الاثنين، يونيو 24، 2013

رأيي في الوضع الحالي قبل 30-6

موقفي باختصار يا جماعة أنا معارض لأخطاء مرسي و لن انتخب أبداً حزب الحرية و العدالة تاني في أي انتخابات و غالباً سأنتخب الوسط او الراية
و مرسي لن اقيمه إلا بعد نهاية الـ 4 سنين و على حسب انجازاته و على حسب برامج المرشحين قصاده وقتها حأحدد اختياري
أنا مع إجراء انتخابات مجلس الشعب و الشورى و المحليات بأقصى سرعة للخروج من الدوامة الزفت اللي المحكمة الدستورية الواطية زنقانا فيها
لكن انا ضد خلعه قبل انتهاء مدته لأن كده البلد حتبقى فوضى و المكسب الوحيد اللي كسبناه من الثورة ( الانتخابات النزيهة ) حيضيع و مش حيرجع تاني
و ساعتها حنلبس في حاجة من3 
1- ثورة اسلامية جهادية متطرفة
2- حرب اهلية طويلة أكبر من الجزائر و العراق و لبنان
3- سيطرة علمانية مستبدة مع اعتقال كل الإسلاميين و مؤيديهم في السجون و عودة مباحث امن الدولة و التعذيب و التنكيل بالمعارضة و عودة الاستبداد أسوء مما كان

و ساعتها تبقى الثورة ضاعت و ضاع معاها الأمل في العدل و الإصلاح و التقدم بالبلد

فيه 3 وسائل دستورية و قانونية لخلع مرسي أمام المعارضة
1- تكسب أكتر من نصف البرلمان و ترفض تشكيل الحكومة 3 مرات متتالية فيضطر يعمل استفتاء على حل مجلس الشعب فالشعب اللي انتخبها يرفض فساعتها يجبر مرسي دستورياً على الاستقالة
2- تكسب اكتر من ثلثين البرلمان و ساعتها تحاكم مرسي طبقاً للدستور و يعزل من منصبه مؤقتاً حتى نهاية المحاكمة و يحل محله رئيس الوزراء اللي هي حتعينه من الأغلبية بتاعتها
3- تنتظر نهاية مدة مرسي بعد 3 سنين و تهزمه في الانتخابات الرئاسية و بعد ما يخسر و يبقى مواطن عادي تحاكمه على كل ما تتهمه به في الـ 4 سنين بتوع حكمه

غير كده يبقى عايزين البلد تبقى فوضى و تولع حريقة


هناك 3 تعليقات:

mado80 يقول...

انا مع الرأي ده برضه جدا ،مرسي للاسف اخطائه قاتله هي اللي وصلت البلد لكده ،عنده سوء تقدير وسوء اختيار توقيت قراراته وممكن تقول وتقول زي ما انت عاوز بس خلعه او عدم تركه يكمل مدته هتبقى مصيبه للبلد
كمان الناس مفكره الاخوان زي شله منتفعين الحزب الوطني الاخوان على الرغم من كل اللي عليها متغلغله داخل المجتمع بمعني هتلاقي دكتور الجامعه المهندس الطالب الفلاح صعب يعني فصيل زي ده تمسحه مسح من الحياه السياسيه لازم صيغه توافق تتفق عليها جميع القوى السياسيه الموجوده ولازم الكل يتنازل لان اللي موصلنا للي احنا فيه ده هو لﻷسف عناد من الطرفين
وربنا يستر ويصلح حال مصر ان شاء الله

يا مراكبي يقول...

أي مصري متعقل لازم يكون فاهم ان خلع الرئيس المنتخب عن طريق ثورة جديدة ده أمر خطير وهيفتح الطريق للفوضى

لكن في نفس الوقت الكلام ده مش لازم يكون مبرر للرئيس انه يتمادى في طريقة حكمه الحالية .. وهي طريقة خاطئة ونتائجها واضحة

لأنه استمراريته بنفس الطريقة الإقصائية المنعدمة الرؤية المثيرة للمشاكل باستمرار وانعدام فقه الأولويات لديه هيخلي الأمور دائماً على صفيح ساخن وسيجد نفسه غير قادر على التركيز على الحكم الرشيد لأنه ستكون في كل يوم مصيبة عليه أن يحتويها

محمد قنديل يقول...

مادو 80
========
ربنا يستر

يا مراكبي
==========
أنا أعيب عليه تأخره في تطهير القضاء و الداخلية
كان المفروض يستغل الوقت اللي كانت سلطة التشريع معاه بإعلان دستوري تطهيري و بحزمة قوانين ثورية

دلوقت كبل نفسه بالدستور و التشريع من مجلس الشورى اللي المعارضة واقفة في زوره و حط نفسه تحت ضرس المحكمة الدستورية الواطية و بقى الموضوع أصعب بكتير بعد ما فقد شعبية كبيرة لتأخره في التطهير
ربنا يستر