الخميس، مارس 10، 2011

إيمان بدوي إلى المجلس الاعلى للقوات المسلحة :عفواً لقد نفذ رصيدكم


كنا معتصمين فى التحرير لدعم عصام شرف و لتنفيذ باقى المطالب الرئيسية الم نطالب برحيل حكومة شفيق
واستجيب لنا  وهل كانت سترحل لولا وجودنا فى التحرير - ثم طالبنا بحل امن الدولة و الجميع رأى ما يحدث
منهم من اشعال للفتن - ثم لماذا لم يتم الافراج عن المعتقلين حتى الان؟ ولماذا لم تتم محاسبة من قتل شبابنا
حتى الان؟ ولماذا يبقى المحافظون والمحليات فى اماكنهم حتى الان؟
 برضو الى من يزايدوا على معتصمى التحرير وكانوا بيقولوا خلاص بقى روحوا وهو فيه ثورة بتشطب بدرى
علشان حمادة عايز يروح النادى والا احنا فارشين وقاعدين على عتبة بيتكم؟ كنت بكلم واحدة من اخواتى
المعتصمات وكان بقلها يومين ما نمتش تصدقوا نامت من التعب
 وانا بكلمها؟
تانى - انا من الناس المعتصمة فى التحرير الناس دى بتروح شغلها الصبح وترتاح وتجيلنا واحنا موجودين
داخل الصينية ولا نعطل المرور على العكس الشباب هما اللى بينظموا المرور فى التحرير وبيحموه
احنا قاعدين ليه؟ كنا نطالب بحل امن الدولة اللى لو كان تم حله او تجميدة بسرعة مكنش يبقى فيه فرم وحرق
مستندت واخفاء ونشر الباقى - المجلس يستجيب ببطء شديد جداااااااااااا للمطالب وكنا قاعدين علشان نفكرهم

 كان معتصم معنا 15 من اسر الشهداء لو لك اخ او ابن اتقتل او اتصاب بعاهه مستديمة او اعتقل كنت هتحس
احنا ليه معتصمين فى التحرير و بنطالب بحل امن الدولة والافراج عن المعتقلين ومحاسبة قتلة شبابنا والحرامية
اللى سرقوا فلوسنا وهربوها وخربوا البلد وتغيير المحافظين والمحليات ووضع جدول زمنى لباقى المطالب
وعلى رأسها الغاء حالة الطوارئ - قاعدين فى الشارع علشانكم وانتم مرتاحين فى البيت وفى الاخر لا نجد
حتى من يتركنا فى حالنا لكى نكمل مسيرة الثورة على خير
 كنا نايمين فى الشارع علشان البشوات يصلهم حقهم وهم نايمين تحت البطانية فى بيوتهم فى الدفا وكمان مش
عاجب - سبحان الله تمام زى ما كان بيقولوا على الثورة فى اولها - بتعطل - كلام فارغ - خلاص بقى
ماتزعلوش مبارك على اخر ايامه؟ هو مستلف منا ربع جنية علشان ننسى ونروح؟

الخلاصة لا اجد تفسيرا للبطء الشديد جدااااااااااااااا جداااااااااااااا من المجلس العسكرى فى اتخاذ قرارات مصيرية مثل
تجميد امن الدولة تمهيدا لحله
امس وبعد ان كنا قد صدقنا بيان المجلس السابق الذى اعتذر فيه عن مهاجمة وضرب المعتصمين مع وعد بعدم
تكرار ذلك ومحاسبة المسئولين نجد نفس الموضوع يتكرر
ضربوا المعتقلين  تزامنا مع هجوم البلطجية منتهزين الفرصة لفض اعتصامنا بالقوة و ضربوا الناس وكسروا
الخيم واستولوا على متعلقاتنا وقبضوا على الشباب والبنات ومنهم صديقاتى من الصحفيين والاساتذة والطلاب
واوسعوهم ضربا بعد احتجازهم فى سجن المتحف المصرى حتى ان صديقتى رشا خرجت وهى لا تستطيع الكلام من شدة الضرب 
منذ فتره ونحن نرى تجاوزات المجلس الاعلى ولا نتكلم حرصا على المصلحة والان آن الاوان ان تعرفوا انهم
قبضوا على كثير من الناس وضربوهم ضرب مبرح وكهربوهم - لماذا تحمل الشرطة العسكرية عصا
كهربائية؟  احتجزوهم فى عدة اماكن منها معتقل فى الهايكستب يقول من كان هناك انه شاهد حوالى ال600 معتقل لا يعلم عنهم احد شئ
وهناك من كان مسجون فى سرداب تحت قصر عابدين منهم اطفال
والان بعد ان نقض المجلس وعده فلا مصداقيه له عندى وعند الكثيرين ولن نصدقهم بعد اليومشاهدوا الفيديو وشاهدوا اشكال الناس التى هجمت على خيام المعتصمين بمساعدة الجيش
وشاهدوا كيف يسحل الجيش بنت فى الشارع
كان معنا 15 اسرة من اسر الشهداء معتصمين فاصبحوا يسموننا خيام الدعارة
http://www.youtube.com/watch?v=wnYppHD05HQ

