الاثنين، أغسطس 29، 2011

كل سنة و انتم طيبين - الحج وحشني

كل سنة و انتم طيبين و عيد سعيد إن شاء الله على المسلمين جميعاً
مش عارف ليه بعد ما رمضان خلص إفتكرت الحج و قررت أنشر صور حجة 1430 هـ اللي عملتها من سنتين بدون تصريح حج لإني كنت حاجج السنة اللي قبلها 
تفاصيل الحج 1تفاصيل الحج 2
آدي الصور على الفيس بوك
http://t.co/QwE8xqf
و ربنا يكتب لنا الحج جميعاً

الجمعة، أغسطس 12، 2011

غريب على الحدود

السلام عليكم
أنا إتنقلت من شغلي في حائل لشغل تاني في مدينة رفحاء على الحدود السعودية العراقية في أقصى شمال السعودية و منسوب البلد هنا حوالي 450 م فوق سطح البحر يعني أوطى من منسوب حائل بحوالي 400 م فده زود إحساسي بالحر كتير رغم إن البلد هنا في قلب الصحراء يعني الرطوبة فيها عادية مش زي المدن اللي على الخليج و لا البحر الأحمر بس برضه حر شديد
أنا فهمت دلوقت ليه أهل السعودية كانوا بيعتبروا حائل مصيف لإن جوها لا يقارن بجو هنا و بقيت حاسس دلوقت نفس إحساس الجنود الأمريكان بالحر في صحراء العراق اللي ما نبعدش عن حدودها أكثر من 35 كم
النقل جه مفاجئ فحصلت دربكة كتير فيه و إضطريت أول ما وصلت إني أؤجر شقة و أفرشها في 4 أيام بس لإن الفندق كان غالي جداًً
مفيش هنا سكن مفروش رخيص زي حائل فلازم تأجر إنت سكن عادي و تفرشه و المشكلة إن هنا مفيش معايا سيارة ( عربية ) زي الشغل اللي فات فدايخ على رجليا بالإعتماد على بعض الزملاء اللي معاهم عربيات طبعاً و المصيبة إن البلد دي زي غيرها من بلاد السعودية لا يوجد فيها تاكسيات و لا مواصلات عامة من اي نوع فيا إما يكون معاك سيارتك او تمشي على رجليك و مفيش أي حلول وسط
البلد صغيرة نوعاً ما و تحسها أقرب لقرية كبيرة و تحس فيها بإحساس المنفي على الحدود بجد و أظن رفح او السلوم أو حتى حلايب مش حيفرقوا كتير عن هنا :) بس أظنهم عمرانين شوية عن هنا
بيقولوا هنا تعداد السكان 40 ألف نسمة فقط :) و المدينة طولها 6 كم و عرضها 3 كم و الغالبية الساحقة لمبانيها لا تزيد عن دورين أرضي و أول علوي
اللي اتبهدلت معايا كتير في النقل هي زوجتي و أنا غلطان إني ما سمعتش نصيحة اللي طلبوا مني أرجعها مصر شهر أو شهرين لحد ما دربكة النقل و فرش الشقة هنا تخلص
يالا أهو الواحد بيتعلم و كلها خبرات نستفيد منها في النقل الجاي إن شاء الله
الحِرَاج هنا ( سوق الأثاث المستعمل ) صغير و فقير نوعاً و الخيارات فيه محدودة و ده زود صعوبة فرش الشقة و خلى الواحد قرفان من النقل و الفرش و لكن الحمد لله عدينا مرحلة القرف الأولية دي :)
معنديش نت هنا لغاية دلوقت و ده خلاني مقطوع الصلة بالدنيا و حاسس إني زي السمكة بره المياه لكن حأحاول أدخله في خلال شهر و لا حاجة لإن فيه اولويات كتير في الفرش قبله
رمضان كريم عليكم جميعاً و كل سنة و انتم طيبين و دعواتكم ليا ربنا يوفقني في غربتي