الاثنين، أبريل 26، 2010

خبطنا تحت بطاطنا - احمد فؤاد نجم

القصيدة دي كتبها الشاعر احمد فؤاد نجم بعد نكسة يونيو 1967 مباشرة و كانت أول قصائده السياسية الممنوعة
مش عارف ليه لما بأقراها دلوقت حاسس إنها لسه منطبقة تماماً على وضع مصر و مفيش حاجة إتغيرت
سيناء رجعت منقوصة السيادة و ما قدرناش حتى ننقذ ضحايا السيول فيها غير بعد ما اخذنا إذن إسرائيل في دخول قوات الإنقاذ من الجيش المصري للمنطقتين ب و ج
عدد ضحايا حوادث السيارات في مصر سنوياً يفوق الـ 30 ألف و ده غير حوادث القطارات و العبارات و غيرها كتير ده غير مرضى السرطان و الفشل الكلوي و الكبدي إلى آخره من القائمة الطويلة شديدة السواد
قلة من الناس مستولية على موارد الدولة و فوق القانون و الحساب و تقود الدولة كلها إلى الهاوية
أشعر بنكسة أخرى قريبة و إنهيار تام لمصر فهل سيحدث هذا ؟ أم أن ربنا سيتداركنا برحمته في اللحظة الأخيرة
أترككم مع القصيدة و أتمنى أن تتفكروا في معانيها جيداً و تربطوها بالواقع الحالي


الحمد لله خبطنا 
تحت بطاطنا
يا محلا رجعه ظباطنا
من خط النار
يا أهل مصر المحمية
بالحرامية
الفول كتير والطعمية
والبر عمار
والعيشة معدن واهي ماشية
اخر أشيا
مادام جنابه والحاشية
بكروش وكتار
ح تقول لى سينا وما سينا شي
ما تدوشناشي
ما ستميت اوتوبيس ماشى
شاحنين انفار
إيه يعني لما يموت مليون
أو كل الكون
العمر أصلاً مش مضمون
والناس أعمار
الحمدلله وأهي
ظاطت
والبيه حاطط
في كل حتة
مدير ظابط
وإن شالله
حمار
ايه يعني فى العقبه جرينا
ولا ف سينا
هى الهزيمه تنسينا
إننا احرار
إيه يعني شعب ف ليل ذله
ضايع كله
دا كفاية بس أما تقول له
إحنا الثوار
الحمد لله ولا حولا
مصر الدولة
غرقانة فى الكدب علاوله
والشعب احتار
وكفايه أسيادنا البعدا
عايشين سعدا
بفضل ناس تملا المعدة
وتقول أشعار
أشعار تمجد وتماين
حتى الخاين
وان شا الله يخربها مداين
عبد الجبار





هناك 14 تعليقًا:

حفيدة عرابى يقول...

شكرا ياباشمهندس
انا احترت اقول ايه اكتر جزء منطبق جدا على واقعنا



انا كنت فاكرة ان بيان ثورة يوليو بس هو اللى بيحسسنى ان الدنيا ماتغيرتش

لكن عندى أمل كبير فى رحمة ربنا

فتاه من الصعيد يقول...

طول عمره كلامه ممتع وموجع ربنا يديله الصحه

شيء مؤسف ان كلام عن نكسه عسكريه يطابق احوال بلد المفروض انها حره غير محتله

تحياتي للاختيار الرائع

مجرد بنت يقول...

انا نفسى اعرف هو بيجيب الكلام المظبوط ده منين يمكن يكون سؤال غبى بس بجد بحس انه يوظف الكلام ويركبه ويلم الموضوع
شكرا ليك يابشمهندس

مهندس مصري يقول...

حفيدة عرابي
============
العفو
كلنا أمل في رحمة الله
و بنقول يارب أسترها معانا

فتاة من الصعيد
===============
المفروض حاجة و الواقع حاجة تانية
القرار السياسي المصري كله مرتهن بالموافقة الأمريكية و الرضا الإسرائيلي غالباً

أشكرك على التعليق

مجرد بنت
========
العفو
هي دي الموهبة اللي بيتميز بها الشعراء

أبو العريف يقول...

ازيك يا هندسه

سمعت عنها كتير القصيده دي
وبحس انها بترن ف وداني

بس اعترف اني اول مره اقراها هنا

فعلا الكلام اللي بقاله زمن بينطبق علي حالنا

القصيده اتقالت ف زمن النكسه

ومازالتت سارية المفعول في زمن الوكسه

مهندس مصري يقول...

أبو العريف
==========
الحمد لله يا بشمهندس
فعلاً إحنا في زمن الوكسة

جنّي يقول...

