السبت، مايو 28، 2011

ماذا حدث في ميدان التحرير يوم الجمعة 27 مايو

تحديث:
بعد مراجعة للصور من أعلى الميدان و التحدث مع العديد من الأصدقاء الذين حضروا المظاهرة فأظن أن الأرقام الحقيقية أقرب لنصف ما ذكرت أنا
أي أنها كانت 400 الف عند صلاة الجمعة و مليون عند صلاة العصر
و عموماً لم أرى أي شخص ممن حضروا المظاهرة يقول أنها كانت أقل من 800 ألف متظاهر في ساعة الذروة عند صلاة العصر
و على فكرة أنا ضد تأجيل الإنتخابات بل أطالب بتعجيلها للتخلص من العسكر بأقصى سرعة 
أنا على فكرة ضد فكرة تأجيل الإنتخابات
لإن حكم العسكر تقيل قوي على قلبي خصوصاً مع إنتهاكاتهم المتكررة لحقوق الإنسان
و لكني مقتنع فعلاً أن الترتيب الصحيح للأمور هو إنتخاب جمعية تأسيسية لوضع الدستور بشكل مستقل عن البرلمان
يعني مثلاً ننتخب جمعية تأسيسية في يوليو و ننتخب المحليات و المحافظين و رؤساء المدن و و رؤساء الأحياء و العمد للقرى في شهر اغسطس و ننتخب كل النقابات المهنية و العمالية المستقلة في بداية سبتمبر و ننتخب البرلمان في نهاية سبتمبر و ننتخب رئيس جمهورية و نائبه في أكتوبر
مع إعتماد التصويت الإلكتروني خاصة للمصريين بالخارج
و عندما تنتهي الجمعية التأسيسية من وضع الدستور نستفتي عليه
على ان يرحل العسكر في شهر أكتوبر بعد انتخاب الرئيس و البرلمان و حتى قبل الإنتهاء من وضع الدستور
كما يجب ان لا ينفرد العسكر بالحكم حتى هذه الفترة فلابد من مجلس مدني يكون مراقباً لهم
فقراراتهم المنفردة مستفزة و تصب في طريق تصفية الثورة على المدى البعيد



نزلت إمبارح ميدان التحرير 
كان يوم  جميل امبارح
نزلت من بيتنا في دمنهور حوالي الساعة 9 صباحاً و وصلت التحرير مع آذان الظهر و صليت الجمعة و العصر على الأسفلت قدام كنتاكي كده و اللي ضايقني إن بعد ما خلصت صلاة مع كمية كبيرة من المتظاهرين إني لقيت إن صلاة الجمعة ناحية هارديز لسه شغالة بإمامة الشيخ محمد جبريل و ده ضايقني بجد 
ليه منصة كنتاكي كانت عاملة صلاة جمعة لوحدها و ليه ما شغلوش ميكروفناتهم مع صلاة الجمعة الرئيسية اللي عند هارديز و ليه نصلي جمعتين في ميدان واحد و إحنا مكناش نعرف و لو عرفنا ما كناش وافقنا على كده أبداً يالا قدر الله و ما شاء فعل
العدد ساعة صلاة الجمعة كان حوالي 800 ألف و بدأ يزداد بعد صلاة الجمعة بمسيرات بتتوافد من جميع مداخل الميدان و انا شفت مسيرتين كبار دخلوا الميدان من ناحية كوبري قصر النيل و العدد على آذان العصر كان وصل لحوالي 2 مليون متظاهر و بدون مشاركة الإخوان المسلمين الرسمية بل و نفيهم القاطع للمشاركة و تنديدهم بمن شارك من شباب الإخوان و عصى اوامر مكتب الإرشاد
و وصلتني أخبار إن مظاهرة القائد إبراهيم في إسكندرية عدت المليون دا غير مظاهرات حاشدة في السويس و الإسماعيلية و معظم عواصم المحافظات المصرية بل و كان فيه مظاهرة في دمنهور أمام مقر امن الدولة المحترق المهجور لحد دلوقت و اللي بقى إسمه الشعبي متحف الظالمين :)
لما الأعداد دي كلها تخرج بدون مشاركة الإخوان يبقى محدش يقدر يمن علينا و يقول لنا مفيش ثورة من غير الإخوان
الإخوان ليا منهم حبايب كتير و منهم أبطال في الثورة المصرية و بذلوا شهداء و مصابين كتير و تنظيمهم كان من عوامل نجاح و حماية الثورة لكن ده لا يعطيهم الحق في إحتكار الثورة و المن على شعب مصر بما فعلوه فهم فعلوه لله و ليس للناس
و منظرهم بقى وحش و بدأت الناس تتكلم عن صفقة بين الإخوان و المجلس العسكري و هما لو ما كانوش عملوا صفقة فشكلهم كأنهم عملوا صفقة و تصريحات بعض قادتهم بتثير الشكوك بجد حتى وسط الناس اللي بيحبوهم زيي
و كان منتشر قوي في الميدان إمبارح هتاف " الإخوان فين ؟ التحرير أهوه " 
يا خوفي على الإخوان اللي قياداتهم ما بتتعلمش من دروس التاريخ
كل ديكتاتور حكم مصر عمل شعبيته بالتحالف مع الإخوان و بعدها هرسهم في السجون
بدئاً من الملك فاروق اللي اتحالف معاهم ضد الوفد و بعد ما أخد غرضه إغتال حسن البنا و نكل بيهم في معتقلات الطور في سيناء ثم جمال عبد الناصر اللي بعد ما شال محمد نجيب لفق لهم حادثة المنشية و سامهم سوء العذاب ثم السادات اللي استخدهم ضد الماركسيين و اليساريين و بعدها قلب عليهم
فهل حيكرر الإخوان نفس الغلطة لرابع مرة و يتحالفوا مع المجلس العسكري ليحصلوا على اغلبية مجلس الشعب و منصب رئيس الوزراء و نصف وزراء الحكومة مقابل القبول برئيس و نائب رئيس من طرف المجلس العسكري و دستور تفصيل بينهم هما الإتنين
صدقوني لو ده حصل يبقى أول ناس حيدبحهم طنطاوي بعد ما يآخد غرضه هما الإخوان


