الثلاثاء، مايو 28، 2013

موقع لحملة تمرد يسرق توقيعي السابق على إستمارة التغيير للبرادعي في 2010

بدأ الموضوع بقراءتي للخبر ده
بالمستندات "تمرد" تسرق آلاف التوقيعات من قاعدة بيانات قديمة 

فشكيت إن ممكن يكون حصل مع توقيعي نفس الموضوع و بدأت البحث في جوجل عن اسمي الرباعي و دي نتيجة البحث 

و كانت النتيجة إني لقيت إسمي فعلاً من ضمن الموقعين على حملة تمرد :(
و لما فتحت الموقع لقيته إتحذف و طلعت لي الرسالة دي


لكن ببساطة دخلت النسخة المخبأة للصفحة على جوجل و كانت النتيجة إني لقيت توقيعي ده برقم 2108 في الصفحة رقم 34 للتوقيعات



فطبيعي بعدها دورت على توقيعي في الجمعية الوطنية للتغيير مع البرادعي في 2010 فلقيت الموقع إتحذف برضه بس من مدة فملوش نسخة مخبأة في جوجل لكن بالبحث وجدت نسخة مخبأة في موقع تاني 



و برضه توقيعي برقم 2108 في الصفحة رقم 34 للتوقيعات
يعني إجمالاً التوقيعات مسروقة بالمسطرة من حملة الجمعية الوطنية للتغيير في 2010 اللي كانت ضد مبارك و كانت جمعت حوالي مليون توقيع  
و من ضمن الزيطة برضه اللي بيزيطوا بيها بتوع تمرد على النت لقيت الأسماء متآخدة نسخ و لصق في منتدى إسمه غلاسة :)
على أساس إن كل دول الرافضين لمحمد مرسي في محافظة القاهرة بس




صحيح شر البلية ما يضحك :D
الحملة بتاعة تمرد حملة هابلة و كفاية انهم بيعترفوا انهم بيوقعوا أكتر من مرة و إذا كانوا هما بيشككوا في إنتخابات بالرقم القومي و تحت رقابة القضاء و الإعلام و المجتمع المدني و الرقابة الدولية و الفرز بيتم في اللجان الفرعية و تعلن نتائجها رسمياً من داخلها و تعطى نسخة رسمية من النتيجة لمندوب كل مرشح
يبقى طبيعي إني أشكك و أرفض أي عدد توقيعات هما يجمعوه لإنهم شغالين بدون أي ضمانات على صحة التوقيعات اللي معاهم بل و إتضح سرقة بعضها أهوه و منهم توقيعي الشخصي

بطلوا لعب عيال و إدخلوا الإنتخابات و ركزوا في إنتقاد العيوب الحقيقية لمحمد مرسي و محاولة تقويمه مش خلعه

اللهم إحفظ أمن مصر و ثورتها من كل مخرب و مزور و متثورج ليسترزق من الثورة و لو بالبلطجة و المولوتوف
و حسبي الله و نعم الوكيل في كل مزور و مخرب و بلطجي و ثورجي بالأجرة او علشان حب الشهرة
و ربنا يهدي النشطاء الحقيقيين اللي شايف إن مثاليتهم الثورية المبالغ فيها حتهدم الثورة و البلد

هناك تعليق واحد:

مجداوية يقول...

المفروض يتحاكموا على التزوير واستغلال توقيعات والتعدي على الخصوصية , بس الكلام ده لو البلد فيها قضاء محترم ونيابة محترمة واعلام محترم , لكن معظمهم نصابين زيهم ,أنا كمان اسمي لقيته وأنا موقعتش !!! حسبنا الله ونعم الوكيل