السبت، مايو 28، 2011

ماذا حدث في ميدان التحرير يوم الجمعة 27 مايو

تحديث:
بعد مراجعة للصور من أعلى الميدان و التحدث مع العديد من الأصدقاء الذين حضروا المظاهرة فأظن أن الأرقام الحقيقية أقرب لنصف ما ذكرت أنا
أي أنها كانت 400 الف عند صلاة الجمعة و مليون عند صلاة العصر
و عموماً لم أرى أي شخص ممن حضروا المظاهرة يقول أنها كانت أقل من 800 ألف متظاهر في ساعة الذروة عند صلاة العصر
و على فكرة أنا ضد تأجيل الإنتخابات بل أطالب بتعجيلها للتخلص من العسكر بأقصى سرعة 
أنا على فكرة ضد فكرة تأجيل الإنتخابات
لإن حكم العسكر تقيل قوي على قلبي خصوصاً مع إنتهاكاتهم المتكررة لحقوق الإنسان
و لكني مقتنع فعلاً أن الترتيب الصحيح للأمور هو إنتخاب جمعية تأسيسية لوضع الدستور بشكل مستقل عن البرلمان
يعني مثلاً ننتخب جمعية تأسيسية في يوليو و ننتخب المحليات و المحافظين و رؤساء المدن و و رؤساء الأحياء و العمد للقرى في شهر اغسطس و ننتخب كل النقابات المهنية و العمالية المستقلة في بداية سبتمبر و ننتخب البرلمان في نهاية سبتمبر و ننتخب رئيس جمهورية و نائبه في أكتوبر
مع إعتماد التصويت الإلكتروني خاصة للمصريين بالخارج
و عندما تنتهي الجمعية التأسيسية من وضع الدستور نستفتي عليه
على ان يرحل العسكر في شهر أكتوبر بعد انتخاب الرئيس و البرلمان و حتى قبل الإنتهاء من وضع الدستور
كما يجب ان لا ينفرد العسكر بالحكم حتى هذه الفترة فلابد من مجلس مدني يكون مراقباً لهم
فقراراتهم المنفردة مستفزة و تصب في طريق تصفية الثورة على المدى البعيد



