الأربعاء، فبراير 02، 2011

تميم البرغوثي - يا مصر هانت و بانت كلها كام يوم

يامصر هانت وبانت كلها كام يوم...
 نهارنا نادي ونهار الندل مش باين
الدولة مفضلش منها إلا حبة شوم..
لو مش مصدق تعال علي الميدان عاين
 ياناس مفيش حاكم إلا من خيال محكوم..
واللي هيقعد في بيته بعدها خاين
اللي هيعقد كأنه سلم الثانين للأمن وقاله هما ساكنين فين..
وصلت لضرب الرصاص علي الخلق في الميادين
حتى الجثث حجزوها اكمنهم خايفين..
يامصر أصبحنا أحياء وميتين مساجين
فاللي هيقعد في بيته يبقى مش مفهوم..
واللي هينزل الهي حارسه صاين
يامصر هانت وبانت كلها كام يوم..
نهارنا نادي ونهار الندل مش باين.
نهارنا نادي وبأيدينا علي فكرة..
الصبح عنده فضول راح نعمل إية بكرة.
إيده علي الباب وخايف يلمس الأكرة..
 ادخل ياأستاذ براحتك والبلد حرة.
إحنا زهقنا نشوف الصبح من برة..
ادخل وخرج بقايا العتمة دي برة.
الناس ديه حرة وجنود الأمن مضطرة..
ياصبح طلعت روحنا لجل تيجي ياخي.
طالعين نجبيها أهو فى كل حارة وحي..
حتى لو ضربونا بالرصاص الحي.
شوف الميادين كدة مفروشة خلق وضي..
دايما مفاجأة ودايما وقتها معلوم.
الحكم لينا وليك الحق يامداين..
يامصر هانت وبانت كلها كام يوم .
نهارنا نادي ونهار الندل مش باين..
ياصف عسكر بدل الدرع شيلوه اثنين.
25 يناير ياشباب فاكرين..
كان فيه انجليز و وزير الداخلية تخين...
كان عنده برده عساكر زيكم جامدين.
سابهم يموتوا علولا لم سأل فيهم..
كانوا شبهكم اساميكم اساميهم.
ياعسكري البهوات اللي بتحميهم..
ممكن يردوا عليك لما تناديهم?
ياعسكري أنا أصلي بس بأستغرب..
لو لاقي تأكل وتشرب قوم ياعم اضرب.
اضرب عشان الوزير من ضربتك يطرب..
 لكن هتشتغل ايه لما الوزير يهرب.
أما الشديد القوي القادر أبو القادر..
برميل تلامة نشر علي مصر من الآخر.
لو شافته معددة تكتب ادب ساخر..
ثابت يقول للهرم ياكابتن اتاخر.
ولم يزل معتقد ان الهرم هيقوم..
ادي الحجر والبشر قايمين يا سيد القوم.
والدين هيترد ياللي عشت متداين..
يامصر هانت وبانت كلها كام يوم.
نهارنا نادي ونهار الندل مش باين..
ده حكم أسرة ولا خوفو ولا خفرع.
ولا وجع بطن يتعالج بزيت خروع..
عمل مسوجر بعيد عنك ولايطلع.
جربنا فيه كل شىء ملقينا شىء ينفع..
منفعش بالأدوية جربنا ألف طبيب..
ولا بعطارة شيوخ ليهم بلح وزبيب.
ولا بجحفل مغولى وضرب بالقباقيب..
عمل مسوجر وسفلي شغل تل أبيب.
وشغل أمريكا متغلف وخاتمه عليه..
ضيف زارنا ياعم من غير دعوة لابس بيه.
قعد 30 سنة ومبيقولش قاعد ليه..
 والنية يديها لابنه النابغة بعديه.
ويقول قضا وقدر بين البشر محتوم..
 قولناله طيب ومين قال القدر معلوم.
واش عرفك يافخامتك بالذي كاين..
يامصر هانت وبانت كلها كام يوم..
نهارنا نادي ونهار الندل مش باين.

هناك 5 تعليقات:

eng_semsem يقول...

تحياتي لك ولتميم البرغوثي وكلماته الصادقه

! أم مصرية يقول...

يا ريت لو صحيح بتحب مصر لو ليك حد فى ميدان التحرير قل له يرجع ... قل له يرجع كفاية حرام عليكم ... قلبنا وجعنا

مهندس مصري يقول...

م/ سمسم
=======
ألف تحية لأبطال ثورة مصر

أم مصرية
=========
محدش حيرجع قبل إزالة المجرم حسني مبارك
واحد بيقتل شعبه نأمن له إزاي بعد كده
حسني لو ركب البلد تاني حيخلي الدم للركب

توتو يقول...

ماشاء الله لاقوه الا بالله



نهارنا نادى ونهار الجبان مش باين



يارب انصرنا يارب ومايبقاش دم الشهدا على الفاضى



ربنا يستر

عالم حبيب يقول...

في ظل الغيبوبة التي يعيشها الإعلام المصري

تردد جديد لقناة الجزيرة على النايل سات بتاريخ 4 فبراير 2011

التردد 11355 عمودي ( V )

القناة تظهر بإسم al jazeera

شعارنا ( الكدب حصري على التلفزيون المصري )

انشرررررررررررررررر