحون و إنتظرت لحد ما هديت و فكرت بعقل صافي
لكن كل اللي اتفرج على إعلامنا دماغه غليت بحمية الجاهلية
الحمد لله اللي نجانا أنا و انت و بعض القلائل منها

محاسن صابر
==========
آميين و كل سنة و انتي طيبة

أليس في بلاد العجائب
===================
آميين
الله يسلمك

د/ كافي
=======
شكلها كده و اللي حصل لحد دلوقت بيؤكد إنهم هولوا الموضوع جامد جداً فوق الحقيقة بمراحل
هو حصل إعتداء على جماهيرنا بس مش بالحجم المهول اللي اتقال ده

فاتيما
=======
إن شاء الله السنة الجاية أكون انا و هي هناك
أنا دعيت لك كالعادة :)
التصعيد الإعلامي كان بأوامر عليا
و الموضوع شكله زي ما نوارة قالت خناقة بيزنس بين علاء و ساويرس من ناحية و بعض جهات النفوذ في الجزائر من ناحية تانية
و لما البيزنس إتسلك الحرب الإعلامية وقفت
كل سنة و انتي طيبة

زكرياء
=======
فعلاً فيه ناس بتحب النتانة بتاعة الفتنة
و إن شاء الله ربنا يكتب لك الحج و تتبهدل زيي كده :)

همس الاحباب يقول...

ربنا يصلح الاحوال
وكل سنة وانت طيب
وحج مبرور وذنب مغفور باذن الله
دعواتك يا حاج
ربنا يصلح احوال الاسلام والمسلمين
تحياتى

مهندس مصري يقول...

همس الأحباب
==========
آميين
و كل سنة و انت بكل خير و صحة و سلامة
إنت و الأسرة الكريمة
نورتني يا خالد
:)

z!zOoOo يقول...

السلام عليكم

الاول ازيك يارب تكون بخير

ثانيا كل سنه وانت طيب ولونها مـتاخره

ثالثا حج مبرور وذنب مغفور إن شاء الله
انتم السابقون ونحن اللاحقون

بس ياريت ماتزعلش من تعليقي

اولا لما حضرتك بتقولي شوف الموضوعين دول عندي كما لو كانت دلائل علي الحدث
وفي الاخر ما هي إلا تعبير عن رأيك الشخصي إلي زي ألاف الاراء الي كلها تحترم

ثانيا : ثانيا لو حضرتك شايف إن مفيش مجرمين تم إرسالهم لمهمه الاعتداء ديه يبقي حضرتك مش متابع كويس

لأن بكلام شهود عيان من هناك من مواطنين مشجعين وإعلاميين بهبوط المشجعين دول من طيارات حربيه

وماعتقدش إن ده مكن يكون فيه كدب لأنه إتقال علي الملاء

وده شيء إن دل يدل علي الموافقه الرسميه للحكومه الجزائريه علي الي حصل

لأن مستحيل طيارات حربيه هتطلع بدون إذن او إرسال .. ودول تقريبا كانوا طالعين في مهمه رسميه

ودول اصلا بلا هويه يعني انا سمعت انهم سافروا بدون اي متعلقات او إثباتات شخصيه

حضرتك بتستغرب علي عدد المصابين لأن الشرطه السودانيه صدت ومنعت جزاء من الاعتداءات وفي خلال الوقت ده كان المواطنين هربوا إلي بيوت السودانيين او إلي أي مكان يمكن الاختباء فيه

وبغض النظر عن ده كله حضرتك كنت عايز يطلع المصابين الفين تلاته عشان تصدق إن فيه إعتداء ولا إيه

وبعدين انا مش عارف الاصابات الي حضرتك بتتكلم عليها عندهم ديه فين..
حضرتك جبتها منين ياريت بس اعرف منك حصلت ازاي

اقرا عن حادثه الاتوبيس الي كسروه وقالوا إننا كسرناه وإتضح إنه متكسر من جوه

ده غير إن الفندق الي نزلو فيه جنب المطار والمسافه بينه وبين المطار 3 دقايق يعني شيء لا يعقل الي بيقولوه

واللاعب الي كان مصاب في وشه قبل الماتش بجرح كبير وفي الماتش مفيش اي جرح

اما حوار جوازات السفر وإلغاء التأشيره ديه طيب لو هنقول الاعلام بتكتب والصحافه بتكدب حتي السفراء بيكدبوا والرياضيين بيكدبوا

يعني كلهم بيكدبوا وبيبهتوا بشيء ماحصلش علي الجزاير شيء مايتعقلش

اما عن اللغو الاعلامي الي إنت قولت عليه انا ممكن اكون مش موافق عليه
لكن ده ترويح عن الشعب لشعوره بالغيظ والحسره والكبت والعجز والاستغراب وكل شيء ممكن تتخيله