نزلت إمبارح ميدان التحرير 
كان يوم  جميل امبارح
نزلت من بيتنا في دمنهور حوالي الساعة 9 صباحاً و وصلت التحرير مع آذان الظهر و صليت الجمعة و العصر على الأسفلت قدام كنتاكي كده و اللي ضايقني إن بعد ما خلصت صلاة مع كمية كبيرة من المتظاهرين إني لقيت إن صلاة الجمعة ناحية هارديز لسه شغالة بإمامة الشيخ محمد جبريل و ده ضايقني بجد 
ليه منصة كنتاكي كانت عاملة صلاة جمعة لوحدها و ليه ما شغلوش ميكروفناتهم مع صلاة الجمعة الرئيسية اللي عند هارديز و ليه نصلي جمعتين في ميدان واحد و إحنا مكناش نعرف و لو عرفنا ما كناش وافقنا على كده أبداً يالا قدر الله و ما شاء فعل
العدد ساعة صلاة الجمعة كان حوالي 800 ألف و بدأ يزداد بعد صلاة الجمعة بمسيرات بتتوافد من جميع مداخل الميدان و انا شفت مسيرتين كبار دخلوا الميدان من ناحية كوبري قصر النيل و العدد على آذان العصر كان وصل لحوالي 2 مليون متظاهر و بدون مشاركة الإخوان المسلمين الرسمية بل و نفيهم القاطع للمشاركة و تنديدهم بمن شارك من شباب الإخوان و عصى اوامر مكتب الإرشاد
و وصلتني أخبار إن مظاهرة القائد إبراهيم في إسكندرية عدت المليون دا غير مظاهرات حاشدة في السويس و الإسماعيلية و معظم عواصم المحافظات المصرية بل و كان فيه مظاهرة في دمنهور أمام مقر امن الدولة المحترق المهجور لحد دلوقت و اللي بقى إسمه الشعبي متحف الظالمين :)
لما الأعداد دي كلها تخرج بدون مشاركة الإخوان يبقى محدش يقدر يمن علينا و يقول لنا مفيش ثورة من غير الإخوان
الإخوان ليا منهم حبايب كتير و منهم أبطال في الثورة المصرية و بذلوا شهداء و مصابين كتير و تنظيمهم كان من عوامل نجاح و حماية الثورة لكن ده لا يعطيهم الحق في إحتكار الثورة و المن على شعب مصر بما فعلوه فهم فعلوه لله و ليس للناس
و منظرهم بقى وحش و بدأت الناس تتكلم عن صفقة بين الإخوان و المجلس العسكري و هما لو ما كانوش عملوا صفقة فشكلهم كأنهم عملوا صفقة و تصريحات بعض قادتهم بتثير الشكوك بجد حتى وسط الناس اللي بيحبوهم زيي
و كان منتشر قوي في الميدان إمبارح هتاف " الإخوان فين ؟ التحرير أهوه " 
يا خوفي على الإخوان اللي قياداتهم ما بتتعلمش من دروس التاريخ
كل ديكتاتور حكم مصر عمل شعبيته بالتحالف مع الإخوان و بعدها هرسهم في السجون
بدئاً من الملك فاروق اللي اتحالف معاهم ضد الوفد و بعد ما أخد غرضه إغتال حسن البنا و نكل بيهم في معتقلات الطور في سيناء ثم جمال عبد الناصر اللي بعد ما شال محمد نجيب لفق لهم حادثة المنشية و سامهم سوء العذاب ثم السادات اللي استخدهم ضد الماركسيين و اليساريين و بعدها قلب عليهم
فهل حيكرر الإخوان نفس الغلطة لرابع مرة و يتحالفوا مع المجلس العسكري ليحصلوا على اغلبية مجلس الشعب و منصب رئيس الوزراء و نصف وزراء الحكومة مقابل القبول برئيس و نائب رئيس من طرف المجلس العسكري و دستور تفصيل بينهم هما الإتنين
صدقوني لو ده حصل يبقى أول ناس حيدبحهم طنطاوي بعد ما يآخد غرضه هما الإخوان