ما علينا نرجع للميدان 
مكان منصة الإخوان الرئيسية اللي عند هارديز كان فيه منصة صغيرة مش عملاقة زي كل مرة بس برضه ناس كتير كانوا ملمومين عندها و اتكلم المستشار زكريا عبد العزيز الرئيس السابق لنادي قضاة مصر و بعده المستشار الخضيري و بعدهم المهندس الفخراني اللي رافع قضية ضد عقد مدينتي و رفع قضية تانية علشان الحد الأقصى للأجور و بيطالب بإحالة 62 ألف مستشار ( مش قضاة بل موظفين في كل المصالح عدوا سن المعاش فبيسموهم مستشارين ) في الحكومة تخطوا سن المعاش و إتمد لهم بعد السن و بيقبضوا مبالغ خرافية
بعدها سبت المنصة دي و رحت للمنصة اللي عند كنتاكي و بعدها للمنصة اللي عند مجمع التحرير و بعدها المنصة اللي عند جامع عمر مكرم و دي أكثر منصة وقفت عندها و هناك كان المستشار أشرف البارودي رمز من رموز إستقلال القضاء و سلمت عليه و اتصورت معاه و لقيت أرائي أنا و هو متوافقة تماماً
و عجبني لما شاب من المنصة هتف " الجيش المصري بتاعنا و المجلس مش تبعنا " و الناس رددت وراه و بعدها قالوا الجيش و الشعب إيد واحدة :)
يارب الناس تفهم إن الجيش مش المجلس و المجلس مش الجيش و إن ناس كتير جوه الجيش بتغلي غضباً من تصرفات المجلس العسكري بس مش قادرين ينطقوا و كفاية ضباط 9 إبريل اللي كل واحد فيهم خد 10 سنين سجن من المحكمة العسكرية
المنصة دي بقى كانت بتاعة ( حزب الجبهة الديموقراطية , الحزب المصري الديموقراطي الإجتماعي , حزب المصريين الأحرار , حزب مصر الحرية ) 
أنا عارف الجبهة و المصريين الأحرار بتاع ساويرس بس مش عارف مين الإتنين التانيين دول و كان فيه وجود ملحوظ هناك لحركة 6 إبريل
و رامي عصام غنى شوية اغاني جميلة جداً و للأسف معاييش كابل الموبايل دلوقت و إلا كنت نزلت لكم الصور و الفيديوهات لإن أغانيه روعة بجد و كانت الناس بتتجاوب معاها جداً و بتطالبه بالإعادة مرة و إتنين
اللي يغيظ بقى إن كل المنصات أكدت على الناس إن كله يروح الساعة 6 بالضبط 
كانها حفلة سينما :) واضح إن مليونيات الجمعة تحولت لمولد ستى الثورة أكثر منها تظاهرة سياسية لها مطالب موحدة 
و مع كده ناس كتير قعدت و كانت ناوية تعتصم لإن المجلس العسكري مش بييجي بالذوق و بيستغفل الناس و بيفرغ الثورة من معناها و مضمونها وسط غلاف براق من الإحتفال بالثورة العظيمة و شبابها الأبطال :)
واحدة كانت بتقول لي مش عارفة مظاهرة إسكندرية بتطلع أحسن من هنا ليه ؟ عايزين نستورد رجالة إسكندرانية للتحرير