وبعدين حضرتك عايز تقنعني إن الجزاير بتكرهنا عشان بنشتمها

يبقي حضرتك يا إما مش مصري يا اما مش عايش في مصر

طيب ياريت تقولي ليه يكسروا الشركات المصريه هناك

ليه يعتدوا للمره مش عارف الكام علي الجاليه الصمريه عندهم

ليه يكبلوا الشركات المصريه بمبالغ
توصل ل 600 مليون جنيه او دولار

والاهم إن شركاتنا المصريه هي الي بادرت وراحت هناك في حين إن كل الدول رفضت وسحبت إستثماراتها من هناك بما فيهم فرنسا عشان الارهاب

ليه يحرقوا القرأن والانجيل

حضرتك ماسمعتش واحد بيقول لسمير زاهر ولا مش عارف مين مش انت الي ديانتك التوراه يعني بيقولوا إنتوا يهود

إحنا بقينا يهود

حضرتك ماشوفتش ولا مره إعتداء علي الأهلي في اي ماتش في الجزاير بالسباب وغيره

ماشوفتش الي حصل سنه 84 ساعه مبارياتنا ما بينا وبينهم ماشوفتش الجمهور نزل الملعب ازاي وبيضربنا بكل وحشيه وهمجيه وكذلك اللاعيبه

ماشوفتش الي كتبه الصحف عندهم وكم الشتيمه والتحقير مننا

وتوصيلهم لأخبار مغلوطه للصحف العالميه واظن إني قلت إن فيه صحف عالميه كتب عننا كلام وحش زي نيوورك تايمز وتايوان تايمز

إحنا لو كنا همج زيهم كنا قتلنا الجاليه بتاعتهم عندنا لكن الحمد لله إحنا رجاله وعمرنا ما كنا خونه زيهم


وحضرتك بتقول فيه مثقفين وكتاب هناك قالوا وعادوا محدش قال حاجه

وكفايه موقف الرئيس الجزايري علي لسان سفيرهم لما قالوا الجزائر ماعندهاش اي نيه للإعتذار


وأظن الاخبار الي عن تأميم الشركات المصريه هناك تكفي وتدل علي إنكار الجميل

عايزين يعملوا واجب مع شعبهم علي قفانا

الاهم من ده كله لو بتقول عن الاصابات الي حصلت عندنا وانا متأكدإنها اخبار مغلوطه

هقولك اقرا عن إحتفالهم والي نتج عنه

لقي 18 شخصا مصرعهم وأصيب 312 آخرون بجروح

http://www.almasdaronline.com/index.php?page=news&article-section=3&news_id=3283

الخبر هنا

يعني حتي في افراحهم همج

اقول كمان ولا كفايه

أظن إن انا اخدت فتره مش عايز اكتب عن الموضوع ده

وكنت رغم عصبيتي ونفوري من الي حصل إلا إني كنت في منتهي العقلانيه

وصدقني العقلانيه مش بتنفع في كل وقت

والعقل نستخدمه مع الي عنده عقل

ياريت ما تكونش إتضايقت من تعليقي

وأتمني تنورني دايما

دمت بكل ود

تحياتي

مهندس مصري يقول...