ما علينا نرجع للميدان 
مكان منصة الإخوان الرئيسية اللي عند هارديز كان فيه منصة صغيرة مش عملاقة زي كل مرة بس برضه ناس كتير كانوا ملمومين عندها و اتكلم المستشار زكريا عبد العزيز الرئيس السابق لنادي قضاة مصر و بعده المستشار الخضيري و بعدهم المهندس الفخراني اللي رافع قضية ضد عقد مدينتي و رفع قضية تانية علشان الحد الأقصى للأجور و بيطالب بإحالة 62 ألف مستشار ( مش قضاة بل موظفين في كل المصالح عدوا سن المعاش فبيسموهم مستشارين ) في الحكومة تخطوا سن المعاش و إتمد لهم بعد السن و بيقبضوا مبالغ خرافية
بعدها سبت المنصة دي و رحت للمنصة اللي عند كنتاكي و بعدها للمنصة اللي عند مجمع التحرير و بعدها المنصة اللي عند جامع عمر مكرم و دي أكثر منصة وقفت عندها و هناك كان المستشار أشرف البارودي رمز من رموز إستقلال القضاء و سلمت عليه و اتصورت معاه و لقيت أرائي أنا و هو متوافقة تماماً
و عجبني لما شاب من المنصة هتف " الجيش المصري بتاعنا و المجلس مش تبعنا " و الناس رددت وراه و بعدها قالوا الجيش و الشعب إيد واحدة :)
يارب الناس تفهم إن الجيش مش المجلس و المجلس مش الجيش و إن ناس كتير جوه الجيش بتغلي غضباً من تصرفات المجلس العسكري بس مش قادرين ينطقوا و كفاية ضباط 9 إبريل اللي كل واحد فيهم خد 10 سنين سجن من المحكمة العسكرية
المنصة دي بقى كانت بتاعة ( حزب الجبهة الديموقراطية , الحزب المصري الديموقراطي الإجتماعي , حزب المصريين الأحرار , حزب مصر الحرية ) 
أنا عارف الجبهة و المصريين الأحرار بتاع ساويرس بس مش عارف مين الإتنين التانيين دول و كان فيه وجود ملحوظ هناك لحركة 6 إبريل
و رامي عصام غنى شوية اغاني جميلة جداً و للأسف معاييش كابل الموبايل دلوقت و إلا كنت نزلت لكم الصور و الفيديوهات لإن أغانيه روعة بجد و كانت الناس بتتجاوب معاها جداً و بتطالبه بالإعادة مرة و إتنين
اللي يغيظ بقى إن كل المنصات أكدت على الناس إن كله يروح الساعة 6 بالضبط 
كانها حفلة سينما :) واضح إن مليونيات الجمعة تحولت لمولد ستى الثورة أكثر منها تظاهرة سياسية لها مطالب موحدة 
و مع كده ناس كتير قعدت و كانت ناوية تعتصم لإن المجلس العسكري مش بييجي بالذوق و بيستغفل الناس و بيفرغ الثورة من معناها و مضمونها وسط غلاف براق من الإحتفال بالثورة العظيمة و شبابها الأبطال :)
واحدة كانت بتقول لي مش عارفة مظاهرة إسكندرية بتطلع أحسن من هنا ليه ؟ عايزين نستورد رجالة إسكندرانية للتحرير
قلت لها لأ السبب إن مفيش منصات هناك و ناس عايزة تظهر في التلفزيون و تتمنظر قدام الناس و الكاميرات و تتفاوض مع الحكومة و المجلس العسكري
هناك ناس بتعمل لوجه الله و لمصلحة الثورة بدون النظر لأي حاجة تانية
رحت ريحت ساعة في جامع عمر مكرم و صليت المغرب و العشاء هناك قصر و جمع تقديم لإني كنت على سفر و خرجت تاني للميدان
قابلت إيمان بدوي و كانت حتعتصم هي و شوية ولاد و بنات جدعان و كنت ناوي أكمل معاهم لكن إضطريت وسط ضغط رهيب من البيت و مكالمات تليفونية متواصلة إني أسيب الميدان الساعة 12 بالليل و أروح و وصلت بيتنا في دمنهور مع أذان الفجر الساعة 3 و ربع لكن من كسوفي و إحراجي من الناس إني سيبتهم و مشيت ما قلتش لحد منهم إني مشيت و كنت سايب حوالي 15 ألف واحد ساعتها معتصمين و قافلين المرور في الميدان و مش عارف إيه اللي حصل بعد كده ؟
بس كان فيه ناس بتلف الميدان غالباً من إئتلاف شباب الثورة و بتحاول تقنع الناس بفض الإعتصام و الإنتظار حتى ينتهي الطلبة من إمتحاناتهم علشان يكون الإعتصام على رواقة :)
و نشال إتمسك الساعة 10 بالليل كده بس أكل ضرب رهيب :)
عموماً ده آخر حاجة عملية أقدر أعملها مع الثورة لإني رجع السعودية خلاص على آخر الإسبوع لأن الأجازة خلصت و على ما أرجع مصر كمان سنة إن شاء الله يا تكون الثورة نجحت و مصر بقت حرة يا يكون المجلس العسكري أجهضها و كل ثورة و إنتم طيبين
و اللي يغيظ بجد إنك تسأل أي حد من الناس العاديين اللي راكبين معاك الميكروباص أو التاكسي أو القطر او المترو هل عندك شك في إن المجلس العسكري تبع مبارك ؟ يقول لك لأ
طيب هل عندك شك إنه كان مشارك أو على الاقل مطرمخ على كل عمايل مبارك و عصابته السوداء  ؟ يقول لك برضه لأ 
طيب هل حاسس بتغيير حقيقي بعد الثورة ؟ برضه لأ
طيب مش بتثور ضد المجلس العسكري ليه ؟
يقول لك أصل لو وقع مين حيمسك البلد ؟ و حنعمل ايه ؟ و البلد منهارة و الإقتصاد واقع  إلخ
لكن لما تحكي لهم على فضايح الجيش في موقعة الجمل و فض إعتصامات 9 ابريل و 9 مارس و 25 فبراير و كلية الإعلام و تعذيب النشطاء و كشف عذرية الناشطات و فض مظاهرة سفارة إسرائيل و إنتهاكات الشرطة الجديدة و الأمن الوطني تلاقيهم يقولوا إحنا ما كناش نعرف الكلام ده و المجلس العسكري لازم يتشال بس إزاي ؟ و مين حيمسك مكانه ؟
عجبت لك يا شعب مصر
و عجبي

