الجمعة، أبريل 24، 2009

مواصفات عروستي

ربنا كرمني الحمد لله و قدرت إن انا أقول في الأجازة دي إني عايز أخطب
الفكرة اللي الناس اللي مش فاهمين فاهمينها إني جاي على السريع آخد اي واحدة و السلام علشان الأجازة محدودة و الوقت ضيق

لا يا جماعة
الزوجة دي حتكون رفيقة عمر بحاله و حنعيش مع بعض كتير قوي إن شاء الله و لازم نفهم بعض و نستحمل بعض و نواجه مع بعض الحياة بحلوها و مرها و نكون عارفين إن هدفنا الاساسي هو إقامة بيت و أسرة ترضي الله سبحانه و تعالى و إننا نربي أولاد على المنهج الإسلامي الصحيح بحيث يراعوا ربنا في كل خطوة في حياتهم زي ما إحنا حنحاول نعمل كده و نكون قدوة حسنة ليهم

يبقى حأتأنى في إختيار الزوجة و حأشوفها في صالونهم مرتين و لا حاجة و لو حصل التوافق و القبول المبدأي يبقى نقدر نخطبها و أعرفها اكتر بقى عن طريق الإنترنت طول السنة الجاية و أنا في السعودية و العائلتين هنا في مصر يتعرفوا على بعض أكتر و يمتزجوا و يتوافقوا مع بعض اكتر
لإن الجواز مش واحد بيتجوز واحدة لا دي عائلة بتناسب عائلة و هل دي تصلح ام لأولادك و هل عائلتها يصلحوا أخوال لهم و هل إنت تصلح اب لأولادها و هل عائلتك تصلح أعمام لهم

مواصفات الزوجة اللي أنا عايزها
1 - متدينة
يعني تعرف دينها كويس و تراعي ربنا في معاملتها ليا و أنا برضه إن شاء الله حأراعي ربنا في معاملتي ليها
و تدينها برضه اكيد حيظهر تطبيق له في حياتها العملية و أبسط حاجة فيها إن يكون لبسها إسلامي ملتزم و محتشم
يعني تكون لابسة طرحة طويلة او خمار و لبسها واسع و تنطبق عليه شروط الحجاب الشرعي الصحيح ( لا يشف و و لا يصف و يغطى الجسد كله ما عدا الوجه و الكفين ) و ده مبدئياً بس
و يا سلام بقى لو حافظة جزء من القرآن و على معرفة بالحديث و الفقه يبقى 100 مية و انا بأقول تكون على معرفة مش عالمة فقه و شريعة لكن تكون على دراية بيهم و بأهميتهم و بعدها نستزيد سوياً أثناء حياتنا مع بعض في معرفة ديننا
أظن إني مش طالب المستحيل

2 - مثقفة
علشان يكون في بيننا أرضية مشتركة للحوار و يكون بيننا إهتمامات مشتركة و تكون عقليتنا في مستوى واحد او متقارب و ده يستلزم طبعاً إنها تكون مؤهل عالي على الأقل رغم إن المؤهلات مش هي اللي بتصنع الثقافة بس حتكون بداية جيدة
لكن مش حآخد واحدة بدبلوم - مع إحترامي لكل الناس - و اقعد اكلمها في حاجات هي مش فاهمها اصلاً و لا عايزة تفهمها

3 - مناسبة ليا إجتماعياً و مادياً
يعني تكون من نفس مستوايا لا أعلى منه و لا اقل منه سواء إجتماعياً او مادياً
يعني أنا باعتبر نفسي من الطبقة المتوسطة
أبويا موجه اول ثانوي ازهري تخصص مواد فقهية و شرعية سابقاً و بالمعاش حالياً
و امي ست بيت بس مثقفة جداً و ابوها كان موجه و خريج الأزهر برضه
و أنا الإبن الكبير و ليا اخت اصغر مني بسنة خريجة تجارة قسم محاسبة و متجوزة و عندها بنتين
و أخ اصغر مني بـ 3 سنين خريج هندسة ميكانيكا قوى و مجند في الجيش حالياً

عايز بقى أسرتها من نفس مستوانا ده و تكون مربياها برضه زي ما اهلي ربوني على قال الله و قال الرسول - صلى الله عليه و سلم - و على الحلال و الحرام و على تقوى الله
مش بأقول إني ملاك و بلا ذنوب بس بأقول إني بأحاول و عايز زوجة تساعدني على طاعة ربنا و عمل كل ما يرضي الله و تكون كما يقول الحديث الشريف : ( إذا نظر إليها سرته و إذا امرها أطاعته و إذا غاب عنها حفظته في نفسها و ماله و ولده )

و الحديث المشهور بيقول
روى أبو داود والنسائي عن أبي هريرة رضي الله عنه: قال النبي صلى الله عليه وسلم: "تنكح المرأة لأربع لمالها ولحسبها ولجمالها ولدينها فاظفر بذات الدين تربت يداك"