zizo ==== و عليكم السلام و رحمة الله و بركاته أولاً : الحمد لله ثانياً : و كل سنة و انت بألف خير :) ثالثاً : ربنا يكتب لك الحج إن شاء الله أنا ما قلتش إن الموضوعين حاجة غير رأيي اللي مستند لأصول شرعية من قرأن كريم و أحاديث نبوية شريفة و انا ما أنكرتش إن كان فيه بلطجية جزائريين بس إستنكاري لأن يقال أنهم تم إخراجهم من السجون خصيصاً لللقاء و اللي عنده مستند رسمي من مصلحة السجون الجزائرية يطلعه و لا كانوا بيوروهم نمرتهم في السجن الجزائري قبل ما يضربوهم كل ده إستنتاجات من إعلاميينا بناء على اقوال شهود العيان اللي محدش فيهم عنده دليل إن دول طلعوا من السجن مخصوص علشان يضربوا جمهورنا ما أظنش إدوا لهم رقم الزنزانة و الإسم و نمرة تليفون السجن علشان التعارف قبل الضرب :) الطيران الحربي الجزائري فعلاً نقل مشجعين مجاناً و ربما يكونوا من الرعاع أو سكان العشوائيات الجزائرية و مش مستغرب منهم هذا السلوك لكن شوف إنت نفسك بتقول إيه ؟ سمعت انهم سافروا بدون اي متعلقات او إثباتات شخصيه سمعت مجرد سمعت ده قصدي من الموضوع فيه مكالمات تليفونية كتير إتصلت بالقنوات الرياضية الفضائية و قالت كلام ياما مجهول المصدر و غير معروف مدى مصداقيته و في وسط حالة الغليان و الغضب تم التعامل معاه على إنه حقائق مؤكدة بدون ما نعرف حقيقة الكلام اللي بيتقال ده إيه الإصابات بتاعتهم اللي قلتها لك بعد ماتش القاهرة إتقالت في قناة النيل للأخبار منسوبة لوزارة الصحة المصرية الأتوبيس بتاعهم فعلاً إترمى عليه 3 طوبات فقط لا غير و صورها التلفزيون الفرنسي اللي كان ماشي وراء الاتوبيس و هما بعدها اتنرفزوا بسبب كده و كسروا باقي قزاز الأتوبيس كله و بهدلوا سواق الأتوبيس المصري لأنهم إفترضوا إنه متواطئ مع اللي حدفوهم بالطوب و تقرير الفيفا اثبت الكلام ده و فعلاًالحكومة السودانية ألغت رسوم تأشيرة الدخول للمشجعين الجزائريين و خلت التأشيرة مجانية كنوع من العدل لإن المصريين بيدخلوا السودان بدون تأشيرة دخول فحبوا يكون تدفق الجمهورين بالعدل بين الفريقين يعني التأشيرات لم يتم إلغاؤها للجزائريين و لكنها اصبحت مجانية و لكن سفرهم للسودان يستلزم جواز سفر و الحصول على التأشيرة المجانية من سفارة السودان بالجزائر و ما ينفعش علشان نروح عن الناس المقهورة نأخذ سيئات بعدد الشعب الجزائري كله دا الحديث الشريف بيقول : سباب المسلم فسوق و قتاله كفر هما كسروا شركاتنا هناك لما الجرائد الخاصة الفاجرة الكذابة عندهم زي الشروق و غيرها نشرت اخبار عن مقتل أكثر من 20 مشجع جزائري في القاهرة و إصابة ألف مشجع جزائري و هي أخبار كاذبة تماماً نفاها السفير الجزائري بالقاهرة لكن هذه الجرائد الفاجرة نفت تكذيبه و إتهمت الحكومة الجزائرية بمحاولة إخفاء عدد الضحايا الحقيقي في مذبحة القاهرة كما سموها و عمرهم ما حيحرقوا القرأن لأنهم مسلمين شوف اللي كانت ناشراه نوارة في مدونة جبهة التهييس الشعبية عن فيديوهات شيخ المسجد الجزائري اللي كان بيقول كده عيب و حرام بعضهم شتم و قال مصرائيل و يهود بسبب سياسات حكومتنا العميلة لإسرائيل و تواطؤها معهم في حرب غزة الاخيرة لكن دول جهلة و مش عارفين يفرقوا بين الشعب المصري الشريف و الحكومة المصرية العميلة و عندنا تم الإعتداء على طلاب جزائريين بل و وصلت لإنه تم إقتحام شقة طالبات جزائريات و ضربهم و طردهم من سكنهم و تكسير العفش بتاعهم خالص و ده كان خبر في مصراوي يعني ما بقاش فيه نخوة و ضربنا النسوان الضيوف اللي عندنا يا عزيزي زيارتك تسعدني و إذا كان على المتابعة أنا تابعت مودرن سبورت و الحياة و دريم 1 و البيت بيتك ( البيض بيضك ) دا غير كل اللي قريته على النت و دمي كان بيغلي بعد الشحن الإعلامي الرهيب ده كله لكن لما فكرت بعقل وصلت لكلامي اللي بأقولهولك ده السب متبادل مننا و منهم و مش مهم مين سب أكتر و لا مين إبتدأ المهم المهزلة دي تقف فوراً إحنا مسلمين و هما مسلمين و اللي بيحصل ده حرام
يتبع

مهندس مصري يقول...

و نطلع من ده كله بإيه ؟
1- آه تم الإعتداء علينا من بلطجية جزائريين في السودان
2- ممكن يكون البلطجية دول مدعومين من الحكومة الجزائرية بس مفيش دليل قاطع و اكيد على الكلام ده و كلها مجرد أقوال لا تصلح كدليل أمام المحاكم
3- أغلب عقلاءالشعبين زعلان من اللي حصل من شوية غوغاء و نفسهم الأمور ترجع لمجاريها و على فكرة انا مدرس الإنجليزي اللي كان بيدرس لي في ثانوي راح إعارة الجزائر 4 سنين و رجع يتغنى بحب الجزائريين للمصريين و مصر لكن سفهاء مشجعي الكورة من الغوغاء لا يعول على آراؤهم في حب مصر أو كرهها و لو تلاحظ مفيش و لا قناة جزائرية ردت علينا لإن كل قنوات تلفزيونهم ملك للحكومة و الحكومة الجزائرية منعت وسائل الإعلام الرسمية من الرد فما شتمناش غير الجرائد الخاصة اللي ممكن نرفع عليهم قضايا تعويض في محاكم الجزائر و نخرب بيتهم و نفلسهم

عزيزي zizo تعليقك ما ضايقنيش بل أهلاً بيك في كل وقت و انا بأحب مدونتك و حأفضل متابعها :)
انا بس بأقول نآخد حقنا بالقانون مش بالشتيمة

lina يقول...

السلام عليكم و رحمة الله و بركاته

شكرا لمروركم على المدونة و يشرفني رايكم ، و بوركتم على الموضوع ، مدونة طيبة جزاكم الله كل خير

تحياتي.

مهندس مصري يقول...

لينة
=====
و عليكم السلام و رحمة الله و بركاته
شكراً لحضرتك
و اتمنى دوام التواصل
جزاكي الله كل خير و بارك في كل من قال كلمة حق من الشعبين في خضم هذه الفتنة العمياء