هناك 14 تعليقًا:

معتز شاهين - باحث تربوي يقول...

مع احترامي لرؤية حضرتك للأحداث
2 مليون أيه يابشمهندس مالصور كانت واضحة جدا
وبالتدليل بما قاله شباب ائالاف الثورة أنفسهم وبالتحديد عبد الرجمن فارس كان العدد لا يزيد عن 25 ألف

يابشمهندس مفيش قناة محايدة اعلنت عن نص نليون واحد حتى في الميدان

أنا بذلك لا أدافع عن الإخوان ولكن عايز أقول لحضرتم أن الشعب ده مش حمار وعارف مين اللي نعاه ومين اللي يلتف على مالطلبه واختياراته ولارد كان واضح جدا في الميدان امبارح

تقبل مروري وتحياتي

MaNoOoSh يقول...

بالنسبة لاسئلتك الاخيرة
فالناس جواها خوف بسبب عمليات التخويف والارهاب اللى بتحصلنا

من بلطجة وتهديد بالاقتصاد والسياحة والاستثمار

بس بحكمة ربنا وبقدرة ان شاء الله الثورة دي هتنجح مهما حصل

لان ربنا دايما بينصر الحق
والحق مع الثورة
وربنا وحده اللى مبارك الثورة دي ومثبت ارادة كتير من الناس على نجاح الثورة

محمود المصرى يقول...

بسم الله الرحمن الرحيم

كيف حالك يا باشمهندس
انا بس ليا نقطتين عاوز اعلق عليهم :
اولا بالنسبة للأعداد اعتقد ان رقم اتنين مليون دا كان متأثر بمشاهدة على الارض دون النظر للمشهد العام للميدان فكل الصور كانت واضحة جدا ان الميدان مكشوف فى اكثر اجزائه خصوصا المنطقة الشمالية والغربية منه , الرقم الحقيقى هو فى رأيى حوالى ربع مليون .
ثانيا بالنسبة للأخوان والله انا شايف ان الاخوان هم من تعلم الدرس جيدا ولذلك يحرصون على سرعة انتقال السلطة من المجلس العسكرى الى حكومة مدنية منتخبة لأن اى حكومة منتخبة يمكن اسقاطها اما عبر الانتخابات واما عبر التظاهرات والنزول للشارع لو انقلبت على الديمقراطية , لكن العالمانيين هم من يريد ان يحصل على الغنيمة كلها والا فلتذهب الديمقراطية للجحيم .
اعتقد ان رفع مطلب الدستور اولا والمجلس الرئاسى هو انقلاب صريح على الديمقراطية واختيار الشعب واتصور ان العالمانيين قد اختاروا الطريق بالتصادم مع التيار الاسلامى الى النهاية .
وصدقنى الاخوان خصوصا والاسلاميين عموما لا يعقدون صفقات مع المجلس العسكرى ولكن ما حدث ببساطة ان العالمانيين ارادوا هم ان يعقدوا الصفقة بحيث يحتفظوا بالمجلس العسكرى فزاعة لمساومة الاسلاميين وتهديدهم بالنموذج الجزائرى فلما اعرض عنهم المجلس العسكرى كان اشاعة الكلام عن الصفقات .
بالمناسبة هل حضرتك رحت الميدان علشان تقول الدستور اولا ؟

ستيتة حسب الله الحمش يقول...