قلت لها لأ السبب إن مفيش منصات هناك و ناس عايزة تظهر في التلفزيون و تتمنظر قدام الناس و الكاميرات و تتفاوض مع الحكومة و المجلس العسكري
هناك ناس بتعمل لوجه الله و لمصلحة الثورة بدون النظر لأي حاجة تانية
رحت ريحت ساعة في جامع عمر مكرم و صليت المغرب و العشاء هناك قصر و جمع تقديم لإني كنت على سفر و خرجت تاني للميدان
قابلت إيمان بدوي و كانت حتعتصم هي و شوية ولاد و بنات جدعان و كنت ناوي أكمل معاهم لكن إضطريت وسط ضغط رهيب من البيت و مكالمات تليفونية متواصلة إني أسيب الميدان الساعة 12 بالليل و أروح و وصلت بيتنا في دمنهور مع أذان الفجر الساعة 3 و ربع لكن من كسوفي و إحراجي من الناس إني سيبتهم و مشيت ما قلتش لحد منهم إني مشيت و كنت سايب حوالي 15 ألف واحد ساعتها معتصمين و قافلين المرور في الميدان و مش عارف إيه اللي حصل بعد كده ؟
بس كان فيه ناس بتلف الميدان غالباً من إئتلاف شباب الثورة و بتحاول تقنع الناس بفض الإعتصام و الإنتظار حتى ينتهي الطلبة من إمتحاناتهم علشان يكون الإعتصام على رواقة :)
و نشال إتمسك الساعة 10 بالليل كده بس أكل ضرب رهيب :)
عموماً ده آخر حاجة عملية أقدر أعملها مع الثورة لإني رجع السعودية خلاص على آخر الإسبوع لأن الأجازة خلصت و على ما أرجع مصر كمان سنة إن شاء الله يا تكون الثورة نجحت و مصر بقت حرة يا يكون المجلس العسكري أجهضها و كل ثورة و إنتم طيبين
و اللي يغيظ بجد إنك تسأل أي حد من الناس العاديين اللي راكبين معاك الميكروباص أو التاكسي أو القطر او المترو هل عندك شك في إن المجلس العسكري تبع مبارك ؟ يقول لك لأ
طيب هل عندك شك إنه كان مشارك أو على الاقل مطرمخ على كل عمايل مبارك و عصابته السوداء  ؟ يقول لك برضه لأ 
طيب هل حاسس بتغيير حقيقي بعد الثورة ؟ برضه لأ
طيب مش بتثور ضد المجلس العسكري ليه ؟
يقول لك أصل لو وقع مين حيمسك البلد ؟ و حنعمل ايه ؟ و البلد منهارة و الإقتصاد واقع  إلخ
لكن لما تحكي لهم على فضايح الجيش في موقعة الجمل و فض إعتصامات 9 ابريل و 9 مارس و 25 فبراير و كلية الإعلام و تعذيب النشطاء و كشف عذرية الناشطات و فض مظاهرة سفارة إسرائيل و إنتهاكات الشرطة الجديدة و الأمن الوطني تلاقيهم يقولوا إحنا ما كناش نعرف الكلام ده و المجلس العسكري لازم يتشال بس إزاي ؟ و مين حيمسك مكانه ؟
عجبت لك يا شعب مصر
و عجبي