عندى سؤال بسيط  احتفظ بالاجابة عندك ولا ترسلها لى: هل توافق على تفريق الجيش وبعض البلطجية
لمعتصمى التحرير بالقوة وهدم خيامهم وضربهم والقبض عليهم ووصفهم بالداعرين؟ نعم او لا فقط
برجاء النشر في كل مكان

هناك 4 تعليقات:

محمد الجرايحى يقول...

بالطبع لا

فاروق سحير ( فاروق بن النيل ) يقول...

مهندس مصرى بيحب مصر
لاأوافق على أية إهانة
أتركوا ميدان التحرير للبلطجية والحزب
الوطنى والسلفيين المتشددين والأقباط اللى مااشتركوش بالثورة ودعوا الحجج لهم حتى يتبين الصادق من الكاذب وسوف نعود لهم بأكثر مما بدأناه وبأقوى مما أيدنا الله به وساعتها سينكشف لنا كل شيئ أرجوكم لاتنسوا قوله تعالى" وإن جنحوا للسلم فإجنح لها " وقوله" إن جاءكم فاسق بنبأ فتبينوا أن تصيبوا قوما بجهالة فتصبحوا على مافعلتم نادمين" صدق الله العظيم
كل ماأبغيه هو عدم إعطاء الفرصة للإحتكاك بهم ولنرى مايحدث ونرى تصرف الأمن والجيش ثم نقررمانحن فاعلون ولاتقولوا الباشوات نايمين فى سريرهم فنحن باشوات كنا معكم ومازلنا أما ماتقصدونهم فهم ليسوا منا ولن يكونوا أبدا من الثورة .
شاب فى الرابعة والستون من عمره شارك بالثورة بقصائده منذأكثر من عام ولم يتأخر هو وأهله بالمشاركة بأنفسهم فيها ومازال

مهندس مصري يقول...

محمد الجرايحي
============
أكيد لأ

فاروق بن النيل
===============
هذه هي المرة الثانية التي يفرق فيها الجيش المعتصمين و يفض إعتصامهم بالقوة
و عدد من إعتقلهم الجيش من المتظاهرين منذ بداية الثورة حتى الآن تخطى 150 معتقل
منهم حوالي 90 تم تعذيبهم و وثقت منظمة العفو الدولية رواياتهم عما حدث
و في أول مرة إعتذر المجلس و قال رصيدنا يسمح
لكن تكرار الأمر يؤكد إنها أوامر متعمدة و ليست إحتكاكات غير مقصودة كما إدعى المجلس الأعلى
و لا ننسى عمرو البحيري الذي تم تلفيق تهمة له و الحكم عليه بخمس سنوات حبس ظلم بدون محاكمة عادلة و بدون حتى حضور محامي معه

أحمد البستاوي يقول...

المشكلة يا باشا إن النظام اللي إحنا عاوزين نسقطه أكبر بكتير من اللي كنا متخياينه
الجيش جزء من النظام شئنا أم أبينا
و اللي بيحصل دلوقتي ترتيب ورق ليس إلا
و اصبر بعد الست شهور اللي طلبهم مبارك في الأول و طلبهم الجيش في الآخر
و ح يطلع لك اللي يقول البلد ما كانشي فيها فلوس من الأساس . . و الناس كانت بتتعذب و لا حاجة . . و احتمال واحد يقولك لا كان فيه ثورة و لا حاجة . . دي واحدة متخانقة مع جوزها -- حصلت و الله على القناة الأولى
---
معنى كلمة النظام هو كل الأوضاع السابقة و المستفيدين منها
كل من كان برتبة فوق رائد جزء من النظام
كل من كان مدير عام فما فوق جزء من النظام
كل من استطاع تكوين ثروات فوق الخمسين مليون جزء من النظام
كل سياسي فوق الأربعين سنة جزء من النظام
---
لسه بدري على ما نقول خلصنا