تروح السعودية بالسلامة
وترجع ومصر حرة بإذن الله

رئيس جمهورية نفسو يقول...

و الله يا محمد اكنك كنت بتقرأ افكاري في اخر 3 اسئلة و هي اجاباتي فعلا اللأات الكبيرة الغير مبررة و الغير ذات معني او هدف جايز حيمشو مبدأ الي تعرفو احسن من الي متعرفوش جايز اكنهن ( كتبتها صح نون النسوة عشان عرفو يخصو شعب بعد ثورتة تاني ) صدقوا خزعبلات ان الاخوان و السلفيين حيولعو في البلد و يحكموها بالحديد و النار و يرجعوها جاهلية تاني قبل الاسلام ( مع انك عارف لا انا بحب الاخوان ولا بدافع عنهم ) بس هو رعب المجهول او الخوف من الضلمة الغير مبرر عشان مجهول منيش عارف الغولة شكلها اية بس بخاف منها ولا ابو رجل مسلوخة حيطلعلي من اي ركن ضلمة في الاوضة المدورة بس برضو خايف عارف بالامانة بيفكرني باية كلامك عن مساؤي الي ارتكبها المجلس العسكري ان الناس اعتقد لسة خايفة من شبح مبارك علي اساس انة من الالهة كما شبهه البعض و استغفر الله مما يصفون او يشبهون وان المجلس العسكري لا يجوز اصلا انك تنطق اسمو و العياذ بالله او اكنة عورة مثلا اعتقد ان حل الامن و الديموقراطية او سميها حل النضافة في مصر هو التطهير و التطهر يعني زي ما ربنا عاقب فرعون و هامان و جندهما يعني جند الاتنين مش مبارك بس الي لازم يتعاقب لا و وزرائة و اعوانهم مهما صغروووووووو و ركز علي صغرووووو دي عشان زي ما انت عارف ما يدخلك النار ليس الكبائر و انما اصاغر الذنوب بالبلدي كدا كل مؤسسة مهما صغرت في اصغر قرية في بر مصر معروف مين فيها الكويس و مين الفاسد المرتشي دا المفروض يمشي يا يستقيل بكرامتة بدل ما يقيلوووووة و يحاكموة و في الحالة دي مش حيسالو من اين لك هذا ولا يحزنون انما لو خرجناك احنا من منصبك مهما كان صغير فتخرج بفضيحة و جرصة و كمان محاكمة ما انت حرامي برضو بس لسة صغير ماخدتش فرصة تبقي كبير و شكرا و السلام عليكم و رحمة الله

بنت الصالحين يقول...

الله أكبر
ايه الكلام الاخير اللي حضرتك بتقول دا ياباشمهندس ؟!!!


فيه دليل على الإتهامات دي ؟؟؟

مهندس مصري يقول...

معتز شاهين
==========
العدد لا يقل بأي حال من الأحوال عن مليون و نصف على الأقل لإني لفيت الميدان في كل حتة و كان زحمة شديدة و بلغ ذروة الإزدحام ساعة آذان العصر
و حأنشر الصور في خلال إسبوع إن شاء الله أول ما اوصل السعودية و حأثبت لحضرتك بالصور و الفيديوهات

و الشعب نزل و ما سمعش كلام الإخوان :)

منووش
======
يارب
ربنا ينصرنا على الظالمين و شعبنا ينول حريته و يسيطر على بلده و يحكمها بنفسه يارب

محمود المصري
===========
الحمد لله انا بخير

الرقم من مشاهداتي و من إعلان المنصات لا يقل عن مليون و نصف و أنا لفيت الميدان كله :)