برنامج تعتعة- حلقة 316 - بنت أختى نوران

نوران الحمد لله كبرت و أختها الصغيرة نادين جميلة زيها برضه
ربنا يبارك فيهم و في أولادكم جميعاً
و آدي الحلقة اللي ظهرت فيها نوران في قناة الفجر الفضائية

الاثنين، مايو 23، 2011

مــن الشعـــب المصـــرى : بيــــان رقـــ (1) ــم


مــن الشعـــب المصـــرى : بيــــان رقـــ (1) ــم

منقول



------------------------------------------------
يا مهلبية يا
هكلك شطة حامية
يا أرزوقية يا
يا خسارة الوطنية يا
يا مهلبية
..................
حط ايده على ايدى
قولتله عندك يا سيدى
قالى هكلك نية يا
حط ايده على دراعى
قالى كل الكون بتاعى
اعمل ايه محظية يا
...................
حط ايده على رجلى
والرجالة طلعت تجرى
وسابونى لوحديا يا
.................
حط ايده على عينى
والرجالة تاهوا يا عينى
عينى ع الرجولية يا
...................
حط إيده على خدى
قولت إمتى الليل دا يعدى
ليل ملوش فجرية يا
..................
حط ايده
ماشلش إيده
وأنا واحدة من عبيده
كيفه يلعب فيا يا
...................
يا مهلبية يا
هكلك شطة حامية
يا ارزوقية يا
يا خسارة الوطنية
---------------------------------------------------
مش حألاقي حاجة أقولها أكتر من اللي الناس دي كلها قالتها
الجدع جدع و الجبان جبان و إحنا يا جدع راجعين الميدان
"

السبت، مايو 21، 2011

مليـونية يوم الجمعـة 27 مـــايو ليه ؟

مليـونية يوم الجمعـة 27 مـــايو
هأنـــزل عشــان مش حـاسـس بالتـغـيير، إخواتـي في السجـن والمخـلوع في شـرم

أولا: المطالب الاقتصادية:
وضع حد ادنــى وأقصـى للأجور.
إعادة توزيع الثروات لإنقاذ البلاد من الأزمة الاقتصادية.
التحكم في الأسعار.
فرض الضريبة التصاعدية.
محاكمة كافة رجال الأعمال الفاسدين ومصادرة أموالهم.

ثانيا: المطالب السياسية:
عودة الأمن بشكل مكثف.
تقديم مبارك للمحاكمة بتهمة الخيانة العظمى، على اثر اعتراف المشير بإعطاء مبارك الأمر للقوات المسلحة بقتل المتظاهرين.
إشراف قضائي وحقوقي على جهاز الأمن الوطني ومحاكمة كل الضباط المتورطين في قتل المتظاهرين وتعذيبهم.
حل المجالس المحلية.
حل جهاز الأمن المركزي أو إدماجه في الجيش.
التأكيد علي حقوق المصريين في الخارج في الانتخابات.
إقالة يحيى الجمل ومحاكمة عمر سليمان.

ثالثا: الحريات:
إلغاء إحالة المدنيين إلى قضاء عسكري.
إعادة محاكمة كل المحكوم عليهم بأحكام عسكرية بعد تحويلهم إلى المحاكم المدنية.
حظر فض الاعتصامات بالقوة بشكل كامل.
تطهير الإعلام، نريد إعلاما ثوريا معبرا عن صوت الشعب وليس صوت الحاكم أيا من كان.

