الجمعة، أغسطس 12، 2011

غريب على الحدود

السلام عليكم
أنا إتنقلت من شغلي في حائل لشغل تاني في مدينة رفحاء على الحدود السعودية العراقية في أقصى شمال السعودية و منسوب البلد هنا حوالي 450 م فوق سطح البحر يعني أوطى من منسوب حائل بحوالي 400 م فده زود إحساسي بالحر كتير رغم إن البلد هنا في قلب الصحراء يعني الرطوبة فيها عادية مش زي المدن اللي على الخليج و لا البحر الأحمر بس برضه حر شديد
أنا فهمت دلوقت ليه أهل السعودية كانوا بيعتبروا حائل مصيف لإن جوها لا يقارن بجو هنا و بقيت حاسس دلوقت نفس إحساس الجنود الأمريكان بالحر في صحراء العراق اللي ما نبعدش عن حدودها أكثر من 35 كم
النقل جه مفاجئ فحصلت دربكة كتير فيه و إضطريت أول ما وصلت إني أؤجر شقة و أفرشها في 4 أيام بس لإن الفندق كان غالي جداًً
مفيش هنا سكن مفروش رخيص زي حائل فلازم تأجر إنت سكن عادي و تفرشه و المشكلة إن هنا مفيش معايا سيارة ( عربية ) زي الشغل اللي فات فدايخ على رجليا بالإعتماد على بعض الزملاء اللي معاهم عربيات طبعاً و المصيبة إن البلد دي زي غيرها من بلاد السعودية لا يوجد فيها تاكسيات و لا مواصلات عامة من اي نوع فيا إما يكون معاك سيارتك او تمشي على رجليك و مفيش أي حلول وسط
البلد صغيرة نوعاً ما و تحسها أقرب لقرية كبيرة و تحس فيها بإحساس المنفي على الحدود بجد و أظن رفح او السلوم أو حتى حلايب مش حيفرقوا كتير عن هنا :) بس أظنهم عمرانين شوية عن هنا
بيقولوا هنا تعداد السكان 40 ألف نسمة فقط :) و المدينة طولها 6 كم و عرضها 3 كم و الغالبية الساحقة لمبانيها لا تزيد عن دورين أرضي و أول علوي
اللي اتبهدلت معايا كتير في النقل هي زوجتي و أنا غلطان إني ما سمعتش نصيحة اللي طلبوا مني أرجعها مصر شهر أو شهرين لحد ما دربكة النقل و فرش الشقة هنا تخلص
يالا أهو الواحد بيتعلم و كلها خبرات نستفيد منها في النقل الجاي إن شاء الله
الحِرَاج هنا ( سوق الأثاث المستعمل ) صغير و فقير نوعاً و الخيارات فيه محدودة و ده زود صعوبة فرش الشقة و خلى الواحد قرفان من النقل و الفرش و لكن الحمد لله عدينا مرحلة القرف الأولية دي :)
معنديش نت هنا لغاية دلوقت و ده خلاني مقطوع الصلة بالدنيا و حاسس إني زي السمكة بره المياه لكن حأحاول أدخله في خلال شهر و لا حاجة لإن فيه اولويات كتير في الفرش قبله
رمضان كريم عليكم جميعاً و كل سنة و انتم طيبين و دعواتكم ليا ربنا يوفقني في غربتي



هناك 5 تعليقات:

رئيس جمهورية نفسو يقول...

الله يقويك و اهو كلو بثوابة يا هندسة صايم و بتنقل و ربنا يكون في عون مراتك من دماغك النشفة و الله واحشنا اوي من غيرك الرغيف مش عارفين نعملة ههههههههههه

فتاه من الصعيد يقول...

الميزه انك هتحفظ شكل اهل البلد ويمكن اسماؤهم :))))

معلش تحمل الصعاب وربنا معاك يا رب يا باشمهندس .... ورمضان كريم

فاتيما يقول...

حلو العنوان يا محمد

:)


افتقدناك كلنا
بتعليقاتك ولينكاتك
وتدويناتك و سلامك الطيب



ومعلش
بكرة تفتكروا الايام دى
وتكون ذكريات حلوة ان شاء الله


الحمدلله انك كويس
والغياب كان سببه خير

سلامى ليك وللأسرة
ورمضان كريم عليكو
وع الناس كلها يا رب

يا مراكبي يقول...

بالتوفيق إن شاء الله في المكان الجديد

وكل عام وأنت والأسرة بخير

كلها أرض الله

الحمد لله على كل حال

مهندس مصري يقول...

رئيس جمهورية نفسو
==================
النقل كان في 15 شعبان
و تقصد ايه بدماغي الناشفة يا شكور ؟
و انتم كمان واحشيني
رمضان كريم

فتاة من الصعيد
===============
مش للدرجة دي ثم كالعادة مليش أي إختلاط مع السعوديين نهائياً
دا حتى صاحب البيت اللي ساكن تحتي ما أعرفوش لإني بأدفع الإيجار في مكتب السمسار العقاري و ده مصري :)

رمضان كريم علينا كلنا ان شاء الله

فاتيما
=======
الله يكرمك يا أم يوسف
و أنا كمان إفتقدتكم و إفتقدت مدوناتكم بشدة

خير ان شاء الله
الله يسلمك و سلامي لماما وأخوكي و الأسرة كلها

يا مراكبي
===========
الحمد لله على كل حال و الغربة مرة في كل مكان و أهي كلها غربة
و كلها أرض الله
و كل سنة و حضرتك و كل الاسرة طيبين