السلام عليكم

كيف حالك يا باشمهندس لعلكم بخير والحمد لله ..

ما اشبه اليوم بالبارحة ولكن الفرق شاسع بين اليوم وامس فقد زاد الفساد والحرامية وكبار الكروش ..

لنا الله ولهم الخزي والعار

تحيتي

مجداوية يقول...

السلام عليكم

الشاعر أحمد فؤاد نجم شعره السهل الممتنع والممتع وخفة الدم المصرية المتناهية ولا آخذ عليه سوا استخدام الألفاظ الخارجة

احنا اتخبطنا على دماغنا ومن يومها واحنا دايخين ومفوقناش , الشعب المصري بيثبت التاريخ إنه دايما حقل تجارب وبيوجه بالريموت كنترول
ومش عارفة ليه بنحب اللي بيأذينا وبيذلنا , احنا شعب ساديزم

أشكرك يا باشمهندس على تعليقك الطيب في التدوينة السابقة وألف شكر على سؤالك والحمد لله رب العالمين وكما قلت أمراض الجسد قد تبرأ لكن سقم الروح لا يبرأ وقد أصابونا في مقتل
ربنا يبارك فيك يارب ويمتعك بالصحة وراحة البال

يا مراكبي يقول...

شعورك في محله تماما

فكان القصيدة وليدة اليوم تماما

فنحن بالفعل في نكسة كبيرة بحق

مهندس مصري يقول...

جني
====
و عليكم السلام و رحمة الله و بركاته
الحمد لله أنا بخير لكن مشغول في الشغل شوية و بقت قعدتي على النت اقل من الأول
فسامحني على التقصير

فعلاً كل البلاوي بقت بزيادة
ربنا ينتقم منهم

مجداوية
=======
و عليكم السلام و رحمة الله و بركاته
أتفق مع حضرتك تماماً بالنسبة للشاعر
و أختلف مع حضرتك بخصوص حب الشعب للي بيذله
بس شعبنا سهل الضحك عليه إعلامياً
صحيح بيفوق بس ساعات بيفوق بعد فوات الأوان

ربنا يديم على حضرتك نعمة الصحة و يكرمك دايماً بكل خير
آميين

يا مراكبي
=========
بس يارب نخرج من النكسة دي على خير
أخشى ما أخشاه هو إنهيار مصر و تحولها إلى حرب اهلية كبيرة مثل العراق او لبنان الحرب الاهلية
في حالة من الفوضى الشاملة
لإني أعتقد ان نظامنا الحاكم لو لم يستطع الإحتفاظ بالحكم بالحديد و النار فلن يرضى بغير الفوضى بديلاً له

ستيتة حسب الله الحمش يقول...

السلام عليكم يا باشمهندس

اللينك اهو
http://www.youtube.com/watch?v=v1ua7sM0eCc&feature=related

سلسلة تتحدث عن مؤامرات عالمية
مش دي القصة
اغلب المؤامرات نعلم عنها لمحة او نحيط بها
لكن ربطها ببعض يستحق ان تراها كاملة
هي 51 جزء كل جزء عشر دقائق
لحد الجزء 46 السلسلة والباقي اعادة وتوضيح وتسليط ضوء على اهم ما ذكر بالسلسلة

في البوست عندي رجل تحت الصفر حاطط لينكات حلوة لنفس الموضوع
ده غير حلقتين لبرنامج سري جدا ها تلاقيها على اليوتيوب عن الماسونية

تحياتي

سبهللة يقول...

اكيد القصيدة دى اتسببت له فى الاعتقال

خلينا نبقى نسأل نوارة فى الموضوع دة

هو ايه اللى حصل فى الففيس بوك بقالى فترة بدور عليك
ولسة لاقياك حالا وبعت لك طلب اضافة تانى

Sonnet يقول...

شكرا على تذكيرنا بكلمات الشاعر أحمد فؤاد نجم...حقا سيناء فقدناها مرتين
مرة ايام النكسة.
و مرة لما هجرناها و لم نعمر إلا المنتجعات السياحية فقط فضلا عن اتفاقية السلام التي حرمتنا القدرة المطلقة على التواصل و التعمير فيها بأمان

مهندس مصري يقول...

ستيتة حسب الله الحمش
==================
و عليكم السلام و رحمة الله و بركاته يا دكتورة
ألف شكر يا فندم

سبهللة
======
أيوه في سنة 1968
مش عارف
بس ده لينك صفحتي على الفيس بوك
http://ar-ar.facebook.com/egyptioneng

sonnet
======
العفو
فعلاً