انـزل وهـات خمسـة معـاك
الجدع جدع والجبان جبـــان و إحنا يا جدع راجعيـن للميـدان

إنشرها في كل مكان

الخميس، مايو 19، 2011

الخميس، مايو 05، 2011

شعب مصر - تميم البرغوثي



يا شعب مصر اللى سابقة ضحكته غضبه
ما يطلع الصبح إلا وصحبتك سببه
يا مخلص الأرض من وحشتها فى الأكوان
يا حجة الشمس تفضل طالعة ساعة كمان
مستأذنة وهى مش عادتها الاستئذان
متونسة بالميدان وبعشرته ونسبه
يا شعب يا مصلي قدام العساكر صف
يجري الجريح من ورا لقدام
لا خاف ولا خف
تدوس عليه العربية تحوله لميت الف
يا للعجب يقتلوه ويتوقعوا هربه
يا للعجب يقتلوه ويتوقعوا غيابه
اللي اتقتل لسه واقف هو واصحابه
ما بهدل الامن غير من ماتوا واتصابوا
والصبح ما نور الا اما الشموس غربوا
اضرب عليا انا مش جاري يا قناص
من امتى خوفنا يابن الكلب ضرب رصاص
كل اللي شاف الشهيد بقى تاره تاره الخاص
الدم صاحي وعنيد ولا تقبلوش تربه
يا شعب ياللي دفع تمن الشوارع دم
احفظ اسامي اللي ماتوا في الشوارع صم
الشارع اللي اصطفى وقصر الامارة لم
ملوك قليلة الرباية ركبوا واتركبوا
شعب بغزالة اتخنق قلب التاريخ في يومين
لابس عباية جحا وهو صلاح الدين
بيكرم الانبيا ويهزأ السلاطين
والفجر خيله وحبات الرمال عربه
يا شعب مصر اكم فرعون وفرعونة
ضربتهم ضرب سجادة في بلكونة
ضرب الملوك تربية صالحة ومضمونة
ما يبقوا بني ادمين الا اذا اضربوا
ضرب الملوك مصلحة
ضرب الملوك تأديب
محلى المماليك وهي بتجري في السراديب
ولولا ضرب شجرة الدر بالقباقيب
مابين اغا وباش اغا كان التتار غلبوا
بعدين مبارك سادات فاروق ماحدش دام
هو احنا شعب كده ما بيعيشلناش حكام
عقبال جيرانا وحبايبنا كمان يا سلام
لو كل من له رئيس نصحى نلاقيه قلبه
يا مصر لسه ولسه الثورة بلة ريق
ما ينتهيلك طريق الا ويبدا طريق
يا شعب مصر تعالى نتفق يا شقيق
رج الملك قبل ما تنعم عليه بلقبه
رجه كده شوفه ان كان الملك شغال
واسأل عليه المكوجي واسأل عليه البقال
واهم حاجة في صفاته انه يكون يتشال
متربي عال لما يمشي يلتزم ادبه
بتكون في احسن حالاتك وانت مش محكوم
بتبقى رايق ولا ظالم ولا مظلوم
بعدين ده ايه الغبي ده اللي يهددك بالشوم
يا مخلي الف احتلال ينزل على ركبه
يا شعب انت اللي كارم كل من حكمك
الدولة دي عارفة تحكم بس من كرمك
كشر لها وهي حتجيلك تبوس قدمك
مافيش حاجة اسمها مليون راجل اتغصبوا
سايق عليك النبي ما تقول كفاية يا شيخ
الملحمة لما تخلص يبدأ التاريخ
وبكرة جاية حروب فيها بكا وصريخ
وبكرة نصرك يخض الشمس من لهبه
سايق عليك النبي ما تقول كفاية كده
من النهاردة انتصاراتك حتبقى كده
يا شعب مصر اللي رجالته وبناته كده
حلال عليه لبن العصفورة لو طلبه
سايق عليك النبي ما تقول كده كفاية
إفرح وكمل وما تقولشى كده كفاية
الثورة دى بداية زى الهجرة والميلاد
الثورة دى بسملة كمل بقى الآية


مع كل مرة قراية حسنها يزداد
والآية تجرى تسلم أختها الراية
من غير نهاية وحتى الوقف مش معتاد
وبكرة أيامنا تبقى حكاية ورواية


عن ناس يباتوا حفايا يصبحوا أسياد
خمسة وعشرين يناير يا شباب حصل ايه
لو قلنا يعنى على الساعة تلاتة الفجر
فى حد فينا طِوِل أو جد حاجة عليه
أو جاب سلاح أو ملايكة بشروه بالنصر
كان اختلف فينا إيه عن أى يوم قبليه
نمنا غلابة، صحينا احنا ولاة الأمر
كان عرش مصر ف أُوَضْنا واحنا ناسيينه
راميين هدومنا على شماله وعلى يمينه
طردنا عنه الحرامى غصب عن عينه
ونزلنا ع الميادين بإدينا شايلينه
بقوا الملوك فى الشوارع والعبيد فى القصر
وف يوم وليلة اكتشفنا ان احنا والنبى مصر
ومصر مش حد تانى غيرنا يعنى يا بيه
وكل واحد سأل طب كنا ساكتين ليه
وشعب مين اللى كانوا الزُّطِّ حاكمينه
بدولة شومة ومختومة بختم النسر
وكل واحد قرا اللى كان على جبينه
رفع بدمه يمينه هْدية وهداية
لو كانت الأنبيا ع المية مَشَّاية
لاجلك يا مصر مشينا باسمين ع الجمر
يا مصر وافتكرى أصل الدنيا نسايه
الملك ده حقنا ومفيش فراعنة جداد
إفرح وكمل وما تقولشى كده كفاية
الثورة ده بداية زى الهجرة والميلاد