أنا على فكرة ضد فكرة تأجيل الإنتخابات
لإن حكم العسكر تقيل قوي على قلبي خصوصاً مع إنتهاكاتهم المتكررة لحقوق الإنسان
و لكني مقتنع فعلاً أن الترتيب الصحيح للأمور هو إنتخاب جمعية تأسيسية لوضع الدستور بشكل مستقل عن البرلمان
يعني مثلاً ننتخب جمعية تأسيسية في يوليو و ننتخب المحليات و المحافظين و رؤساء المدن و و رؤساء الأحياء و العمد للقرى في شهر اغسطس و ننتخب كل النقابات المهنية و العمالية المستقلة في بداية سبتمبر و ننتخب البرلمان في نهاية سبتمبر و ننتخب رئيس جمهورية و نائبه في أكتوبر
مع إعتماد التصويت الإلكتروني خاصة للمصريين بالخارج
و عندما تنتهي الجمعية التأسيسية من وضع الدستور نستفتي عليه
على ان يرحل العسكر في شهر أكتوبر بعد انتخاب الرئيس و البرلمان و حتى قبل الإنتهاء من وضع الدستور
كما يجب ان لا ينفرد العسكر بالحكم حتى هذه الفترة فلابد من مجلس مدني يكون مراقباً لهم
فقراراتهم المنفردة مستفزة و تصب في طريق تصفية الثورة على المدى البعيد

ستيتة حسب الله الحمش
==================
الله يسلمك و يارب مصر تتحرر بإذن الله
و مش حاوصيكي
أوعوا تفرطوا في حقنا كمصريين في الخارج في التصويت
أصل موضوع التصويت في السفارات و القنصليات ده فاشل لأبعد الحدود
يعني أنا المفروض أسافر 600 كم من حائل للرياض علشان أصوت ؟
ثم المصريين في السعودية حوالي 2 مليون على الأقل يعني لو قسمتيهم على سفارة و قنصليتين يبقى المفروض اقف في طابور طوله 600 ألف واحد قدام السفارة ؟
و دول حيصوتوا في كام يوم ؟ و هل السعودية حتسمح بتجمع رهيب زي ده من غير ما تفضه بالقوة ؟

رئيس جمهورية نفسو
=================
معاك حق يا شكوور

بنت الصالحين
===========
إعملفي بحث في جوجل و راجعي بوستات مدونتي هنا في التواريخ المذكورة
الشرطة العسكرية و المخابرات الحربية و قوة 777 لمكافحة الإرهاب إرتكبت إنتهاكات قذرة ضد النشطاء في تواريخ 25 فبراير و 9 مارس و 9 إبريل في التحرير و 14 مايو امام سفارة إسرائيل و الإنتهاكات موثقة بالصور و الفيديوهات و تقارير منظمات حقوق الإنسان المصرية و الدولية
و أغلب المحبوسين بأحكام عسكرية هم أبرياء و ليسوا بلطجية

الأدلة مالية النت

محمود المصرى يقول...

بسم الله الرحمن الرحيم

بالفعل انا سمعت كلام الراجل على المنصة ان العدد تجاوز المليون ونصف وهذا كلام حماسى من الواقف على المنصة وليس موضوعى.
بالنسبة لكلامك عن منهج العمل اعتقد ان الشعب ارتضى بآلية محددة فى الاستفتاء السابق ولابد من الالتزام بها ولو قال احد بتغير الظروف فهذا يفتح المجال للتشكيك فى أى انتخابات قادمة وكل مرة نقول اصل الظروف تغيرت فلابد من اعادة الانتخابات .
وبرنامجك هو مثالى لكن فى رأيى غير عملى لأسباب كثيرة منها ان المجلس المدنى سيكون ضعيفا فى ادارة الدولة لأنه لا يستند لأى شرعية فضلا عن غياب قوة الحسم فأنا اعتقد ان الجيش رغم اخطائه هو افضل المتاح لأدارة المرحلة لحين انتخابات حرة تقدم حكومة منتخبة .
اما الدستور فأنا ارفض تماما جمعية تأسيسية غير منتخبة ولو قلت منتخبة فهى نفس فكرة البرلمان .
تحياتى لك

فتاه من الصعيد يقول...

:)

كان يوم جميل بحق :)

مهندس مصري يقول...

