الثلاثاء، مارس 29، 2011

ليه كده ؟ دا إحنا بنحب الجيش

 إيه اللي يخلي الشرطة العسكرية تقبض على المدون مايكل نبيل من بيته بطريقة زوار الفجر ؟
و ليه اصلاً يتقبض عليه ؟ و إيه التهمة الموجهة له ؟
هل صحيح إن ده بسبب تدوينته دي ؟
http://www.maikelnabil.com/2011/03/blog-post_07.html
و هل اصبح التعبير عن الرأي محرماً بعد الثورة
قد نتفق أو نختلف مع كل أو بعض ما كتبه و لكن هذا لا يمنح احداً الحق في إعتقاله بشكل تعسفي و بدون إبداء إتهام محدد و بطريقة قانون الطوارئ و مباحث أمن الدولة
و لو هو فيه إتهام محدد متوجه له ليه ما يصدرش أمر بالقبض عليه من النيابة العامة و يتقبض عليه بشكل عادي مش بالهجوم على بيته في منتصف الليل
أنا ما اعرفش مايكل نبيل ده و لكن مهما كانت افكاره و سواء إتفقت معاه او إختلفت و أنا مختلف معه في نصف ما قاله تقريباً أو اكثر لكن مش لازم نرجع لعهد زوار الفجر تاني أبداً
عموماً أدعو كل الناس اللي بتحب مصر إنها تنزل لميدان التحرير يوم الجمعة الجاية 1 ابريل في مليونية إنقاذ الثورة و تطالب بالقبض على الفاسدين و إستبدال المسؤولين الفاسدين في كل مرافق الدولة بمسؤولين صالحين بحق لنأتمنهم على البلاد و العباد
و ما زلت أؤكد على ثقتي في الدكتور عصام شرف و أدعو ربنا يوفقه لكل ما فيه الخير و يلهمه الصواب في كل ما يفعل
تحديث:-
عندما كتبت هذه التدوينة لم أكن اعلم أن مايكل نبيل ملحد و أنه يحب إسرائيل
و انه سبق أن إعتقله الجيش في بداية الثورة ليومين ثم أفرج عنه
http://www.maikelnabil.com/2011/02/blog-post_08.html
و قد اتهمه الجيش بإهانة المؤسسة العسكرية و تكدير الأمن العام و أحاله للمحاكمة العسكرية و هو ما نرفضه تماماً لأن العدالة و الحرية حقوق أساسية لكل المواطنين  مهما كان دينهم أو أراؤهم السياسية  و كما رفضنا محاكمات الإخوان المسلمين العسكرية من قبل نرفض محاكمة مايكل عسكرياً لأن المبدأ واحد لا يتجزأ

و هذه صفحة الحرية لمايكل نبيل http://www.facebook.com/FreeMaikelNabil على الفيس بوك

هناك 8 تعليقات:

عاشقة الفردوس يقول...

كنت بقرأ التدوينة بتاعة نبيل مايكل دا

وانا مختلفة مع 3/4 اللي قاله زي ماانت ياباشمهندس قولت بالظبط , ف وشايفة ان الموضوع فيه جانب سودوي ومخيف ف كلامه

لكن معاك ف ان كان المفروض يطلعو أمكر بالقبض عليه وميكونش الأمر زي قبل كدا نلاقي طرق همجية وزوار الفجر ف بيتنا بتهمة ومن غير تهمة



انا ضده تماما لكن ف نفس الوقت رافضة طريقة قبضهم عليه


>>>معاك في ان لازم العناصر الفاسدة تتحاكم واننا نلاقي محاكمات سريعة لرؤوس الفساد وسرعة في استردادحقوق المصريين

mrmr يقول...

اى ان كان ملحد او غير ذلك
فهذا رايه الشخصى ويجب ان نحترم جميع الاراء
ياريت فعلا نعرف تهمته ايه
هل يا ترى اعتقاله بسبب هذا المقال ؟
لو كان ذلك يبقى كانك يا ابو زيد ما غزيت ورجعت ريمه لعادتها القديمه
ربنا يستر

AHMED SAMIR يقول...

انا عن نفسي
دور الجيش ملتبس بالنسبة لي
ساعة يكون فوق مستوى المسئولية و ساعات يتباطأ بشكل غريب و مريب

مهندس مصري يقول...

عاشقة الفردوس
==============
يبقى متفقين

مرمر
=====
للأسف

أحمد سمير
=======
حاجة محيرة فعلاً

محمد الجرايحى يقول...

الجيش مجموعة من البشر تحملوا أمانة فوق مستوى وطاقة البشر ومن المحتل وجود أخطاء ولابد من أن ننبه لها وواجب عليهم الأخذ بها والانتباه إليها...
الجيش مازال هو الحصن الحصين للأمة.
ولكن لابد من أن يعود سريعاً لمكانه الطبيعى .....

مهندس مصري يقول...

محمد الجرايحي
===========
ربنا يقوي الجيش على المسؤولية اللي تحملها دي
و يصلحوا اي أخطاء بيقعوا فيها بسرعة
و يرجعوا لثكناتهم بشكل أسرع

أحسن شاب في البلد يقول...

دا عيل ابن ( تيييييييييت ) و مالوش مله
و دا داعي للفوضى .. مش علشان بينتقد الجيش
و الاشكال دي لازم تتربى
و على رأي احمد السقا في ( حرب اطاليا ) ساعات الغلط مع اللي غلط بيبقى منتهى الصح
مش عايزين بقى نفتح المجال للملحدين و البهائيين و الشواذ و الهندوس ... و نقلبها بزرميط
--------------
معتز قنديل

مهندس مصري يقول...

أحسن شاب في البلد
=================
و لو إبن 60 تيت في بعض
برضه مواطن مصري و له حقوق لازم لا تنتهك
المبدأ واحد لا يتجزأ
و اللي يرضى بالسماح للجيش بالإعتقال التعسفي مع واحد زي ده مش حيعرف يلاحق على إعتقالات الجيش بعد كده لكل اللي مش على مزاجهم و لكل اللي ينتقد الأداء السياسي للمجلس الأعلى بتهم مطاطة زي إهانة المؤسسة العسكرية و تكدير الأمن العام اللي ملهمش تعريف قانوني محدد
كما إن الإستفتاء اللي فات الناس وافقت على إلغاء المادة 179 من الدستور القديم اللي كانت بتسمح بتحويل المدنيين للمحاكم العسكرية
فبأي حق و بأي سند قانوني يتم محاكمة مدنيين ( ناشطين و بلطجية و غيرهم ) أمام المحاكم العسكرية المختصة قانوناً بمحاكمة العسكريين فقط و التي تفتقد للإستقلال القضائي و أبسط ضمانات المحاكمات العادلة
و ده لا ينفي إنه عيل تيييييييييييييييت
بس الجيش حكم لغاية دلوقتي على بتاع 150 واحد ظلم من النشطاء و المواطنين العاديين دا غير 50 معتقل تانييين بدون محاكمة لحد دلوقت دا غير اللي اتعذبوا و اللي اتكشف على عذريتهم