مش بس مصر اتغيرت من وقفة الميدان
فيه مساحة ضلمة نورت فى طبيعة الإنسان
فيه حاجة ف طبيعة البشر زى السمع زى البصر
زى اكتشاف القدرة ع الطيران
فيه حاجة كت ضايعة وبانت
خلت الأمة استعانت
عالشقا بالله فهانت
هذه الدنيا على الفتيان
ارقينا وارقيهم يا عم الشيخ
فى حاجة خلت يشمك التاريخ
ينزل عن الوجه الجميل فيبان
والخلق كانوا مدركين
لكنهم مش كلهم متأكدين
لحظة ما شافوا بعضهم جوة المظاهرة
اصبحت واضحة وظاهرة نعمة الرحمن على المستضعفين
وصلت رسالة ربهم من كل زهرة كل زفرة
كل نفرة كل زحمة في كل حارة او خناقة في الاشارة
كل كلمة حق
او ضحكة ولد او بنت
كانت دعوة مستورة الى العصيان
فى حاجة أصلا فى الطبيعة تدعو للثورة على السلطان
شوف الشجر رغم الحجر طارح ثمر زى الخبر وبتعلنه الأغصان
شوف الهوا حب اللِّوا فبقوا سوا هبَّة لها ألوان
شوف القمر يفضل قمر تحت الحصار
رغم اقتناعه إنه هايموت قبل ما يشوف النهار
تحصل مفاجأة تطلع الشمس ف حضوره
يختلط نورها بنوره
تشبهه ما تقولش واحدة من ولاده
هى معناه وامتداده
واخدة منه الموهبة والبغددة
وعشان كده
لغة يقولوا عنهم القمران
شوف النجوم ما لهاش نظام حاكم
تكسر كلمة العالم
يبص ويبقى مش فاهم
وهو شايفها ماشية بكيفها فى الأكوان
يا سما هويتك
انت بيتي وقلبي بيتك
تشبهيني واشبهك بالمعنيين
الشبهة يعني والشبه يام النجوم الفلتانين
وباموت انا في فلتانك الامني
لإنه عبقري وفني
وفيه منطق من الموجود في كل جنان
وبرضه باحبه بس كده عشان فلتان


فيه حاجة غامضة بتكتشف
هى اللى بتخلى الحصان اللى اتحدف
من بطن أمه ولسه مش عارف يقف
يقزح ويجرى ويعرف انه حصان
فيه حاجة بتخلى السجين المستكين فى كل حين اشطر من السجان
فيه حاجة بتخلى القوى عيِّل قوى وبيتلوى من نكتة الغلبان
فيه حاجة بتخلى عيون الخلق ما تنامشى
وبتخلى المدن تمشى
وتخرج زى كلمة حق من غير قصد مابترجعش لو طلعت
وم الأسمنت والأسفلت يفلت فلت نهر مقدس الجريان
فليحذر السلطانُ زحف الغابة
والورد إذ يستأنس الدبابة
داب الحديد من لمسته دوبان
فيه حاجة خلت خطة الموت ترتبك
عابس وعايز يشتبك
خاف من ضحية جاية ناوية تاخده بالأحضان
وإذا بهذا الفجر يا اخواننا اتولد بيننا
وكنا احنا بنستنى وهو كمان بيستنا
واتاريه بس عايز إذن منا وهو فى يميننا
فلما أذنا خد منا وعطانا أمان
يا فجر يا سابق صياح الديك
يا شعب يا مشبك إيديك فى إديك
وكأنها خط الثلث فى آية القرآن
إديت لآدم معنى تانى زاد على كل المعانى
وربنا قال هو ده قصدى وده غرضى
كده بالظبط لا زيادة ولا نقصان
يا مصر وانت لسه في البدايات
بكرة اللي جاي اعظم م اللي فات
يا مصر قومي وبصي في المرايات
كان كل واحد في الميدان جايب معاه مراية
رافعها للسما
اشكال والوان كلها مرفوعة في العالي
صبحت مراية واحدة بتلالي
وبقت يا مصر الارض صورة للسما
لعبة بازل متكاسرة الاجزاء
لما البشر يتجمعوا تبان السما ع الارض
واما البشر يتفرقوا تلقي السما بتنفض
تبقى سما متوزعة جوه الشقق
وتمر ليلة من التوجس والقلق
وننام ونصحى تاني يوم
ترجع سما لما البشر يتجمعوا مع بعض
يا مصر حقك تملكي بدل السما اتنين
واحدة هدية وواحدة تانية صانعها مصريين
يا مصر لو دققتي حتلاقي البراق
بيجر عربية فواكه في الحواري الضيقة
شوفي الصحابة والحواريين على القهوة
بيتناقشوا بحرارة
والسما على مد ايدهم مستشارة طيعة ورقيقة
شوفي المساجد كت تشاور ع السما
صبحت تشاور ع البشر وتقول اهما يا سما
بصي وشوفي
وابقي قول لكل صوفي
وهو طالع لك طريق المعرفة اتغير
يوصل م السما للارض
لا يتوه ولا يحير
وشوفي الخلق وسط الموت تقابله وهي بتهزر
فيتلخبط ويتبعتر
وسر الدنيا يتفسر
ونعدلها ونوزنها
باقول يا مصر قومي وبصي في المرايات
في سما الولاد هم اللي عاملينها
بيشوفوا بعض في وش بعض
كأن انا انت وهو انا واحنا الكل
احنا ف مرايا بعض بنصبح صباح الفل
افدي بروحي كل واحد في المرايا طل
افدي الشهيد اللي بيتبسم
الفجر توب على قده متكسم
والله اعلم مين من الاتنين في صاحبه حل
افدي اللي سهران ع الخيم في الطل
وافدي اللي واقف يشتغل في الضل
وافدي اللي شايل للعناد اشارات
يهدي التاريخ صوب الميدان لو ضل
وافدي اللي واقف هاري نفسه كلام
وافدي اللي يتريق على الحكام
وافدي اللي رايح جاي ما بيتعبش
وافدي اللي جنبه حط فرشة ونام
وافدي طويل البال ما يتعصبش
وافدي المصاب اللي شوية وطاب
وافدي المصاب بهوى التراب وما طابش
وافدي اللي صاب البلطجي وما اتصابش
وافدي المقام العالي في التحرير
دولة بلا امرا وشعب امير


