الخميس، مارس 24، 2011

عودة القمع - يسقط قانون الطوارئ

و يعاقب بالحبس و الغرامة التي لا تقل عن 30 الف جنيه و لا تزيد عن 50 الف جنيه كل من حرض او دعا أو روج بالقول أو بالكتابة أو بأي طريقة اخرى من طرق العلانية لأي من الأفعال السابقة ..... يعني حتكمموا الناس كمان
ده كان تعليقي على القانون بمرسوم لمنع بعض حالات التجمهر و الإعتصام
و آدي نص القانون المصيبة ده



القانون المصيبة ده بيمنع التظاهر و الإعتصام تماماً و ليس المظاهرات الفئوية فقط 
ثم لو فيه فئة عندها مظلمة ما هي جهة التظلمات التي ستبت في شكواهم بشكل سريع و عادل فالعدل البطئ ظلم كما هو معروف
و ما هي جهة الرقابة على جهة التظلم هذه ؟
ثم أن الفقرة الأخيرة في القانون التي ذكرتها في بداية التدوينة ستجرم كل المدونين و أعضاء الفيس بوك و التويتر و كل من يكتب كلمة يتم تفسيرها على إنها تحريض و القانون مطاط كعادة القوانين ايام مبارك و يسمح بكل انواع التفسيرات حسب مزاج من يطبقه
ثم ان القانون يطبق في حالة الطوارئ فقط و ده سبب أدعى لإننا نصر على المطالبة بإلغاء قانون الطوارئ
و ياريت تبصوا على نص قانون الطوارئ و تاريخه الإسود من سنة 1914 لحد دلوقت في اللينك ده
دراسة تاريخية قيمة عن تاريخ قانون الطوارئ المشئوم في مصر
كان من ضمن أهم مطالب الثورة إلغاء الطوارئ و ده شئ كلنا مصرين عليه
و الجيش اللي الشعب رحب بيه بينقلب دلوقتي على الثورة
أو على الأقل تصرفاته بتوحي بكده
فلما يضرب الناس قدام مجلس الوزراء و بعدها يطلع يعتذر و يقول رصيدنا يسمح و يهف عمرو البحيري 5 سنين سجن بحكم محكمة عسكرية ظالم
و بعدها يضرب الناس في التحرير يوم  9 مارس و يفض الإعتصام اللي كان ناس ياما مش موافقة عليه بس فضه بطريقة همجية و سحل ناس و منهم بنات على الاسفلت و بعدها اللي اتقبض عليهم أكثر من 100 واحد منهم 18 بنت إتآخدوا على المتحف المصري و إتكلبشوا خلفي و إنضربوا بالعصيان المكهربة و البيادة من الشرطة العسكرية و إدارة التحريات العسكرية و أفرجوا عن قلة منهم و نقلوا الباقي للهايكستب و هناك إنضربوا تاني و اتعذبوا تاني و قلعوهم ملط و صوروا البنات و هما عريانين و هددوهم بنشر الصور بل و جابوا دكتور كشف على عذريتهم بالعافية و بعدها كل الرجالة إتهفوا أحكام عسكرية من سنة لخمس سنين سجن ما عدا 4 صحفيين خدوا براءة و البنات كلهم أخدوا سنة مع إيقاف التنفيذ
و آدي تقرير منظمة العفو الدولية
http://www.amnesty.org/en/news-and-updates/egyptian-women-protesters-forced-take-%E2%80%98virginity-tests%E2%80%99-2011-03-23 
و كملت بإقتحام الشرطة العسكرية لجامعة القاهرة بالمدرعات و فضهم لإعتصام طلبة كلية إعلام و كلية دار العلوم من أجل إقالة عمداء الكليتين الموالين للحزب الوطني و امن الدولة و تم ضرب الطلبة و الدكاترة المعتصمين بالعصيان المكهربة وتفريقهم بالقوة
دا الامن المركزي في عزه عمره ما عملها و كان بيقف بره الجامعة علشان يمنع المظاهرات من الخروج للشارع و كان اقصى حاجة الحرس الجامعي مع شوية بلطجية يهاجموا الطلبة
إنما في عهد الثورة الجيش هاجم الحرم الجامعي
هو إحنا بنتقدم لقدام و لا بنرجع لورا
بس كان افضل رد هو نزول كل طلبة المدينة الجامعية فوراً للتظاهر و الإعتصام بالجامعة تأييداً لطلبة كلية الإعلام و جاري التحضير لمظاهرات لكل طلبة الجامعة تكون شديدة الحشد و الكثافة


الخلاصة 
أيها المجلس الاعلى للقوات المسلحة دي ثورة مش لعب عيال و يا تنفذوا مطالب الثورة و تعاملوا الناس بإحترام و جهة مستقلة تحقق في انتهاكات الجيش الموثقة دي لحقوق الإنسان و تطهروا البلد من الفساد و تحاكموا الفاسدين بسرعة مش بالبطء المستفز بتاعكم ده
يا تعملوا كده يا تمشوا و تسيبوا المسؤولية اللي انتم مش قدها لو مش قادرين عليها سيبوها
و يا دكتور عصام شرف عار عليك يصدر قانون زي ده في عهدك و بأفكرك بكلمتك : لو مش حتقدر تغير حترجع تنضم للثوار في الميدان  
لو مضغوط عليك من أي حد إعلن ده للشعب و الشعب حيدعمك في وش التخين


و أخيراً القانون ده مش حينجح في تكميم المدونين و لا أي حد من الشعب تاني 
و الثورة شكلها محتاجة ثورة تانية تلحقها قبل ما تفطس

هناك 4 تعليقات:

محمد الجرايحى يقول...

السلام عليكم ورحمة الله وبركاته
هل يحق لى الآن أن أسأل السادة الذين كانوا يطالبون ببقاء الجيش حتى إعداد دستور جديد حتى إذا استدعى الأمر بقاؤهم
صنة أو سنتين.... مارأيكم الآن ؟؟؟

الأخوة الكرام الجيش لايستطيع البقاء فى الحياة المدنية أكثر من ذلك وخاصة فى ظل هذه الظروف المضطربة.

مهندس مصري يقول...

محمد الجرايحي
===========
و عليكم السلام و رحمة الله و بركاته
قوات القمع في الجيش و هي
1- المخابرات الحربية
2- الشرطة العسكرية
3- إدارة التحريات العسكرية
و معهم كل قيادات المجلس الأعلى بدأوا ينقلبون على الثورة
و يجب رحيلهم بأسرع ما يمكن و تسليم البلد لقيادة مدنية شريفة

shlotmozdwag يقول...

لن ينجحوا وستنتصر الثورة إن شاء الله

مهندس مصري يقول...

شلوت مزدوج
===========
يارب