أنا بقى عايز ذات الدين اللي تكون من عائلة مناسبة
و إن شاء الله عايزها تقعد في البيت لإن صاحب بالين كذاب و انا عايز زوجتي تتفرغ ليا و للأولاد لإن شايف عمل المرأة بيتعبها جداً و بيشتتها عن زوجها و اولادها و انا كفيل بمصاريف البيت كلها و مصاريفها الخاصة و لو إتفقنا إننا إحنا الإتنين حنراعي ربنا في بعض يبقى مفيش داعي نخاف من بعض و نخون بعض و تبقى هيا باصة لشغلها على إنه ظهرها و سندها لأ أنا ما أقبلش التفكير ده

و مع كده برضه رغم إنها حتقعد في البيت لازم تكون متعلمة و مثقفة علشان نتوافق فكرياً و تعرف تربي العيال كويس و لو مت و لا حصل لي حاجة تقدر ساعتها تنزل تشتغل و تصرف على العيال و ما تتحوجش لأي حد

يبقى انا عايزها متدينة - مثقفة - متعلمة تعليم عال - من اسرة مناسبة و عائلة محترمة -تقبل الجلوس في المنزل و عدم العمل بعد الزواج - مقبولة شكلاً

البعض حيقول لي ما إتكلمتش في الجمال و ده ردي عليها إن انا عايزها مقبولة و مش شرط تكون جميلة قوي و لا فائقة الجمال لإن انا نفسي مش شايف إني جميل او وسيم أنا شخص عادي و عايزها عادية زيي

طيب حد تاني حيقول لي يعني إنت ما قابلتش و لا واحدة طول عمرك بالمواصفات دي
حأقوله : مش عارف يمكن حصلت مرة او إتنين بس انا معنديش حلول وسط يا إما تقدر تتجوز يبقى تدخل البيت من بابه يا إما ما تقدرش يبقى اللي معاهوش ما يلزموش فعلشان كده طول ما كنت غير قادر مادياً على الزواج كنت بأتعامل مع كل الآنسات اللي بأقابلهم في الحياة سواء في الشغل او في غيره على إنهم إخواتي و باتعامل معاهم معاملة اخوية بحتة و ده كان اريح ليهم و ليا
لإني غير مؤمن بعلاقات الحب قبل الإرتباط الرسمي و اللي مش بيكون باين لها نهاية محددة خصوصاً في حالة عدم القدرة على الزواج لإني بأشوفها صياعة و قلة ادب و ضحك على عقول البنات و هي مدخل للشر و المعاصي

ما هو سهل إني أضحك على بنت و اقولها بأحبك و عايز اتجوزك بس إنتي شايفة الظروف خصوصاً إن فيه بنات ماشية تحب على نفسها و ما بتصدق و نعيش مع بعض قصة غرام و لا بتوع السيما
طيب و بعدين و آخرة الصياعة دي إيه ؟
أنا كنت حاطط قدام عيني دايماً الحديث القائل
روى عبد الرازق في جامعه عن أبي قلابة رحمه الله بسند حسن أن رسول الله صلى الله عليه وسلم قال: "البر لا يبلى, والذنب لا ينسى, والديان لا يموت, اعمل ما شئت, كما تدين تدان".

يعني اي شئ غلط حأعمله حيترد لي و اللي ما أرضاهوش لأختي ما ارضاهوش لبنات الناس فكنت ماشي حياتي مستقيم لا بأبص كده و لا كده لكن اول ما ربنا قدرني على الزواج قررت إني اكمل نص ديني
إزاي ؟
انا عايش في السعودية و من البيت للشغل و من الشغل للبيت ففرصة إني اشوف عروسة معدومة فطلبت من أمي و أختي يدوروا في معارفنا على عروسة مناسبة ليا و بالمواصفات دي و فعلاً جابوا لي قائمة بعرايس من معارفنا و قرايبنا البعاد و ابتديت آخد خطوات جدية و ربنا يسهل اللي فيه الخير

بالنسبة لجواز الإنترنت بقى فانا مش مقتنع بيه نهائياً لإنك في النت بتتحاور مع شخصية وهمية و محدش بيكشف على النت عن نفسه غير الحاجات الكويسة و عمر ما واحد او واحدة حتبان عيوبهم على النت ثم المعرفة من النت مش حتخلي الواحد يعرف عائلة عروسته و لا أحوالها الحقيقة و لا شخصيتها الحقيقية فعلاً
الإنترنت مليان خدع و إشتغالات و نسبة فشل الجواز منه أكبر بكتير من نسب النجاح فاللي بيفكر يتجوز عن طريق النت يبقى موهوم

ده رأيي و دي طريقة تفكيري اللي مقتنع بيها
دعواتكم بقى إن ربنا يسهل و أتوفق لبنت الحلال في الاجازة دي

السبت، أبريل 11، 2009