اعلم يا هذا الجيل ان الوطن بشره
لو مصر مالهاش نيل كان شعبها حفره
مش وصلوا بحرين وبنوا جبال اتنين
وف ظرف أسبوعين على خوفهم انتصروا
والخوف ده شىء معروف بيفرعن الحلوف
رزق الملوك الخوف من غيره يندثروا
رزق الملوك بقشيش من خوفنا شعب وجيش
ومفيش ملك بيعيش لو شعبك افتكره
ناس لسة فى العشرين نازلين على الميادين
بيهزأوا السلاطين من غير ما يعتذروا
يا شعب يا مجنون
علم شعوب الكون
اللي اخترع فرعون
قادر يجيب خبره
يا سادة الايام يا رافعين الهام
من بكرة بر الشام نادر لكم شجره
نادرها تين وزتون فى القدس ينتظرون
جيش ع الغلابة حنون وعلى العدا ضرره
دافعين تمنها دما
يا امة الكرما
شعبك كأنه سما
والدنيا دي مطره


يا مصر حمد الله ع السلامة


مطر ونازل بدون غمامة
مطر يا سيدي نازل وطالع
كأنه مدنا والارض جامع
والارض دي مظاهرة في الشوارع
تسقي السما جدعنة وشهامة
مطر وطالع يقول لربه
الامهات اللي في مصر ربوا
ويا بنات مصر قوموا حبوا
اجمل ما في الراجل الكرامة
مطر وطالع ع الفجر يدن
طلعت بنات مصر حلوة جدا
في الحرب والدنيا نار ومعدن
طايرة وشايلة السما اليمامة
خمسة وعشرين من شهر واحد
الفين وعشرة وزادوا واحد
كنا ملايين وكنا واحد
حددنا موعد يوم القيامة


قلت لصحابى انزلوا وانا بعيد عنهم
وقلت من بات فى بيته سلم اصحابه
وانا اللى غبت وهمه اللى هنا اتصابوا
نزلوا الشباب الميدان وانا بعيد عنهم
كسروا الشباب البيبان وانا بعيد عنهم
خرج الشباب م البيوت وأنا بعيد عنهم
دخل الشباب فى الموت وانا بعيد عنهم
يا موتى قوم امتحنى أعتذر منهم
اشمعنى يا كلب تستثنينى من بينهم
يوم الخطر قبلها ما كنت اجبنهم
يا موت تعالى اعوض غربتى ومنفاى
يا موت تعالى أحاسبك ع القديم والجاى
يا موت تعالى ونتقاسمك أنا وعداى
ولا تطال عزوتى وانا بعيد عنهم


بس الحكومة قالت لي انت مش مصري
انت فلسطيني يعني اجنبي حصري
طيب يا بيه يعني بلاد الشام بلاد اروام؟
اعيد كلام قلته ميت مرة ده يبقى كلام؟
مش ام هاشم بلدها السيدة زينب؟
مش الحسين في الحسين ولا لازم له جواز؟
ولا حيختار مابين مصر وعراق وحجاز؟
والمرسي والشاطبي جم م الاندلس الاتنين
من مرسية وشاطبة لو كانوا مش باينين
في اسكندرية اجانب ولا مصريين
اسماءنا هي بلادنا يا حسن يا حسين
اسماءنا زي العلم زي اللغة والدين
اسماءنا هي الوطن له دمنا لو عاز
واسمي خلالي في الارض العريضة ملاذ
وعزوة في كل دار تنطق حروفه تمام
وف كل دار ليا صحبة وليا اهل عزاز
كان نفسي يا مصر يتأكد كلامي بدم
والدم يا مصر برضه ع المحبة قليل
قالوا لي بتحب مصر قلت مش عارف
هو الهوى يبقى جارف لما اقول جارف؟
واقعد أألف أغاني عن جمال النيل
وحكاية الشرب ميت مرة وهرم ونخيل
ولا الهوى الحق هو اللي يهد الحيل
واولى شيء في الهوى يا مصر شيل الهم
ياللي تحب النبي ايدك معانا وشيل
الحب اتقل من اسمه واسمه نفسه تقيل
وفي التباس المحبة ع المحبة دليل
ما تعرف اللي اصابك عشق ولا تعب
والشوق بيقلب مع الحرمان ساعات بغضب
والصبر بس اما يخلص يبقى صبر جميل


