الجمعة، مارس 25، 2011

حطة يا بطة يا دقن القطة - الشيخ إمام

حطَّه يا بطَّه يا دقن القطه
بابا جاي وشايل الشنطه
إيه في الشنطه
فيها ما فيها
غش وبوليتيكا وأوَنْطَه
حطه يا بطه

حاكم بابا شغلته ظابط
ضابط هابط
شابط لابط
راقع خابط
نازل شافط
طالع لاهط
عمره ما فكَّر فكره وصابت
عمره ما نبِّتْ زرعه وطابت
يزرع سكر يطلع شطه
حطه يا بطه

بابا عشان خَدْها بالملحق
بقى ظابط واتعيِّن ملحق
واترقى سفير ف وزير
إيه السر .. السر ف بير
والسر ف طرف النبوت
واللي يحل السر يموت
ياما نفسي يا بلدنا يا شابه
يبقوا الوزرا بفلات فوت
وقلوبهم مليانه مباسطه
حطه يا بطه

يا بلدنا يا زادنا وزوادنا
يا ام جدودنا وبنت ولادنا
إيه آخرتها مع الظباط
بيروقراط على تكنوقراط
حُكَما فلاسفه فشر سقراط
واحنا يا عيني غلابه بُساط
فردانيه ما بيناش رابطه
حطه يا بطه يا دقن القطة


هناك 7 تعليقات:

فاتيما يقول...

:)

تسلم يا محمد

مهندس مصري يقول...

فاتيما
======
الله يسلمك
كان واحد صاحبي حاططها على الفيس بوك و لقيتها مناسبة جداً فحطيتها :)

محمد الجرايحى يقول...

كلام بسيط فى مظهر ولكن عميق فى جوهره
ــــــــ
أحسنت الاختار والطرح
تقديرى واحترامى

محمد سعد القويري يقول...

الأخ الفاضل :: مهندس مصري ::
أسعد الله أوقاتك بكل خير :)
وحلوة الهيصة دي ^^^ بمزح معاكـ :)

متمنيا من أعماق أعماق قلبي
كل الخير لمصر ولشعب مصر

موجة يقول...

قصديدة جميلة..
من أبيات الشيخ امام والمخلصين انطلقت الثورة..
بوست جميل
تسرني زيارتك
خالص تحياتي
احمد

عاشقة الفردوس يقول...

: )))

مهندس مصري يقول...

محمد الجرايحي
===========
أشكرك
و أنا أحس انها مناسبة تماماً لوضعنا الحالي

محمد سعد القويري
================
ربنا يستجيب لدعواتك و أمنياتك يا أخي الفاضل
و يزيد من فضله و نعمه على بلاد الحرمين الشرفين و أهلها

موجة
=====
منور يا بو حميد

عاشقة الفردوس
==============
:)