محمود المصري
===========
إن غداً لناظره قريب
و أدينا حنشوف إيه اللي حيجرى في الشهور القادمة

و الجمعية التأسيسية المنتخبة تختلف عن البرلمان لأن أعضاؤها لن يكون لهم نفس إمتيازات أعضاء البرلمان التي تثير طمع الإنتهازيين من المرشحين

و رؤيتي للعدد في التحرير أنه لن يقل عن نصف ما ذكرته أنا بفرض خطأي و مبالغتي :)
يعني ساعة الصلاة كانت 400 ألف و العصر وصلت الذروة لمليون :)

و منور المدونة بتعليقاتك دايماً يا صديقي

فتاة من الصعيد
===============
فعلاً و لسه لما انشر لكم الصور و الفيديوهات خلال إسبوع :)

فارس عبدالفتاح يقول...

لعل تعيها اذن وعقل وقلب واعي :


يرجى العلم والاحاطة :

http://www.youtube.com/watch?v=U5OVILmXp4g&feature=related

المهندس يقول...

انص بقراء ونشر هذا المقال


عودوا الى الميدان يرحمكم الله


http://kashfhesab1.blogspot.com/2011/06/blog-post.html

رئيس جمهورية نفسو يقول...

ايضا اتفق معك في بعض الامور منها
أنا ضد تأجيل الإنتخابات بل أطالب بتعجيلها للتخلص من الحالة التي تعيشها مصر من اللا كساد و اللاعمل بالعربي الحال الواقف و بغض النظر عن حكم العسكر و ان كنت اري طالما وثقنا في الجيش لادارة الامور من الاول فلابد من تسليمها له الي النهاية مع اني عارف ان دا بيولد ديكتاتور جديد اقوي و اشرس و اغبي من الي قبل منة و الدليل علي كدا الانتهاكات اللانسانية الممارسة
ايضا مقتنع فعلاً أن الترتيب الصحيح للأمور هو إنتخاب جمعية تأسيسية لوضع الدستور بشكل مستقل عن البرلمان و اعضائة سواء شعب او شوري
ايا ما كان ميعادها و يتم انتخاب رؤساء الاحياء في البداية ثم رؤساء المدن ثم المحليات و المحافظين بالترتيب الاصغر فالاكبر ولا ننسي العمد و شيوخ القري برضو انتخاب و انسي التعيين دا بقا و ننتخب كل النقابات المهنية و العمالية المستقلة سبتمبر بقا ولا اغسطس مش فارق الجمعية العمومية لكل نقابة هي الي تحكم و بعد كدا ياتي دور البرلمان شعب و شوري ايا ما كان فيهم الاول او يلغوهمو يجو بمجلس جديد مش فارق البنية الاساسية موجودة و الشعب اتمرن علي ميت انتخاب ديموكراسي بس مش بتاع القزافي لا مصري و اصلي
مع إعتماد التصويت الإلكتروني خاصة للمصريين بالخارج او من خلال السفارات
و الاهم من ذلك في وجهة نظري ان تقوم كل وزارة و مؤسسة و مكان سواء صغير او كبير و صغير دي معناها فرع لمكتب في حارة جوة زنجة جوة زوجاج يطهر نفسو من الفساد الي فية يعني اية ؟ يعني رئيس المكتب لو فاسد الموظفين يقرو علية عشان ينكرش و يروح للقضا و هو الي يفصل بقا لو الموظفين دول بينصبو يتجازو لو طاهر اهلا بية

مهندس مصري يقول...

رئيس جمهورية نفسه
================
ماشي
بس بلاش حتة أو السفارات دي
متخيل 2 أو 3 مليون مصري في السعودية يصوتوا في سفارة في الرياض و قنصليتين واحدة في جدة و الثانية في الدمام
يعني على الأقل 600 ألف ناخب على اللجنة الواحدة
يقفوا إزاي و فين و يدوا صوتهم في قد ايه ؟ و حيسافروا مسافات من خمسمائة لألف كيلومتر علشان يصوتوا ؟
يا إما يتم عمل لجان تصويت في كل إمارات و مناطق المملكة بإشراف من السفارة زي ما السفارة السودانية عملت في الإستفتاء على انفصال الجنوب مثلاً
أو تريحونا و تعملوا لنا التصويت الإلكتروني