يا اهل مصر
وانا اهلي في مصر عرب
اهلي عزازمة وعشايرة الخال وخال الخال
ما بين شراقوة وصعايدة بدو في الحالتين
قولوا لي دولا عرب او دولا مصريين
او دولا الاتنين سوا في الحل والترحال
بعدين انا اسمي تميم وحاروح من اسمي فين؟
مش فيه في مصر قريش؟
قالوا البراغتة قريش
من بيت عدي بن مرة والنسب عمري
حطوا الحدود والعشيرة واحدة في البلدين
وسلك شائك فرق من قالوا ليه او ليش
وكنت اطنش لو ان البحث ده نظري
لكن ده فيه دم سال
واسأل رفح وعريش
واسأل ملوك ترهن الاقصى برغيف العيش
واسأل حدود تحرم المسلم من الحرمين
واسأل في غزة الوف في الحرب متحاصرين
ويخيروني العيال في حب اب وام
انا ابن رضوى ومريد
اسمي تميم من تم
وكل دار للعرب لي فيها خال او عم
واللي يقول غير كده بيني وبينه الدم
مين اللي يثبت ومين يجري يلم الديل
شد الكلام عمته واختار اعز جواد
ورد قاصد بلاده والهوى رداد
وابن الاصول اللي ما يبدل ببلاد ببلاد
والغربة مرة ولو كانت هدومها جداد
في مصر بعد السفر وجد الكلام معناه
واهل مصر صحابي واولياء الله
يا اوليا لسه في العشرين وفي التلاتين
يستنجدوا المؤمنين في المأزمة بيكم
يا فارجين الكرب بين العرب عناوين
منعني عنهم مطار القاهرة واسمي
واني لو جيت يقولوا اجنبي مسكناه
مسكنا واحد اهو له مديح في حزب الله
يتهموا اصحابي بيا مش انا بيهم
واضر لي ستة سبعة اكون في وسطيهم
ع بال ما خلص الكلام ده النصر كان مضمون
القلب فرحان ولكن اتعبه منفاه
وهده بعده عن اللي عاش بيستناه
ما فضلش غير انحني حبا واقول الله
الله افردني عنهم وجمعهم
لكي اراهم على بعد واسمعهم
قد فاز فوزا عظيما من قضى معهم


لما تشوف الشهيد تبقى السلامة خجل
وتبقى عايز تقول له يا أخى آسف
طب قول لى بس اعمل ايه، لو يعنى فيها عمل
اللقمة دى لك نصيب فيها باشيلهولك
واشيل نصيبك من القاعدة وكاسات الشاى
لكن نصيبك فى أنفاسى أشيله إزاى
وازاى أشيللك نصيبك من فرحنا الجاى
ساعات ألاقينى باطلب خط محمولك
بعمل فى نفسى كده ليه، لسه مش عارف
وروح على القهوة أسأل، هو جه وسأل
من قال لك الموت طبيعى يبقى مش شايف
الموت ده شىء مش طبيعى الموت ده أصله خلل
الأصل فينا الخلود وهييجى يوم نلقاه
ما تحسبوش الشهيد اداكوا بس حياة
ما موتوش هو وحده اللى برصاصة رماه
ده طخ ابنه اللى لسه ما اتولدش معاه
وطخ أولاد ولاده لآخر الأيام
موت معاه بشرية كاملة محتملة
عدوا بقى فيها كام شاعر وكام رسام
وكام طبيب عبقرى بين الأطبة إمام
وفيلسوف له على حكم الليالى كلام
وبنت نظرتها تشفى القلب من داؤه
فى شعب كامل رحل ما عرفش أسماؤه
في جسم كل شهيد فيه مصر مكتملة
فخلوا مصر اللى فاضلة تعيش كما شاؤوا

نحن لانزرع المكرونه ..